Jilïr jilat kullakanakajj congregacionan wali valoranïpjjewa

Inas jumajj uka kullakjam uñjasiraksta, edadanëjjatam laykojj inas nayrjam taqe kun jan lurañ puedjjstati. Walja maras Jehová Diosar jan jitheqtas serviwaystajja, Jehová Diosar jan nayrjam servitam amuyasisajj inas desanimasiraksta. ¿Jan ukham amuyasiñatakejj kunas yanaptʼiristam?

¿KUN LURAÑAMSA JEHOVÁ DIOSAJJ MUNI?

Akham jisktʼasim: “¿Kun lurañajsa Jehová Diosajj muni?” sasa. Deuteronomio 6:5 textojj akham siwa: “Jehová Diosamarojj taqe chuymamampi, taqe almamampi, taqe chʼamamampi munasiñamawa” sasa. Uka arunakajj wal chuymachtʼistu. ¿Kunatsa ukham sistanjja?

Uka textorjamajja, puedkta ukarjam jupar servisma ukwa Jehová Diosajj muni. Uk amuyañajja mayninakampi jan igualayasiñatakiw yanaptʼätam, kuntï nayrajj lurirjamäkayäta uk amtasisajj juma pachpa jan igualayasiñatakiw yanaptʼarakïtam.

Waynäskayäta jan ukajj tawaqöskayäta ukhajj chʼamamarjam qhawqtï lurañ puedkayäta ukwa Jehová Diosar servisajj lurpachayätajja. Jichhajj kunanaktï lurañ puedkta ukarjam lurañatakiw chʼamachasiskaraktajja. Ukhamajj waynäskayäta jan ukajj tawaqöskayäta ukhajj puedkayäta ukarjamaw Jehová Diosar serviyätajja, jichhajj uka pachparakwa luraskaraktajja.

MAYNINAKAROJJ WAL YANAPTʼASMA

“Edadanëjjatajat janiw uk lurañ puedjjti” sañat sipansa, kunanaktï lurañ puedkta uka toqenakatwa pienstʼañama. Jilïrëjjasajj akwa lurasma:

Experienciamampiw mayninakarojj yanaptʼasma. Diosan pä servirinakapajj kamsapjjänsa uk amuytʼapjjañäni:

David reyejj akham sänwa: “Nayasti waynäskayätwa, jichhasti awkëjjtwa, ukampis cheqap sarnaqer jaqerojj janiw ni maynirusa apanukut uñjkti, janirakiw wawanakaparus tʼantʼa thaqaskir uñjkti” sasa (Sal. 37:25).

Josué chachajj akham sänwa: “Jichhajj niyaw jiwañampëjjta, jumanakajj taqe chuymamampi, taqe almamampiw sum yatipjjtajja, kuntï Jehová Diosamajj jumanakar sapkayätam taqe uka suma arunakapajj phoqasïnwa. Jumanakatakejj taqpachaw phoqasïna, janiw ni mayas jan phoqaskänti” sasa (Jos. 23:14).

Kuntï Davidampi Josué chachampejj sapkäna ukajj cheqäskapunïnwa. Kuna laykutejj jan jitheqtas Jehová Diosar walja maranak servisajja, taqe ukanakwa uñjawayapjjäna. Ukhamajj jupanakajj razonampiw parlapjjäna. Jumajj walja maranak jakatamat ukhamarakiw experienciamampejj mayninakar yanaptʼasma.

Jehová Diosar walja maranak serviñajj kunjamsa yanaptʼawaytam ukat kuna bendicionanaksa katoqawayta ukanakatwa mayninakarojj parlasma. ¿Kunjamsa Diosajj markapar yanaptʼawayi uk uñjirïtati? Ukhamächi ukhajja, ukanakwa mayninakarojj cuenttʼasma. Uk istʼañajj mayninakarojj wal chʼamañchtʼani, jumas kusisitaw jikjjatasirakïta (Rom. 1:11, 12).

Maysa toqetjja, tantachäwinakar sarasaw mayninakar chʼamañchtʼarakisma, puedsta ukhajja tantachäwinakatakejj Salonaruw sarasma. Ukham lurasajj janiw mayninakaruk chʼamañchtʼkätati, jumarus yanaptʼarakïtamwa. Qalltan parlaniwayktan uka Connie kullakajj akham siwa: “Tantachäwinakar sarañajja, jan aynachtʼañatakiw yanaptʼitu. Salonankasajj qhawqsa jilat kullakanakajj munasipjjetu uk uñjta ukhajja, janiw llakinakajats amtaskti, nayas qhawqsa jupanakar munasta uk uñachtʼayañatakejj regalonakwa churarakta. Jilat kullakanakamp chik Jehová Diosar serviñatakiw chʼamachasirakta” sasa.

