¿Kunsa Jacob chachan qhepa arunakapat yateqsna? (Nayrïr parte)

1, 2. ¿Kunsa Jacobojj janïr jiwkasajj luräna, ukat kunatsa? (Dibujo uñjjattʼarakïta).

JACOBOJJ wali jilïrëjjäna ukhajja, familiapamp chikaw Canaán oraqet Egiptor sarjjäna, ukanjja 17 maranakaw Diosarojj jan jitheqtas serviskakïna (Gén. 47:28). Uka tiemponjja Jacobojj wali munat José yoqapampiw jikisïna, ukhamajj jiwatäjjpachawa sasin amuykäna uka wawapamp jikisisajj wali kusisitäpachänwa, kuna laykutejj mayampiw familiapajj mayachtʼatäjjäna. Ukampis Jacobojj jiwañap jakʼankjjatapwa amuyasïna, ukatwa taqe yoqanakapar jawsayäna, ukhamat wali importante arunak jupanakar yatiyañataki (Gén. 49:28).

² Uka tiemponjja, mä familia pʼeqtʼirejj niya jiwañampëjjäna ukhajj familiaparuw tantachthapirïna, ukhamat qhep qhepa instruccionanak churañataki (Is. 38:1). Maysa toqetjja, jiwatap qhepat khitis familiapar pʼeqtʼani ukaw uka tantachäwinakan yatiyasirakirïna.

3. Génesis 49:1, 2 textorjamajja, ¿kunatsa Jacobun arunakapajj jan armkañänjja?

³ (Génesis 49:1, 2 liytʼäta). Jacobojj yoqanakapamp tantachaskäna ukajj jan armkañänwa. Kuna laykutejj uka tantachäwinwa kunas jutïrin pasani ukajj yatiyasïna, mä arunjja yoqanakaparusa familianakaparus kunas pasani ukwa Jacobojj Diosan yanaptʼapampejj yatiyäna. Ukatwa Jacobun uka arunakapajj profecía arunakjam uñtʼasi.

4. ¿Kunanakatsa aka yatichäwin yatjjataskañäni? (“Jacobun familiapa” sat recuadro uñjjattʼarakïta).

⁴ Aka yatichäwinjja, Jacobojj kunanaksa Rubén, Simeón, Leví ukat Judá yoqanakapar säna ukanakatwa yatjjataskañäni. Jutïr yatichäwinjja, mayni kimsaqallqo yoqanakaparojj kamsarakïnsa ukanakatwa yatjjataskarakiñäni. Jacobojj kunatï yoqanakaparusa familianakaparus pasañapäkäna ukanakwa arsüna, tiempompejja yoqanakapan familiapajj Israel markaruw tukjjañapäna. Nayra Israel markan kunanakas pasawayi uk yatjjatasajja, kunjamsa Jacobun arsut arunakapajj phoqasiwayi ukwa amuytʼañäni. Ukat Jacobun arunakapat waljanakwa yateqarakiñäni, ukanakaw Jehová Dios Awkisan chuymapar purtʼkir sarnaqañatak yanaptʼistani.

RUBÉN

5. ¿Awkipat kun katoqañsa Rubenojj suypachäna?

⁵ Jacobojj Rubén yoqapampiw nayraqat parläna, “jumajj jilïr wawajätawa” sasaw sarakïna (Gén. 49:3). Jilïr wawätap laykojja, Rubenojj mayni jilanakapat sipansa jukʼamp herencia katoqañwa suypachäna. Ukatjja, ‘awkijan jiwatap qhepat nayaw familia pʼeqtʼjjäjja, jutïrinsa tribujat jutir mayniw awkijan familiapar pʼeqtʼani’ sasaw suyarakpachäna.

6. ¿Kunatsa Rubenojj jilïr wawäñ aptʼasïna? (Génesis 49:3, 4).

⁶ Ukampis Rubenojj jilïr wawäñ aptʼasïnwa (1 Crón. 5:1). ¿Kunatsa ukham sistanjja? Mä qhawqha maranak nayrajja, Rubenojj awkipan Bilhá concubinapampiw ikintasïna. Uka warmejja, awkipan wali munat Raquel esposapan serviripänwa (Gén. 35:19, 22). ¿Kunatsa Rubenojj Bilhá warmimp ikintaspachäna? Jupajj Lea warmin yoqapänwa. Raquelan jiwatap qhepatjja, inas Rubenojj akham sasin amuychïna: ‘Bilhá warmip ikintasï ukhajj Jacobojj jupar uñisiniwa, ukhamatwa mamajarojj jukʼamp munasjjani’ sasa. Jan ukajj inas Rubenojj Bilhá warmimpïñ munasajj munañapamp apayaschïna. Cheqas kunjamatjjay ukar purtʼasiwaychi uk janiw yatktanti, ukampis kuntï lurkäna ukajj Jehová Diosatakisa Jacob awkipatakis janipuniw walïkänti (Génesis 49:3, 4 liytʼäta).

