Фәсил 13
Јеһованын тахты гаршысындакы бөјүк издиһам
1. а) Аллаһын кечмишдә јашамыш хидмәтчиләри вә 144 000 нәфәр өз мүкафатыны нә вахт алаҹаглар? б) Бөјүк издиһамы нә ҝөзләјир?
ҺАБИЛДӘН тутмуш Вәфтизчи Јәһјаја гәдәр Јеһованын бүтүн садиг хидмәтчиләринин һәјатында әсас јери Аллаһын ирадәсини јеринә јетирмәк тутурду. Дүздүр, бу адамларын һамысы чохдан өлүб, амма онлар Аллаһын јени дүнјасында дирилиб әбәди јашајаҹаглар. Аллаһын сәмави Падшаһлығында Мәсиһлә бирҝә һакимијјәт сүрәҹәк 144 000 нәфәр дә өз мүкафатыны алмаздан әввәл өлмәлидир. Лакин Вәһј 7:9 ајәсиндә ҝөстәрилдији кими, бу ахыр ҝүнләрдә бүтүн милләтләрдән јығылан вә јер үзүндә әбәди јашамаға үмид бәсләјән ‘бөјүк издиһам’ өлүм ҝөрмәјәҹәкдир. Бәс сән бу бөјүк издиһамын арасындасан?
Бөјүк издиһам кими тәмсил едир
2. Вәһј 7:9 ајәсиндәки ‘бөјүк издиһамын’ кими тәмсил етдији ҝет-ҝедә неҹә ајдынлашырды?
2 Јеһованын хидмәтчиләри 1923-ҹү илдә баша дүшдүләр ки, Матта 25:31-46 ајәләриндә Исанын дедији ‘гојунлар’ вә Јәһја 10:16 ајәсиндәки ‘башга гојунлар’ јер үзүндә әбәди јашамаға үмид едән инсанлардыр. Даһа сонра 1931-ҹи илдә ајдын олду ки, Језекел 9:1-11 ајәләриндәки алынларына ишарә гојулмуш инсанлар да јер үзүндә јашамаға үмид бәсләјәнләрдир. 1935-ҹи илдә исә бәлли олду ки, бөјүк издиһам Исанын дедији «башга гојунлар» синфинә аиддир. Аллаһын бәјәндији бөјүк издиһама бу ҝүн милјонларла адам дахилдир.
3. «Тахтын гаршысында дурмаг» ифадәси нәјә ҝөрә ҝөјләр синфинә ишарә етмир?
3 Вәһј 7:9 ајәсиндә бөјүк издиһамын ҝөјдә олдуғу дејилмир. ‘Тахтын гаршысында дурмаг’ үчүн мүтләг ҝөјдә олмаг лазым дејил. Онлар садәҹә Аллаһын ҝөзү өнүндәдирләр (Мәзмур 11:4). Бөјүк издиһамын саја-һесаба ҝәлмәмәси онун ҝөјләр синфинә аид олмадығына дәлаләт едир. Вәһј 7:4-8 вә 14:1-4 ајәләриндә јазыланлардан фәргли олараг, бу групун сајы гејри-мәһдуддур. Һалбуки, јердән ҝөјә ҝөтүрүләҹәк инсанларын сајы 144 000 нәфәрдир.
4. а) Бөјүк издиһама хәтәр тохундурмајаҹаг «бөјүк мәшәггәт» нәдир? б) Вәһј 7:11, 12 ајәләриндән кимләрин бөјүк издиһамы мүшаһидә етдији вә онларла бирликдә Аллаһа ибадәт етдији мәлум олур?
4 Вәһј 7:14 ајәсиндә бөјүк издиһам һаггында белә дејилир: «Бунлар, о бөјүк мәшәггәтдән чыханлардыр». Онлар бәшәр тарихиндә баш вермиш ән бөјүк мүсибәтдән сағ чыхырлар (Матта 24:21). Хиласларына ҝөрә Аллаһа вә Мәсиһә миннәтдарлыгларыны билдирәндә ҝөјдә јашајан садиг варлыгларын һамысы онларла бирликдә нида едәҹәкләр: «Амин. Аллаһымыза әбәди бәрәкәт, иззәт, һикмәт, шүкран, һөрмәт, гүдрәт вә гүввәт олсун. Амин» (Вәһј 7:11, 12).
