Јығынҹағын тәшкили вә идарә гајдасы

ҺӘВАРИ Булус коринфлиләрә биринҹи мәктубунда Аллаһ һаггында ваҹиб бир мәгамы вурғулајыр: «Аллаһ сүлһ Аллаһыдыр. О, низамсызлығы севмир». Сонра да мәсиһиләрин ибадәт ҝөрүшләри илә бағлы дејир: «Гој һәр шеј әдәб-әрканла вә низамла олсун» (1 Кор. 14:33, 40).

² Һәвари мәктубун әввәлиндә Коринф јығынҹағында јаранан фикирајрылығы илә бағлы хәбәрдарлыг верир. Булус онлары данышыгда фикир бирлијини әкс етдирмәјә, јекдил вә һәмфикир олмаға сәсләјир (1 Кор. 1:10, 11). Јығынҹағын бирлијинә тәсир едән бир сыра мәсәлә илә бағлы мәсләһәт верир. Инсан бәдәнини нүмунә ҝәтирәрәк Булус бирлијин вә әмәкдашлығын ваҹиблијини вурғулајыр. О, кимлијиндән асылы олмајараг, јығынҹагдакы һамыны бир-биринә мәһәббәт вә гајғы ҝөстәрмәјә тәшвиг едир (1 Кор. 12:12—26). Јығынҹагдакылар арасында бу ҹүр әмәкдашлығын олмасы үчүн јахшы тәшкилатчылыг ҝәрәкдир.

³ Бәс бу мәсиһи јығынҹағы неҹә тәшкил олунмушду? Ону ким тәшкил етмишди? Дахили гурулушу неҹә иди? Онун идарәсини кимләр һәјата кечирирди? Ҝәлин ҝөрәк Мүгәддәс Китаб бу суаллара неҹә ҹаваб верир (1 Кор. 4:6).

АЛЛАҺЫН РӘҺБӘРЛИЈИ АЛТЫНДА ГУРУЛАН ТӘШКИЛАТ

⁴ Мәсиһи јығынҹағы ерамызын 33-ҹү илинин Әллинҹи ҝүн бајрамында тәсис едилиб. Биринҹи әсрдә гурулан бу јығынҹаг һаггында нә демәк олар? Бу јығынҹаг теократик јолла гурулуб идарә олунурду, јәни һәр шеј Аллаһын (јун. теос) рәһбәрлији (кратос) алтында иди. Бу ики сөзә 1 Бутрус 5:10, 11 ајәләриндә раст ҝәлинир. Тәхминән 2000 ил бундан әввәл Јерусәлимдә баш вермиш вә Аллаһын Кәламында гәләмә алынмыш һадисәләр бизи әмин едир ки, мәсһ олунмуш мәсиһиләрин јығынҹағы Аллаһын һөкмү илә тәсис олунуб (Һәв. 2:1—47). Бу јығынҹаг Аллаһын «инша етдији бина» вә «аиләсинин үзвләри» иди (1 Кор. 3:9; Ефес. 2:19). Мүасир мәсиһи јығынҹағы да биринҹи әсрдәки јығынҹағын нүмунәси әсасында тәшкил олунуб вә фәалијјәт ҝөстәрир.

⁵ Илк јығынҹаг тәхминән 120 шаҝирддән ибарәт иди. Илк дәфә мүгәддәс руһ онларын үзәринә төкүлмүшдү. Бунунла да Јуил 2:28, 29 ајәләриндәки пејғәмбәрлик јеринә јетмишди (Һәв. 2:16—18). Һәмин ҝүн тәхминән 3000 нәфәр дә суда вәфтиз олунараг руһдан доғулмушларын јығынҹағына гошулмушду. Онлар Мәсиһ һагда дејиләнләри гәбул етмишдиләр вә «һәвариләрдән һәвәслә тәлим алыр»дылар. Бундан сонра «Јеһова... һәр ҝүн хилас оланлары онларын сырасына гошурду» (Һәв. 2:41, 42, 47).

⁶ Јерусәлимдәки јығынҹаг елә сүрәтлә бөјүјүрдү ки, һәтта јәһуди баш каһини наразылығыны билдирәрәк шаҝирдләрин өз тәлимләрини бүтүн Јерусәлимә јајдыгларыны сөјләмишди. Јерусәлимдәки јығынҹаға гошулан јени шаҝирдләрин арасында чохлу јәһуди каһинләри дә вар иди (Һәв. 5:27, 28; 6:7).

