Walja jaqenak utjki uka cheqanakan yatiyañatak machaq wakichäwinaka
1. ¿Kunjamanakatsa nayrïr cristianonakajj yatiyapjjerïna?
1 Nayrïr patak maranakanjja, cristianonakajj utat uta ukat walja jaqenak utjki uka cheqanakan yatiyapjjerïna (Hech. 20:20). Amtañäni; jupanakajj temploruw sarapjjerïna, kunattejj ukan walja jaqenak utjatap sum yatipjjäna (Hech. 5:42). Ukat Atenas markan kawkïr qhatutï utjkän uka plazanwa apóstol Pablojj sapür yatiyirïna (Hech. 17:17). Jichhürunakanjja, suma yatiyäwinak yatiyañatakejj ukhamarakiw utat uta yatiytanjja. Ukat auto sayayañanakana, negocionakana, parquenakana, ukat kawkhantï walja jaqenakajj utjki uka cheqanakans yatiyaraktanwa. Cheqansa, walja jaqenak utjki uka cheqanakan yatiyañatak wals chʼamañchapkchistojja, jichhajj waljaniw pä machaq aski wakichäwinakan yanaptʼaraksna. Kunanakas uk jichhajj yatjjatañäni.
2. ¿Kuna aski wakichäwimpis 2011 maran noviembre phajjsin qalltasiwayi?
2 Wakiskir wakichäwi, walja jaqenak utjki uka cheqanakan yatiyaña. Kunjamtï Anuario 2013 qellqatan 16 ukat 17 jananakan qhanañchaskejja, 2011 maran noviembre phajjsin kawkhantï walja jaqenakajj utjki uka cheqanakan Nueva York (Estados Unidos) markan yatiyañajj qalltasiwayi. Cheqas kawkhantï walja jaqenak sarnaqapki ukhanwa mesanaka, suma lurtʼat letreronaka, walja arunakat Bibliat apstʼat qellqatanaka ukat yaqha ukhamanakamp uttʼayawayapjje. Ukat waljanirakiw ukanak uñjapjjarakïna, sañäni: jachʼa edificionakan jakirinaka ukat jan mantañjamäki uka utanakan jakirinakas uñjapjjarakïnwa. Jïsa, walja askinakaw jikjjatasiwayi. Mä phajjsinakwa 3.797 revistanaka ukat 7.986 libronakajj lakirasiwayi. Ukat waljanirakiw ‘Bibliat yatichapjjeta’ sasin sapjjarakïna. Niyakejjay uka amtamp taqe ukanakajj lurasiwaychejja, Bibliat yateqañ munirinakajj kawkhans jakapjje, kuna sutinipjjesa, taqe ukanakwa kawkhantï jakapki uka tamanakar apayjjapjjäna, ukhamat mä jilata jan ukajj mä kullaka visittʼañapataki.
3. ¿Kunjamsa aka suma wakichäwejj Oraqpachan lurasiñapatak chʼamachasiski?
3 Uka wakichäwimpejj walja askinakaw jikjjatasiwayi, ukatwa Oraqpachan kawkhantï walja jaqenak utjki uka cheqanakan ukham lurasiñapatak qalltasiwayi. Ukat kawkhansa yatiyañajj wakisispa uk sucursalaw ajllirakini. Ukatakejj kawkïr markanakantï walja jaqenak sarnaqapki ukarjamaw sucursalajj ajllispa, sañäni: walja autonak utjatapata, oficinanakani jachʼa edificionak utjatapata jan ukajj jakañatak walja utanak utjatapata. Ukat yatiyapkani uka jilat kullakanakarojj kunjamsa yatiyasini ukanakjja sucursalarakiw qhanañchi. Ukatakejj precursor especialjam jan ukajj regularjam irnaqapki ukanakaruw ajllisispa, ukat precursor auxiliaranakajj yanaptʼapjjarakispawa.
4. ¿Kunjamsa uka suma wakichäwinkirinakajj yatiyapjje?
