Thakinsa callenakansa yatiyañax wali askiwa
1. ¿Kunjamatsa Jesusat yatiqassna?
1 Jesucristox aka Uraqinkkäna ukhaxa, thakinakansa ukat yaqha chiqanakansa jaqinakarux yatiyapunïnwa (Luc. 9:57-61; Juan 4:7). Jesusax wakiskir yatichäwinakapxa, taqinir yatiyañatakiw chʼamachasïna. Jichhürunakanxa, thakinsa ukat callenakansa Diosan arunakap jaqinakan yatipxañapataki yatiyañax wali askiwa (Pro. 1:20). Ukham yatiykasin askinak jikxatañatakixa, jiwasaw nayraqat parlañ qalltañasa ukat sumwa amuytʼasiñasaraki.
2. Thakina jan ukax callenakan yatiykasaxa, ¿kunatsa nayraqat jiwasan parlañ qalltañax wakisi?
2 Nayraqat jiwasaw parlañ qalltañasa. Jaqinakax jiwasan ukar jutapxañapatak quntʼat suyañat sipansa, jiwasaw jikxatasin parlañ qalltañasa. Kusisitaw uñkattʼañasa ukat suma arunakampiw parltʼañasa. Ukat yaqha jilatampis jan ukax kullakampis sarañäni ukhaxa, sapak jikxattʼañaw wakisispa. Maynitï Bibliat yatiqañ munirjamächi ukhaxa, yatiqañ munaskakiñapatakix jiwasaw arxayañasa. Wakisirjamäni ukhaxa, parlañ tukuyxasaw kunjamsa wasitampi jupamp jikissna uk jisktʼañasa. Yaqhip jilat kullakanakaxa pachpa thakina jan ukax callenakanwa yatiyapxi, ukhamatwa sapa kuti pachpa jaqinakamp jikisipxi ukat Bibliat yatiqapxañapatak chʼamañchtʼapxi.
3. Thakina ukat callenakan yatiykasinxa, ¿kunjamatsa amuytʼasirïtas uñachtʼaysna?
3 Sum amuytʼasipxañäni. Kawkinsa yatiyañäni ukat khitirus parltʼañäni uk sumwa amuyañasa. Janiw taqi khitinakatï paski ukanakar yatiyañax wakiskiti. Suma amuytʼasirïñasawa. Sañäni, maynitï laq saraskchi ukhax jupar parlxayañax janiw wakiskaspati. Aljasisipki ukawjantï yatiyaskstan ukhaxa, aljasirin jan majtʼasiñapatakix sumwa amuytʼasiñasa. Janiw alasir mantapki ukhax parlxayañax wakiskaspati, jan ukasti mistsunxapxi ukhaw parlañ wakisispa. Janiw sustjirjam jakʼachasiñasäkiti. Ukat kuna qillqatanaksa churañäni uks amuytʼasirakiñasawa. Maynitï Bibliat jan yatiqañ munirjamäkchi ukhaxa, revistanak churañat sipansa mä tratado churañaw wakisispa.
4. ¿Kunatsa thakina ukat callenakan yatiyañax wali askixa?
4 Thakina ukat callenakan yatiykasaxa jukʼa tiemponakwa walja jaqinakar chiqa yatichäwinakamp purtʼsna (Ecl. 11:6). Khitinakampitï parlkañäni ukanakaxa inas utat uta sarasin jan jikxatktan ukanakäpxchi. ¿Janit jumax ukham yatiyañataki chʼamachasirakisma? Kunattix ukax wali askiwa ukat askinakwa jikxataraksna.