Фәсил 19
Аллаһын сөзүнү ҹәсарәтлә сөјләмәјә давам един
1. а) Исанын шаҝирдләри һансы хош хәбәри јајырдылар вә јәһудиләрдән бәзиләри буна неҹә мүнасибәт ҝөстәрирди? б) Өзүмүзә һансы суаллары верә биләрик?
ТӘГРИБӘН 2 000 ил бундан әввәл Аллаһын Оғлу Иса Мәсиһ јер үзүнүн ҝәләҹәк Падшаһы кими мәсһ олунду. Дини рәгибләрин тәһрики илә Иса едам едилди, амма Јеһова ону өлүләрдән дирилтди. Исанын васитәси илә әбәди һәјата јол ачылды. Онун шаҝирдләри бу хош хәбәри халг арасында јајмаға башладыгда тәгибләрә мәруз галдылар. Бәзиләри зиндана салынды вә һәтта дөјүлдү. Онлара Иса һаггында данышмаг гадаған едилди (Һәвариләрин ишләри 4:1-3, 17; 5:17, 18, 40). Шаҝирдләр нә етмәли идиләр? Бәс сән нә едәрдин? Ҹәсарәтлә шаһидлик етмәјә давам едәрдин?
2. а) Бизим ҝүнләрдә һансы хош хәбәр бәјан едилмәлидир? б) Хош хәбәри тәблиғ етмәк мәсулијјәти кимләрә һәвалә едилмишдир?
2 Аллаһын Падшаһлығынын Падшаһы Иса Мәсиһ дүшмәнләри арасында һакимијјәт сүрмәк үчүн 1914–ҹү илдә ҝөјдә тахта чыхарылды (Мәзмур 110:2, ЈД). Сонра Шејтан вә онун ҹинләри јерә атылдылар (Вәһј 12:1-5, 7-12). Јашадығымыз пис системин ахыр ҝүнләри башланды. Бу дөврүн сонунда Аллаһ шејтан системини тамамилә мәһв едәҹәк (Даниел 2:44; Матта 24:21). Сағ галанлара, Ҹәннәтә чевриләҹәк јер үзүндә әбәди өмүр сүрмәк имканы вериләҹәк. Әҝәр хош хәбәрә һај вермисәнсә, сән дә ону башгалары илә бөлүшмәк истәјәҹәксән (Матта 24:14). Бәс инсанлардан һансы мүнасибәти ҝөзләмәк олар?
3. а) Инсанларын Падшаһлыг һаггында хош хәбәрә мүнасибәти неҹәдир? б) Өзүмүзә һансы суалы вермәлијик?
3 Бәзи адамлар Падшаһлыг һаггында хош хәбәрә һај верәҹәк, әксәријјәт исә лагејд галаҹаг (Матта 24:37-39). Бу хәбәрә ришхәнд едән, гаршы чыханлар да тапылаҹаг. Иса хәбәрдарлыг етмишди ки, белә мүнасибәти һәтта гоһумлардан да ҝөзләмәк олар (Лука 21:16-19). Ола билсин иш јериндә вә мәктәбдә дә белә гаршыдурма илә үзләшәсән. Бәзи өлкәләрдә һакимијјәт органлары Јеһованын Шаһидләринин фәалијјәтинә һәтта гадаға гојмушлар. Белә вәзијјәтләрлә үзләшәндә Аллаһын сөзүнү ҹәсарәтлә сөјләмәјә вә ‘иманда сабит дурмаға’ давам едәҹәксәнми? (1 Коринфлиләрә 16:13).
Ҝүҹүмүзә ҝүвәнмирик
4. а) Аллаһын садиг хидмәтчиләриндән нә тәләб олунур? б) Мәсиһчи ҝөрүшләри нәјә ҝөрә чох ваҹибдир?
