Бу ҝүн Аллаһын хидмәтчиләри кимләрдир?

“Габилијјәтимиз Аллаһдандыр. О бизи... Әһди-Ҹәдидин хидмәткарлары олмаға габил етди” (2 КОРИНФЛИЛӘРӘ 3:5, 6).

1, 2. Биринҹи әсрин бүтүн мәсиһчиләри үзәринә һансы вәзифә гојулмушду, лакин вахт кечдикҹә һәр шеј неҹә дәјишди?

ЕРАМЫЗЫН биринҹи әсриндә бүтүн мәсиһчиләрин, хош хәбәри тәблиғ етмәк кими ваҹиб вәзифәләри варды. Онларын һамысы мәсһедилмишләр вә јени әһдин хидмәтчиләри идиләр. Бә’зиләринә јығынҹагда өјрәтмәк кими әлавә тапшырыглар һәвалә едилмишди (1 Коринфлиләрә 12:27—29; Ефеслиләрә 4:11). Валидејнләр аиләдә ағыр вәзифәләр дашыјырдылар (Колослулара 3:18—21). Лакин бүтүн мәсиһчиләр әсас вә сон дәрәҹә ваҹиб олан тәблиғ ишиндә иштирак едирдиләр. Јунанҹа Мүгәддәс Јазыларын орижиналында бу вәзифә, әсас е’тибары илә “хидмәти” нәзәрдә тутан диакони́а сөзү илә ифадә едилир (Колослулара 4:17).

² Лакин вахт кечдикҹә һәр шеј дәјишди. Тәблиғ етмәк һүгугуну јалныз өз ихтијарларында сахлајан руһаниләр синфи јаранды (Һәвариләрин ишләри 20:30). Һәмин руһаниләр синфи, өзүнү христиан адландыранларын кичик һиссәсини тәшкил едирди. Бөјүк әксәријјәт исә “дүнјәви” адыны газанды. Дүнјәвиләрә, онларын мүхтәлиф - мәсәлән, руһаниләри тә’мин етмәк үчүн вәсаит ајырмаг кими - вәзифәләринин олмасы өјрәдилсә дә, онларын әксәријјәти артыг тәблиғ етмир, лакин пассив динләјиҹиләрә чеврилмишдиләр.

3, 4. а) Христиан аләминдә дин хадимләри рүтбәни һансы јолла алырлар? б) Христиан аләминдә кимләр дин хадими һесаб олунур вә нәјә ҝөрә Јегованын Шаһидләриндә һәр шеј башга ҹүрдүр?

³ Руһаниләр синфи, дин хадими (гәдим Јунан дилиндә диа́конос, “хидмәтчи” вә ја “гуллугчу”) рүтбәсини алмаг иддиасындадырларa. Онлар дин хадими олмаг үчүн, семинаријалар битирир вә руһани рүтбәјә кечирилирләр. Бир Мүгәддәс Китаб енсиклопедијасында гејд едилир: “Руһани рүтбәјә һәср олунма, бир гајда олараг, мүәјјән едилмиш ајинләрә риајәт етдикдән сонра кимә исә дин хадими вә ја кешиш статусунун верилмәсини нәзәрдә тутур; рүтбәјә һәср едилән Аллаһын Кәламыны тәблиғ етмәк вә ја дини мәрасимләри иҹра етмәк, јахуд да һәр икисини етмәк һүгугуну газаныр” (“The International Standard Bible Encyclopedia”). Бәс бу рүтбәјә тә’јин едәнләр кимләрдир? “Јени Британија енсиклопедијасы”нда дејилир: “Јепископлуг мөвҹуд олан килсәләрдә рүтбәләри һәмишә јепископ тә’јин едир. Пресвитериан килсәләриндә исә бу иш кешишләр тәрәфиндән иҹра олунур”.

⁴ Беләликлә, Христиан аләминин килсәләриндә чох аз адам дин хадими ола биләр. Лакин Јегованын Шаһидләриндә вәзијјәт тамамилә башга ҹүрдүр. Нәјә ҝөрә? Она ҝөрә ки, Христиан аләминдә гәбул олунмуш гајда-ганун биринҹи әсрин мәсиһчи јығынҹағында јох иди.

Әслиндә Аллаһын хидмәтчиләри кимләрдир?