Хиласа лајиг ҝөрүләнләр
5. Бөјүк издиһамын сырасында олмаг үчүн нә тәләб едилдијини һарадан өјрәнмәк олар?
5 Бөјүк издиһамын бөјүк мәшәггәтдә сағ галмасы Јеһованын салеһ нормаларына ујғундур. Хилас олунаҹаг инсанларын сәҹијјәви хүсусијјәтләри Мүгәддәс Китабда ајдын тәсвир едилир. Она ҝөрә дә салеһлији севәнләрин һәјат тәрзи артыг индидән хиласа лајиг олмалыдыр. Онлардан нә тәләб олунур?
6. Бөјүк издиһамын үзвләрини нәјә ҝөрә гојунла мүгајисә етмәк олар?
6 Гојун мүлајим вә үзүјола һејвандыр. Иса ҝөјләр синфинә аид олмајан ‘башга гојунларынын’ олдуғуну дејәндә јер үзүндә әбәди јашамағы арзулајан вә онун тәлимләринә табе олмаг истәјән инсанлары нәзәрдә тутурду. «Гојунларым сәсимә гулаг асырлар, Мән дә онлары таныјырам, вә ардымҹа ҝәлирләр» (Јәһја 10:16, 27). Белә инсанлар Исанын дедији һәр шејә гулаг асыб әмәл едир вә онун шаҝирди олурлар.
7. Исанын давамчылары һансы кејфијјәтләри јетишдирмәлидирләр?
7 Исанын давамчыларындан һәр бири даһа һансы кејфијјәтләри јетишдирмәлидир? Аллаһын Кәламы ҹаваб верир: ‘Әввәлки јашајышыныза мәхсус олан көһнә мәнлији кәнара атын вә Аллаһын бәнзәјишинә ҝөрә һәгиги салеһлик вә мүгәддәсликлә јарадылмыш јени мәнлији ҝејинин’ (Ефеслиләрә 4:22-24). Исанын давамчылары Аллаһын хидмәтчиләринин бирлијини даһа да мөһкәмләндирән «мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг» кими кејфијјәтләр јетишдирирләр (Галатијалылара 5:22, 23).
8. Бөјүк издиһам садиг галығы дәстәкләмәклә һансы чәтинликлә үзләшир?
8 Бөјүк издиһам тәблиғ ишинә нәзарәт едән аз сајлы ҝөјләр синфинин нүмајәндәләринә көмәклик ҝөстәрир (Матта 24:14; 25:40). Башга гојунлар буна ҝөрә тәгиб олунаҹагларыны билирләр, чүнки ахыр ҝүнләрин башланғыҹында Иса Мәсиһ вә онун мәләкләри Шејтаны вә онун ҹинләрини ҝөјдән јерә атыблар. Шејтанын вә ҹинләрин јерә атылмасы јер үзүнә неҹә тәсир ҝөстәрир? «Јерә... вај олсун! Чүнки иблис, вахтынын аз олдуғуну биләрәк, бөјүк гәзәблә јаныныза енди» (Вәһј 12:7-12). Бу системин сону јахынлашдыгҹа, Шејтан Аллаһын хидмәтчиләрини даһа да шиддәтлә тәгиб едир.
9. Аллаһын хидмәтчиләри хош хәбәри нә дәрәҹәдә уғурла тәблиғ едирләр вә бу нәјин сајәсиндә мүмкүндүр?
9 Шиддәтли тәгибләрә бахмајараг, тәблиғ иши давам едир. Биринҹи Дүнја Мүһарибәсинин сонунда ҹәми бир нечә мин тәблиғчи вар идисә, инди онларын сајы милјонларладыр, чүнки Јеһова сөз вермишдир: «Сәнә гаршы ишләнән һеч бир силаһ ишә јарамајаҹаг» (Јешаја 54:17). Һәтта биринҹи әсрдә јашамыш јәһуди али мәһкәмәсинин үзвү етираф етмишди ки, Аллаһын ишини һеч ҹүрә сахламаг олмаз. О, фәрисејләрә мүраҹиәт едиб Исанын шаҝирдләри һаггында белә демишди: «Бу адамлардан әл чәкин вә онлары бурахын. Чүнки бу тәшәббүс вә бу һәрәкәт инсанлардан исә, јох олаҹагдыр; Лакин Аллаһдан исә, ону јох етмәјә сизин ҝүҹүнүз чатмаз. Һәтта Аллаһла савашанларын һалына дүшә биләрсиниз» (Һәвариләрин ишләри 5:38, 39).