4 Јеһованын садиг хидмәтчиләри Онун руһани тәдбирләриндән ҝүҹ алырлар. Белә тәдбирләрдән бири јығынҹаг ҝөрүшләридир. Мүгәддәс Јазылар бизи бу ҝөрүшләрдән галмамаға чағырыр (Ибраниләрә 10:23-25). Узун илләр боју Јеһованын садиг шаһидләри һәмиманлылары илә бу ҝөрүшләрдә мүнтәзәм иштирак етмәк үчүн вар ҝүҹләри илә чалышырлар. Јығынҹаг ҝөрүшләри Мүгәддәс Јазылар һаггында билијимизи даһа да артырыр. Бундан әлавә, биз јахшы билдијимиз һәгигәтләри даһа дәриндән анлајыр вә онлары һәјатда тәтбиг етмәјин јолларыны даһа ајдын ҝөрүрүк. Бирликдә ибадәт етдијимиз мәсиһчи гардашларымызла даһа да јахынлашыр вә Аллаһын ирадәсини јеринә јетирмәк үчүн ҝүҹ алырыг. Јеһованын руһу јығынҹаг васитәсилә бизә рәһбәрлик верир вә Иса мәһз бу руһ васитәсилә арамыздадыр (Матта 18:20; Вәһј 3:6).
5. Јеһованын Шаһидләринин фәалијјәти гадаған олунанда онлар ҝөрүшләрини неҹә кечирирләр?
5 Јығынҹаг ҝөрүшләринин һамысына мүнтәзәм ҝәлирсән? Орада ешитдикләрини һәјатда тәтбиг едирсән? Бәзән Јеһованын Шаһидләринин фәалијјәтинә гадаға гојулан һалларда јығынҹаг ҝөрүшләрини кичик групларла евләрдә кечирмәк лазым ҝәлир. Ҝөрүшләрин јери вә вахты арабир дәјишилир, бәзи ҝөрүшләр чох ҝеҹ кечирилир. Бу һамыја мүнасиб олмур. Амма белә нараһатлыглара вә ја тәһлүкәләрә бахмајараг, садиг баҹы-гардашларымыз һәр бир ҝөрүшдә иштирак етмәк үчүн вар гүввәләри илә сәј ҝөстәрирләр.
6. Аллаһа ҝүвәндијимизи неҹә ҝөстәрә биләрик вә бу, һәмишә ҹәсарәтлә данышмағымыза неҹә көмәк едә биләр?
6 Јеһованын көмәјинә һәр заман мөһтаҹ олдуғумузу анлајыб мүнтәзәм вә үрәкдән дуа едәркән Аллаһа етибарымыз ҝүҹләнир. Сән белә едирсән? Иса јердәки хидмәти заманы даима дуа едирди (Лука 3:21; 6:12, 13; 22:39-44). Дирәкдә едам олунмаздан габагкы ҝеҹә о, шаҝирдләрини белә тәшвиг едирди: «Ојаг дуруб дуа един ки, имтаһана уғрамајасыныз» (Марк 14:38). Инсанларын Падшаһлыг хәбәринә лагејд јанашмасы тәблиғ хидмәтиндә сәјимизи зәифләдә биләр. Әҝәр бизи лаға гојур вә тәгиб едирләрсә чәтинликләрдән гачмаг үчүн тәблиғ етмәмәк фикринә дүшә биләрик. Лакин ҹәсарәтлә данышмаг үчүн сәмими гәлбдән дуада Аллаһын руһунун көмәјини истәјириксә, белә фикирләри өзүмүздән узаглашдыраҹағыг (Лука 11:13; Ефеслиләрә 6:18-20).
Кечмишин ҹәсарәтли тәблиғчиләри
7. а) «Һәвариләрин ишләри» китабы нәјә ҝөрә бизим үчүн хүсуси мараг доғурур? б) Абзасын сонунда ҝәтирилмиш суаллара ҹаваб верәркән бу мәлуматын фајдасы үзәриндә дүшүн.
7 «Һәвариләрин ишләри» китабы һамымыз үчүн хүсуси мараг доғурур. Бу китабда Јеһованын садиг вә ҹәсарәтли шаһидләри — бизим кими һиссләрә малик һәвариләрин вә диҝәр еркән шаҝирдләрин чәтинликләри неҹә дәф етдикләри тәсвир едилир. Ҝәл ашағыдакы суалларын вә ҝәтирилмиш ајәләрин көмәји илә бу китабын мүәјјән һиссәләрини арашдыраг. Бу заман охудугларынын фајдасы үзәриндә дүшүн.
Һәвариләрин али тәһсили вар иди? Онлар тәбиәтән горхмаз адамлар идиләр? (Јәһја 18:17, 25-27; 20:19; Һәвариләрин ишләри 4:13).
