Сентјабр

Јеһова Исаја бәшәријјәтин бүтүн проблемләрини һәлл етмәк ихтијары вериб. Мөҹүзәләри васитәсилә Иса ҝөстәрмишди ки, гаршысында аҹиз олдуғумуз проблемләри арадан галдырмаға гадирдир. Мәсәлән, о бизи бәшәријјәтин проблемләринин көкүндә дуран ҝүнаһдан вә онун нәтиҹәси олан хәстәлик вә өлүмдән гуртармаг игтидарындадыр (Мәт. 9:1—6; Ром. 5:12, 18, 19). Ҝөстәрдији мөҹүзәләр сүбут едир ки, о, «һәр ҹүр» хәстәни сағалда билир, һәтта өлүләри дирилдә билир (Мәт. 4:23; Јәһ. 11:43, 44). Һәмчинин Исанын шиддәтли фыртынаны рам етмәк вә инсанлары шәр руһи гүввәләрдән азад етмәк сәлаһијјәти вар (Марк 4:37—39; Лука 8:2). Јахшы ки, Јеһова Исаја бу гәдәр ихтијар вериб! Әмин ола биләрик ки, Аллаһын Падшаһлығынын һакимијјәти алтында ҝөзәл немәтләр алаҹағыг. Исанын јер үзүндә ҝөстәрдији мөҹүзәләрдән өјрәнирик ки, о, Аллаһын Падшаһлығынын Падшаһы кими тезликлә бундан да бөјүк ишләр ҝөрәҹәк. w23.04 с. 3—4, абз. 5—7

Әҝәр бөјүк јығынҹагда хидмәт едирсинизсә вә сизә чох вахт шәрһ верилмирсә, ола билсин, әл галдырмагдан ваз кечәсиниз. Амма белә етмәјин, јенә дә шәрһ вермәјә ҹәһд един. Һәр ҝөрүшә бир нечә шәрһ һазырлајын. Белә етсәниз, әввәлдә сизә сөз верилмәсә дә, ҝөрүш боју һәлә дә шәрһ вермәк имканыныз олаҹаг. «Ҝөзәтчи гүлләси»нин тәлим нәшринә һазырлашанда һәр абзасын мәгаләнин әсас мөвзусу илә неҹә әлагәли олдуғу барәдә дүшүнүн. Онда мүзакирә боју шәрһ вермәк үчүн һәмишә фикриниз олаҹаг. Бундан әлавә, бәзи абзасларда дәрин тәлимләр мүзакирә олунур вә онлары изаһ етмәк даһа гәлиздир. Һәмин абзаслара шәрһ һазырлаја биләрсиниз. Чүнки адәтән белә абзаслара әл галдыранларын сајы аз олур. Бәс әҝәр артыг нечә ҝөрүшдүр ки, шәрһ верә билмәмисинизсә, нә едә биләрсиниз? Ҝөрүшдән әввәл бәнди апараҹаг гардаша јахынлашыб һансы суала ҹаваб вермәк истәдијинизи дејә биләрсиниз. w23.04 с. 21—22, абз. 9, 10

Јусиф Јеһованын бујругларына ҹанла-башла әмәл едирди. Онун јахшы әр олмасынын сирри дә мәһз бунда иди. Ән азы үч дәфә о, Јеһовадан аиләси илә бағлы ҝөстәриш алмышды. Һәр дәфә дә о бу ҝөстәришләрә дәрһал әмәл едирди. Һалбуки бунлар асан тапшырыглар дејилди (Мәт. 1:20; 2:13—15, 19—21). Аллаһын вердији бујруглара әмәл етмәклә Јусиф Мәрјәми горуду, она дәстәк олду вә онун гајғысына галды. Бир дүшүнүн, Јусифин бу ҹүр давранышыны ҝөрәндә Мәрјәмин она севҝиси вә һөрмәти неҹә артырды! Әзиз әрләр, сиз дә Јусифдән өрнәк ҝөтүрәрәк чалышын аиләнизин гејдинә галмаг үчүн Мүгәддәс Китабдан мәсләһәтләр ахтарасыныз. Сонра исә чәтин олса да, бу мәсләһәтләрә әмәл един. Бунунла арвадынызы севдијинизи ҝөстәрәҹәксиниз вә никаһынызы мөһкәмләндирәҹәксиниз. Вануатуда јашајан вә 20 илдән чохдур евли олан бир баҹы дејир: «Әрим Јеһованын мәсләһәтинә үз тутанда вә Онун ҝөстәришләринә әмәл едәндә она һөрмәтим бирә-беш артыр. Өзүмү архајын һисс едирәм вә онун вердији гәрарлара етибар едирәм». w23.05 с. 21, абз. 5

Бабилдән ҝери гајыдан јәһудиләр Аллаһын «мүгәддәс халгы» олаҹагды (Ган. 7:6). Амма бу о демәк дејилди ки, онлар Јеһованы разы салмаг үчүн өзләриндә һеч бир дәјишиклик етмәмәлидирләр. Јәһудиләрин әксәријјәти ҝөзүнү Бабилдә ачмышды. Онлар бабиллиләрин дүшүнҹәсини, дәјәрләрини мәнимсәмишди. Илк јәһудиләр Исраилә гајыдандан узун илләр сонра вали Нәһәмја хәбәр тутду ки, Исраилдә доғулан ушаглар јәһудиләрин дилини билмир. О буна мәәттәл галды (Ган. 6:6, 7; Нәһ. 13:23, 24). Аллаһын Кәламынын јазылдығы әсас дили — ибрани дилини билмәјән ушаглар Јеһованы севмәји, Она ибадәт етмәји неҹә өјрәнәҹәкдиләр? (Үзр. 10:3, 44). Одур ки, јәһудиләр һәјатларында көклү дәјишиклик етмәли иди. Амма буну Исраилдә етмәк даһа асан иди, чүнки бурада пак ибадәт тәдриҹән бәрпа олунурду (Нәһ. 8:8, 9). w23.05 с. 15, абз. 6, 7