5. Мүгәддәс Китаба әсасән, кимләри Аллаһын хидмәтчиләри адландырмаг олар?

⁵ Мүгәддәс Китаба әсасән, ҝөјдә вә ја јердә Јеговаја ибадәт едән һәр бир кәс Онун хидмәтчисидир. Мәләкләр Исаја хидмәт едирдиләр (Матта 4:11; 26:53; Лука 22:43). Онлар һәмчинин “гуртулушу мирас алаҹаг оланлара јардым етмәк үчүн” ҝөндәрилирләр (Ибраниләрә 1:14; Матта 18:10). Иса Аллаһын хидмәтчиси иди. О деди: “Инсан Оғлу Она хидмәт едилмәк үчүн дејил, хидмәт етмәјә... ҝәлмишдир” (Матта 20:28; Ромалылара 15:8). Исанын давамчыларына “Онун изләри илә” ҝетмәләри тапшырылдығы үчүн, ајдын мәсәләдир ки, онлар да хидмәтчиләр олмалыдырлар (1 Петер 2:21).

6. Иса неҹә ҝөстәрди ки, онун шаҝирдләри Аллаһын хидмәтчиләри олмалыдырлар?

⁶ Ҝөјләрә галдырылмаздан бир гәдәр әввәл Иса шаҝирдләринә деди: “Ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един; сизә әмр етдијим һәр шејә риајәт етмәји онлара өјрәдин” (Матта 28:19, 20). Исанын шаҝирдләриндән, јени шаҝирдләр һазырламаг тәләб олунурду, демәли онлар Аллаһын хидмәтчиләри олмалы идиләр. Јени шаҝирдләр Исанын дедији һәр шејә, о ҹүмләдән ҝедиб шаҝирдләр һазырламаг тапшырығына да риајәт етмәји өјрәнирдиләр. Кишиләр вә гадынлар, бөјүкләр вә ушаглар - бир сөзлә, Иса Мәсиһин бүтүн һәгиги шаҝирдләри, Аллаһын хидмәтчиләри олурдулар (Јоел 2:28, 29).

7, 8. а) Һансы ајәләрдән ҝөрүнүр ки, бүтүн мәсиһчиләр Аллаһын хидмәтчиләридирләр? б) Аллаһын хидмәтчиси вәзифәсинә тә’јин олунмагла әлагәдар һансы суаллар мејдана чыхыр?

⁷ Буна мүвафиг олараг, б. е. 33-ҹү илинин Пентикост ҝүнүндә јығылан Исанын бүтүн шаҝирдләри, кишиләр вә гадынлар “Аллаһын мөһтәшәм ишләри барәдә” данышмаға башладылар (Һәвариләрин ишләри 2:1—11). Бундан әлавә, һәвари Павел јазмышды: “Салеһлик үчүн үрәклә иман едилир, хилас олмаг үчүн исә ағызла ачыгҹа сөјләнир [“үмумхалг гаршысында тәблиғ едилир”, ЈД]” (Ромалылара 10:10, И—93). Павел бу сөзләрлә азсајлы руһаниләр синфинә дејил, “мүгәддәслијә дә’вәт олунмуш, Аллаһын Ромада јашајан севҝилиләри”нә мүраҹиәт едирди (Ромалылара 1:1, 7, И—93). “Ефесдә олан вә Мәсиһ Исада иман едән мүгәддәсләр”ин һамысы ајагларына “сүлһ Мүждәсини тәблиғ етмәк һазырлығыны” ҝејмәли идиләр (Ефеслиләрә 1:1; 6:15). Ибраниләрә јазылан мәктубу ешидәнләрин һамысы исә “играр етдији үмиди тәрәддүд етмәдән мөһкәм тутмаға” чағырылырдылар (Ибраниләрә 10:23).

⁸ Белә исә, инсан нә заман Аллаһын хидмәтчиси олур? Башга сөзләрлә десәк, о, Аллаһын хидмәтчиси вәзифәсинә нә заман тә’јин олунур? Вә ким тәрәфиндән тә’јин олунур?

Инсан Аллаһын хидмәтчиси вәзифәсинә нә заман тә’јин олунур?

9. Иса, Аллаһын хидмәтчиси вәзифәсинә нә заман вә ким тәрәфиндән тә’јин едилди?

