Мәһәббәтә вә јахшы ишләрә тәшвиг едән ҝөрүшләр

ӘСРЛӘРДИР КИ, Јеһованын халгы мүтәшәккил шәкилдә бир јерә топлашыр. Гәдим Исраилдә үч бөјүк бајрамы гејд етмәк үчүн кишиләр Јерусәлимә ҝедирдиләр (Ган. 16:16). Биринҹи әсрдә мәсиһиләр әксәр һалларда киминсә евиндә мүнтәзәм олараг топлашырдылар (Флм. 1, 2). Бу ҝүн биз дә һәфтәлик ҝөрүшләрдә вә бөјүк топлантыларда јығышырыг. Нәјә ҝөрә Аллаһын хидмәтчиләри бир јерә топлашыр? Чүнки бу ҝөрүшләр онларын ибадәтинин ајрылмаз һиссәсидир (Зәб. 95:6; Кол. 3:16).

² Бу ҝөрүшләрә ҝәләнләр орадан бөјүк фајда әлдә едирләр. Исраиллиләрә һәр једдинҹи Чардаглар бајрамы илә әлагәдар дејилмишди: «Кишиләри, гадынлары, ушаглары, шәһәрләриниздә јашајан јаделлиләри бир јерә јығын ки, һамы гулаг асыб Аллаһыныз Јеһовадан горхмағы өјрәнсин вә бу Ганунун бүтүн сөзләринә диггәтлә әмәл етсин» (Ган. 31:12). Ҝөрүндүјү кими, бир јерә топлашмагда әсас мәгсәд Јеһовадан елм алмагдыр (Әшј. 54:13). Бу ҝөрүшләрдә һәмчинин бир-биримизлә таныш олур, руһланыр вә үнсијјәт едәрәк ҝүҹ топлајырыг.

ИБАДӘТ ҜӨРҮШЛӘРИ

³ Ерамызын 33-ҹү илинин Әллинҹи ҝүн бајрамындан сонра шаҝирдләр бир јерә топлашыб «һәвариләрдән һәвәслә тәлим алыр» вә «һәр ҝүн бирликдә мәбәддә јығышыр»дылар (Һәв. 2:42, 46). Сонралар мәсиһиләр ибадәт етмәк үчүн бир јерә топлашанда Мүгәддәс Јазылары, һәмчинин һәвариләрин вә диҝәр шаҝирдләрин јаздығы мәктублары охујурдулар (1 Кор. 1:1, 2; Кол. 4:16; 1 Салон. 1:1; Јаг. 1:1). Бу ҝөрүшләрдә еләҹә дә дуа едирдиләр (Һәв. 4:24—29; 20:36). Һәрдән хидмәтдә баш вермиш һадисәләри данышырдылар (Һәв. 11:5—18; 14:27, 28). Ҝөрүшләрдә Мүгәддәс Китаб тәлимләри мүзакирә олунур вә пејғәмбәрликләрин јеринә јетмәсиндән данышылырды. Ҝөрүшдә иштирак едәнләрә мәсиһи һәјат тәрзи сүрмәклә вә Аллаһа сәдагәт ҝөстәрмәклә бағлы мәсләһәтләр верилирди. Һамы хош хәбәри шөвглә тәблиғ етмәјә тәшвиг олунурду (Ром. 10:9, 10; 1 Кор. 11:23—26; 15:58; Ефес. 5:1—33).

⁴ Мүасир зәманәмиздә дә мәсиһи ҝөрүшләри һәвариләрин гојдуғу нүмунәјә әсасән кечирилир. Биз Ибраниләрә 10:24, 25 ајәләриндә јазылмыш илаһи чағырыша һај веририк: «Ҝәлин бир-биримизә гаршы диггәтли олуб... бәзиләринин вәрдиш етдији кими, јығынҹагларымыздан галмајаг, бир-биримизи руһландыраг вә о ҝүнүн јахынлашдығыны ҝөрдүкҹә бунлары даһа чох едәк». Бу ахырзаманда бизим бир јерә топлашараг руһланмаға даһа чох еһтијаҹымыз вар. Бу, бизи руһани ҹәһәтдән мөһкәмләндирәҹәк вә Аллаһа садиг галмаға көмәк едәҹәк (Ром. 1:11, 12). Биз позғун вә әхлагсыз нәслин ичиндә әсил мәсиһи кими јашајырыг, аллаһсызлығы вә бу дүнјаја хас истәкләри рәдд едирик (Филип. 2:15, 16; Тит. 2:12—14). Бу дүнјада мәсиһи јығынҹағындан јахшы јер јохдур! (Зәб. 84:10). Ҝөрәсән, Аллаһын Кәламыны охујуб арашдырмаг гәдәр фајдалы нә исә вар? Ҝәлин бизим рифаһымыз үчүн тәшкил олунмуш ҝөрүшләр барәдә данышаг.

