Фәсил 95

Бошанма мәсәләси вә ушаглара мәһәббәт

ИНДИ ерамызын 33-ҹү илидир. Иса Мәсиһ Пасха бајрамыны гејд етмәк үчүн шаҝирдләри илә Јерусәлимә ҝедир. Онлар Иордан чајыны кечиб јолларыны Переја бөлҝәсиндән салырлар. Иса бир нечә һәфтә әввәл дә Перејада иди. Анҹаг һәмин вахт досту Лазар хәстәләндијиндән ону Јәһудејаја чағырдылар. Кечән сәфәр Перејада оларкән Иса фәрисејләрлә бошанма һаггында сөһбәт етмишди, инди фәрисејләр јенидән бу мәсәләнин үзәринә гајыдырлар.

Бошанма мәсәләсинә ҝәлдикдә, фәрисејләр арасында мүхтәлиф бахышлар мөвҹуддур. Муса пејғәмбәр демишдир ки, гадында «ләјагәтсиз бир шеј» оларса, киши ону бошаја биләр. Бәзиләри бунун јалныз хәјанәтә аид олдуғуну дүшүнүрләр. Диҝәрләринин фикринҹә исә, һәтта ән хырда сәһв «ләјагәтсиз бир шеј» сајылыр. Фәрисејләр Исаны јохламаг мәгсәдилә сорушурлар: «Киши истәнилән сәбәбә ҝөрә арвадыны бошаја биләр?» Онлар әминдирләр ки, Иса неҹә ҹаваб верирсә-версин, фәрисејләрин һамысы онун фикри илә разылашмајаҹаг.

Лакин Иса бу суала мәһарәтлә ҹаваб верир. Онун ҹавабы инсан дүшүнҹәсинә јох, никаһын Банисинин нијјәтинә әсасланыр. О дејир: «Мәҝәр охумамысыныз ки, Јарадан башланғыҹдан онлары киши вә гадын олараг јарадыб вә белә дејиб: “Буна ҝөрә дә инсан өз ата-анасындан ајрылыб арвадына бағланаҹаг вә икиси бир бәдән олаҹаг”? Беләликлә, онлар артыг ики јох, бир бәдәндир. Буна ҝөрә дә Аллаһын бир бојундуругда бирләшдирдијини гој һеч кәс ајырмасын».

Иса Аллаһын никаһла бағлы әзәли нијјәтини ҝөстәрир: әрлә арвад бир-биринә бағланмалы, јәни бошанмамалыдырлар. «Онда Муса нәјә ҝөрә бошанмаг үчүн арвада бошанма кағызы вермәји бујуруб?» — дејә фәрисејләр етираз едирләр.

Иса ҹаваб верир: «Муса дашүрәкли олдуғунуза ҝөрә арвадынызы бошамағы изин вермишди, һалбуки башланғыҹдан белә олмајыб». Доғрудан да, Аллаһ Еден бағында никаһы тәсис едәндә бу гурулушда бошанмаја јер ајырмамышды.

Сонра Иса фәрисејләрә дејир: «Билин вә аҝаһ олун, ким арвадыны онун ҹинси әхлагсызлығына [јунанҹа порнеја] ҝөрә дејил, башга сәбәбә ҝөрә бошајыб өзҝәсинә евләнирсә, зина едир». Бунунла о ҝөстәрир ки, Аллаһ јалныз ҹинси әхлагсызлыға ҝөрә бошанмаға иҹазә верир.

Шаҝирдләр никаһын даими иттифаг олдуғуну вә бошанмаг үчүн јалныз бир әсас олдуғуну баша дүшүб дејирләр: «Әҝәр иш беләдирсә, онда евләнмәмәк даһа јахшыдыр ки!» Аилә гурмаг истәјән адам бу иттифагын әбәди олдуғуну дәрк етмәли вә никаһа ҹидди јанашмалыдыр.

Сонра Иса субајлыгдан сөз салыр. О дејир ки, бәзи оғланларын «бәдәниндә анаданҝәлмә гүсур» олур вә онлар евләнә билмирләр, чүнки «ҹинси јахынлыға гадир дејилләр». Бәзиләрини инсанлар вәһшиҹәсинә «ҹинси јахынлыға јарарсыз едибләр». Еләләри дә вар ки, евләнмәк вә ҹинси јахынлыг етмәк истәјини боғараг субај галыр, өзләрини бүтүнлүклә Падшаһлығын ишләринә һәср едирләр. Иса һәмин фикри белә тамамлајыр: «Бу ҹүр јашамағы баҹаран, гој бу ҹүр јашасын».

Бу вахт адамлар ушагларыны Исанын јанына ҝәтирирләр. Амма шаҝирдләр, Иса бош јерә нараһат олмасын дејә, ушаглары данлајыб ҝери гајтармаг истәјирләр. Лакин Иса дејир: «Гојун ушаглар јаныма ҝәлсин, онлара мане олмајын, чүнки сәмави падшаһлыг беләләринә мәхсусдур».

Иса ҝөзәл ибрәт дәрси верир: әҝәр Аллаһын Падшаһлығында олмаг истәјириксә, ушаг кими тәвазөкар олмалы вә өјрәнмәјә ҹан атмалыјыг. Һәмчинин Исанын нүмунәсиндән ҝөрүрүк ки, һәр биримиз, хүсусилә дә валидејнләр, ушаглара вахт ајырмалыјыг. Сонра Иса ушаглары гуҹаглајыб, онлара хејир-дуа верир. Беләҹә, о, ушаглара өз мәһәббәтини ҝөстәрир. Матта 19:1—15; Ганунун тәкрары 24:1; Лука 16:18; Марк 10:1—16; Лука 18:15—17.

▪ Бошанма мәсәләси илә бағлы фәрисејләр арасында һансы мүхтәлиф бахышлар вар вә бу сәбәбдән онлар Исаны неҹә сынајырлар?

▪ Иса фәрисејләрә неҹә ҹаваб верир вә бошанма үчүн һансы јеҝанә сәбәб вар?

▪ Нәјә ҝөрә Исанын шаҝирдләри «евләнмәмәк даһа јахшыдыр» дејирләр вә Иса һансы мәсләһәти верир?

▪ Исанын ушагларла рәфтарындан нә өјрәнирик?