4 Aka wakichäwejj kunjamsa apasi. Precursor regular jilat kullakanakajj mesapar jakʼachasinipjjañapwa suyapjje, ukat qellqatanak utjki uk apasipjjañapatakiw jaqenakar chʼamañchtʼapjje. Jisktʼanakanïpjjchi ukhajj Bibliampipuniw qhanañchapjje. Ukat maynitï mä qellqatanïñ munchejja, kunjamsa qollqemp yanaptʼasispa uk janiw sapkiti. Ukampis ¿kunjamsa qollqemp yanaptʼasipjjta? sasin jisktʼirinakarojj pachpa revista uñachtʼayasin kunjamsa qollqemp yanaptʼaspa uk qhanañchapjjaraki. Ukat wakisirjamächi ukhajja, “¿Utaman maynimp visittʼayasiñ munasmati?” jan ukajj “¿Bibliat yateqañ munasmati?”, sasaw jisktʼapjje.
5. ¿Kamsapjjes mä chacha warmejj uka suma wakichäwitjja?
5 Aka suma wakichäwin yanaptʼañajj wali askipuniwa. Mä casarat chacha warmejj akham sasaw qellqanipjjatayna: “Yatiyañatak wakichaski ukankkasajj walja jaqenakar jut sarir uñjasajj qawqsa taqe Oraqpachankir jaqenakar yatiyasiñapatak chʼamachasitäski uk sum amuyapjjta. Cheqas Jehová Diosajj uka jaqenakar wal yanaptʼañ muni, ukatwa jakäwisan yatiyir sarañajj nayrankañapapuni. Ukat jaqenakar mesa nayraqatan jut sarir uñjasajj Jehová Diosas jupanakan chuymap uñjkaspa ukat arunakap katoqapjjanit janicha uks sum yatjjarakpacha sasaw amuyapjjta. Janipuniw angelanakan yanapap ukham jakʼat uñjapjjerïkti” sasa.
6. 1) Walja jaqenak utjki uka cheqanakan yatiyañajj ¿kunjamsa tamanakan apasiski, ukat maynïrit kunans jan pachpäki? 2) Walja jaqenak utjki uka cheqanakan yatiyañatakejj ¿kunatsa tamanakajj purapat yanaptʼasipjjañapa?
6 Walja jaqenak utjki uka cheqanakan yatiyañatak taman wakichäwi. Maysa toqetsti aka suma wakichäwejj tamanakanwa qalltasiraki, ukat ukjja irpir chuymaninakaw sarayapjjaraki. Ukanjja, jilat kullakanakajj pachpa territoriopan kawkhantï walja jaqenak utjki uka cheqanakan qellqatanak uchañatak mesanak uttʼayapjje. Ukat maynïr wakichäwitjja, aka wakichäwinjja walja tamanakaw kawkïr cheqtï sucursalajj ajlliwayki ukan yatiyapjjaspa (“Purapat yanaptʼasiñaw wakisi” siski uk uñjjattʼäta).
7. Irpir chuymaninakatï walja jaqenak utjki uka cheqanakan yatiyasiñap amtapjjani ukhajj ¿kunjams lurapjjani?
7 ¿Kawkhantï tamajj yatiyki uka cheqanakan walja sarnaqer jaqenakajj utjiti? ¿Wakisispati aka suma wakichäwi qalltañajja? Taqe ukanakjja, irpir chuymaninakaw amuytʼjjapjjañapa. Inas qellqatanaka uchañatak mesanak auto sayayañanakana, plazanakana, parquenakana, callenakana, jachʼa tiendanakana, universidadanakana, aeropuertonakana ukat sapa mara tantachäwinak apapki uka cheqanakan uttʼayañ wakischispa. Ukat qellqatanak uchañatak mesajj wakisirakispaw pachpa urunaka, pachpa horasaraki ukat pachpa cheqan uchañajja. Maysa toqetjja, tienda jakʼanakan mesa uttʼayañ janiw wakiskiti kunattejj ukar mä rat altʼasirikiw jaqenakajj sarapjje, antisas jachʼa tienda manqhanakanwa mesa uttʼayañ wakisispa. Ukat acerantï (vereda) walja jaqenak sarnaqapjjchejja, mä mesa uchaskañat sipansa, mä jiskʼa nuknaqañ carritokwa qellqatanak uskusiñapatak uchasispa. ¿Kunjamas taqe ukanakajj lurasispa?, ukatakejj walja archivonak wakichawayapjje, ukanwa kunjamsa suma letreronak (carteles) lurasipa uk qhanañchi. Cheqas uka letreronakajj Yatiyañataki, ¡Despertad! ukat Kunsa yatichi sat qellqatanak qhanañchi, ukatakejj irpir chuymaninakaw uka archivonak Internetat apaqapjjaspa. Kawkïr precursoranaktï ukat jilat kullakanaktï irpir chuymaninakajj ajllipki ukanakajja, walja jaqenak utjki uka cheqanakan yatiyapki uka jilat kullakanakjamarakiw lurapjjañaparaki, ukat yatiyañ toqet irpir chuymanin ewjjtʼanakaparjamaw lurapjjarakini. Ukat kunaratutï maynejj Bibliat jukʼamp yatjjatañ munchi ukampis taman territoriopat yaqha cheqankchejja, Sírvase visitar (S-43) sat formulariow jankʼak qellqantapjje, ukat secretario jilataruw churjjapjjaraki.