ҺӘФТӘСОНУ ҜӨРҮШ

⁵ Һәфтәсону ҝөрүшүн биринҹи һиссәсиндә ҝөрүшә илк дәфә ҝәләнләр дә дахил олмагла, ҝениш күтлә үчүн нәзәрдә тутулан Мүгәддәс Китаба әсасланмыш нитг сөјләнилир. Бу нитгин һәм јениләрин, һәм дә јығынҹаг тәблиғчиләринин руһани ҹәһәтдән гидаланмасында бөјүк ролу вар (Һәв. 18:4; 19:9, 10).

⁶ Иса Мәсиһ, онун һәвариләри вә диҝәр шаҝирдләри бу ҝүн Јеһованын халгынын ибадәт ҝөрүшләриндә кечирилән ачыг ҝөрүшләрә бәнзәр ҝөрүшләр кечирирдиләр. Сөзсүз ки, Иса ән бәлағәтли натиг олуб. Инсанлар онун һаггында дејирди: «Биз һәлә өмрүмүздә бу ҹүр данышан адам ҝөрмәмишик» (Јәһ. 7:46). Иса ихтијар саһиби кими данышмагла ону динләјән инсанлары һејран гојурду (Мәт. 7:28, 29). Исанын чатдырдығы хәбәри гәбул едән инсанлар бол немәтләр дадырдылар (Мәт. 13:16, 17). Һәвариләр Исадан нүмунә ҝөтүрүрдүләр. Һәвариләрин ишләри 2:14—36 ајәләриндә Бутрусун ерамызын 33-ҹү илинин Әллинҹи ҝүн бајрамында сөјләдији мөһтәшәм нитг гәләмә алыныб. Бутрусун сөзләри минләрлә инсаны һәрәкәтә тәшвиг етмишди. Сонралар Булусун Афинада сөјләдији нитги ешидән инсанлар мәсиһилији гәбул етмишдиләр (Һәв. 17:22—34).

⁷ Бу ҝүн дә милјонларла инсан һәр һәфтә ибадәт ҝөрүшләриндә, һәмчинин бөјүк топлантыларда сөјләнән ачыг мәрузәләрдән бөјүк фајда әлдә едир. Бу мәрузәләр руһани ҹәһәтдән ојаг галмаға вә Падшаһлығын ишиндә фәал олмаға көмәк едир. Һәгигәтлә марагланан инсанлары вә башгаларыны ҝөрүшләрә дәвәт етмәклә онлара Мүгәддәс Китабын әсас тәлимләри илә таныш олмаға көмәк едирик.

⁸ Ачыг мәрузәләрдә мүхтәлиф мөвзулар ишыгландырылыр. Мәрузәләрдә Мүгәддәс Китаб тәлимләри, пејғәмбәрликләри, принсипләри арашдырылыр, аилә илә, никаһла, ҝәнҹләрин үзләшдији проблемләрлә вә мәсиһи әхлагы илә бағлы мәсләһәтләр верилир. Бәзи мәрузәләр Јеһова Аллаһын еҹазкар хилгәтинә һәср олунур. Диҝәрләриндә исә Мүгәддәс Китабда ады чәкилән инсанларын иманына, ҹәсарәтинә, нөгсансызлығына вә бизә неҹә нүмунә гојдугларына диггәт јетирилир.

⁹ Ачыг мәрузәдән там фајда ҝөтүрмәк үчүн ҝөрүшә диггәтлә гулаг асмаг, натигин сөјләдији ајәләри ачмаг, ајәләр охунанда вә изаһ олунанда изләмәк лазымдыр (Лука 8:18). Мүзакирә олунан фикирләрин доғрулуғуна әмин оланда өјрәндикләримиздән мөһкәм јапышаҹаг вә онлара әмәл едәҹәјик (1 Салон. 5:21).