Аллаһын Оғлуну мәһкум етмиш јәһуди мәһкәмәси гаршысында ҹәсарәтлә данышмаг үчүн Петер гүввәни һарадан алырды? (Матта 10:19, 20; Һәвариләрин ишләри 4:8).
Һәвариләр Синедриона ҝәтирилмәздән әввәлки һәфтәләр әрзиндә нә едирдиләр? (Һәвариләрин ишләри 1:14; 2:1, 42).
Рәисләр һәвариләрә Исанын адындан тәблиғ етмәји гадаған едәндә Петер вә Јәһја неҹә ҹаваб вердиләр? (Һәвариләрин ишләри 4:19, 20).
Азад олунандан сонра һәвариләр көмәк үчүн кимә мүраҹиәт етдиләр? Онлар тәгибләрин сона чатмасы, јохса башга шеј һаггында дуа едирдиләр? (Һәвариләрин ишләри 4:24-31).
Дүшмәнләр тәблиғ ишини дајандырмаға ҹәһд ҝөстәрәндә Јеһова хидмәтчиләринин көмәјинә кими ҝөндәрди? (Һәвариләрин ишләри 5:17-20).
Һәвариләр азад олунмаларынын сәбәбини баша дүшдүкләрини неҹә ҝөстәрдиләр? (Һәвариләрин ишләри 5:21, 41, 42).
Тәгибләр нәтиҹәсиндә бир чох шаҝирдләр башга јерләрә сәпәләнсәләр дә, онлар һансы иши давам етдирирдиләр? (Һәвариләрин ишләри 8:3, 4; 11:19-21).
8. Еркән мәсиһчиләрин хидмәти һансы руһландырыҹы бәһрәләр вермишди вә нәјә ҝөрә биз дә бу ишдә иштирак едә биләрик?
8 Хош хәбәрин тәблиғи өз бәһрәсини ҝәтирирди. Ерамызын 33-ҹү илинин Пентикост ҝүнүндә тәгрибән 3 000 шаҝирд вәфтиз олунду. «Сајлары ҝет-ҝедә артан кишиләрлә гадынлар Рәббә иман едиб ҹәмијјәтә гошулурдулар» (Һәвариләрин ишләри 2:41; 4:4; 5:14). Бир мүддәтдән сонра Аллаһын халгынын амансыз тәгибчиси Тарсуслу Шаул мәсиһчи олуб ҹәсарәтлә һәгигәти тәблиғ етмәјә башлады. Сонралар о, һәвари Павел ады илә танынды (Галатијалылара 1:22-24). Биринҹи әсрдә башланмыш иш һәлә дә дајанмајыб. Бу ахыр ҝүнләрдә тәблиғ иши јени гүввә илә вүсәт алыб бүтүн јер үзүнә јајылмышдыр. Биз бу ишин иштиракчысы олмаг шәрәфинә лајиг ҝөрүлмүшүк вә кечмишдәки садиг шаһидләрин нүмунәсиндән өјрәнә биләрик.
9. а) Шаһидлик етмәк үчүн Павел һансы имканлардан истифадә едирди? б) Падшаһлыг һаггында хәбәрин тәблиғи үчүн сән һансы имканлардан истифадә едирсән?
9 Павел Иса Мәсиһ һаггында һәгигәти өјрәндикдә нә етди? О дәрһал «[Иса] Аллаһын Оғлудур» дејә тәблиғ етмәјә башлады (Һәвариләрин ишләри 9:20). Павел Аллаһын она ҝөстәрдији мәрһәмәтә ҝөрә миннәтдар иди вә баша дүшүрдү ки, онун ешитдији хош хәбәрә һамынын еһтијаҹы вар. Павел јәһуди олдуғундан о дөврүн адәтинә ҝөрә синагоглара ҝедирди вә орада шаһидлик едирди. О һәмчинин евдән-евә тәблиғ едир вә базар мејданларында адамларла сөһбәт едирди. Павел хош хәбәрин тәблиғи үчүн һәвәслә јени әразиләрә ҝедирди (Һәвариләрин ишләри 17:17; 20:20; Ромалылара 15:23, 24).
10. а) Шаһидлик едәркән Павелин ҹәсарәтли олмасы илә бәрабәр, бәсирәтлилији нәдән ҝөрүнүр? б) Гоһумлара, иш вә ја мәктәб јолдашларымыза шаһидлик едәндә Павелин кејфијјәтләрини неҹә әкс етдирә биләрик?