JEHOVÁ DIOSAJJ KUNTÏ LURKTA UK WALI VALORANITWA UÑJI

Biblianjja Diosan walja servirinakapatwa parli, janisay nayrjam taqe kuns lurirjamäjjapjjchïnjja, Jehová Diosajj jupanakarojj munasiskakïnwa. Jupanakat maynïrejj Simeón chachänwa, jupajj wali jilïrëjjäna ukhajja, Jesusarojj asu wawäkäna ukhaw uñjäna. Templor sapa kuti sarkäna ukhajja, kunjamsa waynanakajj luräwinakap phoqasipkäna uk sum uñjpachäna. ¿Uk uñjasajj kunsa amuypachäna? Edadanëjjataj laykojj janjamakiw Jehová Diosajj valoranit uñj-jjetuti sasin inas amuychïna. Ukampis janiw ukhamäkänti, Jehová Diosajj jupatjja, ‘cheqapar sarnaqeri ukhamarak Dios chuyma jaqewa’ sasaw säna. Ukatwa Jesusarojj asu wawäkasin uñjayäna. Ukat Jesusajj Mesiasäniwa sasin mä profecía arsuyarakïna (Luc. 2:25-35). Janiw jilïrëjjatapak Jehová Diosajj uñjkänti, jan ukasti qhawqsa jupar confiyäna ukwa uñjäna. “Espíritu santos jupjjankarakïnwa”.

Jumatï jilïrëjjsta ukhajja, Jehová Diosajj jupar taqe chuym servitam wali valoranitwa uñjaskaki. Diosajj janiw kuntï maynejj jan churirjamäki uk suykiti, jan ukasti “qhawqhatï maynin utjki ukarjam churañapwa jupajj suyi”, servirinakapajj ukham lurapki ukhajj jupajj wal kusisi (2 Cor. 8:12).

Ukhamajj kunanaktï jumajj lurañ puedkta ukanak lurañatak chʼamachasim. Sañäni, jukʼa tiempokïpasa, kunjamanakatsa jumajj predicasma uka toqenakat amuytʼam. Jilat kullakanakar celularat jawsasa jan ukajj mä nota qellqtʼasaw chʼamañchtʼarakisma. Niyakejjay Jehová Diosar walja maranak serviwayjjstajja, arunakamajj wal jupanakar chʼamañchtʼaspa.

Janisay chʼamanëjjstajja, Jehová Diosar serviskakismawa. Uk sum amuytʼañatakejj “Jan jiwayasiñapatakiw yanaptʼäna” sat recuadronjja, África oriental toqenkir mä jilïr kullakan experienciap liytʼasma.

Walja maranak Jehová Diosar jan jitheqtas servitamajja, mayninakarojj wal chʼamañchtʼaspa. Jan waltʼäwinakan aguantas Jehová Diosar servitamajj wali yateqaskayawa. Hebreos 6:10 texton uñstki uka arunak jan armasimti, ukan akham siwa: “Diosajj cheqapar uñjir Diosawa, jupajj janiw luratanakamatsa ni sutipar munasipjjatam uñachtʼayapjjatamats armaskiti, ukanakjja santo jilatanakar jichhakam servisaw uñachtʼayapjjtajja” sasa.

MAYNINAKAR YANAPTʼASKAKIÑATAK CHʼAMACHASIM

“Jilïr jaqenakajj mayninakar yanaptʼasajj wali ocupatäpjje ukhajja, jukʼamp maranakwa jakapjje. Janirakiw sint usuntapkiti, ratukiw pienstʼapjjaraki” sasaw yatjjatatanakajj sapjje.

Cheqas mayninakar yanaptʼañatak chʼamachasisipkchinisa, jilïrëjjapjjatap laykojj jan walinakan uñjasisipkakiniwa. Jehová Diosan Reinopakiw juch chhaqtayani, kuna laykutejj jucha kawsaw jilïrkipstañasa jiwañasa utji (Rom. 5:12).

Taqe kunanaktï Jehová Diosar serviñatak lurkta ukanakajja, suytʼäwimar jukʼamp confiyañataki ukat jan sint usuntañatakiw yanaptʼätam. Munat jilïr jilat kullakanaka, ak janipun armapjjamti: qhawqsa Jehová Diosar serviñatak chʼamachasipjjta uk wali valoranitwa jupajj uñji, qhawqsa Jehová Diosar confiyapjjta uk uñjasajj jilat kullakanakajj wal munasipjjaraktamjja.