Бөјүк топлантылар

Симасындан севинҹ, тәбәссүм јаған инсанлары ҝөрүрсүнүз? Онлар сәбирсизликлә ҝөзләдикләри бөјүк топлантыја ҝәлибләр. Бу мәрасимләрин тәмәли гәдим вахтлардан гојулуб. Кечмишдә Аллаһ хидмәтчиләринә бујурмушду ки, илдә үч дәфә бир јерә топлашсынлар (Ганунун тәкрары 16:16). Бу ҝүн дә бүтүн дүнјада илдә үч дәфә бөјүк топлантылар кечирилир: ики дәфә бир ҝүн давам едән рајон топлантысы вә бир дәфә үч ҝүн давам едән реҝионал топланты. Бу топлантыларын мәгсәди нәдир?

Гардашлыг телләрини мөһкәмләндирир. Гәдим дөврдә исраиллиләр бөјүк мәҹлисләрдә Јеһоваја алгыш едирдиләр. Биз дә бөјүк топлантыларда бирҝә Аллаһа ибадәт едирик (Зәбур 26:12; 111:1). Бу ҝөрүшләрдә биз ајры-ајры јығынҹаглардан, һәтта башга өлкәләрдән ҝәлмиш диндашларымызла таныш олуруг. Наһар фасиләси заманы наһар етмәклә јанашы, бир-биримизлә сөһбәт едәрәк јени достлар газанырыг (Һәвариләрин ишләри 2:42). «Бүтүн гардашлығы» бирләшдирән мәһәббәти бу топлантыларда һәр кәс дуја биләр (1 Бутрус 2:17).

Аллаһын јолунда ирәлиләмәјә көмәк едир. Гәдимдә Аллаһын халгына ајәләр охунуб изаһ олунурду. Бу, халгын рифаһына хидмәт едирди (Нәһәмја 8:8, 12). Бу ҝүн биз дә бөјүк топлантыларда Аллаһын Кәламындан тәлим алырыг. Програм Мүгәддәс Китабдан ҝөтүрүлмүш бир ајәјә әсасланыр, мәрузәләрдән, сәһнәҹикләрдән вә саирәдән ибарәт олур. Бүтүн бунлар бизә Аллаһа мәгбул һәјат сүрмәјә көмәк едир. Сынаглар гаршысында имандан дөнмәјән баҹы-гардашларымызын һәјатында баш верән һадисәләри ешидәндә исә ҝүҹ-гүввәт алырыг. Реҝионал топлантыларда тамашалар ҝөстәрилир. Бу тамашалар Мүгәддәс Китабдакы һадисәләри ҝөзүмүзүн гаршысында ҹанландырыр вә бизә ибрәтамиз дәрсләр верир. Белә топлантыларда һәјатыны Јеһоваја һәср едәнләр вәфтиз олур.

• Нәјә ҝөрә бөјүк топлантылар хүсуси мәрасимдир?

• Бу топлантылардан сиз неҹә бәһрәләнә биләрсиниз?