10 Павел ҹәсарәтли олмагла бәрабәр һәм дә бәсирәтли адам иди. Биз дә белә олмалыјыг. О јәһудиләрлә Аллаһын онларын әҹдадларына вердији вәдин әсасында данышырды. Јунанларла онлара таныш олан мөвзулар әсасында сөһбәт едирди. Шәһадәт вермәк үчүн бәзән өзүнүн һәгигәти неҹә өјрәндијиндән данышырды. Павел демишди: «Һәр шеји Мүждә үчүн едирәм ки, онун немәтләринә шәрик олум» (1 Коринфлиләрә 9:20-23, И–93; Һәвариләрин ишләри 22:3-21).
11. а) Әлејһдарларла даима гаршылашмамаг үчүн Павел нә едирди? б) Павел кими һәрәкәт етмәк нә вахт мүдрик оларды вә буну неҹә етмәк олар? в) Ҹәсарәтлә данышмаға давам етмәк үчүн ҝүҹү һарадан алырыг?
11 Хош хәбәрә гаршы мүгавимәт ҝүҹләнәндә Павел бир мүддәт башга јердә тәблиғ етмәјин даһа мүнасиб олдуғуну лазым билирди. О, әлејһдарларла даим үзләшмәкдән гачынырды (Һәвариләрин ишләри 14:5-7; 18:5-7; Ромалылара 12:18). Лакин һеч вахт хош хәбәрдән утанмырды (Ромалылара 1:16). Әлејһдарларын лагејд вә һәтта сәрт рәфтары Павелин һеч дә хошуна ҝәлмирди. О, тәблиғ ишини давам етдирмәк үчүн ‘Аллаһдан ҹәсарәт алырды’. Павел демишди: «Рәбб јанымда дуруб, мәни мөһкәмләндирди ки, тәблиғ мәним васитәмлә там е‘лан едилсин» (1 Салониклиләрә 2:2; 2 Тимотејә 4:17). Мәсиһчи јығынҹағынын Башчысы Иса бизим ҝүнләрдә мөһтәшәм бир ишин ҝөрүләҹәјини әввәлҹәдән билдирмишди. Бу иши јеринә јетирмәк үчүн о бизә ҝүҹ верир (Марк 13:10).
12. Мәсиһчиләрин ҹәсарәти нәдән ҝөрүнүр вә нәјә әсасланыр?
12 Иса вә биринҹи әсрдәки садиг шаҝирдләр кими бизим дә Аллаһын сөзүнү ҹәсарәтлә данышмаға там әсасымыз вар. Бу о демәк дејил ки, биз инсанларын һиссләринә мәһәл гојмамалы вә ја хош хәбәри динләмәк истәмәјәнләри мәҹбур етмәлијик. Ејни заманда адамларын лагејдлији бизи руһдан салмамалы вә мүгавимәтләрә бахмајараг сусмамалыјыг. Биз дә Иса кими, диггәти бүтүн јер үзүнүн гануни һөкумәтинә —Аллаһын Падшаһлығына јөнәлдирик. Биз Каинатын Һөкмдары Јеһованы тәмсил етдијимиз үчүн гәтијјәтлә данышырыг, чүнки бәјан етдијимиз хәбәр бизим јох, Онункудур. Јеһованы иззәтләндирмәјә бизи илк нөвбәдә Она олан мәһәббәтимиз тәшвиг етмәлидир (Филипилиләрә 1:27, 28; 1 Салониклиләрә 2:13).
Тәкрар үчүн суаллар
• Падшаһлыг хәбәрини имкан дахилиндә һәр кәслә бөлүшмәк нә үчүн ваҹибдир, амма инсанлардан һансы мүнасибәти ҝөзләмәк олар?
• Јеһоваја хидмәтдә өз ҝүҹүмүзә ҝүвәнмәдијимизи неҹә ҝөстәрә биләрик?
• «Һәвариләрин ишләри» китабындан һансы гијмәтли дәрсләри өјрәнә биләрик?
[173-ҹү сәһифәдәки шәкилләр]
Кечмишдә олдуғу кими инди дә Јеһованын хидмәтчиләри Онун сөзүнү ҹәсарәтлә сөјләјирләр