Фәсил 31
Шәнбә ҝүнү сүнбүл дәрмәк олар?
БИР гәдәр сонра Иса Мәсиһ шаҝирдләри илә бирҝә Јерусәлимдән чыхыб Галилејаја гајыдыр. Баһар фәслидир вә зәмиләрдә тахыл јетишиб. Шаҝирдләр аҹ олдугларындан сүнбүлләри дәрир вә овуб јејирләр. Онларын бу һәрәкәти ҝөздән јајынмыр, чүнки бу ҝүн шәнбәдир.
Бајаг Јерусәлимдә дин рәһбәрләри Исаны ҝуја Шәнбәјә аид әмри поздуғуна ҝөрә өлдүрмәк истәјирдиләр. Инди фәрисејләр бу иттиһамы ирәли сүрүрләр: «Бах, сәнин шаҝирдләрин шәнбә ҝүнү гадаған олунмуш иши ҝөрүрләр».
Фәрисејләр иддиа едирләр ки, сүнбүл дәрмәк вә сүнбүлү әлдә овмаг тахыл бичмәк вә дән үјүтмәк кими бир ишдир. Дин рәһбәрләринин гојдуғу мәһдудлашдырыҹы гајдалар уҹбатындан Шәнбә руһани ҹәһәтдән тәравәтләндириҹи, хош ҝүн дејил, үзүҹү бир әнәнә олмушдур. Буна ҝөрә дә Иса Мәсиһ Мүгәддәс Јазылардан нүмунәләр ҝәтирәрәк ҝөстәрир ки, Шәнбә һаггындакы гануну бу ҹүр сәрт чәрчивәјә салмаг Јеһова Аллаһын нијјәтинә зиддир.
Иса дејир ки, гәдимдә Давуд вә јолдашлары аҹанда Аллаһын евинә ҝириб Аллаһа гурбан ҝәтирилмиш чөрәкләри јемишдиләр. Јеһова Аллаһын өнүндән ҝөтүрүлүб јениләри илә әвәз олунмуш бу чөрәкләри, адәтән, каһинләр үчүн сахлајырдылар. Лакин Давуд вә онун јолдашлары чәтин вәзијјәтдә олдугларындан бу чөрәкләри једикләринә ҝөрә иттиһам олунмадылар.
Сонра Иса диҝәр нүмунә чәкир: «Ганунда охумамысыныз ки, шәнбә ҝүнләри каһинләр мәбәддә шәнбә ҝүнүнү позсалар да ҝүнаһкар сајылмырлар?» Бәли, мәбәддә хидмәт едән каһинләр гурбанлары тәгдим етмәклә әлагәдар шәнбә ҝүнү дә һејван кәсмәли вә диҝәр ишләри ҝөрмәлидирләр. Иса дејир: «Буну билин ки, бурада мәбәддән дә бөјүк бир адам дуруб».
Иса фәрисејләри мәзәммәт едәрәк әлавә едир: «Еһ, әҝәр сиз: “Мән гурбан јох, мәрһәмәт истәјирәм”, — сөзләринин мәнасыны баша дүшсәјдиниз, ҝүнаһсыз адамлары мәһкум етмәздиниз». О, сөзүнү белә јекунлашдырыр: «Чүнки инсан Оғлу шәнбә ҝүнүнүн Ағасыдыр». Иса бу сөзләрлә нә демәк истәјир? О, өзүнүн әмин-аманлыг ҝәтирәҹәк сәмави Падшаһлыгда миниллик һакимијјәтини нәзәрдә тутур.
Артыг 6000 илдир ки, бәшәријјәт Шејтан Иблисин әсарәтиндән әзаб чәкир, зоракылыг вә мүһарибәләр баш алыб ҝедир. Анҹаг Бөјүк Шәнбә, јәни Иса Мәсиһин һакимијјәти инсанлар үчүн бу көләликдән азадлыг вә әзаб-әзијјәтдән раһатлыг вахты олаҹаг. Матта 12:1—8; Левилиләр 24:5—9; 1 Шамуел 21:1—6; Сајлар 28:9; Һушә 6:6.
▪ Иса Мәсиһин шаҝирдләри нәдә тәгсирләндирилир вә Иса буна неҹә ҹаваб верир?
▪ Иса фәрисејләрин нәдә јанылдыгларыны ҝөстәрир?
▪ Иса һансы мәнада «шәнбә ҝүнүнүн Ағасыдыр»?