Әфсуслар олсун ки, нә гәдәр һәвәсли, низамлы олсаг да, бәзән һәр шеј план үзрә ҝетмәјә биләр. Ола билсин, гәфил иш чыхсын вә мәгсәдимизи иҹра етмәјә вахт галмасын (Ваиз 9:12). Јахуд да елә проблемлә үзләшә биләрик ки, бу бизи руһдан салар, ҝүҹүмүз түкәнәр (Мәс. 24:10). Һәмчинин ҝүнаһлы олдуғумуз үчүн һансыса јанлыш һәрәкәтимизлә мәгсәдимизә чатмағы даһа да чәтинләшдирә биләрик (Ром. 7:23). Ја да садәҹә јорғун ола биләрик (Мәт. 26:43). Бу кими манеәләрә бахмајараг, тәслим олмамаға бизә нә көмәк едә биләр? Јадда сахлајын: мәгсәдинизә чатмаға нәјинсә мане олмасы о демәк дејил ки, даһа сиздә алынмајаҹаг. Мүгәддәс Китабда јазылыб ки, биз тез-тез проблемләрлә үзләшә биләрик. Амма орада, һәмчинин јазылыб ки, биз ајаға галха биләрик. Бәли, нәсә мане олса да, мәгсәдинизә чатмаға чалышанда ҝөстәрирсиниз ки, Јеһованы разы салмаг истәјирсиниз. Јеһова да сизин тәслим олмадығынызы ҝөрәндә тәсәввүрәҝәлмәз дәрәҹәдә севинир. w23.05 с. 30—31, абз. 14, 15

Өнҹүл хидмәти ҝәнҹ гардашлара мүхтәлиф инсанларла әмәкдашлыг етмәји өјрәдир. Һәмчинин бу хидмәт онлара пулдан ағылла истифадә етмәјә вә јерсиз хәрҹләр етмәмәјә көмәк едир (Филип. 4:11—13). Көмәкчи өнҹүл хидмәти тамвахтлы хидмәтә ачылан гапыдыр. Бу онлары өнҹүл хидмәтинә һазырлајыр. Өнҹүл хидмәти исә тамвахтлы хидмәтин диҝәр нөвләринә гапы ача биләр. Мәсәлән, тикинтидә вә ја Бејтелдә хидмәт етмәјә. Мәсиһи гардашлар јығынҹагда диндашларына ағсаггал кими хидмәт етмәк үчүн лазыми тәләбләрә ҹаваб вермәјә чалышмалыдырлар. Мүгәддәс Китабда дејилир ки, бу мәсулијјәтә ҹан атан гардаш «јахшы шеј арзулајыр» (1 Тим. 3:1). Гардаш илк нөвбәдә јығынҹаг хидмәтчиси олмаг үчүн тәләбләрә ҹаваб вермәлидир. Јығынҹаг хидмәтчиләри бир чох ишләрдә ағсаггаллара көмәк едирләр. Һәм ағсаггаллар, һәм дә јығынҹаг хидмәтчиләри баҹы-гардашларына тәвазөкарлыгла хидмәт едирләр вә тәблиғ ишиндә шөвглә чалышырлар. w23.12 с. 28, абз. 14—16

Јушијјә падшаһ јенијетмә јашларында Јеһованы ахтармаға башлады. О, Јеһованы танымаг, Онун ирадәсини јеринә јетирмәк истәјирди. Бунунла белә, бу ҝәнҹ падшаһын һәјаты һеч дә асан дејилди. Һәмин вахт әксәријјәт сахта аллаһлара ибадәт едирди, буна ҝөрә дә Јеһованын тәрәфини тутмаг үчүн Јушијјәјә бөјүк ҹәсарәт лазым иди. О, белә дә етди! Һеч 20 јашы јох иди ки Јушијјә өлкәдән сахта ибадәти тәмизләмәјә башлады (2 Салн. 34:1, 2). Сиз дә чох ҝәнҹ олсаныз да, Јушијјәдән өрнәк алараг Јеһованы ахтармаға, Онун хүсусијјәтләри барәдә өјрәнмәјә ҹан ата биләрсиниз. Бу ҹүр давам етсәниз, өзүнүзү Она һәср етмәк истәјәҹәксиниз. Бәс һәср олунмағынызын һәјатыныза һансы тәсири олаҹаг? 14 јашында вәфтиз олунан Лука дејир: «Индән белә мән Јеһоваја хидмәти һәјатымда һәр шејдән үстүн тутаҹағам вә Онун гәлбини севиндирмәјә чалышаҹағам» (Марк 12:30). Әҝәр сизин дә үрәјиниздә белә бир истәк варса, нә хош сизә! w23.09 с. 11, абз. 12, 13

