Walja jaqenak utjki uka cheqanakan yatiyañajj wali askipuniwa
1. ¿Kun lurapjjañapatakis walja tamanakar chʼamañchasiwayi?
1 Yaqhep cheqanakan walja jaqenakaw sarnaqapjje, ukham territorionïpki uka tamanakarojja, mesanakaru jan ukajj nuknaqañ carritonakaru qellqatanak uchas uka cheqanakan yatiyapjjañapatakiw chʼamachasiwayi. Nuknaqañ carritonakampi yatiyapjjanejja, maynikis ukankañapapuniwa, jupajj qontʼasispawa jan ukajj saytʼasispawa. Mesar qellqatanak uchas yatiyapjjanejja, paniniw ukankapjjañapa. Jupanakajj munasiñampi ukat kusisitaw yatiyapjjañapa. Khitis jakʼachasinini ukhajja, maynïriw akham sas parlañ qalltaspa: “Aka yatichäwit Bibliajj kamspachas ¿uk jisktʼasirïtati?” sasa. Uka jakʼanjja, maya jan ukajj pä jilat kullakanakajja yatiyapjjarakispawa, ukhamat uknam pasasipki uka jaqenakar yatiyapjjañapataki.
2. Walja jaqenakajj utjki uka cheqanakan yatiykasajj kuna experiencias utjawayi uk qhanañchtʼma.
2 Ukham yatiyatasatjja, walja jaqenakaw Bibliat yateqañ qalltawayapjje. Universidadan yateqer mä tawaqojja, Jehová Diosan Qhanañchirinakapat qellqañ munäna, ukampis janiw mä Tantachasiñ Utsa jikjjatkänti. Mä semanatjja, mesan qellqatanak uchasa Diosan arunakapat yatiyirwa universidadan uñjatayna. Ukhamatwa Bibliat yateqañ qalltäna. Jichhajj bautisatäjjewa, kawkhanakantï walja jaqenak utjki uka cheqanakanwa yatiyjjaraki.
3. Walja jaqenakajj utjki uka cheqanakan yatiyapki uka jilat kullakanakajj ¿kamsapjjesa?
3 Walja jaqenak utjki uka cheqanakan yatiyir mä kullakajj akham siwa: “Uka phajjsin mistki uka revistanak apasiñatakiw yaqhepajj jakʼachasinipjje. Yaqhepasti janipuniw Jehová Diosan Qhanañchirinakapat parlir istʼapjjerïkataynati. Ukham yatiyatasatjja, waljaniw Diosan arunakapat istʼapjjaspa” sasa. Yaqha kullakajj akham sarakiwa: “Diosan arunakapat janis ukham yatiyirïkstanjja, kusiskañawa, aleq yatiñatakisa jaqenakaw juman ukarojj jutapjje” sasa.
4. Qellqatanak uchañatak mesajj ¿kunatsa pachpa urunaka, pachpa horasaru ukat pachpa cheqan uchañajj wakisispa?
4 Cheqas qellqatanak uchañatak mesajja, pachpa urunaka, pachpa horasaru ukat pachpa cheqan uchañaw wakisi. Ukhamatwa jaqenakajj yatjjasinjja, jisktʼasiñatakisa jan ukajj Bibliat apstʼat qellqatanak mayiñatakis jakʼachasinipjjaspa. ¿Tamamajj ukham yatiyañatak amtaskiti? Walja jaqenakajj utjki uka cheqanakan “Diosan reinopat” ¡yatiyañatak chʼamachasirakim! (Luc. 9:60.)