7. ¿Kunas Rubenorusa familiaparus pasäna? (“Jacobojj janïr jiwkasajj profecianak arsüna” sat recuadro uñjjattʼarakïta).

⁷ Jacobojj akham sasaw Rubenor säna: “Janiw jumajj jilankkätati” sasa. Uka arunakajj phoqasïnwa. Bibliarjamajja, Rubenon familiapat janiw maynis reyirusa, sacerdoterusa, jan ukajj profetarus tukkänti. Ukampis Jacobojj janiw juparojj wawapjam rechazkänti, Rubenot jutirinakas Israel markan mä triburuw tukjjapjjarakïna (Jos. 12:6). Rubenojj jakkasajj suma chuymanïtapwa uñachtʼayäna, amuyatajja janirakiw mayampis qʼañu jucha lurañar purtʼasjjänti (Gén. 37:20-22; 42:37).

8. ¿Kunanaksa Rubenon sarnaqäwipat yateqsna?

⁸ ¿Kunsa yateqsna? Munañasamp jan apayasiñatakisa qʼañu juchar jan purtʼasiñatakis wal chʼamachasiñasawa. Juch lurañatak mä yantʼan uñjaskasajja, kunjamsa uka jucha lurañajj Jehová Diosarusa, familiasarusa, mayninakarus jan waltʼayaspa uka toqetwa amuykiptʼañasa. Ukatjja aka arunakwa amtañasaraki: “Kuntï maynejj phawki, ukrakwa apthapini” (Gál. 6:7). Maysa toqet kunatï Rubenor paskäna ukajja, Jehová Diosajj kunja khuyaptʼayasirisa ukwa amtayistu. Cheqas jucha luratasat jan walinakan uñjasikipuniñäniwa, ukampis jiwasatï arrepentisiñäni ukat kunatï walïki uk lurañatak chʼamachasiñäni ukhajja, Diosajj perdonistaniwa, bendisirakistaniwa.

SIMEÓN UKAT LEVÍ

9. Simeón ukat Leví yoqanakapan luratanakapampejja, ¿kunatsa Jacobojj jan acuerdökäna? (Génesis 49:5-7).

⁹ (Génesis 49:5-7 liytʼäta). Ukjjarojja Jacobojj Simeón ukat Leví yoqanakapampiw parläna. Kuntï siskäna uka arunakampejja, Jacobojj yoqanakapan luratanakapamp jan acuerdötapwa uñachtʼayäna. Mä qhawqha maranak nayrajja, Jacobun Dina phuchapajj Canaán oraqenkir Siquem waynamp violataw uñjasïna. Ukham pasatapatjja, Jacobun taqe yoqanakapaw wali coleratäpjjäna. Ukampis Simeonampi Leví jilapampejj colerampiw atipayasipjjäna, ukatwa jupanakajj Siquem waynampiru markapampir engañjañ amtapjjäna, ‘jumanakatï circuncidasipjjäta ukhajj sumankañanwa jakasiñäni’ sasaw kʼarisipjjarakïna. Uka arunakajj Siquem waynatakisa markapatakis walikïnwa, ukatwa circuncidasipjjäna. Ukampis jupanakajj wali usuratäsipkäna ukhajja, Jacobun Simeón ukat Leví yoqanakapajj “espadas aptʼasitaw jutapjjäna, jan amuykayakwa markar mantapjjarakïna, ukatsti taqpach chachanakaruw jiwarayapjjäna” (Gén. 34:25-29).

10. Jacobojj kuntï Simeón ukat Leví yoqanakapat arskäna ukajj ¿kunjamas phoqasïna? (“Jacobojj janïr jiwkasajj profecianak arsüna” sat recuadro uñjjattʼarakïta).

¹⁰ Pä yoqanakapan walja jaqenakar jiwarayapjjatapatjja, Jacobojj wali coleratänwa. Ukatwa ‘jupanakajj Israel markan kunayman cheqanakar ananukutäniwa’ sasin mä profecía arsüna. Uka arunakajj 200 jila maranak qhepatwa phoqasïna, mä arunjja Israel markajj Suma Oraqer mantkäna ukhaw phoqasïna. Simeón tribunkirinakajja, Judá tribunkir oraqenakap taypinwa herencianakap katoqapjjäna (Jos. 19:1). Leví tribunkirinakasti, Israel markan oraqenakap taypinwa herencianakap katoqapjjarakïna, jupanakan taqpach markanakapajj 48 markanakänwa (Jos. 21:41).

11. ¿Kuna sumanaksa Simeón ukat Leví tribunakajj lurapjjäna?

