4 | Biblian suma ewjjtʼanakapa

¿Kamsañsa muni?

Bibliajj janis qolla toqet parlir librökchejja, llaki usunïpki ukanakarojj ewjjtʼanakapajj wal yanaptʼaspa. Ukanakat mä qhawqha uñjañäni.

¿Kunjamsa yanaptʼistu?

“Jan usuta jaqenakatakejj janiw doctorajj munaskiti, usutäpki ukanakatakikiw munasi” (MATEO 9:12).

Awisajj doctoramp yanaptʼayasiñajj wali wakiskiriwa sasaw Bibliajj sistu. Llaki usunïpki ukanakat waljanejja, usup toqet jukʼamp yatjjatasa, doctoran ukar sarasaw yanaptʼa jikjjatapjje.

‘Ejercicio lurañajj yanaptʼistuwa’ (1 TIMOTEO 4:8).

Kunatï cuerposar yanaptʼkaspa ukanakatak tiempo apstʼasiñasa, chʼamachasiñasa, llaki usumpi jan aynachtʼañatakiw yanaptʼistaspa. Ukanakat yaqhepajj akanakawa: ejercicionak sapa kuti luraña, chʼamañchtʼkir manqʼanak manqʼaña, sum iktʼaña.

“Kusisit chuymajja mä suma qollawa, ukampis aynachtʼat chuymajja maynirojj jan chʼamaniw jayti” (PROVERBIOS 17:22).

Bibliankir kawkïr textonakatï yanaptʼkistaspa ukanak liytʼaña, kuna lurañanakatï phoqañajj jan chʼamäkaspa ukanak lurañ amtañaw kusisita jikjjatasiñatak yanaptʼistaspa. Llaki usunïkstansa jan ukajj ukar uñtasit yaqha usunïkstansa, jakäwisan kuna askinakatï utjki ukar chuym uchañäni ukhajja, janiw aynachtʼkañäniti.

“Kawkjantï humilde chuymanïñajj utjki ukanjja yatiñanïñaw utji” (PROVERBIOS 11:2).

Usutätam laykojja, inas yaqhep luräwinak jan lurirjamätam amuyassta, ukhamajja mayninakatï yanaptʼañ munapjjstam ukhajj yanaptʼayasiñamawa. Amigonakamasa, familiaranakamas jumar yanaptʼañ wal munasipkpacha, ukampis kunjamsa yanaptʼapjjeristam uk inas jan yatipkchiti. Ukhamajja, kunansa yanaptʼatäñ munta uk qhanwa sañama, ukampis kunatï wakiski ukakwa mayiñama, yanaptʼapkätam ukanakatsa yuspärañamarakiwa.

Llaki usunïpki ukanakarojj kunjamsa Biblian ewjjtʼanakapajj yanaptʼi

“Janjamakiw sum jikjjataskayätti, ukatwa doctoran ukar uñjayasir sarta. Doctorajja, kunatsa ukham jikjjatasiyäta ukwa qhanañchtʼitäna, ukaw usutätaj amuyasiñatak yanaptʼawayitu. Kuna tratamientonaksa lurirista uksa doctorajj sarakitänwa” (Nicole,a jupajj trastorno bipolar usuniwa).

“Esposajampi sapa alwa Biblia liyiñajj wal yanaptʼitu, ukhamatwa kunanakatï chʼamañchtʼkitaspa uka toqet lupʼisa sartta. Yaqhep urunakajj wali llakita jikjjatasta ukhajja, Biblian mä chʼamañchtʼkir textojj utjapuniwa, ukwa amuyta” (Peter, jupajj llaki usuniwa).

“Qalltanjja, kuna usunïkayättï uka toqet yaqhanakar parlañ phenqʼasiyätwa. Ukampis kunjamas jikjjatasiyäta ukjja, mä amigajaw sum amuyitäna, jupajj wali munasiñampiw uñjitäna, ukaw jan sint llakisiñatak yanaptʼawayitu, jan sapakjam jikjjatasiñatakis yanaptʼawayarakitu” (Ji-yoo, jupajj trastorno alimentario usuniwa).

“Bibliajja, jan trabajoruk chuym uchañataki, sum samartʼañatakiw yanaptʼawayitu. Ewjjtʼanakapajj jan sint llakisiñataki, sumak jikjjatasiñatakiw yanaptʼawayarakitu” (Timothy, jupajj trastorno obsesivo compulsivo usuniwa).