Kunjamsa nuknaqañ carritonakampi yatiysna

Mesanakampi jan ukajj nuknaqañ carritonakampi yatiyañajja, suma chuyman walja jaqenakaruw Diosar uñtʼapjjañapatak yanaptʼaski (Juan 6:44). Ukatwa irpir chuymaninakarojj territoriopan walja jaqenak utjki, uka cheqanakan yatiyasiñapatak chʼamañchtʼasiwayi. Niyakejjay carritonakajj nuknaqañakïchejja, autoridadanakat permiso mayiñajj janiw wakiskaspati. ¿Khitinakas yatiyapjjaspa? Amuytʼasirinaka, cristianjam sum isthaptʼasirinaka ukat parltʼañsa jan ajjsaririnaka. Kunsa lurañasa ukat kuns jan lurañasäki ukanakwa mä qawqha uñjaskañäni. Uka ewjjtʼanakarjam lurañaw yatiyirinakarojj ukhaman irnaqtʼkasajj sum yatiyañatak yanaptʼani.

Kuns lurañasa:

Uka cheqa pasapkani ukanakarojj munasiñampiw uñjañasa ukat amuyañasarakiwa. Kusisitaw uñkattʼañasa ukat sumwa aruntañasa. Khitis jakʼachasinini ukhajja, akham sissnawa: “Munstajja, mayit apasismawa” sasa.
Janiw sinti jakʼaru saytʼasiñasäkiti. Yaqhep cheqanakanjja, yatiyirinakajj ‘janiw sinti jayankañasäkiti’ sasaw sapjje, ukampis ukajj janiw taqe cheqan askipunïkaspati. Ukhamächi ukhajja, inas maynin jakʼachasiniñapkam jaya cheqan suyañajj wakischispa. Jakʼachasinini ukhaw jupampi parlañ qalltsna, inas akham jisktʼsna: “¿Jumajj ukham jisktʼasirïtati?” sasa.
Wakiskani ukhajj Bibliampipuniw parltʼañasa.
Kuna qellqatanakampitï jaqenakar Bibliat yatichtan ukanakat may apasini ukhajja, sañäni, Kunsa yatichi sat libro apasini ukhajja, kunjamsa Bibliat yatichasi ukwa qhanañchtʼañasa ukat ¿Kunatsa Bibliat yatjjatañama? sat video celularat jan ukajj apnaqañ jiskʼa aparatot uñtayaraksna.
Maynitï jukʼamp yatjjatañ munani ukhajja, kawkhansa jakasi ukwa wakischini ukhajj qellqtʼasiñasa. Jan territoriosan jakkchi ukhajja, Persona que mostró interés (S-43) sat formularior qellqantasaw tamasankir secretarior jankʼaki churañasa.