Фәсил 56

Адамы нә мурдар едир?

ИСА МӘСИҺӘ гаршы мүгавимәт ҝүҹләнир. Хејли шаҝирди ондан ајрылыб. Үстәлик, 31-ҹи илин Пасха бајрамында Јерусәлимдә Исаны өлдүрмәк истәјән јәһудиләр һәлә дә бу фикирләриндән дашынмајыблар.

Инди исә 32-ҹи илин Пасхасыдыр. Аллаһын тәләбинә ҝөрә, һамы бу бајрамда иштирак етмәли иди, јәгин ки, Иса да бунун үчүн Јерусәлимә ҝедир. Амма бу дәфә о, чох еһтијатлыдыр, чүнки һәјаты тәһлүкә алтындадыр. Сонра о, Галилејаја гајыдыр.

Еһтимал ки, Иса инди Капернаһумдадыр. Фәрисејләрлә мирзәләр ону ҝөрмәк үчүн Јерусәлимдән дуруб бура ҝәлирләр. Онлар ону дини гајдалары позмагда иттиһам етмәк үчүн бәһанә ахтарырлар. «Сәнин шаҝирдләрин дәдә-бабаларымызын гојдуғу адәт-әнәнәни нијә позурлар? — дејә ондан сорушурлар. — Мисал үчүн, онлар јемәкдән габаг әлләрини јумурлар». Әслиндә, дирсәјә гәдәр јујунмаг Аллаһын тәләби дејил, амма фәрисејләр бу ајинә риајәт етмәмәји ҹидди тәгсир сајырлар.

Иса онларын иттиһамына ҹаваб вермир, бунун әвәзиндә ҝөстәрир ки, онлар өзләри Аллаһын ганунуну гәсдән вә кобудҹасына позурлар. «Бәс сиз нијә өз әнәнәләринизә ҝөрә Аллаһын әмрини позурсунуз? — о сорушур. — Мисал үчүн, Аллаһ белә дејиб: “Атана вә анана һөрмәт ет” вә “Атасына вә ја анасына пис сөз дејән мүтләг өлдүрүлмәлидир”. Сиз исә дејирсиниз: “Атасына вә ја анасына: «Сәни сахламаг үчүн нәјим варса, һамысы Аллаһа һәср едилмиш бәхшишдир», — дејән, атасына һөрмәт етмәјә биләр”».

Һәгигәтән дә, фәрисејләр өјрәдирләр ки, пул, әмлак вә һәр һансы бир шеј бәхшиш кими Аллаһа һәср едиләрсә, бунлар мәбәдә аид олур вә онлары башга ҹүр истифадә етмәк олмаз. Лакин бәхшиш ону һәср едән адамда галыр. Мисал үчүн, оғул дејә биләр ки, онун пулу вә ја әмлакы «гурбанлыгдыр», јәни Аллаһа, јахуд Аллаһын мәбәдинә һәср едилмиш бәхшишдир. Беләликлә, о, еһтијаҹ ичиндә олан гоҹа ата-анасына јардым етмәкдән бојун гачырыр.

Фәрисејләрин Аллаһын ганунуну белә һијләҝәрҹәсинә тәһриф етмәләри һаглы олараг Исада гәзәб доғурур. О дејир: «Бунунла, сиз өз әнәнәниздән өтрү Аллаһын сөзүнү һечә ендирмисиниз. Еј икиүзлүләр, Јешаја сизин һаггынызда јахшы пејғәмбәрлик етмишдир: “Бу халг Мәнә дилдә һөрмәт едир, амма үрәкләри Мәндән чох узагдыр. Онлар Мәнә әбәс јерә ибадәт едирләр, чүнки онларын өјрәтдикләри ади инсан әмрләридир”».

Ҝөрүнүр, ҹамаат фәрисејләри Исаја суал вермәк үчүн габаға бурахыб. Исанын бу ҹидди иттиһамы гаршысында фәрисејләр сөз тапа билмәјәндә Иса ҹамааты чағырыб дејир: «Мәнә гулаг асын вә сөзләрими дәрк един. Елә бир шеј јохдур ки, инсанын ағзындан кечиб ону мурдар етсин. Инсанын ағзындан кечән јох, дахилиндән чыхан ону мурдар едир».

Бир гәдәр сонра Иса шаҝирдләри илә бир евә ҝирәндә онлар сорушурлар: «Хәбәрин вар ки, фәрисејләр сәнин сөзләриндән инҹијибләр?»

Иса белә ҹаваб верир: «Сәмави Атамын әкмәдији һәр бир битки көкүндән гопарылаҹаг. Гој инҹисинләр. Онлар кор бәләдчиләрдир. Әҝәр кор кора бәләдчилик едәрсә, икиси дә гујуја дүшәр».

Петер о бири шаҝирдләрин адындан хаһиш едир ки, Иса адамы нәјин мурдар етдијини ајдынлашдырсын. Иса буна тәәҹҹүбләнир: «Јәни сиз дә һәлә баша дүшмәмисиниз? Мәҝәр билмирсиниз ки, ағыза ҝирән һәр шеј бағырсаглардан кечиб бајыра чыхыр? Анҹаг ағыздан чыхан шејләр үрәкдән ҝәлир. Бах, бунлар адамы мурдар едир. Мисал үчүн, пис фикирләр, гәтл, зина, ҹинси әхлагсызлыг, оғурлуг, јалан шаһидлик, күфр үрәкдән чыхыр. Адамы белә шејләр мурдар едир. Анҹаг јујулмамыш әллә чөрәк јемәк инсаны мурдар етмир».

Иса һеч дә ҝиҝијенанын әлејһинә дејил. О демир ки, хөрәк биширәндә вә ја јемәкдән габаг әлләри јумаг лазым дејил. Хејр, Иса дин рәһбәрләринин ријакарлығыны ифша едир, чүнки онлар Мүгәддәс Јазыларда олмајан тәләбләрин үстүндә дурараг Аллаһын салеһ ганунларындан һијләҝәрҹәсинә бојун гачырырлар. Бәли, инсаны пис ишләр мурдар едир вә Иса ҝөстәрир ки, онлар инсанын гәлбиндән чыхыр. Јәһја 7:1; Ганунун тәкрары 16:16; Матта 15:1—20; Марк 7:1—23; Чыхыш 20:12; 21:17; Јешаја 29:13.

▪ Иса һансы мүгавимәтлә гаршылашыр?

▪ Фәрисејләр Исаны нәдә иттиһам едирләр вә Иса онларын Аллаһын ганунуну гәсдән поздугларыны неҹә ҝөстәрир?

▪ Исанын дедијинә ҝөрә, әслиндә адамы нә мурдар едир?