Һәјат үчүн рәһбәрлик тәгдим едән илаһи мүдриклик

ЈЕҺОВА мүдрик Һөкмдардырмы? Бу суала ҹаваб вермәјин ән јахшы үсулу Онун вердији мәсләһәтләри нәзәрдән кечирмәкдир. Онлар тәтбиголунандырмы? Онлара әмәл етмәк һәјаты даһа мәналы вә уғурлу едирми? Мүдрик падшаһ Сүлејман јүзләрлә мәсәл јазмышдыр. Бу мәсәлләрдә, демәк олар, һәјатын бүтүн саһәләринә тохунулур. Ҝәлин бир нечә нүмунәјә нәзәр салаг.

Аллаһа ҝүвәнин. Јеһова илә јахшы мүнасибәтләрин олмасы үчүн Она ҝүвәнмәк сон дәрәҹә ваҹибдир. Сүлејман јазмышдыр: «Бүтүн гәлбинлә Јеһоваја етибар ет, өз ағлына ҝүвәнмә. Һәр ишиндә Ону дүшүн, О да јолларыны рәван едәр» (Мәсәлләр 3:5, 6). Аллаһа ҝүвәнмәк, јәни Онун рәһбәрлијини ахтармаг вә Она табе олмаг һәјата дәрин мәна гатыр. Белә етмәклә инсан Аллаһын үрәјини севиндирир вә Онун дүшмәни Шејтанын галдырдығы мүбаһисәли мәсәләләрдә Јеһоваја өз мөвгејини ҝөстәрир (Мәсәлләр 27:11).

Башгалары илә һикмәтлә давранын. Аллаһын әрләрә, арвадлара вә ушаглара вердији мәсләһәт бу ҝүн һәмишәкиндән даһа чох актуалдыр. Аллаһ әрләрә: «Ҹаванлығында алдығын арвадындан кам ал» мәсләһәтини верәрәк арвадларына садиг галмалы олдугларыны ҝөстәрир (Мәсәлләр 5:18—20). Әрли гадынлар «Мәсәлләр» китабындан әринин вә ушагларынын фәхри олан баҹарыглы гадынын парлаг тәсвирини ҝөрә биләрләр (Мәсәлләр фәсил 31). Бурада, һәмчинин ушаглара валидејнләринә итаәт етмәк мәсләһәт ҝөрүлүр (Мәсәлләр 6:20). Бундан башга китабда ҝөстәрилир ки тәнһалығы севмәк худбинлијә ҝәтириб чыхардығындан достлуг етмәк ваҹибдир (Мәсәлләр 18:1). Достлар бизә һәм јахшы, һәм дә пис тәсир едә биләр, буна ҝөрә дә өзүмүзә дост сечәркән мүдрик олмалыјыг (Мәсәлләр 13:20; 17:17).

Өз гајғыныза һикмәтлә галын. «Мәсәлләр» китабында спиртли ичкиләрдән суи-истифадә етмәмәјә сағламлыға јахшы тәсир ҝөстәрән һиссләрә саһиб олмаға, сәһһәтә зәрәр јетирәнләри исә боғмаға вә чалышган ишчи олмаға даир дәјәрли мәсләһәтләр вар (Мәсәлләр 6:6; 14:30; 20:1). Орада хәбәрдарлыг олунур ки, Аллаһын мәсләһәтинә зидд ҝедән инсан дүшүнҹәсинә етибар етмәк фәлакәтә ҝәтириб чыхарыр (Мәсәлләр 14:12). Үрәјимизин «һәјат булаглары» олдуғуну хатырладараг китаб дахили варлығымызы, јәни үрәјимизи позуҹу тәсирләрдән горумағы нәсиһәт едир (Мәсәлләр 4:23).

Бүтүн дүнјада милјонларла инсан бу кими мәсләһәтләрә ујғун јашамағын һәјаты јахшылашдырдығыны ҝөрмүшдүр. Нәтиҹәдә, тутарлы сәбәбдән ирәли ҝәләрәк онлар Јеһованы өз Рәһбәрләри кими гәбул едирләр.

«Мәсәлләр» китабына әсасланыб.