¹⁰ Кифајәт гәдәр гардаш оланда ачыг мәрузәләр һәр һәфтә сөјләнилир. Чох вахт бу мәрузәләри башга јығынҹаглардан дәвәт олунмуш натигләр сөјләјир. Гардашлар аз оланда исә, һәр һәфтә олмаса да, мүмкүн гәдәр тез-тез ачыг мәрузәләр сөјләнилир.

¹¹ Һәфтәсону ҝөрүшүн икинҹи һиссәси «Ҝөзәтчи гүлләси» мүзакирәсидир. Мүзакирәдә «Ҝөзәтчи гүлләси» журналындакы мәгалә суал-ҹаваб шәклиндә арашдырылыр. Бу журнал васитәсилә Јеһова бизә вахтлы-вахтында руһани гида верир.

¹² Адәтән, журналдакы мәгаләләрдә Мүгәддәс Китаб принсипләрини һәјатда тәтбиг етмәклә бағлы мәсләһәтләр верилир. Бу мәгаләләр мәсиһиләрә дүнјанын руһуна гаршы дурмаға вә позғун давранышдан узаг олмаға көмәк едир (1 Кор. 2:12). «Ҝөзәтчи гүлләси» журналы Мүгәддәс Китаб тәлимләринә вә пејғәмбәрликләринә ҝет-ҝедә даһа ҝур ишыг сачыр, бунун сајәсиндә биз һәгигәтлә бир аддымлајыр вә салеһләрин јолунда јеријирик (Зәб. 97:11; Мәс. 4:18). Бу ҝөрүшдә олмаг вә мүзакирәдә иштирак етмәк салеһлијин һөкм сүрәҹәји јени дүнјаја бәсләдијимиз үмиддән доған севинҹи аловландырыр (Ром. 12:12; 2 Бут. 3:13). «Ҝөзәтчи гүлләси» мүзакирәси бизә руһун бәһрәсини јетишдирмәјә көмәк едир вә Јеһоваја хидмәт етмәк әзмимизи артырыр (Гал. 5:22, 23). Биз сынаглара таб ҝәтирмәк үчүн ҝүҹ әлдә едир, «ҝәләҹәк үчүн мөһкәм тәмәл» гојуруг вә беләҹә, әсил һәјатдан бәрк-бәрк јапышырыг (1 Тим. 6:19; 1 Бут. 1:6, 7).

¹³ Бу руһани сүфрәдән там шәкилдә гидаланмаг үчүн нә етмәлијик? Ҝөрүшә ја шәхсән, ја да аиләликҹә әввәлҹәдән һазырлашмалы, истинад олунан ајәләри охумалы, ҝөрүшдә өз сөзләримизлә шәрһ вермәлијик. Бунун сајәсиндә һәгигәт үрәјимиздә көк салаҹаг вә иманымызы дилимизлә изһар етмәјимиз башгаларына фајда ҝәтирәҹәк. Баҹы-гардашларын шәрһләринә диггәтлә гулаг асмагла һәфтәлик мүзакирәдән бөјүк фајда әлдә едәҹәјик.

ҺӘФТӘАРАСЫ ҜӨРҮШ

¹⁴ Һәр һәфтә јығынҹаглар ибадәт евиндә јығышыб Мәсиһи һәјаты вә ибадәти адлы ҝөрүшү кечирирләр. Бу ҝөрүш үч һиссәдән ибарәтдир вә бизи Аллаһын «хидмәтчиләри олмаға јарарлы» едир (2 Кор. 3:5, 6). Ҝөрүшүн ҹәдвәли вә мүзакирә үчүн мөвзулар һәр ај «Мәсиһи һәјаты вә ибадәти. Иш дәфтәри»ндә тәгдим олунур. «Мәсиһи һәјаты вә ибадәти. Иш дәфтәри»ндә тәблиғ үчүн сөһбәт планлары да јер алыр.

