Фәсил 107

Тој зијафәти мәсәли

ИСА МӘСИҺ данышдығы ики мәсәллә мирзәләр вә бөјүк каһинләри ифша едир, онлар да ону өлдүрмәк истәјирләр. Лакин Исанын сөзү бунунла битмир. О, онлара даһа бир мәсәл данышыр:

«Сәмави падшаһлыг оғлу үчүн тој едән бир падшаһа бәнзәјир. Падшаһ тој зијафәтинә дәвәт етдији гонаглары чағырмаг үчүн нөкәрләрини ҝөндәрди. Лакин гонаглар ҝәлмәк истәмәдиләр».

«Падшаһ» — Јеһова Аллаһ Өз Оғлу Иса Мәсиһ үчүн «тој едир». 144 000 мәсһ олунмушдан ибарәт ҝәлин синфи нәһајәтдә Иса илә ҝөјдә бирләшәҹәк. Падшаһын тәбәәләри б. е. ә. 1513-ҹү илдә Ганун әһдинә дахил олараг «каһинләр сәлтәнәти» олмаг шәрәфинә лајиг ҝөрүлән Исраил халгыдыр. Тоја илк дәвәт аланлар да онлардыр.

Һәмин дәвәт илк дәфә ерамызын 29-ҹу илинин пајызындан, Иса шаҝирдләри илә (падшаһын нөкәрләри) тәблиғ етмәјә башлајан вахтдан, 33-ҹү илә гәдәр ҝөндәрилир. Лакин исраиллиләр бу дәвәти гәбул етмирләр. Онда Аллаһ бу халга даһа бир имкан верир. Иса дејир:

«Падшаһ бу дәфә башга нөкәрләри ҝөндәрди вә онлара деди: “Ҝедин гонаглара белә дејин: «Наһары һазырламышам, ҹөнҝәләр вә бәсләнмиш һејванлар артыг кәсилиб, һәр шеј һазырдыр. Зијафәтә тәшриф бујурун»”». Икинҹи дәфә бу дәвәт ерамызын 33-ҹү илинин Әллинҹи ҝүн бајрамында Исанын давамчыларынын үзәринә мүгәддәс руһ енән вахтдан 36-ҹы илә гәдәр сәсләнир. Бу, Исраил халгы үчүн сонунҹу дәвәт олур.

Анҹаг исраиллиләрин әксәријјәти бу дәвәти дә тәкәббүрлә рәдд едирләр. Иса данышыр: «Лакин онлар дәвәти веҹләринә алмадылар. Кимиси өз тарласына, кимиси дә алверинин далынҹа ҝетди. Галанлары исә нөкәрләри тутуб тәһгир етдиләр вә өлдүрдүләр. Падшаһ бәрк гәзәбләнди. Ордусуну ҝөндәриб гатилләри мәһв етди, шәһәрләрини дә јандырды». Бу сөзләр ерамызын 70-ҹи илиндә јеринә јетди. О заман Рома ордусу Јерусәлими дармадағын едиб «гатилләри мәһв етди».

Иса сөзүнә давам едир: «Сонра исә [падшаһ] нөкәрләринә деди: “Тој зијафәти һазырдыр, лакин гонаглар мәҹлисдә иштирак етмәјә лајиг олмадылар. Буна ҝөрә дә шәһәрдән чыхан јоллара ҝедин вә тапдығыныз адамларын һамысыны зијафәтә чағырын”». Нөкәрләр бу әмри иҹра едирләр вә тојхана гонагларла долур.

Шәһәр кәнарындакы јоллардан гонагларын топланмасы ерамызын 36-ҹы илиндә башлајыр. Јәһуди олмајанлардан дәвәти илк гәбул едән ромалы забит Корнили вә онун аиләси олур. Дәвәти рәдд едәнләри әвәз едән гејри-јәһудиләрин топланмасы зәманәмизә гәдәр давам едир.

Мәһз бизим зәманәдә тојхана гонагларла долур. Иса сонракы һадисәләри белә тәсвир едир: «Падшаһ гонаглара бахмаг үчүн ичәри ҝирди. Бирдән онун ҝөзүнә тој либасы ҝејмәмиш адам саташды. Падшаһ она деди: “Гардаш, сән нә үчүн бура тој либасында ҝәлмәмисән?” О динмәди. Онда падшаһ нөкәрләринә әмр етди: “Бунун әл-ајағыны бағлајыб чөлә, зүлмәтә атын. О, орада һөнкүр-һөнкүр ағлајыб дишләрини гыҹајаҹаг”».

«Тој либасы ҝејмәмиш адам» Христиан дүнјасынын үзвләрини тәмсил едир. Аллаһ һеч вахт онларда руһани Исраилә хас олан кејфијјәтләр ҝөрмәјиб; һеч вахт онлары Падшаһлығын һәмварисләри кими мүгәддәс руһла мәсһ етмәјиб. Буна ҝөрә дә онлар чөлә, зүлмәтә атылыб мәһв едиләҹәкләр.

Иса бу мәсәли белә тамамлајыр: «Чүнки дәвәт едиләнләр чох, сечиләнләр исә аздыр». Бәли, Исраил халгындан чохлары Мәсиһин ҝәлини синфинә дахил олмаға чағырылды, лакин онлардан чох аз адам бу дәвәти гәбул етди. Сәмави дәвәти алан 144 000 нәфәрин әксәријјәтини гејри-јәһудиләр тәшкил едир. Матта 22:1—14; Чыхыш 19:1—6; Вәһј 14:1—3.

▪ Тоја илк дәвәти аланлар кимләрдир вә онлар нә вахт бу дәвәтә лајиг ҝөрүлдүләр?

▪ Бу дәвәт илк дәфә нә вахт сәсләнди вә ону сәсләндирән «нөкәрләр» кимләрдир?

▪ Бу дәвәт икинҹи дәфә нә вахт сәсләнди вә бундан сонра кимләр дәвәт олунмаға башлады?

▪ «Тој либасы ҝејмәмиш адам» кимләри тәмсил едир?

▪ Чохлу сајда дәвәт едилиб, аз сајда сечиләнләр кимләрдир?