Һәвари Булус Салоники јығынҹағына илк мәктубуну јазанда јығынҹаг һеч бир ил јох иди ки јаранмышды. Јәгин, тәјин олунмуш гардашлар тәҹрүбәсиз иди вә ола билсин, сәһвләрә јол верирди. Амма онлар јенә дә һөрмәтә лајиг идиләр. Бөјүк мүсибәт јахынлашдыгҹа, ола билсин, биз ҝөстәриш алмаг үчүн ағсаггаллардан индикиндән дә чох асылы олаҹағыг. Ола биләр, һәмин вахт баш идарә вә филиалла әлагәмизи итирәк. Она ҝөрә дә индидән ағсаггаллары севиб онлара һөрмәт етмәк ваҹибдир. Нә олурса олсун, ҝәлин ајыг-сајыглығымызы горујаг, диггәтимизи ағсаггалларын сәһвләринә јох, Јеһованын Иса Мәсиһ васитәсилә онлары истигамәтләндирдијинә јөнәлдәк. Һәмчинин үмидимизи мөһкәм сахламалыјыг, о бизә сакит вә сабит галмаға көмәк едир. Дәбилгә әсҝәрин башыны горудуғу кими хиласа олан үмидимиз дә бизим дүшүнҹәләримизи горујур. Биз бу дүнјанын етдији тәклифләрин пуч олдуғуну баша дүшүрүк (Филип. 3:8). w23.06 с. 11—12, абз. 11, 12

Ахмаг гадынын чағырышыны ешидәнләр гәрар вермәлидирләр: онлар дәвәти ја гәбул етмәли, ја да рәдд етмәлидирләр. Биз ҹинси әхлагсызлыгдан чәкинмәлијик. Бунун үчүн әсаслы сәбәбләр вар. «Ахмаг гадын» белә дејир: «Оғурлуг су ширин олар» (Мәс. 9:17). «Оғурлуг су» нәдир? Мүгәддәс Китабда әрлә арвад арасындакы јахынлыг тәравәт ҝәтирән суја бәнзәдилир (Мәс. 5:15—18). Гануни никаһда олан киши илә гадын бир-бири илә ҹинси мүнасибәтдән һәзз ала биләр. Амма «оғурлуг су» барәдә буну гәтијјән демәк олмаз. Ола билсин, «оғурлуг су» дејиләркән гадаған олунмуш ҹинси мүнасибәтләр нәзәрдә тутулур. Чох вахт әхлагсызлыг едәнләр өз әмәлләрини оғрутәк хәлвәтдә едирләр. Әмәлләри онлара «ширин» су кими ҝәлир. Нәјә ҝөрә? Јәгин, онлар дүшүнүр ки, ҝөрдүкләри ишин үстү ачылмајаҹаг. Амма онлар неҹә дә јанылырлар! Јеһова һәр шеји ҝөрүр. Онун рәғбәтини итирмәкдән бетәр һеч нә ола билмәз. Белә бөјүк иткидән сонра бу суја «ширин» демәк олар? (1 Кор. 6:9, 10). w23.06 с. 22—23, абз. 7—9

Ола билсин, дуаларынызын әввәлки кими үрәкдән ҝәлмәдијини вә ја тәблиғдән даһа севинҹ дујмадығынызы дүшүнүрсүнүз. Дүшүнмәјин ки, Јеһова мүгәддәс руһуну сиздән ҝөтүрүб. Гејри-камил инсанын һәрдән бу ҹүр һиссләрә гапылмасы нормалдыр. Ҝөрсәниз ки, шөвгүнүз јаваш-јаваш азалыр, һәвари Булусун нүмунәси үзәриндә дүшүнүн. Дүздүр, о, Исадан өрнәк ҝөтүрмәјә чалышырды. Амма баша дүшүрдү ки, һәрдән ејни шөвглә хидмәт едә билмәјәҹәк. Булус һәмин ан һансы һиссләр кечирмәсинә бахмајараг, хидмәтини јеринә јетирмәјә гәтијјәтли иди. Ејнилә, сиз дә тәкҹә һиссләриниз әсасында гәрар вермәјин. Кечирдијиниз һиссләрә бахмајараг, дүзҝүн оланы етмәјә гәтијјәтли олун. Мүәјјән вахтдан сонра һәрәкәтләриниз һиссләринизә тәсир едәҹәк (1 Кор. 9:16). w24.03 с. 11—12, абз. 12, 13

Баҹы-гардашлара севҝимизи онлары достларымызын сырасына гәбул етмәклә ҝөстәрә биләрик (2 Кор. 6:11—13). Чохумузун ҝетдији јығынҹагларда баҹы-гардашларын хасијјәти, миллијјәти вә мәдәнијјәти бир-бириндән фәргләнир. Фикримизи онларын мүсбәт ҹәһәтләринә ҹәмләсәк, онлара севҝимизи артыра биләҹәјик. Бөјүк мүсибәт заманы мәһәббәт ваҹиб рол ојнајаҹаг. Һәмин вахт Јеһова бизи неҹә горујаҹаг? Гәдим Бабил һүҹума мәруз галан заман Јеһова Өз халгына белә бир ҝөстәриш вермишди: «Еј халгым, ичәри отагларыныза ҝирин, арханызҹа гапылары бағлајын. Гәзәб кечәнәҹән, гыса мүддәтә ҝизләнин» (Әшј. 26:20). Јәгин, биз дә бөјүк мүсибәт заманы бу ҝөстәришә әмәл етмәли олаҹағыг. w23.07 с. 6—7, абз. 14—16

