Kunjamtï akhakam yatjjataniwayktanjja, jaqenakajj jutïrin sum jakasiñatakejj destinoru, yatjjatatäñaru, qollqeruw confiyapjje, suma jaqëñatakis chʼamachasipjjarakiwa. Ukampis ukanakajj janiw jutïrin sum jakasiñatak yanaptʼkistaspati. Ukhamajj ¿janipunit jutïrin sum jakasiñatak yanaptʼajj utjkpacha? Cheqas utjiwa.
WALI YATIÑANIT JUTIR MÄ YANAPTʼA Mä amtar puriñatakejja, jukʼamp yatjjattʼatäki, jan ukajj jiwasat jukʼamp jilïrïki ukaruw jisktʼastanjja. Jutïrintï sum jakasiñ munstanjja, ukhamarakiw khititï jukʼamp experiencianïki jukʼamp yatiñanïki ukar confiyañasa. Uka confiykañ yanaptʼajja Bibliawa. Mä 3.500 maranak nayraw qellqasirakïna.
¿Kunatsa Bibliar confiyañasa? Qellqayki ukajja, taqet sipansa wali yatiñaniwa. Jupajja, “Nayra Tiempotpach Jakir Awkiw[a]”, “wiñayatpach wiñayatak” jakiriwa (Daniel 7:9; Salmo 90:2 ). “Khititï alajjpachanak Lurki, cheqpach Diosäki, oraq lurki” ukawa (Isaías 45:18 ). Jupa pachpaw sutip yatiyistu, Jehová satawa (Salmo 83:18 ).
Bibliajja taqe jaqenak lurawayki uka Diosatwa juti, ukanjja janiw mä kasta costumbrenïki, jan ukajj mä kasta jaqenakakis jukʼamp sumäpkaspa ukham yatichkiti. Ukan utjki uka ewjjtʼanakajj wali sumawa, kunayman cheqankir jaqenakarus yanaptʼarakiwa. Bibliajja walja arunakaruw jaqokipasiwayi, ukarakiw oraqpachan jukʼamp lakirasi. Ukatwa jaqenakajj facilak amuytʼapjjaspa, ukhamarak yanaptʼayasipjjaspa. Cheqas Bibliajj akham siwa:
“Diosajj janiw khitirus yaqhachkiti. Jan ukasti khitinakatï taqe markanakan jupar ajjsartʼapki, kunatï cheqapäki ukarjam lurapki ukanakarojj Diosajj katoqewa” ( HECHOS 10:34, 35 ).
Kunjamtï mä suma awkejj wawanakapar munaski yanaptʼkarakejja, ukhamarakiw munasiri Jehová Diosajj Biblia toqejj yanaptʼistu (2 Timoteo 3:16 ). Diosan Aruparojj jumajj confiyarakismawa. Cheqansa Diosaw jiwasar lurawayistu, kunatï jiwasatak walïki uksa yatirakiwa.
CONFIYKAÑ MÄ YANAPTʼA
Bibliajj confiykañ yanaptʼanakaniwa. ¿Kunatsa? Mä 2.000 maranak nayraw kunas aka oraqen pasani jichhürun jaqenakajj kunjamäpjjanisa uk profecianakan qhanañchjjäna.
¿KUNANAKAS PASAÑAPÄNA?
“Mä jachʼa markajj yaqha jachʼa marka contraw nuwasini, mä gobiernosti yaqha gobierno contrarakiw nuwasini. Jachʼa terremotonakaw utjarakini, manqʼat pistʼañanakasa jan wali usunakasa ukjan akjan utjani” ( LUCAS 21:10, 11 ).
¿JAQENAKAJJ KUNJAMÄPJJANISA?
“Qhepa urunakanjja chʼama tukuña jan wali tiemponakaw utjani. Jaqenakajj akhamäpjjaniwa: jupanak pachpa munasirinaka, qollqe sinti munirinaka, pʼeqe waytat sarnaqerinaka, jachʼa jachʼa tukurinaka, Dios contra jaqe contra jan wal parlirinaka, awkiparus taykaparus jan istʼirinaka, jan yuspärasirinaka, jaqe masipar jaytanukurinaka, jan munasirinaka, jan kuna acuerdorus mantañ munirinaka, kʼarintirinaka, munañapampi apnaqayasirinaka, qhorunaka, kunatï walïki uk uñisirinaka, traicioneronaka, jan amuytʼañ munirinaka, jachʼañchasirinaka, Diosar munasiñat sipansa pachpa munañapak thaqerinaka” ( 2 TIMOTEO 3:1-4 ).
Biblian uka profecianakapajja, walja maranak nayraw qellqasiwayjje. Uka profecianakan phoqasiskatap uñjasajja, ¿kunsa amuyta? Hong Kong markan jakasiri Leung sat chachjamaw amuyarakpachätajja, jupajj akham siwa: “Bibliankir profecianakajj walja maranak nayraw qellqasiwayjje, ukampis aleq jaqejj janiw cheqtʼkaspati. Jiwasat sipansa jukʼamp yatiñaniw Biblia qellqayañapa” sasa.
Biblian utjki uka profecianakat waljaw phoqasiwayi. Ukaw Diosan Arupätap uñachtʼayistu. Jehová Diosajj akham siwa: “Nayaw Diosätjja, nayjam Diosajj janiw utjkiti. Qalltatpachwa nayajj kunatï paskani uk yatiyjjta” sasa (Isaías 46:9, 10 ). Ukatwa kunanaktï Bibliajj jutïrit siski ukar confiysna.
JICHHÜRUTAKI, WIÑAYATAKI MÄ YANAPTʼA
Biblian utjki uka ewjjtʼanakamp yanaptʼayasïta ukhajja, sumaw jakasïta. Aka toqenakat amuytʼam.
QOLLQEMPI TRABAJOMPI
“Wali chʼam tukusin wal trabajiñat sipansa mä jukʼa samartʼañaw jukʼamp sumajja, kuna laykutejj wali chʼam tukusin wal trabajiñajja thayar katthapiñampi sasiwa” ( ECLESIASTÉS 4:6 ).
FAMILIAMP SUM JAKASIÑA
“Kunjamtï sapa maynejj jupa pachpar munaskejja, ukhamarakiw sapa maynejj warmipar munasiñapa. Casarat warmejj chachaparojj wali respetompiw uñjañaparaki” ( EFESIOS 5:33 ).
MAYNINAKAMP SUM APASIÑA
“Colerasiñjja apanukjjam, sinti colerasiñjja jaytanukjjam. Jan colerasimti, coleratajj kunatï jan walïki ukwa luräta” ( SALMO 37:8 ).
Biblian ewjjtʼanakaparjamatï sarnaqätajja, jichhajj yanaptʼatamwa, jutïrinsa kusisitaw jakasïta. Diosajj jutïrin kunjam jakasiñassa muni uk Bibliaw qhanañchistu.
SUMANA JAN LLAKISISA JAKASIÑA
“Jan tukuskir sumankañampiw jupanakajj wal kusisipjjarakini” ( SALMO 37:11 ).
UTASA MANQʼASA TAQENITAKIW UTJANI
“Jupanakajj utanakwa utachasipjjani, ukanwa jakapjjarakini, uvasanakwa yapuchasipjjani, achunakapwa manqʼapjjarakini” ( ISAÍAS 65:21 ).
JANIW KHITIS USUNTJJANITI NI JIWJJANISA
“Janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti” ( APOCALIPSIS 21:4 ).
¿Jutïrin ukham jakasiñatakejj kunsa lurañama? Jutïr yatichäwinwa uka toqet yatjjatañäni.