Aka revista liytʼirinakan jisktʼäwinakapa

Apóstol Pablojj kuntï 1 Corintios 15:29 texton siskäna uka arunakarjamajja, ¿yaqhep cristianonakajj jiwatanak lantit bautisasipjjañapäna?

Janiwa. Janiw ni Bibliansa ni yaqha qellqatanakansa ukham siskiti.

Ukampis yaqhep Biblianakanjja, uka textojj ukhamwa amuyayaspa. Ukatwa yaqhepanakajja, Pablojj jakkäna uka tiempon jaqenakajj jiwatanak lantiw uman bautisasipjjäna sasin amuyapjje. Amuytʼañataki, Qullan Arunaka Biblianjja akham siwa: “Yaqhepanakajj jiwatanakatakiw bautisasipjje. ¿Kunataraki uk lurapjjesti? Jiwatanakajj jan jaktkchini ukhasti ¿kunataraki jiwatanakatak bautisasipjjesti?” sasa.

Jichhajja, Bibliat yatjjattʼat pä jaqenakajj kamsapjjesa uk uñjañäni. Gregory Lockwood sat teologojj akham siwa: ‘Jiwatanak lantisa jaqenakajj bautisasipkaspa ukhamwa yaqhepajj piensapjje, ukampis ukham bautisasiñajj janiw Bibliansa ni historia qellqatanakansa utjkiti’ sasa. Machaq Testamentot yatjjatiri Gordon Fee sat jaqejj niya ukhamwa sarakïna: “Janiw ni Bibliansa ni historia qellqatanakansa ukham bautismot parlkiti. Machaq Testamentonjja janipuniw mä jukʼas uka toqet parlkiti. Janirakiw uka tiempot qhepa maranakan utjkäna uka iglesianakansa ni comunidad cristiana ortodoxa taypinsa ukham lurañajj utjkänti” sasa.

Bibliarjamajja, Jesusajj discipulonakapar akham sänwa: “Sarapjjam, taqe markankir jaqenakar nayan discipulojar tukuyapjjam, bautisapjjam [...]. Ukatsti taqe kuntï nayajj jumanakar yatichapksma ukanak phoqañ yatichapjjarakim” sasa (Mat. 28:19, 20). Ukhamasti maynejj bautisasiñatakejj Jehová Diosampita Jesusampitwa yatjjatañapäna, jupanakaruw creyiñapäna, istʼañaparakïna. Jiwatäjje ukasa jan ukajj sepulturan allintatäjje ukasa janiw ukanak lurkaspati, janirakiw mä cristianos jupa lanti bautisaskaspati (Ecl. 9:5, 10; Juan 4:1; 1 Cor. 1:14-16).

Ukhamajj ¿Pablojj 1 Corintios 15:29 qellqatan kamsañsa munäna?

Corintonkir yaqhep cristianonakajja, janiw jiwatat jaktañajj utjkiti sasaw sapjjäna (1 Cor. 15:12). Pablojj janiw ukhamäkiti sasaw säna. ‘Nayajj sapüruw niya jiwata uñjasta’ sasaw sarakïna. Ukampis kunayman jan walinakansa uñjaskchïnjja, jiwä ukhajj Jesusarjamaw Diosajj jaktayitani sasaw confiyäna (1 Cor. 15:30-32, 42-44).

Ajllit cristianonakajj janïr jiwatat jaktayatäkasajja, jan walinakar sapür saykatawayasaw jiwapjjañapäna ukwa Corintonkirinakajj amuyapjjañapäna. ‘Taqe khitinakatï Cristo Jesusan bautisatäpkäna ukanakajja, jiwäwipan bautisatäpjjarakïnwa’ (Rom. 6:3). ¿Ukajj kamsañs muni? Jupanakajj Jesusjamarakiw yantʼanakar saykatapjjañapäna, jaktañatakejj jiwapjjañaparakïnwa.

Jesusajj pä mara jila uman bautisatäjjäna uka qhepatjja akham sasaw pä apostolonakaparojj säna: “Kunjamtï nayajj bautisasisktjja ukham bautisatäpjjätawa” sasa (Mar. 10:38, 39). ¿Jesusajj kamsañsa munäna? Diosar taqe chuyma servitasjja jiwañkamaw uñachtʼayañasa sañwa ukampejj munäna. Pablojj akham sasaw ajllitanakar sarakïna: “Jiwasatï Cristomp chika tʼaqesiñänejja, jupamp chikarakiw jachʼañchatäñäni” sasa (Rom. 8:16, 17; 2 Cor. 4:17). Mä arunjja, alajjpachan jaktañatakisa ukan jakañatakisa ajllitanakajj jiwapjjañapänwa.

Ukhamasti apóstol Pablon arunakapajj akham sasaw traducitäspa: “Maysa toqetjja, jiwañ amtampi bautisasirinakajj ¿kamachapjjanisa? Jiwatanakatejj jan jaktanipkchini ukhajja, ¿kunataraki jupanakajj jiwañ amtampi bautisasipjjesti?” sasa.