¹¹ Simeón ukat Leví chachanakat jutirinakajja, janiw jupanakjamajj jan walinak lurapkänti. Leví tribunkirinakajj jan jitheqtasaw Jehová Diosar adorapjjäna. Jehová Diosan Leyip katoqañatak Moisesajj Sinaí qollur makatkäna ukhajja, walja israelitanakajj vaca qallur uñtasit mä estatuaruw adorapjjäna. Ukampis Levitanakajj Moisés toqetwa saytʼasipjjäna, jan wal luraskäna ukanakan chhaqtayasiñapatakis yanaptʼapjjarakïnwa (Éx. 32:26-29). Ukat Israel markan sacerdotenakjam servipjjañapatakejja, Jehová Diosajj Leví tribunkirinakaruw ajllïna (Éx. 40:12-15; Núm. 3:11, 12). Suma Oraqejj katuntaskäna ukhasti, Simeón tribunkir chachanakajj jan ajjsarasaw Judá tribunkir chachanakamp chik nuwasipjjarakïna, ukhamatwa jupanakajj Jehová Diosan munañap phoqapjjäna (Juec. 1:3, 17).

12. ¿Kunanaksa Simeón ukat Leví chachanakan sarnaqäwipat yateqsna?

¹² ¿Kunsa yateqsna? Janipuniw coleramp atipayasiñasäkiti. Maynitï jiwasar mä jan wal luristaspa, jan ukajj mä munat familiasar jan wal luraspa ukhajja, coleratäñatakejj razonanïsnawa (Sal. 4:4). Ukampis akwa amtañasa: coleramp atipayasisatï jan walinak parlsna, jan ukajj jan walinak lursna ukhajja, janiw Jehová Diosarojj kusisiyksnati (Sant. 1:20). Kunapachatï jilat kullakanakasasa, jan ukajj Diosar jan servirinakas jan walinak lurapjjestani ukhajja, kunatï Jehová Diosar gustki uk lurañatakiw chʼamachasiñasa. Ukhamatwa mayninakarojj arsutasampisa luratanakasampis chuym jan ustʼaykañäniti (Rom. 12:17, 19; 1 Ped. 3:9). Maysa toqetjja, awk taykasatï jan walinak lurapjjani ukhajj janiw jupanakat yateqasisajj jan walinak lurañasäkiti. Janipun akham sasin amuyañäniti: ‘Janiw Jehová Diosarojj kusisiyañ puedkiristti, janipuniw kunapachas jupamp katoqatäkäti’ sasa. Kunatï cheqapäki uk lurañatakejj Jehová Diosaw yanaptʼistani, kuna sumanaktï lurktan ukanakats bendisirakistaniwa.

JUDÁ

13. Awkipan arunakap istʼañ horasajj purinjjäna ukhajja, ¿kuna toqetsa Judá chachajj wal llaktʼaspachäna?

¹³ Ukjjarojja Jacobojj Judá yoqapampiw parlarakïna. Kuntï jilïr jilanakaparojj tatapajj siskäna ukanak istʼasajja, ‘nayatakejj kuna jan walinakak arsuskani’ sasaw llakispachäna. Kuna laykutejj jupajj kunayman jan walinakwa luräna. Sañäni, jupajj mayni jilanakapamp chikaw Siquem marka saqueysüna (Gén. 34:27). José sullka jilaparojj esclavotwa aljapjjäna, awkiparojj kunatï jan cheqäki ukwa yatiyapjjarakïna (Gén. 37:31-33). Mä qhawqha tiempotjja, prostitutäpachawa sasin amuyasajj Tamar yojjchʼapampiw ikintasirakïna (Gén. 38:15-18).

14. ¿Jacobojj Judá yoqaparojj kamsänsa, ukat kuna sumanaksa Judá chachajj luräna? (Génesis 49:8, 9).

¹⁴ Ukampis Jacobojj Jehová Diosan amuytʼayatajja, Judá yoqapatakisa familiapatakis kunatï sumäki ukanakakwa arsüna, jachʼañchtʼarakïnwa (Génesis 49:8, 9 liytʼäta). Judá chachajj chuymankipstat awkipat wal llakisïna, Benjamín sullka jilapat khuyaptʼayasisas jarkʼaqañwa munarakïna (Gén. 44:18, 30-34).

15. Jacobun arsut profeciajj ¿kunjamanakatsa Judá chachjjar phoqasïna?

¹⁵ Jacobun arsutaparjamajja, Judá chachaw jilanakaparojj pʼeqtʼañapäna. Ukampis uka profeciajj janiw jankʼakejj phoqaskänti, mä 200 maranak qhepatwa phoqasiskäna. Israelitanakajj Egiptot mistupkäna, Suma Oraqer puriñatakis wasarnam sarapkarakïna ukhajja, Judá tribuw mayni tribunak nayraqat saräna (Núm. 10:14). Mä qhawqha maranak qhepatjja, Judá tribunkir chachanakaw cananeonak contra nuwasirejj nayraqat sarapjjäna, ukhamat Suma Oraq katuntaniñataki (Juec. 1:1, 2). Ukatjja Judá tribut jutañapäkäna uka reyinakat Davidaw nayraqatajj reyjam apnaqañ qalltäna. ¿Kunanakas Judá chachjjarojj phoqasirakpachäna?

