Јығынҹаг хидмәтчиләринин дәјәрли хидмәти

ҺӘВАРИ Булус филиппилиләрә мәктубунда јазмышды: «Мәсиһ Исанын гуллары Булус вә Тимутидән Мәсиһ Иса илә вәһдәтдә олан Филиппидәки бүтүн мүгәддәсләрә, нәзарәтчиләрә вә јығынҹаг хидмәтчиләринә мәктуб» (Филип. 1:1). Диггәт јетирдинизсә, һәвари мәктубда јығынҹаг хидмәтчиләринин дә адыны чәкир. Ҝөрүнүр, бу гардашларын јығынҹаг ишләриндә ағсаггаллара ҝөстәрдији көмәк әвәзсиз иди. Бу ҝүн дә јығынҹаг хидмәтчиләринин ағсаггаллара бөјүк көмәји дәјир. Онларын әмәји сајәсиндә јығынҹагда низам-интизам һөкм сүрүр.

² Јығынҹағынызда кимин јығынҹаг хидмәтчиси олдуғуну билирсиниз? Онларын сизин вә јығынҹағын рифаһы үчүн һансы ишләри ҝөрдүјүндән хәбәриниз вар? Јеһова Аллаһ онларын зәһмәтини јүксәк гијмәтләндирир. Һәвари Булус онлар һагда јазырды: «Ләјагәтлә хидмәт едәнләр јахшы ад газаныр вә Мәсиһ Исаја ҝәтирдикләри иман барәдә алныачыглыгла данышырлар» (1 Тим. 3:13).

ЈЫҒЫНҸАГ ХИДМӘТЧИЛӘРИ ҮЧҮН МҮГӘДДӘС КИТАБ ТӘЛӘБЛӘРИ

³ Јығынҹаг хидмәтчиси бир мәсиһи кими ағыллы-камаллы вә мәсулијјәтли олмалы, ишинә ҹидди јанашмалыдыр. Бу, һәвари Булусун Тимутијә јаздығы мәктубда садаланан тәләбләрдән ҝөрүнүр: «Јығынҹаг хидмәтчиләри дә ејнән ҹидди олмалыдырлар. Онлар икиүзлү, шәраб дүшкүнү, һарам газанҹ һәриси олмамалы, тәмиз виҹданла иманын мүгәддәс сиррини горумалыдырлар. Гој әввәлҹә онларын јарарлы олуб-олмадығы сынансын. Әҝәр гүсурсуздурларса, гој јығынҹагда хидмәтчи кими хидмәт етсинләр. Јығынҹаг хидмәтчиси тәк бир гадынла евли олмалыдыр. О, ушагларыны вә ев әһлини јахшы идарә етмәлидир» (1 Тим. 3:8—10, 12). Онлар јығынҹаг хидмәтчиләри үчүн олан јүксәк тәләбләрә ујғун јашамалыдырлар ки, һеч ким јығынҹағы хүсуси мәсулијјәтләр һәвалә олунан бу инсанлара ҝөрә иттиһам етмәсин.

⁴ Ҹаван вә ја јашлы олмаларындан асылы олмајараг, јығынҹаг хидмәтчиләри тәблиғдә һәр ај фәал олмалыдырлар. Онлар Иса Мәсиһдән өрнәк алыб ҹанла-башла тәблиғ едир, Јеһова Аллаһ кими, инсанларын хилас олмағыны истәјирләр (1 Тим. 2:4).

⁵ Јығынҹаг хидмәтчиләри ҝејимдә, хариҹи ҝөрүнүшдә, данышыгда, дүшүнҹә тәрзиндә вә давранышда нүмунәви олмалыдырлар. Сағламдүшүнҹәли олмагла онлар башгаларынын һөрмәтини газана биләрләр. Онлар Јеһова илә мүнасибәтләрини вә јығынҹаға хидмәт етмәк шәрәфини јүксәк гијмәтләндирирләр (Тит. 2:2, 6—8).