Гој сизи дәрракәли инсан кими танысынлар. Дүшүнүн: «Инсанлар мәни неҹә таныјыр? Дәрракәли, ҝүзәштә ҝедән, башгасынын фикринә һөрмәтлә јанашан инсан кими, јохса сәрт, кобуд вә инадкар инсан кими? Башгаларыны динләјирәм вә мүмкүндүрсә, онларын дедији кими едирәм?» Бизим нә дәрәҹәдә дәрракәли олдуғумуз Јеһоваја вә Исаја нә дәрәҹәдә бәнзәдијимизи ҝөстәрәҹәк. Дәрракәли олмаг бизә көмәк едир ки, вәзијјәтимиз дәјишәндә она ујғунлашмағы баҹараг. Бу дәјишикликләр ҝөзләмәдијимиз чәтинликләр јарада биләр. Мәсәлән, ола биләр ки, сағламлығымызда гәфил ҹидди проблем јарансын, јахуд јашадығымыз өлкәдә баш верән сијаси вә игтисади дәјишикликләр уҹбатындан һәјатымыз алт-үст олсун (Ваиз 9:11). Һәтта тәшкилатын тәјинатымызы дәјишмәси бизим үчүн бөјүк дәрд ола биләр. Нөвбәти дөрд аддым јени вәзијјәтә ујғунлашмаға көмәк едәҹәк: 1) реаллығы гәбул етмәк, 2) диггәтимизи ҝәләҹәјә ҹәмләмәк, 3) фикримизи мүсбәт шејләрә көкләмәк вә 4) башгалары үчүн нәсә етмәк. w23.07 с. 21—22, абз. 7, 8

Бабиллиләр Дәнјалы јурд-јувасындан дидәрҝин едиб әсир апаранда о, чох ҝәнҹ иди. Амма ҝөрүнүр, о, ишғалчыларын диггәтини чәкмишди. Онлар «заһири» амилләрә — Дәнјалын «ејибсиз, јарашыглы» вә задәҝан аиләдән олмасына фикир вермишдиләр (1 Ишм. 16:7). Елә буна ҝөрә дә бабиллиләр Дәнјала тәлим кечдиләр ки, онларын елит тәбәгәсинә мәнсуб олсун (Дән. 1:3, 4, 6). Јеһова исә Дәнјалы Она садиг олдуғуна ҝөрә севирди. Дәнјалын һарадаса 20 јашы оланда Јеһова онун адыны Нуһ вә Әјјуб кими Она узун илләр сәдагәтлә хидмәт етмиш инсанларла бир чәкмишди (Јар. 5:32; 6:9, 10; Әјј. 42:16, 17; Һизг. 14:14). Дәнјал сүрдүјү узун вә ҝөзәл өмрү боју Јеһова тәрәфиндән севилди (Дән. 10:11, 19). w23.08 с. 2, абз. 1, 2

Ев алмаг истәјәндә, јәгин, евин һәр јерини өз ҝөзүнүзлә ҝөрмәк истәјәрдиниз. Ејни шеји Аллаһын Кәламыны мүталиә едән заман да етмәлијик. Әҝәр ону тез-тәләсик охусаныз, јалныз тәмәл һәгигәтләри баша дүшәҹәксиниз, башга сөзлә десәк, «Аллаһын мүгәддәс сөзләри илә бағлы ибтидаи тәлимләри» биләҹәксиниз (Ибр. 5:12). Буна ҝөрә дә Мүгәддәс Китабын «ичинә ҝириб» орадакы инҹәликләри ҝөрмәјә чалышын. Буну етмәјин ән ҝөзәл јолу мүхтәлиф һиссәләрин бир-бири илә неҹә әлагәли олдуғуну ҝөрмәкдир. Мәгсәд гојун ки, тәкҹә нәјә инандығынызы јох, һәмчинин буна нәјә ҝөрә инандығынызы да дәрк едәсиниз. Аллаһын Кәламынын там дәрк етмәк үчүн дәрин һәгигәтләри өјрәнмәлијик. Булус мәсиһиләри тәшвиг етмишди ки, Аллаһын Кәламынын дәринлијинә варыб «һәгигәтин ҝенишлијини, узунлуғуну, һүндүрлүјүнү вә дәринлијини» там гаврасынлар. Бунун сајәсиндә онларын иманлары «мөһкәм» вә «мәтин» олаҹагды (Ефес. 3:14—19). Биз дә ејни шеји етмәлијик. w23.10 с. 18—19, абз. 1—3

Мүгәддәс Китабда сәбир ҝөстәрмиш чох адамын нүмунәси вар. Бәлкә, фәрди мүталиәниз заманы онлар барәдә арашдырма апарасыныз? Мәсәлән, Давуд Исраилин ҝәләҹәк падшаһы олмаг үчүн мәсһ едиләндә ҝәнҹ јашларында иди. Амма бу падшаһлығы алмаг үчүн о, узун илләр ҝөзләмәли олду. Јахуд ҝөтүрәк Шәмуну вә Һәннәни. Онлар Јеһоваја сәдагәтлә гуллуг едәрәк вәд олунмуш Мәсиһин ҝәлишини ҝөзләјирди (Лука 2:25, 36—38). Бу кими нүмунәләри арашдыраркән нөвбәти суаллар үзәриндә дүшүнүн: «Бу инсана сәбир ҝөстәрмәјә нә көмәк едиб? Бунун она һансы хејри олуб? Мән она неҹә бәнзәјә биләрәм?» Һәмчинин сәбирсизлик едән инсанлар барәдә дә мүталиә едә биләрсиниз (1 Ишм. 13:8—14). Нөвбәти суаллара ҹаваб тапмаға чалышын: «Бу инсанын сәбирсизлик етмәсинә нә сәбәб олду? Бу нә илә нәтиҹәләнди?» w23.08 с. 25, абз. 15