8. Walja jaqenak utjki uka cheqanakan yatiyaña sat wakichäwitï tamaman jan apaskchinejja, ¿kunjamanakatsa aka wakichäwin yanaptʼasma?
8 Walja jaqenak utjki uka cheqanakan yatiyaña sat wakichäwin ¿yanaptʼasmati? Yaqhep cheqanakan janiw aka suma wakichäwi apañjamäkiti, kunattejj janiw mä cheqan walja jaqenak sarnaqer utjkiti. Tamamatï ukhaman uñjaschejja, Diosan arunakap yatiykasin aka suma wakichäwin yanaptʼarakismawa. ¿Yatiykta uka cheqanakan utjiti; jiskʼa ukat jachʼa tiendanaka, plazanaka jan ukajj yaqha ukhamanaka? Maysa toqetjja, ¿sapa mara mä cheqan jaqenakajj tantachasipjjeti? Ukhamächi ukhajja, ukanakan yatiykasaw aka suma wakichäwin yanaptʼasma.
9. ¿Kawkhanakanjjay jaqenakajj jikjjatasipchini ukhanakan kunatsa yatiyañatak chʼamachasiñasa?
9 Jehová Diosajj “taqenin qhespiyatäñapwa muni, kunatejj cheqäki uk uñtʼapjjañaparaki” (1 Tim. 2:4). Ukhamajj janïr akapach tukusïwip purinkipanjja, Diosan Reinopat suma yatiyäwinak taqeniruw yatiyañ muntanjja (Mat. 24:14). Awisajj janiw jaqenakarojj utanakapan jikjjatañjamäkiti, ukampis walja jaqenak utjki uka cheqanakan yatiyasajj inas jikjjataraksna. Ukhamatakwa Diosan suma yatiyäwinakap istʼapjjaspa. Jïsa, kawkhankchiñänisa jaqenakar yatiyasipkakiñäni ukhamatwa kuntï ‘lurañasäki uk sum phoqhañäni’ (2 Tim. 4:5).
[5 janan recuadropa]
Purapat yanaptʼasiñaw wakisi
Awisajj walja tamanakat jilat kullakanakaw pachpa cheqanakan yatiyapjje, sañäni: auto sayayañanakana, negocionakana ukat yaqha ukhamanakana. Maysa toqetsti jan pachpa tamankir jilat kullakanakaw pachpa jaqenakaru, aljirinakaru revistanak jaytapjje. Inas jilat kullakanakajj yaqha horasanakan ukham lurapjjchi, ukampis jaqenakajj mayjtʼasipjjaspawa. Ukhamajj walja jaqenak utjki uka cheqanakan yatiykasajj kawkhakamatï tamasajj yatiyki ukhakamakiw yatiyañasa.
Jilat kullakanakatï yaqha taman territoriopan yatiyañ munapjjchejja, tamapan utjki uka yatiyañ toqet irpir chuymanimpiw nayraqat parltʼapjjañapa. Ukat uka cheqan yatiyasispati janicha jupaw uka yaqha tamankir yatiyañ toqet irpir chuymanimp parljjarakini. Ukat mä territoriontï walja arunakat yatiyaschejja, yatiyañ toqet irpir chuymaninakajj purapat sum yanaptʼasipjjañapa, ukhamat jaqenakajj jilat kullakanakamp jan mayjtʼasipjjañapataki. Ukhamatwa ‘taqe kunas sum lurasini maynit maynikam’ yanaptʼasisa (1 Cor. 14:40).
[6 janan fotopa]
[6 janan fotopa]