⁶ Бу гардашларын тәјината јарарлы олуб-олмадыглары сынаныб. Һәтта тәјин олунмаздан әввәл онлар һәјатларыны Јеһоваја, сөзүн әсл мәнасында, һәср етдикләрини сүбут едибләр. Һәмчинин тәсдиг едибләр ки, Јеһова Аллаһын иши онлар үчүн һәр шејдән үстүндүр вә тапшырылан һәр иши ҝөрмәјә һазырдырлар. Бу гардашлар јығынҹаг үчүн ҝөзәл нүмунәдир (1 Тим. 3:10).

ЈЫҒЫНҸАГ ХИДМӘТЧИЛӘРИНИН ИШИ

⁷ Јығынҹаг хидмәтчиләри баҹы-гардашларын рифаһы үчүн чохсајлы ишләр ҝөрүрләр. Бунун сајәсиндә ағсаггалларын тәлим вермәјә вә јығынҹағын гејдинә галмаға даһа чох вахтлары галыр. Ағсаггаллар шурасы бу гардашлара тапшырыг верәндә онларын габилијјәтини вә јығынҹағын тәләбатларыны нәзәрә алыр.

⁸ Ҝәлин бу гардашларын ҝөрдүјү ишин бир нечәсини нәзәрдән кечирәк. Онлардан һансынаса әдәбијјата бахмаг тапшырылыр. Бунун сајәсиндә һәм шәхси, һәм дә хидмәтдә истифадә үчүн әдәбијјатымыз олур. Бәзиләринә исә јығынҹағын малијјә һесабаты вә ја саһәләр һәвалә олунур. Кимиси микрофона, кимиси сәсҝүҹләндириҹи аваданлыға бахыр, кимиси јығынҹаға ҝәләнләрә хидмәт едир, кимиси дә башга ишләрдә ағсаггаллара көмәк едир. Ибадәт евинә гуллуг етмәк вә ораны тәмиз сахламаг чохлу ҝүҹ тәләб етдији үчүн, адәтән, бу мәсулијјәт јығынҹаг хидмәтчиләринин үзәринә дүшүр.

⁹ Бәзи јығынҹагларда бу ишләрин һәр бири илә ајры-ајры гардашлар мәшғул олур. Елә јығынҹаглар вар ки, бир нечә иши бир гардаш иҹра едир. Бәзи һалларда исә бир иши бир нечә гардаш јеринә јетирир. Јығынҹагда јығынҹаг хидмәтчиси аздырса, ағсаггаллар шурасы вәфтиз олунмуш нүмунәви гардашлара јухарыдакы ишләрдән бәзиләрини тапшыра биләр. Бунун сајәсиндә һәмин гардашлар тәҹрүбә топлајаҹаг вә ҝәләҹәкдә јығынҹаг хидмәтчиси тәјин олунанда јығынҹаға даһа чох фајда ҝәтирәҹәкләр. Баҹылар јығынҹаг хидмәтчиси тәјин олунмасалар да, гардаш олмајан јығынҹагларда бәзи ишләри нүмунәви баҹыја тапшырмаг олар. Нүмунәви инсан давранышы вә ибадәти илә башгаларына ҝөзәл өрнәк олан инсандыр. Нүмунәви гардашын вә ја баҹынын ибадәт ҝөрүшләриндә иштирак етмәји, хидмәт етмәји, аилә һәјаты, әјләнҹә сечими, ҝејиниб-кеҹинмәји вә һәјатынын диҝәр саһәләри башгаларына нүмунә олмалыдыр.

¹⁰ Әҝәр јығынҹагда ағсаггал чох аздырса, вәфтиз олмаг истәјән адамла Мүгәддәс Китаб тәлимләри илә бағлы суал-ҹавабы тәҹрүбәли јығынҹаг хидмәтчиси апара биләр. Суаллар «Әлавәләр» бөлмәсинин «Мәсиһи етигадлары» адлы I һиссәсиндә јерләшир. «Мәсиһи һәјаты» адлы II һиссәдә инсанын шәхси һәјаты илә бағлы һәссас мәсәләләрә тохунулдуғу үчүн бу һиссәнин суал-ҹавабыны ағсаггал апармалыдыр.