Һәвари Бутрус сәдагәтли иди. Һеч бир шеј ону Исанын ардынҹа ҝетмәкдән сахлаја билмәди. Мәсәлән, бир дәфә шаҝирдләр Исанын дедији сөзләри баша дүшмәмишди (Јәһ. 6:68). Онлар Исанын дедикләрини изаһ етмәјини ҝөзләмәк әвәзинә, ондан узаглашдылар. Амма Бутрус белә етмәди. О, баша дүшүрдү ки, «әбәди һәјатын сөзләри» јалныз Исададыр. Иса Бутрусун вә диҝәр һәвариләрин ону атаҹағыны билирди. Буна бахмајараг, о, Бутруса деди ки, онун јенидән ҝери гајыдаҹағына вә сәдагәтли галаҹағына әминдир (Лука 22:31, 32). Иса билирди ки, «руһ шөвглү, ҹисим исә зәифдир» (Марк 14:38). Буна ҝөрә дә Бутрус ону таныдығыны данса да, о, Бутрусдан үмидини үзмәди, ону атмады. Иса дириләндән сонра еһтимал ки, тәкликдә Бутруса ҝөрүндү (Марк 16:7; Лука 24:34; 1 Кор. 15:5). Јәгин, һәрәкәтләринә ҝөрә пешман олан бу һәвари Исаны ҝөрүб мөһкәмләнмишди. w23.09 с. 22—23, абз. 9, 10

Јеһова Она иман едән инсанларын тәгсирини бағышлајыр, ҝүнаһларыны һеч һесаба да алмыр (Зәб. 32:1, 2). Онун ҝөзүндә белә инсанлар ҝүнаһсыз вә салеһдирләр. Ибраһим, Давуд вә диҝәр мөмин инсанлар салеһ адлансалар да, гејри-камил, ҝүнаһлы идиләр. Амма Јеһоваја ибадәт етмәјән инсанлардан фәргли олараг, онлар иманлы идиләр, буна ҝөрә дә Аллаһ онлары ҝүнаһсыз сајырды (Ефес. 2:12). Ромалылара јаздығы мәктубунда һәвари Булусун ајдын изаһ етдији кими, Јеһова илә дост олмаг үчүн иман шәртдир. Елә бу сәбәбдән Ибраһимлә Давуд пејғәмбәр Аллаһла дост олуб. Биз дә ола биләрик. w23.12 с. 3, абз. 6, 7

Бу ҝүн бүтүн мәсиһиләр Аллаһа гурбан ҝәтирә биләр. Неҹә? Вахтымызы, ҝүҹүмүзү вә мадди вәсаитимизи Аллаһа ибадәтә сәрф етмәклә. Јеһоваја ән јахшы гурбанлары вермәклә ҝөстәририк ки, Она ибадәт етмәк бизим үчүн бөјүк шәрәфдир. Һәвари Булус ибадәтимизә аид олан бәзи саһәләри вурғулајыр вә ҝөстәрир ки, онлара бармагарасы јанашмамалыјыг (Ибр. 10:22—25). Бура Јеһоваја дуа етмәк, үмидимизи аләмдә бәјан етмәк, јығынҹаг ҝөрүшләриндә иштирак етмәк вә Јеһованын ҝүнүнүн јахынлашдығыны ҝөрдүкҹә бир-биримизи даһа да чох руһландырмаг дахилдир. «Вәһј» китабынын сонларына јахын Јеһованын мәләји дүз ики дәфә дејир: «Аллаһа сәҹдә гыл» (Вәһј 19:10; 22:9). Ҝәлин Јеһованын бөјүк руһани мәбәди илә бағлы дәрин һәгигәтләри һеч вахт унутмајаг вә Улу Аллаһымыз Јеһоваја ибадәт етмәк имканыны һәр заман гијмәтләндирәк! w23.10 с. 29, абз. 17, 18

Һамымыз истәјирик ки, һәмишә «бир-биримизи севәк». Амма Иса Мәсиһин бу ваҹиб хәбәрдарлығыны да унутмамалыјыг: «Әксәр инсанларда мәһәббәт сојујаҹаг» (Мәт. 24:12). Иса демирди ки, бу онун шаҝирдләринин чоху илә баш верәҹәк. Амма јенә дә биз еһтијатлы олмалыјыг. Мәһәббәтдән касад инсанларын бизи өзләринә охшатмағына имкан вермәмәлијик. Ортаја белә суал чыхыр: «Диндашларымыза севҝимизин ҝүҹлү олуб-олмадығыны неҹә јохламаг олар?» Бунун үчүн мүәјјән вәзијјәтләрдә неҹә даврандығымыза фикир верә биләрик (2 Кор. 8:8). Бу вәзијјәтләрдән бирини Бутрусун сөзләриндән ҝөрмәк олар: «Һәр шејдән зијадә бир-биринизи һәрарәтлә севин, чүнки мәһәббәт чохлу ҝүнаһын үстүнү өртүр» (1 Бут. 4:8). Демәли, диндашымыз сәһв едәндә, јахуд да хәтримизә дәјәндә мәһәббәтимизин нә дәрәҹәдә ҝүҹлү олдуғуну јохламаг үчүн фүрсәт јараныр. w23.11 с. 10—11, абз. 12, 13