⁷ Иса демишди: «Јерусәлимдә, бүтүн Јәһудијјәдә вә Сәмәријјәдә, һәтта јерин уҹгарларынадәк мәним шаһидим олаҹагсыныз» (Һәв. 1:8). Исанын бу сөзләри Стефанын гәтлиндән сонра Јерусәлимдә баш галдыран ҝүҹлү тәгибләрә ҝөрә шаҝирдләрин Јәһудијјә вә Сәмәријјә бөлҝәләринә сәпәләнәндә јеринә јетди. Шаҝирдләр ҝетдикләри һәр јердә хош хәбәри бәјан едир вә чохлу шаҝирд һазырлајырдылар. Јени шаҝирдләрин арасында сәмәријјәлиләр дә вар иди (Һәв. 8:1—13). Гыса мүддәт сонра мүждә сүннәтсизләрә, јәһуди олмајанлара да чатдырылды вә чох ҝөзәл нәтиҹәләр әлдә олунду (Һәв. 10:1—48). Бүтүн бу мүждәчилик ишинин нәтиҹәсиндә јени шаҝирдләрин сајы артыр, Јерусәлимдән кәнарда да јени јығынҹаглар јаранырды (Һәв. 11:19—21; 14:21—23).

⁸ Јени јығынҹагларын Аллаһын рәһбәрлији алтында тәшкили вә идарәси үчүн һансы тәдбирләр ҝөрүлмүшдү? Аллаһын руһунун рәһбәрлији алтында јығынҹагларын гејдинә галан ағсаггаллар тәјин олунурду. Булус вә Барнәба биринҹи тәблиғ сәјаһәтләри заманы јығынҹагларда ағсаггаллар тәјин едирдиләр (Һәв. 14:23). Мүгәддәс Китабы јазанлардан бири Лука Булусун Ефес јығынҹағынын ағсаггаллары илә ҝөрүшү барәдә јазмышды. Булус онлара демишди: «Өзүнүзә вә бүтүн сүрүјә фикир верин. Мүгәддәс руһ сизи бу сүрүјә нәзарәт етмәк үчүн тәјин едиб ки, Аллаһын Өз Оғлунун ганы баһасына алдығы јығынҹағыны отарасыныз» (Һәв. 20:17, 28). Онлар Мүгәддәс Јазылардакы тәләбләрә ҹаваб вердикләри үчүн ағсаггал тәјин олунмушдулар (1 Тим. 3:1—7). Булусун әмәкдашы Титуса Критдәки јығынҹагларда ағсаггал тәјин етмәк сәлаһијјәти верилмишди (Тит. 1:5).

⁹ Јығынҹагларын сајы ҝет-ҝедә артырды. Јерусәлимдәки һәвариләр вә ағсаггаллар биринҹи әсрдәки бејнәлхалг мәсиһи јығынҹағына рәһбәрлик етмәјә давам едирдиләр. Онлар рәһбәрлик шурасы гисминдә фәалијјәт ҝөстәрирдиләр.

¹⁰ Һәвари Булус ефеслиләрә мәктубунда јазмышды ки, онлар Аллаһын мүгәддәс руһуна ујғун һәрәкәт етмәклә, Мәсиһин рәһбәрлијинә табе олмагла јығынҹагдакы бирлији горуја биләрләр. Һәвари һәмин мәсиһиләри өзләриндә тәвазөкарлыг јетишдирмәјә вә јығынҹагда олан һәр кәслә сүлһдә олуб «руһун вердији бирлији горумаға» тәшвиг едирди (Ефес. 4:1—6). Сонра о, Зәбур 68:18 ајәсини ситат ҝәтирир вә бу ајәни Јеһованын руһани ҹәһәтдән јеткин кишиләрлә бағлы тәдбиринә аид едир. Аллаһ онлары һәвари, пејғәмбәр, мүждәчи, ағсаггал вә мүәллим тәјин едиб ки, јығынҹағын рифаһына хидмәт етсинләр. Јеһова Аллаһын һәдијјәси олан бу кишиләр јығынҹағы мөһкәмләндирирләр ки, онлар Аллаһа хош олан руһани јеткинлијә чатсынлар (Ефес. 4:7—16).