¹⁵ Ҝөрүшүн биринҹи һиссәси Аллаһын Кәламындакы хәзинә адланыр. Бу һиссәдә биз Мүгәддәс Китабдан мүәјјән парчанын контекстинә нәзәр салыр вә һадисәләрин ҹәрәјан етдији дөвр һаггында мәлумат алырыг, еләҹә дә өјрәндикләримизи һәјата кечирмәјин јолларыны өјрәнирик. Ҝөрүшдә һәмчинин чыхыш олур, Мүгәддәс Китабдан бир парча охунур вә Мүгәддәс Китабын һәфтәлик гираәтинә әсасланан мүзакирә кечирилир. «Мәсиһи һәјаты вә ибадәти. Иш дәфтәри»ндә бу парчалары башгаларына өјрәтмәјә көмәк едән әјани вәсаитләр вә чалышмалар вар. Мүгәддәс Китабы бу ҹүр дәриндән арашдырмаг һәјатымыза мүсбәт тәсир едир вә бир мүәллим кими јетишмәјимизә көмәк едир, беләҹә, биз «там сәриштәли, һәр ҹүр јахшы ишә тамамилә һазыр» олуруг (2 Тим. 3:16, 17).

¹⁶ Ҝөрүшүн икинҹи һиссәси «Сәриштәли мүждәчи олун» адланыр. Бу һиссә хидмәтлә бағлы өјрәндикләримизи практикада тәтбиг етмәк, тәблиғ вә тәлим ишиндә сәриштәли олмаг үчүн ҝөзәл фүрсәт јарадыр. Шаҝирд тапшырыгларындан әлавә, сөһбәт планы видеоларынын мүзакирәси дә олур. Ҝөрүшүн бу һиссәси бизә «арифләрин дилини» верир ки, биз «јериндә дејилмиш сөзлә јорғунлара һај верә» биләк (Әшј. 50:4).

¹⁷ Ҝөрүшүн «Мәсиһи һәјаты» адланан үчүнҹү һиссәсиндә Мүгәддәс Китаб принсипләрини ҝүндәлик һәјатымызда неҹә тәтбиг едә биләҹәјимиз мүзакирә олунур (Зәб. 119:105). Бу һиссәнин әсас өзәллији Мүгәддәс Китаб дәрсидир. Мүгәддәс Китаб дәрси «Ҝөзәтчи гүлләси» мүзакирәси кими суал-ҹаваб шәклиндә кечирилир.

¹⁸ Һәр ај «Мәсиһи һәјаты вә ибадәти. Иш дәфтәри»ни аланда ағсаггаллар шурасынын координатору, јахуд она көмәк едән ағсаггал иш дәфтәрини диггәтлә нәзәрдән кечирир вә ҹәдвәл тутур. Һәр һәфтә ағсаггаллар шурасынын тәјин етдији вә јахшы мүәллимлик баҹарығы олан ағсаггал ҝөрүшә сәдрлик едә биләр. Онун мәсулијјәтинә ҝөрүшүн вахтында башлајыб вахтында гуртармасына нәзарәт етмәк вә тапшырығы олан шаҝирдләри тәрифләмәк вә онлара мәсләһәт вермәк дахилдир.

¹⁹ Һәјат вә ибадәт ҝөрүшүнә мүнтәзәм һазырлашмаг вә ҝөрүшдә иштирак етмәк бизә Аллаһын Кәламыны јахшы баша дүшмәјә, орадакы принсипләри дәрк етмәјә, мүждәни әминликлә тәблиғ етмәјә вә мәһарәтлә шаҝирд һазырламаға көмәк едир. Ҝөрүшдәки меһрибан аб-һава вә руһландырыҹы мүзакирәләр һәлә вәфтиз олунмајанлара да мүсбәт тәсир ҝөстәрир. Бу вә диҝәр ҝөрүшләрә һазырлашанда «Ҝөзәтчи Гүлләсинин китабханасы»ндан, «JW Library^®» (ҹеј-дабл-ју-лајбрери) програмындан, «Ҝөзәтчи Гүлләсинин ОНЛАЈН КИТАБХАНАСЫ^™»ндан (сизин дилдә варса) вә ибадәт евиндәки китабханадан истифадә едә биләрсиниз. Ибадәт евинин китабханасында Јеһованын Шаһидләринин дәрҹ етдији нәшрләр, «Ҝөзәтчи Гүлләси нәшрләринин индекси», «Јеһованын Шаһидләринин нәшрләри үзрә ахтарыш» вәсаити, һәмчинин бир сыра Мүгәддәс Китаб тәрҹүмәләри, Мүгәддәс Китаб сөзләринин әлифба ҝөстәриҹиси, лүғәт вә ахтарыш апармаг үчүн диҝәр вәсаитләр јерләшир. Бу китабханадан ибадәт ҝөрүшүндән әввәл вә ја сонра истифадә етмәк олар.