Јығынҹагда бирини севиб, о бирисиндән ҝен ҝәзириксә, Исанын мәһәббәтлә бағлы вердији әмрә итаәт етдијимизи дејә билмәрик. Дүздүр, ола билсин, Иса кими бизим дә өзүмүзә даһа јахын һисс етдијимиз кимләрсә вар (Јәһ. 13:23; 20:2). Амма һәвари Бутрус бизә хатырладыр ки, бүтүн диндашларымыза «гардашлыг мәһәббәти» бәсләмәлијик, онлары доғмамыз кими севмәлијик (1 Бут. 2:17). Бутрус бизи тәшвиг едир: «Бир-биринизи сәмими-гәлбдән, һәрарәтлә севин». Бу контекстдә «һәрарәтлә» севмәк һиссләримизи мәһәббәтә чатана гәдәр дартмаг демәкдир (1 Бут. 1:22). Тутаг ки, һансыса баҹы вә ја гардаш хәтримизә дәјиб. Бу заман илк реаксијамыз она мәһәббәт ҝөстәрмәк јох, әксинә, ондан әвәз чыхмаг ола биләр. Амма Бутрус Исадан өјрәнмишди ки, гисас алмағымыз Аллаһа хош ҝетмир (Јәһ. 18:10, 11). О јазмышды: «Пислијә писликлә, тәһгирә тәһгирлә ҹаваб вермәјин, әксинә, хејир-дуа илә ҹаваб верин» (1 Бут. 3:9). Һәрарәтли севҝи сајәсиндә меһрибан вә анлајышлы олаҹагсыныз. w23.09 с. 28—29, абз. 9—11

Ушаглар чох тез бөјүјүр. Бу просес инсаны һејран гојур. Адама елә ҝәлир ки, ушаг өз-өзүнә бөјүјүр. Амма руһани ҹәһәтдән бөјүмәк, јеткинләшмәк өз-өзүнә баш верән бир просес дејил (1 Кор. 13:11; Ибр. 6:1). Бунун үчүн Јеһова илә мөһкәм достлуг мүнасибәти ҝәрәкдир. Һәмчинин Онун бәјәндији кејфијјәтләрә саһиб олмаг, мүәјјән баҹарыглара јијәләнмәк вә ҝәләҹәк һәјата һазырлашмаг үчүн Јеһованын мүгәддәс руһуна еһтијаҹымыз вар (Мәс. 1:5). Јеһова инсанлары киши вә гадын олараг јарадыб (Јар. 1:27). Онлар физики ҹәһәтдән бир-бириндән чох фәргләнир. Онларын фәргли олдуглары диҝәр саһәләр дә вар. Јеһова киши илә гадыны јараданда һәрәсинә хүсуси бир рол верди. Онлар бу шәрәфли роллары иҹра етмәк үчүн мүәјјән кејфијјәтләрә вә баҹарыглара саһиб олмалыдырлар (Јар. 2:18). w23.12 с. 18, абз. 1, 2

Иса инсанларын Аллаһын адыны чәкмәсини истәјирди? Әлбәттә. Бәзи дин хадимләри Аллаһын мүгәддәс адыны дилә ҝәтирмәји һөрмәтсизлик һесаб едирдиләр. Амма Иса Мүгәддәс Китаба әсасланмајан бу ҹүр дүшүнҹәни рәдд едирди, нәјинсә она Атасынын адыны уҹалтмаға мане олмасына јол вермирди. Исанын ҝерасалыларын торпағында ҹинә тутулмуш бир адамы сағалтдығы һадисәни јадымыза салаг. Ҹамаат чох горхмушду вә Исаја јалвармышды ки, онларын әразисиндән чыхыб ҝетсин. О да ҝетмишди (Марк 5:16, 17). Амма Иса Аллаһын адынын орада да танынмасыны истәјирди. Буна ҝөрә дә кишијә тапшырды ки, ҝедиб инсанлара сағалдығыны данышсын. Амма Иса она «ҝет мәним нә етдикләрими даныш» демәди, «Јеһованын сәнин үчүн етдији һәр шеји... даныш» деди (Марк 5:19). Иса бу ҝүн биздән дә ејни шеји ҝөзләјир. О, бүтүн дүнјада Атасынын адыны бәјан етмәјимизи истәјир! (Мәт. 24:14; 28:20). Буну етмәјимиз Падшаһымыз Исаја хош ҝедир. w24.02 с. 10—11, абз. 10

