Diosan Arup telefonot yatiyaraksnawa
1. ¿Kunatsa Diosan Arup telefonot yatiyañax wali wakiskirixa?
1 ¿Kunatsa Diosan Arup telefonot yatiyañax wali wakiskirixa? Kunattix Diosan chiqa yatichäwip uñtʼañwa jaqinakar yanaptʼañäni, ukhamat qhispiyasiñ jikxatapxani (2 Ped. 3:9). Chiqas utat utatpunwa Diosan Arup yatiytanxa, ukampis jan utankapki jupanakar yatiyañ munaraktanwa, ukatwa kunaymanit yatiytanxa (Mat. 24:14; Luc. 10:1-7; Rev. 14:6).
2. ¿Telefonot yatiyañatakix kunjamsa wakichasi?
2 ¿Kunjamsa wakichasi? Kunjamtï utat uta yatiyañatakix kawkhansa yatiyasini uk wakichaskixa ukhamarakiw telefonot yatiyañatakix wakichasi. Ukhamaxa telefonot yatiyañatakix kawkhans yatiyasma uk mayirakismawa, ukat sapakisa maynimpi jan ukax paninimpis yatiyarakismawa. Kawkhattï telefonot yatiykäta uka chiqax chʼujukïñapawa. Yaqhip jilat kullakanakaxa, libronaka ukat kunanaks utat uta yatiyañatak apasipxi ukanakwa mesa patar apnuqtʼasipxi.
3. ¿Telefonot yatiykasax kuns lurañasa?
3 ¿Kuna tuqitsa ukat kunjamsa parläta? Ukatakixa, Diosan Apnaqäwipat Yatiyañataki, Razonamiento libro ukat ¿Kunatï chiqäki uk yatiñ munasmati? uka qillqatanakanwa kuna tuqitsa parlasma uk jikxatäta. Kuna tuqitsa parltʼäta ukwa nayraqat ajlliñama ukat kuns jisktʼasma ukwa amuytʼañama, ukxaruxa Bibliat apstʼat kawkïr tʼaqanakas uka jisktʼar qhanañchi ukwa ajlliñamaraki. Kawkïr qillqatampis utat uta yatiyasiski uka qillqatanakampiw telefonot yatiyasiraki. Telefonot yatiykasaxa jupamp jikisisas parltʼkasma ukhamwa parltʼañama. Inas maynix telefonot jan yatiyirïkchïnti ukatwa qillqtʼasitapat liytʼaspa, ukampis liytʼatapax parltʼkaspas ukhamäñapawa. Ukat akanak amtañamarakiwa: jan axsarayasimti ukat janirak jankʼaki parlarpayamti. Jan ukasti respetompi, pacienciampi ukat llampʼu chuymamp parlañamawa, ukxa khitimpitï parlkta ukax umayaniwa. Kuntï siskätam uk sum istʼañamawa ukat uka arsutamax walikiwa sañamarakiwa. Qullqimp yanaptʼañ munirinakan churäwinakapampiw aka yatichäwix apasi sasin janiw sañamäkiti, kunattix telefonot jawsasas aljañ munksna ukhamwa amuyaspa.
4. ¿Diosan Arup telefonot yatiyasax khitinakampis parlsna?
4 ¿Telefonot Diosan Arup yatiykasax khitinakampis parlsna? Inas maynix usutäsa utat jan misturjamäkchi jan ukax irnaqäwipan jikxatasitapat utat uta yatiykasax jan jikxatkstanti ukanakaruw parlsna. Ukat yaqhip jachʼa altus utanakarux janiw mantayapkistuti ukat yaqhip utanakax jarkʼatarakiwa. Ukhamax Diosan Arup telefonot yatiyañatak chʼamachtʼasiñäni, ukhamatwa taqinir suma yatiyäwinak phuqatpach yatiyarakiñäni.