ТӘБЛИҒ ҜӨРҮШЛӘРИ

²⁰ Һәфтәичи вә һәфтәсону бир груп тәблиғчи гыса шәкилдә кечирилән тәблиғ ҝөрүшүнә топлашыр. Бу ҝөрүшләр, адәтән, киминсә евиндә, јахуд башга бир мүнасиб јердә кечир. Бу ҝөрүшләри ибадәт евиндә дә кечирмәк олар. Мүхтәлиф јерләрдә кичик груплар шәклиндә топлашмағын сајәсиндә тәблиғчиләрә һәм тәблиғ ҝөрүшүндә иштирак етмәк, һәм дә саһәјә ҝетмәк асан олур. Тәблиғчиләр тез бир заманда бөлүшдүрүлмәли вә јубанмадан саһәјә ҝетмәлидир. Груп нәзарәтчисинә групунда олан тәблиғчиләрә јахындан диггәт ҝөстәрмәк даһа асан олур. Групларын ајры-ајры јығышмағы јахшыдыр, амма вәзијјәт елә ҝәтирә биләр ки, бир нечә груп бир јердә јығышмалы ола биләр. Мәсәлән, һәфтәарасы кечирилән ҝөрүшә аз тәблиғчи ҝәлирсә, бир нечә групу бирләшдирмәк, јахуд да бүтүн груплары бирләшдириб ҝөрүшү ибадәт евиндә, ја да башга мүнасиб јердә кечирмәк јахшы оларды. Бунун сајәсиндә тәблиғчи үчүн әмәкдаш тапмаг асан олар. Јығынҹаг гәрара ҝәлә биләр ки, бајрамлар вахты да ибадәт евиндә тәблиғ ҝөрүшләри кечирсин, јахуд да «Ҝөзәтчи гүлләси» мүзакирәсиндән сонра бүтүн јығынҹаг үчүн тәблиғ ҝөрүшү кечирсин.

²¹ Ајры-ајрылыгда јығышан групларда тәблиғ үчүн ҝөрүшү груп нәзарәтчиси апарыр. Груп нәзарәтчиси вахташыры бу ҝөрүшү апармаг үчүн өз көмәкчисини вә ја башга мүнасиб гардашы тәјин едә биләр. Гардаш тәблиғ үчүн практики вә фајдалы фикирләр һазырламалы вә мүзакирә етмәлидир. Тәблиғчиләр бөлүшдүрүләндән сонра групдан бир нәфәр дуа едир. Бундан сонра груп дәрһал тәблиғ әразисинә ҝедәҹәк. Бу ҝөрүшләр 5—7 дәгигә чәкмәли, јығынҹағын ибадәт ҝөрүшүндән сонра кечирилдикдә исә бундан да аз олмалыдыр. Тәблиғә чыханлар бу ҝөрүшдән руһланмалы, фајдалы ҝөстәришләр вә мәсләһәтләр алмалыдырлар. Јениләри, јахуд көмәјә еһтијаҹы оланлары тәҹрүбәли тәблиғчиләрлә тәјин етмәк олар ки, тәҹрүбә топласынлар.

ЈЕНИ ВӘ ЈА БАЛАҸА ЈЫҒЫНҸАГЛАРДА ИБАДӘТ ҜӨРҮШЛӘРИ

²² Шаҝирдләрин сајы артдыгҹа јығынҹагларын сајы да артыр. Јени јығынҹаг јаратмаг һагда әризәни, адәтән, филиала рајон нәзарәтчиси ҝөндәрир. Бәзән балаҹа груплар јахынлыгдакы јығынҹағын нәздиндә фәалијјәт ҝөстәрмәји даһа мүнасиб һесаб едә биләрләр.