¹¹ Һәрдән әсаслы сәбәбләрә ҝөрә ағсаггаллар шурасы јығынҹаг хидмәтчиләринин тапшырыгларыны дәјишә биләр. Анҹаг јахшы оларды ки, бу гардашлар бир мүддәт ејни ишлә мәшғул олуб тәҹрүбә топласынлар вә баҹарыға јијәләнсинләр.

¹² Бәзи әразиләрдә инкишафы ајдын ҝөрүнән јығынҹаг хидмәтчиләринә башга тапшырыглар да верилә биләр (1 Тим. 4:15). Әҝәр кифајәт гәдәр ағсаггал јохдурса, јығынҹаг хидмәтчиси груп нәзарәтчисинин көмәкчиси, бәзи һалларда исә груп хидмәтчиси тәјин олуна биләр, лакин онун ишинә ағсаггаллар нәзарәт етмәлидир. Јығынҹаг хидмәтчиләри, еһтијаҹ јаранарса, Мәсиһи һәјаты вә ибадәти ҝөрүшүндә мүәјјән бәндләрлә чыхыш етмәјә, еләҹә дә Мүгәддәс Китаб дәрсини кечирмәјә вә мәрузә илә чыхыш етмәјә тәјин олуна биләр. Әҝәр бөјүк еһтијаҹ варса вә јығынҹаг хидмәтчиләри гојулан тәләбләрә ҹаваб верирләрсә, онлара әлавә тапшырыглар верилә биләр (1 Бут. 4:10). Јығынҹаг хидмәтчиләри ағсаггаллара үрәкдән көмәк етмәлидирләр.

¹³ Јығынҹаг хидмәтчиләринин иши ағсаггалларын ишиндән фәргләнсә дә, онлар Аллаһа мүгәддәс хидмәтдә аз иш ҝөрмүрләр, онларын әмәји сајәсиндә јығынҹагда низам-интизам һөкм сүрүр. Јығынҹаг хидмәтчиләри өз мәсулијјәтләрини јахшы јеринә јетирирләрсә, нәзарәтчи вә мүәллим кими јетишибләрсә, онлары ағсаггал мәсулијјәтинә төвсијә етмәк олар.

¹⁴ Әзиз јенијетмәләр вә јени вәфтиз олмуш гардашлар, сиз јығынҹаг хидмәтчиси олмаға ҹан атырсынызмы? (1 Тим. 3:1). Һәр ил чох сајда инсан Јеһоваја ибадәтә гошулур, бу сәбәбдән јығынҹагларда руһани ҹәһәтдән јеткин вә мәсул гардашлара тәләбат артыр. Башгаларына ҹани-дилдән көмәк етмәклә бу мәсулијјәтләрә ҹан атмыш олурсунуз. Бунун үчүн Исанын нүмунәси үзәриндә дүшүнүн (Мәт. 20:28; Јәһ. 4:6, 7; 13:4, 5). Фәдакар вә сәхавәтли олмағын ҝәтирдији севинҹи дујдугҹа башгаларына көмәк етмәк арзунуз ҝүҹләнәҹәк (Һәв. 20:35). Буна ҝөрә дә башгаларына көмәк етмәјә, ибадәт евинә гуллуг ҝөстәрмәјә вә лазым ҝәлдикдә Мәсиһи һәјаты вә ибадәти ҝөрүшүндә шаҝирд тапшырыгларында кимисә әвәз етмәјә һәмишә һазыр олун. Мәсулијјәтә ҹан атан гардаш һәмчинин мүнтәзәм мүталиә едәрәк руһани кејфијјәтләрә јијәләнмәлидир (Зәб. 1:1, 2; Гал. 5:22, 23). Бундан әлавә, о, јығынҹагда тапшырыг аланда етибарлы вә садиг инсан олдуғуну сүбут етмәлидир (1 Кор. 4:2).

¹⁵ Јығынҹаг хидмәтчиләри Аллаһын мүгәддәс руһу илә тәјин олунурлар. Јығынҹагда олан һәр кәс бу гардашларла әмәкдашлыг етмәклә онларын зәһмәтини гијмәтләндирдијини ҝөстәрир. Бунунла јығынҹаг һәмчинин Јеһованын Өз евиндә низам-интизамы горумаг үчүн ҝөрдүјү тәдбири дәстәкләмиш олур (Гал. 6:10).