Фәсил 33
Јешаја пејғәмбәрин сөзләри јеринә јетир
ФӘРИСЕЈЛӘРИН вә һиродчуларын ону өлдүрмәк үчүн план гурдугларыны биләндә Иса шаҝирдләри илә Галилеја ҝөлүнә ҝедир. Бүтүн Фәләстиндән вә диҝәр бөлҝәләрдән ҹамаат бураја, Исанын јанына ахышыр. О, хејли хәстәни сағалдыр вә буна ҝөрә дә ағыр хәстәликдән әзаб чәкәнләр она тохунмаға ҹан атыр.
Адам әлиндән тәрпәнмәк олмур. Иса шаҝирдләринә бир гајығы һазыр вәзијјәтдә сахламағы тапшырыр ки, издиһам ону сыхышдырмаға башласа, гајыға миниб саһилдән бир гәдәр аралансын вә орадан тәлим верә билсин. Бундан әлавә, о, гајыгла диҝәр саһилбоју јерләрә ҝедиб орадакы адамлара да көмәк едә биләр.
Исанын шаҝирди Матта Инҹилдә гејд едир ки, Мәсиһин фәалијјәти нәтиҹәсиндә «Јешаја пејғәмбәр васитәсилә дејилмиш» пејғәмбәрлик јеринә јетир вә һәмин сөзләри ситат ҝәтирир:
«Будур, Мәним сечдијим, үрәјимҹә олан әзиз гулум! Мән она мүгәддәс руһумдан верәҹәјәм вә о, милләтләрә әдаләтин нә олдуғуну изаһ едәҹәк. О мүбаһисә етмәјәҹәк, сәсини галдырмајаҹаг, күчәләрдә сәси чыхмајаҹаг. Һагг-әдаләти зәфәрә чатдырмајынҹа сынмыш гамышы әзмәјәҹәк, көзәрән пилтәни сөндүрмәјәҹәк. Милләтләр онун адына үмид бағлајаҹаг».
Шүбһәсиз ки, Аллаһа әзиз вә Онун үрәјинҹә олан шәхс Исадыр. О, сахта дини әнәнәләрлә үстүнә өртүк салынмыш һәгиги әдаләти инсанлар үчүн ашкар едир. Фәрисејләр Аллаһын ганунуну тәһриф етдикләриндән шәнбәдә һәтта хәстә адама көмәк етмирләр! Иса Аллаһын әдаләтини инсанлара ајдынлатмагла онлары бу әнәнәләрин буховундан азад едир. Мәһз буна ҝөрә дин рәһбәрләри ону өлдүрмәјә чалышырлар.
Бәс һансы мәнада о «мүбаһисә етмәјәҹәк, сәсини галдырмајаҹаг» вә күчәләрдә онун «сәси чыхмајаҹаг»ды? Адамлара шәфа верәндә Иса онлара бәрк-бәрк тапшырыр ки, «онун ким олдуғуну һеч кәсә демәсинләр». О истәмир ки, ҹамаат күчә вә мејданларда ҹар чәкиб ондан данышсын, ја да онун һаггында мүхтәлиф шајиәләр јајыб ону дилдән дилә салсын.
Иса һәмчинин сындырылмыш, ајаглар алтында тапданмыш гамыша бәнзәјән инсанлара тәсәлливериҹи хәбәр ҝәтириб. Бу адамлар сөнүб гуртармаг үзрә олан көзәрән пилтәни хатырладырлар. Бәли, Иса сынмыш гамышы әзмир, көзәрән пилтәни сөндүрмүр. Әксинә, о, һәлим инсанлара шәфгәт вә мәһәббәт ҝөстәрир, онлары дирчәлдир. Һәгигәтән дә, Иса Мәсиһ бүтүн милләтләр үчүн үмид гајнағыдыр! Матта 12:15—21; Марк 3:7—12; Јешаја 42:1—4.
▪ Иса мүбаһисә етмәдән вә күчәләрдә сәсини чыхармадан әдаләти неҹә бәјан едир?
▪ Кимләр сынмыш гамышы вә көзәрән пилтәни хатырладыр? Иса онларла неҹә рәфтар едир?