10. а) Бөјүк издиһамын үзәриндәки «ишарә» нәји билдирир? б) Аллаһын хидмәтчиләринин ‘ҝөјдән ҝәлән сәсә’ гулаг асдыглары нәдән ҝөрүнүр?
10 Бөјүк издиһамын үзвләринин хиласы үчүн онларын үзәринә нишан гојулур (Језекел 9:4-6). Алынларындакы «ишарә» онларын Јеһоваја һәср олунуб Исанын шаҝирди кими вәфтиз олундугларыны вә Мәсиһә хас кејфијјәтләр јетишдирмәјә чалышдыгларыны нүмајиш етдирир. Ҝөјдән ҝәлән сәс Шејтанын үмумдүнја јалан дин империјасыны нәзәрдә тутараг дејир: «Еј халгым, орадан чыхын ки, онун ҝүнаһларына шәрик олмајасыныз вә онун бәлаларынын биринә дүчар олмајасыныз». Бөјүк издиһам бу сәсә гулаг асыр (Вәһј 18:1-5).
11. Бөјүк издиһамын үзвләри Јеһованын хидмәтчиләри олдугларыны неҹә нүмајиш етдирирләр?
11 Иса шаҝирдләринә һәмчинин демишди: «Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк» (Јәһја 13:35). Бу дүнјанын динләринин нүмајәндәләри исә әксинә, мүһарибәләрдә миллијәти башга олан һәмиманлыларыны өлдүрүрләр! Аллаһын Кәламында дејилир: ‘Кимин Аллаһын өвлады, кимин дә шејтанын өвлады олдуғу бундан бәлли олур: салеһ иш ҝөрмәјән, Аллаһдан дејилдир, өз гардашыны севмәјән дә һәмчинин. Биз бир-биримизи севмәлијик, шәрирдән олан, өз гардашыны өлдүрән Габил кими олмамалыјыг’ (1 Јәһја 3:10-12).
12. Јеһова чүрүк бар ҝәтирән ‘ағаҹларла’, јәни динләрлә бөјүк мәшәггәтдә нә едәҹәк?
12 Иса сөјләмишди: «Һәр јахшы ағаҹ хејирли мејвә верәр; пис ағаҹ исә чүрүк мејвә верәр. Јахшы ағаҹ чүрүк мејвә верә билмәз; пис ағаҹ да хејирли мејвә верә билмәз. Хејирли мејвә вермәјән һәр ағаҹ кәсиләр вә ода атылар. Беләликлә онлары бәһрәләриндән таныјаҹагсыныз» (Матта 7:17-20). Дүнја динләри ҝәтирдикләри бәһрәләри илә «пис ағаҹ» олдугларыны тәсдиг едирләр. Јеһова бу динләри бөјүк мәшәггәтдә мәһв едәҹәк (Вәһј 17:16).
13. Бөјүк издиһам Јеһованын ‘тахты гаршысында’ бирликдә дурдуғуну неҹә нүмајиш етдирир?
13 «Вәһј» китабында бөјүк издиһамын хиласынын сәбәби ачыгланыр. Орада тәсвир едилир ки, онлар Јеһованын ‘тахтынын гаршысында дурублар’, башга сөзлә Онун али һөкмранлығыны гәбул едирләр. Бөјүк издиһамын үзвләри ‘либасларыны Гузунун ганы илә јујуб ағардыблар’, јәни Исанын, ҝүнаһлары јујан фидијәсини гәбул едирләр (Вәһј 7:9-15; Јәһја 1:29). Онлар өзләрини Аллаһа һәср етмиш вә буну суда вәфтиз олунмагла символизә етмишләр. Ағ либаслары Аллаһын гаршысында тәмиз олдугларыны ҝөстәрир. Онлар Аллаһа ‘ҝеҹә-ҝүндүз хидмәт едирләр’. Сәнҹә, һәјатыны бурада јазыланлара даһа чох ујғунлашдырмаг үчүн нә етмәлисән?
Буҝүнкү хејир-дуалар
14. Јеһованын хидмәтчиләри артыг индидән һансы ҝөзәл хејир-дуалары алырлар?
