Фәсил 32
Шәнбә ҝүнү һансы ишләри ҝөрмәк олар?
БАШГА бир шәнбә ҝүнү Иса Мәсиһ Галилеја ҝөлүнүн јахынлығында бир синагога ҝәлир. Орада әли гурумуш бир адам вар. Дин хадимләри олан мирзәләр вә фәрисејләр Исанын бу адамы сағалдыб сағалтмајаҹағыны ҝөрмәк үчүн Исаны ҝөздән гојмурлар. Нәһајәт онлар сорушурлар: «Гануна ҝөрә шәнбә ҝүнү адам сағалтмаг олар?»
Јәһуди дин рәһбәрләри белә һесаб едирләр ки, шәнбә ҝүнү јалныз инсанын һәјаты тәһлүкә алтында оланда ону мүалиҹә етмәк олар. Мисал үчүн, онлар өјрәдирләр ки, шәнбә ҝүнү чыхмыш сүмүјү јеринә салмаг, јахуд бурхулмуш јери сарымаг гануна зиддир. Буна ҝөрә дә мирзәләрлә фәрисејләр Исаны тәгсирләндирмәјә бәһанә тапмаг үчүн бу суалы верирләр.
Иса онларын фикрини билир. Иса буну да јахшы билир ки, онларын шәнбә ҝүнү әмринә даир бахышлары ифратдыр вә Мүгәддәс Јазылара әсасланмыр. Бу сәбәбдән Иса онларын јанлыш мөвгеләринә гаршы чыхыр вә һәмин кишијә: «Дур, ортаја кеч», — дејир.
Иса мирзәләрә вә фәрисејләрә мүраҹиәт едир: «Аранызда елә адам вармы ки, бирҹә гојуну олса вә һәмин гојун шәнбә ҝүнү чалаја дүшсә, ону орадан чыхармасын?» Саһиби гојундан мәнфәәт ҝөтүрдүјүндән һејваны сәһәрә кими чалада сахламаз. Чүнки гојун хәстәләнсә, саһиби зәрәр чәкә биләр. Үстәлик, Мүгәддәс Јазыларда белә дејилир: «Салеһ инсан һәтта һејванларынын еһтијаҹыны дујар».
Сонра Иса мүгајисә едәрәк дејир: «Белә исә, ҝөрүн инсан гојундан нә гәдәр гијмәтлидир! Бәли, гануна ҝөрә шәнбә ҝүнү јахшы иш ҝөрмәк олар». Дин рәһбәрләри бу ҹүр мәнтигли вә мәрһәмәт долу дәлилин гаршысында аҹиз галыб сусурлар.
Иса онларын бу гәдәр дашүрәкли олдугларындан бәрк кәдәрләнир. О, гәзәблә онлары сүзүб шикәст адама дејир: «Әлини узат». Һәмин адам әлини узадыр вә әли дәрһал сағалыр.
Фәрисејләр, шикәст адамын әлинин сағалдығына севинмәк әвәзинә, чөлә чыхыб Исаны өлдүрмәк үчүн Һиродун ардыҹыллары илә бирҝә план гурурлар. Һиродчулар сијаси групдур, бу група дин хадимләри олан садукејләр дә дахилдир. Бу груп фәрисејләрлә ачыг-ашкар дүшмәнчилик едир, лакин Иса Мәсиһә гаршы чыхмаг үчүн онлар бирләширләр. Матта 12:9—14; Марк 3:1—6; Лука 6:6—11; Сүлејманын мәсәлләри 12:10; Чыхыш 20:8—10.
▪ Иса Мәсиһлә јәһуди дин рәһбәрләри арасында гаршыдурма неҹә башлајыр?
▪ Јәһуди дин рәһбәрләри шәнбә ҝүнүндә хәстә адамы сағалтмаға неҹә бахырлар?
▪ Иса Мәсиһ јанлыш фикирләри ифша етмәк үчүн һансы мәсәли чәкир?