Anitunakajatak galletanaka
OREGÓN (Estados Unidos) markan jakasiri Nick sat chachajja, akham sasaw qellqäna: “2014 mara qalltanakanjja, pä jiskʼa anitunakajaruw jakkayäta uka markan paseytʼayañatak irpsuyäta. Testigonakajja uka cheqanakanpun carritonakapamp predicapjjeri. Jupanakajj suma isthaptʼataw taqe khitinakatï uknam pasapkäna ukanakar wali kusisit arunttʼapjjeri.
”Testigonakajj janiw jaqenakaruk sum uñjapjjerïkiti, jan ukasti jiskʼa anitunakajarus wali sumwa uñjapjjarakiri. Mä urojja, Elaine sat warmiw carritomp predicaskäna, ukatjja pä jiskʼa anitunakajaruw galletanak wajjtʼarapitäna. Qhepatjja sapa kuti uka cheqnam pasirïta ukhajj anitunakajajj ‘galletanak wajjtʼapkäna uka esquinarupuniw’ sarañ munapjjeri.
”Walja phajjsinakas pasjjchïnjja, galletanak manqtʼasiñ wal munapjjeri. Nayasti Testigonakampejj wali sumwa mä jukʼa parltʼasirakirïta, ukampis janiw Testigonakampejj añch parlañ munirïkti. 70 mara jilanëjjchiyätsa kunanaktï Testigonakajj creyipki uk janiw sum yatkayätti. Cristianöpjjtwa sapki ukanakajja, janiw kunjamtï munkayäta ukhamäpkänti, ukatwa naya sapakiw Bibliat yatjjatañajäspa sasin amuyayäta.
”Uka tiemponjja, jukʼamp Testigonakaruw carritonakapampi walja cheqanakan predicaskir uñjayäta. Jupanakajj wali suma chuymanïpjjarakïnwa. Bibliampipuniw jisktʼanakajar qhanañchtʼapjjeri, ukatwa jupanakar jukʼamp confiyjjayäta.
”Mä urojja, Elaine warmejj akham sasaw jisktʼitäna: ‘¿Animalanakajj Diosan regalopätap jumajj creytati?’ sasa. Nayajj ‘jïsa’ sarakiyätwa. Ukatjja Isaías 11:6-9 textwa liytʼarapitäna. Ukat uksaruw taqe kunas nayatakejj cambyjjäna, ukampis Bibliat apstʼat qellqatanak janïraw apasiñ munkayätti.
”Ukat uksarojja, Elaine warmimpi Brent esposopampejj wali sumwa Bibliat mä jukʼa parltʼapjjerïta. Jesusan kayup arkañajj kamsañs muni uk sum amuytʼañatakejj Mateo librot Hechos librokamaw liytʼasma sasaw sapjjetäna. Ukat nayajj ukhampunwa lurayäta. Mä jukʼa tiempotjja, 2016 chika maraw Brent jilatampi Elaine kullakampi Bibliat yateqañ qalltayäta.
”Semanan Bibliat yatjjatkayäta uksa, Tantachasiñ Utan apaskäna uka tantachäwinaksa, wali kusisitaw suyjjerïta. Kuntï Bibliajj yatichki uk yateqasajj wal kusisiyäta, wal yuspärarakïyäta. Mä mara qhepatjja, bautisasjjayätwa. Jichhajj 79 maranëjjtwa, cheqa thakinkjjatajsa yatjjaraktwa. Jichhajj oraqpachan Diosar servipki uka familia taypinkjjtwa, ukajj Jehová Diosan bendicionapawa”.