16. ¿Kunjamsa Génesis 49:10 texton qellqatäki uka profeciajj phoqasiwayi? (“Jacobojj janïr jiwkasajj profecianak arsüna” sat recuadro uñjjattʼarakïta).

¹⁶ ‘Taqe jaqenakar apnaqañatak mä gobernantejj Judá chachan familiapatwa jutani, jupaw jaya tiempo apnaqani’ sasaw Jacobojj säna (Génesis 49:10, notapamp liytʼäta). Uka gobernantejj Jesucristowa, juparojj Siló sasaw Jacobojj sarakïna. Jesusat parlkasajja mä angelajj akham sänwa: “Jehová Diosaw juparojj David awkipan tronop churani” sasa (Luc. 1:32, 33). Ukatjja Jesusarojj “Judá tribunkir León” sasaw uñtʼasiraki (Apoc. 5:5).

17. ¿Kunjamsa Jehová Diosat yateqasitas uñachtʼaysna?

¹⁷ ¿Kunsa yateqsna? Jehová Diosajja kuna sumanaktï servirinakapajj lurapki ukanak janiw armkiti. Judá chachajj sinti jan walinaksa lurkchïnjja, Diosajj jupar bendisïnwa. Ukampis inas Judá chachan jilanakapajj akham sasin jisktʼasipjjchïna: “¿Kuna sumanak uñjasas Jehová Diosajj jupar bendispacha?” sasa. Jupanakajj kunjjay amuyapjjchïna uk janiw yatktanti, jan ukasti kunjamsa Diosajj Judá chachan suma luratanakap uñjäna, kunjamsa ukarjamajj bendisirakïna ukakwa yattanjja. ¿Kunsa Jehová Diosat yateqassna? Maynejj wali importante asignación katoqe ukhajja, awisajj pantjasitanakap amtasajj ‘uka asignación katoqañapajj janiw wakiskiti’ sasaw amuysna. Ukampis akwa amtañasa: Jehová Diosajj servirinakapat kunatï sumäki ukwa thaqe, mä arun kunja suma chuymanïpjjesa ukwa uñji.

18. ¿Kunatsa paciencianïñatak chʼamachasiñasa?

¹⁸ Judá chachan sarnaqäwipatjja, paciencianïñajj kunja wakiskirisa ukwa yateqaraksna. Jehová Diosajj promesanakap phoqapuniwa, ukampis janiw jiwasan amuyusarjamasa ni amtasarjamas ukanak phoqkiti. Ak amtañäni: Judá tribunkirinakajja, janiw Diosan markaparojj jankʼak pʼeqtʼañ qalltapkänti. Antisas taqe chuymaw Jehová Diosajj uttʼaykäna uka pʼeqtʼirinakar apoyapjjäna, Leví tributäkäna uka Moisesarusa, Efraín tributäkäna uka Josué chacharusa, Benjamín tributäkäna uka Saúl reyirus jan jaytjasaw apoyapjjäna. Jiwasajj Judá tribunkirinakatwa yateqasiñasaraki, khitinakarutï Jehová Diosajj markapar irpañapatak uttʼayki ukanakarojj taqe chuymaw apoyañasa (Heb. 6:12).

19. Jacobojj janïr jiwkasajj kunanaktï arskäna ukajja, ¿kunsa Jehová Diosat yatichistu?

¹⁹ Jacobojj janïr jiwkasajj kunanaktï arskäna ukanakat ¿kunsa yateqsna? “Diosajj janiw kunjamtï mä jaqejj maynir uñjki ukham uñjkiti”, ukwa nayraqatajj yateqtanjja (1 Sam. 16:7). Maysa toqet akanakwa yateqaraktanjja: Diosajj wali paciencianiwa, perdonañatakis jankʼakirakiwa. Maynin jan wali luratanakap uñjasajj janiw kusisitäkiti, ukampis jupajj janiw taqenin perfectöñas suykiti. Khitinakatï sinti jachʼa juchanak lurawayapjjatapat taqe chuym arrepentisipjje, kunatï cheqapäki uk lurañatak chʼamachasipjjaraki ukhajja, Diosajj jupanakar perdoniwa, bendisirakiwa. Jutïr yatichäwinjja, Jacobojj mayni kimsaqallqo yoqanakaparojj kamsarakïnsa uka toqetwa yatjjataskañäni.