Ахырзаманын бу ағыр дөнәминдә нә јахшы ки, биз Јеһованын халгынын арасындајыг. Дүнјадакы вәзијјәт ҝүнбәҝүн писләшир. Амма Јеһова бизә бу чәтин вәзијјәтләрә дөзә билмәјимиз үчүн ҝөзәл руһани аилә бәхш едиб (Зәб. 133:1). Һәмчинин О бизә аилә телләримизи мөһкәмләндирмәјә көмәк едир (Ефес. 5:33—6:1). Үстәлик, гәлб раһатлығымызы горумаг үчүн дәрракә вә һикмәт верир. Бунунла белә, Јеһоваја даима сәдагәтлә хидмәт едә билмәјимиз үчүн вар ҝүҹүмүзлә чалышмалыјыг. Нәјә ҝөрә? Чүнки заман-заман башгаларынын гејри-камиллији бизә пис тәсир едә биләр. Һәмчинин өз сәһвләримизә ҝөрә, әләлхүсус, ејни сәһви дәфәләрлә тәкрарладығымыза ҝөрә руһдан дүшә биләрик. Она ҝөрә дә 1) диндашымыз бизи инҹидәндә, 2) һәјат јолдашымыз давранышы илә бизи мәјус едәндә вә 3) сәһвләримизә ҝөрә руһдан дүшәндә Јеһоваја хидмәти давам етдирмәлијик. w24.03 с. 14, абз. 1, 2

Заман-заман Јеһованын јолунда чох иш ҝөрмәјә гәтијјәтли олан баҹы-гардашларын һәјат һекајәләрини ешидәҹәксиниз. Ола билсин, онлар Падшаһлыг Мүждәчиләри Мәктәбиндә охујублар, јахуд тәблиғчиләрә тәләбат олан әразијә көчүбләр. Әҝәр белә бир мәгсәд гојмаға шәраитиниз јол верирсә, тәрәддүд етмәјин. Јеһованын халгы Она даһа чох хидмәт едә билмәк үчүн һәр бир фүрсәти дәјәрләндирир (Һәв. 16:9). Бәс әҝәр һал-һазырда вәзијјәтиниз буна јол вермирсә, онда неҹә? Дүшүнмәјин ки, сиз буну едәнләрдән дәјәрсизсиниз. Әсас ахыра кими дөзүм ҝөстәрмәкдир (Мәт. 10:22). Јеһова етдијиниз хидмәти чох дәјәрләндирир. Одур ки, өз баҹарығыныз вә шәраитиниз чәрчивәсиндә Јеһованын јолунда етдијиниз хидмәти һечә сајмајын. Бу, вәфтиздән сонра да Исанын ардынҹа ҝетмәјин ваҹиб үсулудур (Зәб. 26:1). w24.03 с. 10—11, абз. 11

Сәмави Атамыз сөз вериб ки, төвбә етсәк, бизи бағышлајаҹаг (Зәб. 86:5). Она ҝөрә дә етдијимиз ҝүнаһлара ҝөрә һәгигәтән дә пешманыгса, әмин ола биләрик ки, Јеһова вердији сөзү тутараг бизи бағышлајыб. Унутмајын, Јеһова сәрт вә тәләбкар Аллаһ дејил. О, һеч вахт биздән ҝүҹүмүздән артығыны тәләб етмир. О, әлимиздән ҝәләни етмәјимизи гијмәтләндирир. Һәмчинин Мүгәддәс Китабдан Јеһоваја бүтүн гәлби илә хидмәт едән кәсләрин нүмунәсини арашдырын. Мәсәлән, һәвари Булусу јадыныза салын. О, узун илләр боју хидмәтә ҹан јандырмышды. Минләрлә километр мәсафә гәт етмиш вә јығынҹаглар тәсис етмишди. Бәс вәзијјәти дәјишдијинә ҝөрә даһа чох хидмәт едә билмәјәндә Булус Аллаһын разылығыны итирди? Тәбии ки, јох. О, әлиндән ҝәләни етмәјә давам етди, Јеһова да она бол немәт верди (Һәв. 28:30, 31). Ејнилә, бизим дә Јеһованын јолунда етдикләримиз заман-заман дәјишә биләр. Амма ән ваҹиби Она һансы нијјәтлә хидмәт етмәјимиздир. w24.03 с. 27, абз. 7, 9

Јеһоваја етдији дуаларла Иса давамчыларына нүмунә гојмушду. О, хидмәти бојунҹа Јеһоваја дәфәләрлә дуа етмишди. Онун иши чох иди, әтрафында да һәмишә адамлар олурду. Она ҝөрә дә дуа етмәк үчүн конкрет вахт ајырырды (Марк 6:31, 45, 46). Тәк галыб Јеһоваја дуа едә билсин дејә о, сәһәр ертәдән ојанырды. Ән азы бир дәфә Иса ваҹиб гәрар вермәздән өнҹә бүтүн ҝеҹәни дуа етмишди (Лука 6:12, 13). Өлүмүндән өнҹәки ҝеҹә исә о, дәфәләрлә дуа етмишди. Чүнки јер үзүндәки тәјинатынын ән чәтин һиссәсини тамамламаг үзрә иди (Мәт. 26:39, 42, 44). Исанын нүмунәсиндән өјрәнирик ки, нә гәдәр мәшғул олсаг да, дуаја вахт ајырмалыјыг. Ола билсин, Иса кими бизә дә бунун үчүн конкрет вахт тәјин етмәк лазымдыр. Ја сәһәр бир аз тез ојана биләрик, ја да ахшам бир аз ҝеҹ јата биләрик. Бунунла Јеһоваја ҝөстәририк ки, Онун вердији әнам бизим үчүн дәјәрлидир. w23.05 с. 3, абз. 4, 5

