Yatiykasajj jan ina chʼusar tiempo aptʼapjjañäniti
Pasïr 2013 maran septiembre phajjsit 2014 agosto phajjsikamajj 1.945.487.604 ukha horanakwa yatiyawaytanjja. Ukajj Diosar jukʼamp serviñ munataswa uñachtʼayi (Sal. 110:3 NM; 1 Cor. 15:58). Cheqas “jukʼa tiempokiw utj-jjestu”, ukhamajj jan ina chʼusar tiempo aptʼañataki chʼamachasipjjañäni, ukhamatwa walja jaqenakar yatiyapjjañäni (1 Cor. 7:29).
Yatiykas tiempo jan ina chʼusar aptʼañatakejja, horarios mayjtʼayañ wakischi ukhajj mayjtʼayañasawa. Sañäni, Diosan arunakap kunaymanit yatiykasajja, inas mä hora jan ukajj jukʼampi jila horanak janipun khitimpis parlkstanjja, ¿kun lurañasäspasa? Territorionakajj mayj mayjawa, aka ewjjtʼanakajj inas tiempo jan ina chʼusar aptʼañatak yanaptʼchistaspa, ukhamatwa chʼamachasitasajj jan inamayäkaniti (1 Cor. 9:26).
Utat uta yatiykasa. Yatiyirinakajj nayratpachaw utat uta yatiyasajj qalltapjjerïna. Niyakejjay walja jaqenakajj urojj trabajir sarapjjchejja, ¿janit jaypʼu toqeru jan ukajj arum toqeru utat uta yatiyañajj wakiskaspa? Uka horanakajj utankjjapjjewa ukat tiemponïpjjarakiwa. Maysa toqetjja alwanakajj callenakana jan ukajj qhatunakan yatiyañaw walirakïspa.
Walja jaqenak utjki ukawjan yatiykasa. Mesanakas ukat nuknaqañ carritonakas walja jaqenak sarnaqki ukawjanakaruw uchasiñapa, ukampis territoriosankañapawa (Diosan Apnaqäwipat Yatiyañataki, julio 2013, 5 jana uñjjattʼäta). Ukawjantï jaqenakajj jan sinti utj-jjchejja, Taman Irpir Chuymaninakat Pʼeqtʼirinakaw walja jaqenak sarnaqki uka cheqar jittayañ amtapjjaspa.
Revisitanak lurkasa, Bibliat yatichkasa. Utat uta yatiykasa jan ukajj walja jaqenak utjki uka cheqanakan yatiykasajja, awisajj janiw askinak jikjjatktanti. ¿Janit uka horasanakajj revisitanakaru jan ukajj Bibliat yatichir sarañajj wakiskaspa? Sañäni, sábado alwanakatï utat uta yatiyañajj waljamänejja, ¿janit jaypʼu toqeru jan ukajj arum toqeru Bibliat yatichir sarksna? Jan mayamp mayampi kuttʼaskañatakejj ¿janit uka territorionkir Bibliat yateqerinakar mä urunaki taqenir visittʼañ amtksna? Ukhamatwa tiempo jan ina chʼusar aptʼkañäniti.
Cheqas yatiyasajj horanak jakhustanwa, ukampis yatiykasin askinak jikjjatañänejja, jukʼampiw kusisiñäni. Kunanjjay yatiyaskstan, ukantï jan askinak jikjjatkañäni ukhajja, inas horarios mayjtʼayañ wakischispa. Ukhamajj ‘Yapuniru’, mä arunjja, Jehová Diosar yanap mayipjjañäni, ukhamat yatiykasin tiempo jan ina chʼusar aptʼañataki (Mat. 9:38).