БУ ҜҮН ЈЫҒЫНҸАГЛАР ҺӘВАРИЛӘРИН ГОЈДУҒУ НҮМУНӘ ҮЗРӘ ФӘАЛИЈЈӘТ ҜӨСТӘРИР

¹¹ Бу ҝүн дә Јеһованын Шаһидләринин јығынҹаглары ејни ҹүр фәалијјәт ҝөстәрир. Бу јығынҹаглардан бејнәлхалг јығынҹаг тәшкил олунуб вә бу бејнәлхалг јығынҹағын өзәји мәсһ олунмуш мәсиһиләрдир (Зәк. 8:23). Бу, Мәсиһин сајәсиндә мүмкүн олуб. О, вәдинә әсасән, сәдагәт ҝөстәриб «бу дөврүн јекунуна кими» мәсһ олунмуш шаҝирдләринин јанындадыр. Ҝүнү-ҝүндән бөјүјән јығынҹаглара ҝәлән инсанлар Аллаһын мүждәсини гәбул едир, һәјатларыны тамамилә Аллаһа һәср едир вә вәфтиз олунуб Исанын шаҝирди олурлар (Мәт. 28:19, 20; Марк 1:14; Һәв. 2:41). Онлар «јахшы чобан» олан Иса Мәсиһи тәкҹә мәсһ олунмуш мәсиһиләрин јох, башга гојунларын да, јәни бүтүн сүрүнүн башы кими гәбул едирләр (Јәһ. 10:14, 16; Ефес. 1:22, 23). Бүтүн сүрү Мәсиһин башчылығына итаәт етмәклә вә онун тәјин етдији «ағыллы вә садиг нөкәр»ә табе олмагла бирлији горујур. Ҝәлин бундан сонра да «ағыллы вә садиг нөкәр»ә үрәкдән етибар едәк (Мәт. 24:45).

ДИНИ БИРЛИКЛӘР

¹² Дөврүн сону јетишәнә гәдәр вахты-вахтында руһани гида вермәк вә Падшаһлыг һаггында мүждәни тәблиғ етмәк үчүн бир сыра бирликләр тәшкил олунуб. Бу һүгуги шәхсләр бир чох өлкәләрдә рәсми гејдијјатдан кечиб вә бир-бири илә сых әмәкдашлыг едир. Бунун сајәсиндә мүждә бүтүн дүнјаја јајылыр.

ФИЛИАЛЛАРЫН ДАХИЛИ ГУРУЛУШУ

¹³ Тәшкилатын һансыса өлкәдә филиалы ачыланда үч вә даһа чох ағсаггалдан ибарәт филиал комитәси тәшкил олунур. Бу комитә филиалын нәздиндә олан өлкәдә, јахуд өлкәләрдә ҝедән ишә нәзарәт едир. Комитә үзвләриндән бири комитәнин координатору тәјин олунур.

¹⁴ Һәр филиалын нәздиндә олан јығынҹаглардан теократик рајонлар тәшкил олунур. Бу рајонларын өлчүсү ҹоғрафи јерләшмәдән, һәмин әразидә мөвҹуд олан дилләрин сајындан, һәмчинин филиалын нәздиндә олан јығынҹагларын сајындан асылы олараг дәјишир. Һәр рајона рајон нәзарәтчиси тәјин олунур ки, һәмин рајона дахил олан јығынҹаглары зијарәт етсин. Филиал рајон нәзарәтчисинә иҹра етдији мәсулијјәтләрә даир ҝөстәришләр верир.

¹⁵ Тәшкилатын һамынын рифаһы үчүн вердији ҝөстәришләри јығынҹаглар үрәкдән гәбул едир. Онлар филиалларда, рајонларда вә јығынҹагларда нәзарәтчи вәзифәсини јеринә јетирән ағсаггалларын сәлаһијјәтинә һөрмәтлә јанашырлар. Онлар садиг вә ағыллы нөкәрдән вахтлы-вахтында руһани гида алырлар. Садиг нөкәр исә өз нөвбәсиндә һәр шејдә Мәсиһин башчылығына табе олур, Мүгәддәс Китаб принсипләринә әмәл едир вә мүгәддәс руһун рәһбәрлијинә бојун әјир. Һәвариләрин ишләри 16:5 ајәсиндә јазылыб: «Јығынҹаглар иманда мөһкәмләнир вә ҝүнү-ҝүндән бөјүјүрдү». Чијин-чијинә чалышмагла биз дә биринҹи әсрдәки мәсиһиләрин әлдә етдији нәтиҹәјә наил олаҹағыг.