Ҝүнүн ајәсиндәки «долмушдур» ифадәсинә фикир верәк. Мүгәддәс Китабын бир изаһлы лүғәтиндә бу сөз «чајтәк үстүмүзә ахмышдыр» кими верилиб. Бу ајә Јеһованын мәсһ олунмуш мәсиһиләрә севҝисинин боллуғуну неҹә дә ҝөзәл тәсвир едир! Мәсһ олунмушлар Аллаһ тәрәфиндән севилдикләрини билирләр (Јһд. 1). Һәвари Јәһја нөвбәти сөзләри јазаркән онларын һиссләрини ифадә етмишди: «Ҝөрүн Атамыз бизә неҹә дә бөјүк мәһәббәт бәхш едиб ки, биз Онун өвладлары адланырыг!» (1 Јәһ. 3:1). Бәс Јеһова тәкҹә мәсһ олунмушлары севир? Хејр. О һамымыза севҝисини сүбут едиб. Јеһованын мәһәббәтинин ән бөјүк исбаты нәдир? Фидјә. Бу, Каинатдакы ән бөјүк мәһәббәтин тәҹәссүмүдүр (Јәһ. 3:16; Ром. 5:8). w24.01 с. 28, абз. 9, 10

Бу ҝүнүн ајәсиндә Давуда горхуларына үстүн ҝәлмәјә көмәк едән бир амил вурғуланыр. Һәјаты тәһлүкәдә олан вахт о, Јеһованын ҝәләҹәкдә онун үчүн ҝөрәҹәји ишләр барәдә дүшүнүрдү. Давуд билирди ки, Јеһова дүз вахтында ону хилас едәҹәк. Һәр шејдән әввәл Јеһова онун Исраилин нөвбәти падшаһы олаҹағыны бәјан етмишди (1 Ишм. 16:1, 13). Давуд әмин иди ки, Јеһованын бүтүн вәдләри мүтләг ҝерчәкләшәҹәк. Бәс Јеһова бизә нә вәд едиб? Билирик ки јашадығымыз бу дүнјада Јеһова үзләшдијимиз бүтүн проблемләри арадан галдырмыр. Бу шәр дүнјада һансы сынагла үзләшириксә үзләшәк, Јеһова ҝәләҹәкдә јени дүнјада онларын һамысыны јох едәҹәк (Әшј. 25:7—9). Јараданымыз өлүләри дирилтмәјә, хәстәликләримизи, емосионал јараларымызы сағалтмаға вә бизә гаршы чыханлары мәһв етмәјә гадирдир (1 Јәһ. 4:4). w24.01 с. 6, абз. 12, 13

Һәср олунмағыныз вә вәфтизиниз барәдә дүшүнүн. Сиз бу гәрары нијә вермишдиниз? Чүнки Јеһованын тәрәфини тутмаг истәјирдиниз. Јадыныза салын, һәгигәти тапдығыныза неҹә әмин олмушдунуз? Сиз Јеһова һагда дәгиг билик алмышдыныз, ҝетдикҹә Ону севмәјә, Она еһтирам бәсләмәјә башламышдыныз. Сонра сиздә иман јаранды вә бу сизи төвбә етмәјә тәшвиг етди. Сиз Јеһованын нифрәт етдији ишләрдән узаг олуб Онун бәјәндији кими јашамаға башладыныз. Јеһованын сизи бағышладығыны һисс едәндә гәлб раһатлығы тапдыныз (Зәб. 32:2). Јығынҹаглара ҝәлмәјә, өјрәндијиниз ҝөзәл һәгигәтләри башгалары илә бөлүшмәјә башладыныз. Инди исә һәср олунуб вәфтиз олунмуш бир мәсиһи кими һәјата апаран јолда јеријирсиниз вә бу јолдан сапмамаг гәтијјәтиндәсиниз (Мәт. 7:13, 14). Гој сизин Јеһоваја сәдагәтиниз вә әмрләринә итаәтдә гәтијјәтиниз мөһкәм олсун. w23.07 с. 17—18, абз. 14; с. 19, абз. 19

Һәсролунма вәдиниз үзәриндә дүшүнәндә нәфсинизи сынајан вәзијјәтләрә гаршы дурмаг әзминиз мөһкәмләнәҹәк. Мәсәлән, киминсә һәјат јолдашы илә флирт едәрдиниз? Әлбәттә, јох! Чүнки сиз артыг Јеһоваја сөз вермисиниз ки, һеч вахт белә шејләрә јол вермәјәҹәксиниз. Әҝәр бәри башдан үрәјиниздә бу ҹүр һиссләрин көк атмасына јол вермәсәниз, сонра онлары чыхарыб атмаг лазым ҝәлмәјәҹәк. Јолунузу дәјишиб, «шәр адамларын јолуна ајаг» басмајаҹагсыныз (Мәс. 4:14, 15). Иса Мәсиһин нүмунәси үзәриндә дүшүнмәк бизә бу саһәдә көмәк едә биләр. О, Атасыны разы салмаға гәтијјәтли иди. Иса Мәсиһ кими сиз дә Аллаһы наразы салаҹаг истәнилән тәклифи ҹәлд вә гәти шәкилдә рәдд едәҹәксиниз (Мәт. 4:10; Јәһ. 8:29). Әслиндә, үзләшдијимиз чәтинликләр, сынаглар даима Исанын ардынҹа ҝетмәјә гәтијјәтли олдуғумузу сүбут етмәк үчүн имкан јарадыр. Әмин ола биләрсиниз ки, Јеһова бу јолда сизә көмәк едәҹәк. w24.03 с. 9—10, абз. 8—10