Дуа көмәк едирми?
ДЕМӘК олар ки, һәр кәсин, һәјатында дуа етмәјә еһтијаҹ дујдуғу анлар олур. Әслиндә бүтүн дини ҹәрәјанлара мәнсуб олан инсанлар үрәкдән дуа едирләр. Мәсәлән, бир буддист, “Амида Буддаја иман едирәм” дуасыны ҝүндә мин дәфә тәкрарлаја биләр.
Дүнјадакы проблемләрин азалмадығына диггәт јетирдикдә, ортаја белә бир суал чыхыр: Инсанлар дуа етмәклә нәјә наил олмаг истәјирләр? Дуалар көмәк едирми?
Инсанлар нә үчүн дуа едирләр?
Шәргдә инсанларын бир чоху өлмүш әҹдадларына, јахуд синтоизмин вә ја даосизмин аллаһларына дуа едирләр. Онлар имтаһанлары мүвәффәгијјәтлә вермәк, јахшы мәһсул јығмаг вә ја хәстәликләрин гаршысыны алмаг үмидилә дуа едирләр. Буддистләр дуа едәрәк маарифләнмәјә наил олмаға чалышырлар. Һиндулар билик, вар-дөвләт вә мүдафиә диләјәрәк севимли илаһи вә илаһәләринә үрәкдән дуа едирләр.
Һәјатларыны гапалы монастырларда раһиб вә ја раһибәлик хидмәтинә һәср едиб, дурмадан дуа етмәклә, бә’зи католикләр бәшәријјәтә фајда ҝәтирәҹәкләринә үмид едирләр. Милјонларла католикләр, тәсбеһ чевирәрәк, әзбәрләнмиш дуалар сөјләмәклә Мәрјәмин лүтфүнү газанмаға ҹәһд ҝөстәрирләр. Шәргдә бир чохлары дуа дәјирманларындан истифадә едирләр. Протестантлар һиссләрини Аллаһа сәрбәст сурәтдә ифадә едә биләрләрсә дә, Рәббин дуасындакы сөзләри тәкрарлајырлар. Јәһудиләрин бир чоху узун јол гәт едәрәк Јерусәлимдәки Гәрб Диварынын јанына ҝәлирләр ки, бурада мә’бәдин бәрпа едилмәси, јени еранын фираванлыг вә сүлһ ичиндә башламасы үчүн дуа етсинләр.
Милјонларла инсанын дурмадан дуа етмәсинә бахмајараг, ҹәмијјәт јохсуллугдан, алкоголизмдән вә наркотикләрдән ҝет-ҝедә даһа чох әзаб чәкир, даһа чох аиләләр дағылыр, ҹинајәткарлыг вә мүһарибәләр ҝетдикҹә артыр. Бәлкә бу инсанлар дүзҝүн дуа етмирләр? Үмумијјәтлә дуалары кимсә ешидирми?
Дуалары кимсә ешидирми?
Әҝәр дуалары һеч ким ешитмирсә, онларын һеч бир фајдасы јохдур. Инсан дуа едәркән, ола билсин, ҝөрүнмәјән руһани аләмдә дуаларыны бир кимсәнин ешитдијинә инаныр. Анҹаг дуалар, ади сәс далғалары илә өтүрүлмүр. Инсанларын чоху инаныр ки, һәтта дуа едәнин дүшүнҹәләрини охуја биләҹәк кимсә вардыр. О, кимдир елә?
Бејин габығынын синир һүҹејрәләриндә милјардларла фикрин неҹә әмәлә ҝәлмәси, алимләр үчүн әсас е’тибарилә сирр олараг галыр. Анҹаг бејини јарадан Шәхсин бу фикирләри охуја билмәси мәнтигә ујғундур. Һәмин Шәхс - Јегова Аллаһдыр (Мәзмур 83:18; Вәһј 4:11). Дуалар јалныз Она јөнәлдилмәлидир. Бәс Јегова белә дуаларын һамысынымы ешидир?