²³ Һәрдән кичик јығынҹаглар анҹаг баҹылардан ибарәт ола биләр. Белә һалларда дуа едән вә јахуд ҝөрүшү апаран баҹы, Мүгәддәс Китаба әсасән, башыны бағламалыдыр (1 Кор. 11:3—16). Әксәр һалларда баҹы ҝөрүшү үзү аудиторијаја отураг шәкилдә кечирир. Баҹылар ҝөрүшләрдә чыхыш етмирләр. Онлар тәшкилатын тәгдим етдији материалы охујур вә ону шәрһ едир; һәрдән, мүхтәлифлик олсун дејә, материалы ја мүзакирә, ја да сәһнәҹик шәклиндә тәгдим едә биләрләр. Филиалла јазылы шәкилдә әлагә сахламағы вә ҝөрүшләри кечирмәји филиал бир баҹыја тапшыра биләр. Мүәјјән вахтдан сонра бу иши ҝөрмәјә јарарлы гардаш оларса, бу мәсулијјәтләр она тапшырылыр.

РАЈОН ТОПЛАНТЫЛАРЫ

²⁴ Илдә ики дәфә бир теократик рајонун јығынҹаглары үчүн бирҝүнлүк рајон топлантысы тәшкил олунур. Бу хош мәрасимләр бүтүн иштиракчылара бир мәсиһи кими үрәкләрини ҝениш ачмаға имкан јарадыр (2 Кор. 6:11—13). Топлантыларда тәгдим олунан мөвзулар вә топлантынын диҝәр һиссәләри баҹы-гардашларын тәләбатларыны нәзәрә алараг һазырланыр. Бүтүн програм Аллаһын Кәламына әсасланыр. Топлантыда мәрузәләр, сәһнәҹикләр (бәзиләри реал һадисәләрә әсасланыр), монологлар вә мүсаһибәләр олур. Бүтүн иштиракчылар топлантыдан алдыглары тәлим сајәсиндә мөһкәмләнирләр. Бу мәрасимләрдә јени шаҝирдләр һәјатларыны Јеһоваја һәср етдикләринин рәмзи олараг вәфтиз олунурлар.

РЕҜИОНАЛ ТОПЛАНТЫЛАР

²⁵ Илдә бир дәфә бөјүк топлантылар кечирилир. Адәтән, үч ҝүн чәкән бу реҝионал топлантыларда бир нечә теократик рајонун јығынҹаглары бир јердә топлашыр. Кичик филиаллар гәрара ҝәлә биләр ки, нәздиндә олан бүтүн јығынҹаглар үчүн бир реҝионал топланты кечирсин. Бәзи өлкәләрдә әразинин тәләбатларындан асылы олараг вә ја тәшкилатын ҝөстәриши илә топлантынын тәшкилиндә мүәјјән дәјишикликләр едилир. Вахташыры бир сыра өлкәләрдә бејнәлхалг вә ја хүсуси топлантылар тәшкил олунур. Бу топлантыларда мүхтәлиф өлкәләрдән он минләрлә Јеһованын Шаһиди иштирак едир. Узун илләрдир ки, Јеһованын Шаһидләринин тәшкил етдији бөјүк топлантылар чох сајда инсанын диггәтини ҹәлб едир. Чохлары мүждәни бунун сајәсиндә ешидир.

²⁶ Бу реҝионал топлантыларда бирҝә топлашараг ибадәт етмәк Јеһованын халгына бөјүк севинҹ ҝәтирир. Топланты боју һәгигәтин нуру даһа да ҝур ишыг сачыр. Бәзи топлантыларда фәрди мүталиә вә ја јығынҹагда мүзакирә етмәк үчүн, јахуд да саһәдә пајламаг үчүн нәзәрдә тутулан јени нәшрләр тәгдим олунур. Реҝионал топлантыларын әламәтдар мәгамларындан бири дә вәфтиз мәрасимидир. Халгын руһани инкишафында бу топлантыларын ролу әвәзсиздир. Бу топлантылар сүбут едир ки, Јеһованын халгы, доғрудан да, садиг мәсиһиләрдән ибарәт бејнәлхалг гардашлыгдыр вә Иса Мәсиһин дедији кими, онларын арасында әсл мәһәббәт һөкм сүрүр (Јәһ. 13:35).

