Онлар фикирләшмирдиләр

ХӘБӘРДАРЛЫГЛАРА лагејд јанашмаг бәдбәхтликлә нәтиҹәләнә биләр.

1974-ҹү илдә Австралијанын Дарвин шәһәриндә бајрам мәрасиминә һазырлыг ҝөрүлән заман, һәјәҹан сигналы шәһәр сакинләринә гасырғанын јахынлашдығыны билдирди. Сон отуз илдә Дарвин бир дәфә дә олсун гасырғадан зәрәр чәкмәмишдир. Бәс бу дәфә нә ола биләрди? Ҝүҹлү күләк инсанларын горхудан ҝизләндикләри евләрин дамыны гопармајынҹа вә диварларыны учурмајынҹа әһалинин чоху јаранмыш тәһлүкәјә ҹидди јанашмырды. Сәһәри ҝүн шәһәр виранәјә чеврилди.

1985-ҹи илин нојабр ајында Колумбијада вулкан пүскүрмәси баш верди. Әримиш гар вә буздан палчыг сели әмәлә ҝәлмишди. Бу сел Армеро шәһәрини басмыш вә 20 000 әһалинин һәјатыны апармышды. Бу һадисә гәфләтәнми баш вермишди? Сон бир нечә ај әрзиндә дағда јералты тәканлар баш верирди. Лакин вулканлы дағын әтәјиндә јашамаға вәрдиш едән Армеро шәһәринин сакинләринин әксәријјәтини бу һеч дә нараһат етмирди. Һакимијјәт органлары јахынлашан фәлакәт һаггында хәбәрдарлыг алмаларына бахмајараг, шәһәрин әһалисинә тәһлүкә барәдә хәбәрдарлыг етмәк үчүн чох аз иш ҝөрүрдүләр. Радио васитәсилә әһалини инандырырдылар ки, горхулу бир шеј јохдур. Килсәнин сәсҝүҹләндириҹиси илә һамыны сакитлији горумаға чағырырдылар. Ахшам вулканын мәнбәјиндән ики ҝүҹлү партлајыш баш верди. Мәҝәр баш верәнләрдән сонра сән һәр шеји атыб гачмаздынмы? Бу ҹүр мүдрик гәрар гәбул едәнләрин сајы чох аз иди; галанларынын ағлына исә бу чох ҝеҹ ҝәлди.

Чох вахт ҝеологлар зәлзәләнин һарада баш верәҹәјини чох дәгигликлә дејә билирләр. Лакин онлар зәлзәләнин нә заман олаҹағыны надир һалларда мүәјјән едә билирләр. 1999-ҹу илдә зәлзәләләр нәтиҹәсиндә бүтүн дүнјада 20 000 адам һәлак олмушдур. Һәлак оланларын бир чоху һесаб едирдиләр ки, бу онларла һеч заман баш вермәјәҹәк.

Сән шәхсән Аллаһын Өзүндән ҝәлән хәбәрдарлыглара неҹә мүнасибәт ҝөстәрирсән?

Сон ҝүнләрин һадисәләри онлар баш вермәздән чох әввәл Мүгәддәс Китабда ајдын сурәтдә тәсвир олунмушдур. Бунунла әлагәдар биз сон ҝүнләри “Нуһун ҝүнләри” илә мүгајисә етмәјә тәшвиг олунуруг. “Туфандан әввәлки ҝүнләрдә” инсанлары, еһтимал ки, зоракылығын артмасы нараһат едирди, лакин онларын башлары бүтүнлүклә өз ҝүндәлик ишләринә гарышмышды. Аллаһын Өз хидмәтчиси Нуһ васитәсилә вердији хәбәрдарлыг һаггында онлар ‘туфан ҝәлиб һамысыны апарынҹаја гәдәр... бихәбәр идиләр [“фикирләшмирдиләр”, ЈД] (Матта 24:37-39). Сән һәмин хәбәрдарлыға диггәт јетирәрдинми? Һал-һазырда сән неҹә давранырсан?

Бәс әҝәр сән Ибраһимин гардашы оғлу Лутун ҝүнләриндә Өлү дәниз јахынлығындакы Содом шәһәриндә јашасајдын, онда неҹә? Һәмин әрази Ҹәннәтә бәнзәјирди. Мадди ҹәһәтдән шәһәр инкишаф едирди. Адамлары һеч нә нараһат етмирди. Лутун ҝүнләриндә “инсанлар јејир, ичир, алыр, сатыр, әкир, тикирдиләр”. Бундан әлавә һәмин ҹәмијјәт үмумиликдә олдугҹа позғун иди. Сән Лутун пис ишләрә даир етдији хәбәрдарлыға диггәт јетирәрдинми? Онун Аллаһын Содом шәһәрини мәһв етмәк нијјәтиндә олдуғуна даир дедији сөзләрә гулаг асардынмы? Јохса, Лутун күрәкәнләри кими, сән дә буну бир зарафат кими гәбул едәрдин? Јахуд, ола билсин, әввәлҹә гачмаға башлајар, сонра исә Лутун арвады кими ҝеријә бахардын? Башгалары һәмин хәбәрдарлыға ҹидди јанашмасалар да, “Лут Содомдан чыхдығы ҝүн ҝөјдән од вә күкүрд јағды вә һамыны мәһв етди” (Лука 17:28, 29).

Бизим ҝүнләрдә дә инсанларын чоху “фикирләшмир”. Лакин Аллаһын Кәламында бизим фајдамыз үчүн горунуб сахланылан бу нүмунәләр бизи тәшвиг едир ки, ОЈАГ ДУРАГ!

[22-ҹи сәһифәдә олан чәрчивә вә шәкил]

Үмумдүнја Туфаны һәгигәтәнми баш вермишдир?

Бир чох тәнгидчиләр Туфанын баш вермәдијини сөјләјирләр. Мүгәддәс Китабда исә дејилир ки, Туфан олмушдур.

Туфан һаггында Иса Мәсиһ дә данышырды, чүнки һәмин дөврдә о, ҝөјдә јашајыр вә баш верән һадисәни мүшаһидә едирди.

[23-ҹү сәһифәдә олан чәрчивә вә шәкил]

Содом вә Һоморра һәгигәтәнми мәһв едилмишдир?

Археолоҝија бу һадисәни тәсдиг едир.

Бу һагда дүнја тарихиндә дә хатырланыр.

Бу һадисәнин доғрулуғуну Иса Мәсиһ дә тәсдиг етмишдир вә бу һадисә һаггында Мүгәддәс Јазыларын 14 китабында мә’лумат вар.