Аллаһ бүтүн дуаларымы ешидир?
Кечмишдә јашајан Давуд падшаһ дуаја хүсуси диггәт јетирирди. О, Аллаһдан илһам алараг, мәзмурларда охујурду: “Еј сән дуаны ешидән, бүтүн бәшәр сәнә ҝәләҹәк” (Мәзмур 65:2). Јегова, инсанларын данышдығы минләрлә дилин һәр һансында олурса-олсун, сөјләнилән бүтүн дуалары анламаға гадирдир. Инсан бејнинин бу гәдәр чох мә’лумат гәбул едә билмәмәси, һеч дә о демәк дејилдир ки, Аллаһ, Она мәгбул тәрздә дуа едәнләрин һамысына диггәт јетирә билмир.
Һәмчинин һәјатында дуаја хүсуси јер верән Иса Мәсиһ гејд етди ки, Аллаһы мәмнун етмәјән дуалар да вар. Исанын, о заман ҝениш јајылан адәт үзрә әзбәрләнмиш дуаларын тәкрарланмасы һаггында дедикләринә диггәт јетирин: “Дуа етдијиниз заман бүтпәрәстләр кими бош сөзләр сөјләмәјин; зира онлар санырлар ки, чох данышмагла ешидиләҹәкләр” (Матта 6:7). Јегова, һәгиги дујғуларымызы ифадә етмәјән дуалары чәтин ки, динләсин.
Мүгәддәс Китабын бир мәсәли, бә’зи дуаларын Аллаһы нә үчүн мәмнун етмәдијни белә изаһ едир: “Ким шәриәти динләмәкдән гулағыны чевирирсә, онун дуасы да мәкруһдур” (Сүлејманын мәсәлләри 28:9). Башга бир мәсәлдә исә дејилир: “РӘБ писләрдән узагдыр; фәгәт салеһләрин дуасыны ешидир” (Сүлејманын мәсәлләри 15:29). Гәдим Исраил халгынын рәһбәрләри Јегованын өнүндә ҹидди ҝүнаһ ишләтдикләри заман, О бәјан етди: “Әлләринизи ачдығыныз заман, ҝөзләрими сиздән ҝизләјәҹәјәм; бир чох дуалар етдијиниз заман да динләмәјәҹәјәм; әлләриниз ганла долудур” (Ишаја 1:1, 15).
Һәвари Петер, дуаларын Аллаһа нә үчүн мәгбул олмадығынын башга бир сәбәбини хатырлатды: “Еј әрләр, һәмчинин сиз дә арвадларынызла илтифатлы давранын. Онлар зәиф ҹинс вә һәјат ән’амынын һәмварисләри олдугларындан онлара һөрмәт ҝөстәрин ки, дуаларыныза манечилик төрәдилмәсин” (1 Петер 3:7). Бу мәсләһәтә е’тинасызлыг ҝөстәрән инсанын дуаларынын ҝөјләрә чатмасы мүмкүн олмајаҹаг.
Тамамилә ајдындыр ки, Аллаһ дуаларымызы ешитсин дејә, мүәјјән тәләбләрә риајәт етмәлијик. Анҹаг дуа едәнләрин әксәријјәтини, Аллаһын онлардан тәләб етдији шејләр аз марагландырыр. Буна ҝөрә дә, сә’јлә едилән бу ҹүр дуалар сајәсиндә дүнјамыз јахшылыға доғру дәјишмәмишдир.
Дуаларымызын Аллаһ тәрәфиндән ешидилмәси үчүн һансы тәләбләр мөвҹуддур? Бу суала ҹаваб вермәздән габаг, үмумијјәтлә нәјә ҝөрә дуа етдијимизи анламалыјыг. Дуаларын көмәк едиб етмәмәси бизә мараглыдырса, ајдынлашдырмалыјыг ки, онларын мәгсәди нәдир? Јегова, Она мүраҹиәт етмәк имканыны нә үчүн нәзәрдә тутуб?
[Иҹазә илә]
G.P.O., Jerusalem