²⁷ Јығынҹағын ибадәт ҝөрүшләриндә, рајон вә реҝионал топлантыларда јығышмаг бизләри Јеһованын ирадәсини јеринә јетирмәк үчүн гүввәтләндирир. Бу ҝөрүшләр иманымызы дүнјанын дағыдыҹы тәсириндән горујур. Онлар Јеһоваја шәрәф вә шан-шөһрәт ҝәтирир (Зәб. 35:18; Мәс. 14:28). Јеһоваја үрәкдән миннәтдарыг ки, јашадығымыз ахырзаманда бизи бу ҹүр ҝөрүшләр васитәсилә руһани ҹәһәтдән тәравәтләндирир.

АҒАНЫН ШАМ ЈЕМӘЈИ

²⁸ Илдә бир дәфә бүтүн дүнјада Јеһованын Шаһидләри Иса Мәсиһин өлүмүнүн анма мәрасимини, јахуд Ағанын шам јемәји адланан мәрасими кечирирләр (1 Кор. 11:20, 23, 24). Јеһованын халгы үчүн бу, илин ән әламәтдар мәрасимидир. Бу мәрасими гејд етмәји Иса Мәсиһин өзү тапшырыб (Лука 22:19).

²⁹ Анма мәрасиминин тарихи Мүгәддәс Китаба әсасланан Пасха бајрамы илә ејни ҝүнә дүшүр вә Пасханын тарихи Мүгәддәс Китабда ҝөстәрилиб (Чых. 12:2, 6; Мәт. 26:17, 20, 26). Исраиллиләр б. е. ә. 1513-ҹү илдә Мисир әсарәтиндән чыхмаларыны һәр ил Пасха бајрамы илә гејд едирдиләр. О заман Јеһованын бујруғу илә исраиллиләр гәмәри тәгвиминин биринҹи ајынын 14-ҹү ҝүнү Пасха гузусуну јемәли вә Мисирдән чыхмалы иди (Чых. 12:1—51). Бу бајрам јаз ҝеҹә-ҝүндүз бәрабәрлијинә чох аз галмыш, Јерусәлимдә тәзә ај ҝөрүнән ҝүндән 13 ҝүн сонра гејд олунурду. Адәтән, Иса Мәсиһин хатирәсини анма мәрасими бәдирләнмиш ајын јаз ҝеҹә-ҝүндүз бәрабәрлијиндән сонра ҝөрүндүјү ҝүнә дүшүр.

³⁰ Мәтта 26:26—28 ајәләриндә Исанын бу мәрасими гејд етмәклә бағлы ҝөстәришләри јазылыб. Бу, мистик ајин дејил. Бу мәрасим сәмави Падшаһлыгда Иса илә бирликдә һакимијјәт сүрмәк үчүн чағырыланларын иштирак етдији символик шам јемәјидир (Лука 22:28—30). Ағанын шам јемәјинә топлашмыш галан мәсиһиләр вә мараглананлар бу мәрасимдә садәҹә мүшаһидәчи гисминдә иштирак едирләр. Орада иштирак етмәклә онлар Јеһова Аллаһа Оғлу Иса Мәсиһ васитәсилә бәшәријјәтә бәхш етдији немәтләрә ҝөрә өз миннәтдарлыгларыны билдирирләр. Анма мәрасиминдән әввәл мәрасимә вә Мүгәддәс Китаб дәрсинә мараг ојатмаг мәгсәдилә хүсуси мәрузә сөјләнилир.

³¹ Јеһованын Шаһидләри һәр ибадәт ҝөрүшүнү һәвәслә ҝөзләјирләр, чүнки бу ҝөрүшләрдә биз «бир-биримизи мәһәббәтә вә јахшы ишләрә тәшвиг» едирик (Ибр. 10:24). Садиг вә ағыллы нөкәр бизим руһани тәләбатларымызы нәзәрә алыб бу ҹүр ҝөрүшләр тәшкил едир. Јеһованын хидмәтчиләринин һамысыны, һәмчинин јени ҝәләнләри дә бу ҝөрүшләрдә мүнтәзәм иштирак едәрәк там фајда ҝөтүрмәјә тәшвиг едирик. Јеһованын халгы Онун Өз тәшкилаты васитәсилә тәгдим етдији һәр шејә ҝөрә үрәкдән миннәтдардыр, бунун сајәсиндә онларын арасындакы бирлик бағлары мөһкәмләнир. Ән әсасы исә, биз бунунла Јеһова Аллаһа шәрәф ҝәтирир вә Ону уҹалдырыг (Зәб. 111:1).