14 Јәгин Јеһоваја хидмәт едән адамларын артыг индидән һансы ҝөзәл хејир-дуалар алдыгларына фикир вермисән. Мисал үчүн, сән дә Јеһованын салеһ нијјәтләри һаггында өјрәнәндә баша дүшдүн ки, Аллаһ инсанлар үчүн ҝөзәл ҝәләҹәк һазырлајыр. Инди јерүзү Ҹәннәтдә әбәди јашамаға үмид бәсләјәрәк һәгиги Аллаһа хидмәт етмәклә һәјатын әсл мәна илә долур. Бәли, Падшаһ Иса Мәсиһ бөјүк издиһамы «һәјат суларынын гајнагларына апараҹаг» (Вәһј 7:17).
15. Сијаси вә әхлаги мәсәләләрә ҝәлдикдә, Јеһованын Шаһидләри Мүгәддәс Китаб принсипләринә әмәл етмәклә һансы хејир-дуалары алырлар?
15 Бөјүк издиһамын алдығы ҝөзәл хејир-дуалара Јеһованын бүтүн хидмәтчиләри арасында һөкм сүрән мәһәббәт, бирлик вә һәмрәјлик дахилдир. Һамымыз ејни руһани гида илә гидаландығымыз үчүн Аллаһын Кәламындакы ејни ганун вә принсипләрә табе олуруг. Бу сәбәбдән сијаси вә миллијјәтчи идеолоҝијаларын зәмининдә јаранан парчаланмалар бизә јаддыр. Биз һәмчинин Аллаһын Өз халгындан тәләб етдији јүксәк әхлаг нормаларына мүвафиг јашајырыг (1 Коринфлиләрә 6:9-11). Она ҝөрә дә бу дүнјада ҝениш јајылмыш әдавәт, парчаланма вә әхлагсызлыға Аллаһын халгы арасында јер јохдур, әксинә онлар бир нөв руһани ҹәннәтдә јашајырлар. Јешаја 65:13, 14 ајәләриндә руһани ҹәннәтин неҹә тәсвир едилдијинә фикир верин.
16. Бу дүнјада үзләшдији чәтинликләрә бахмајараг, бөјүк издиһам һансы үмидлә јашајыр?
16 Әлбәттә, Јеһоваја хидмәт едәнләр камил дејилләр. Бу дүнјадакы бир чох чәтинликләр онлардан јан кечмир. Онлар да бәдбәхтликләрә мәруз галыр вә ја мүһарибәләрин ҝүнаһсыз гурбаны олурлар, һәмчинин әзаб чәкир, хәстәләнир, өлүрләр. Амма бу адамлар әминдирләр ки, Аллаһ јени дүнјада «онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр» (Вәһј 21:4).
17. Һәгиги Аллаһа ибадәт едәнләрин башына ҝәләнләрдән асылы олмајараг, онларын һансы ҝөзәл ҝәләҹәји вар?
17 Инди гоҹалыг, хәстәлик, тәгибләр вә јахуд да бәдбәхт һадисә уҹбатындан һәјатыны итирсән белә, Јеһова сәни Ҹәннәтдә дирилдәҹәк (Һәвариләрин ишләри 24:15). Мәсиһин Миниллик Һакимијјәти дөврүндә сән јенидән руһани зијафәтдә олаҹагсан. Јараданын бүтүн нијјәтләринин еҹазкарҹасына һәјата кечдијини вә инсанлара боллуҹа мадди немәтләр верилдијини ҝөрдүкҹә Аллаһа гаршы мәһәббәтин даһа да ҝүҹләнәҹәк (Јешаја 25:6-9). Аллаһын халгынын неҹә дә ҝөзәл ҝәләҹәји вар!
Тәкрар үчүн суаллар
• Мүгәддәс Китабда бөјүк издиһам һансы ваҹиб һадисә илә бағлы хатырланыр?
• Аллаһын бәјәндији бөјүк издиһамын сыраларында олмаг истәјириксә, артыг индидән нә етмәлијик?
• Бөјүк издиһамын инди алдығы вә ҝәләҹәк јени дүнјада алаҹағы хејир-дуалар сәнин үчүн нә дәрәҹәдә гијмәтлидир?
[123-ҹү сәһифәдәки шәкил]
Бөјүк издиһамын милјонларла үзвү һәгиги Аллаһа бирликдә ибадәт едир