⁹ Инсанын Аллаһын хидмәтчиси вәзифәсинә нә заман вә ким тәрәфиндән тә’јин олундуғуну билмәк үчүн, ҝәлин Иса Мәсиһин нүмунәсини нәзәрдән кечирәк. Онун, Аллаһын хидмәтчиси олдуғуну сүбут едән руһани рүтбәси вә ја семинарија битирмәси һаггында сәнәди јох иди вә ону, Аллаһын хидмәтчиси вәзифәсинә инсан тә’јин етмәмишди. Онда нәјә ҝөрә тәсдиг едә биләрик ки, Иса Аллаһын хидмәтчиси иди? Она ҝөрә ки, Ишајанын илһамланмыш сөзләри онун үзәриндә јеринә јетди: “Рәббин Руһу үзәримдәдир, чүнки... Мүждәни билдирмәк үчүн О Мәни мәсһ етди” (Лука 4:17—19; Ишаја 61:1). Бу сөзләр шүбһәсиз олараг сүбут едир ки, Исаја, хош хәбәри тәблиғ етмәк һәвалә олунмушду. Ким тәрәфиндән? Бу ишин иҹра олунмасы үчүн Иса Јегованын руһу илә мәсһ едилдијинә ҝөрә, ајдындыр ки, хидмәтчи вәзифәсинә ону Јегова Аллаһын өзү тә’јин етмишди. Бу нә заман баш верди? Иса вәфтиз олунаркән, Јегованын руһу онун үзәринә енди (Лука 3:21, 22). Демәли, Иса вәфтиз олунаркән Аллаһын хидмәтчиси вәзифәсинә тә’јин едилди.

10. Мәсиһчи хидмәтчисини хидмәтә ким габил едир?

¹⁰ Бәс Исанын биринҹи әсрдә јашамыш давамчылары? Онлар да Аллаһын хидмәтчиләри статусуну Јеговадан алмышдылар. Павел демишди: “Габилијјәтимиз Аллаһдандыр. О бизи... Әһди-Ҹәдидин хидмәткарлары олмаға габил етди” (2 Коринфлиләрә 3:5, 6). Јегова, Она пәрәстиш едәнләри һансы тәрздә хидмәтә габилијјәтли едир? Павелин “Мәсиһин Мүждәсини јајмагда Аллаһын гулу” адландырдығы Тимотејин нүмунәсинә диггәт јетирәк (1 Салониклиләрә 3:2).

11, 12. Аллаһын хидмәтчиси олмаг үчүн мүвәффәгијјәтләр әлдә етмәкдә Тимотејә нә көмәк етди?

¹¹ Тимотејә үнванланмыш нөвбәти сөзләр, онун Аллаһын неҹә хидмәтчиси олдуғуну анламагда бизә көмәк едир: “Амма сән, өјрәндијин вә әмин олдуғун шејләрә әмәл етмәкдә давам ет, чүнки бунлары кимдән өјрәндијини билирсән. Мүгәддәс Јазылары да ушаглыгдан е’тибарән билирсән. Бу Јазылар, Мәсиһ Исаја иман васитәсилә хилас ҝәтирән һикмәти сәнә вермәјә гадирдирләр” (2 Тимотејә 3:14, 15, И—93). Тимотеји “играр етмәјә” вә ја үмумхалг гаршысында тәблиғ етмәјә тәшвиг едән иманын тәмәли, Мүгәддәс Јазылара әсасланан билији иди. Бунун үчүн Мүгәддәс Китабы шәхсән охумасы кифајәт идими? Хејр. Охудугларына даир дәгиг билик вә руһани анлајыш әлдә етмәк үчүн, Тимотејин көмәјә еһтијаҹы варды (Колослулара 1:9). Беләликлә, Тимотеји өјрәндији шејләрә “әмин” етдиләр. Мүгәддәс Јазылары “ушаглыгдан е’тибарән” билдијинә ҝөрә, чох ҝүман ки, онун илк мүрәббијәләри анасы вә нәнәси олмушдур, чүнки Тимотејин атасы, еһтимала ҝөрә имансыз иди (2 Тимотејә 1:5).

¹² Лакин Тимотејин Аллаһын хидмәтчиси олмасына башга сәбәбләр дә вар иди. Мисал үчүн, гоншу јығынҹаглардан олан мәсиһчиләрлә үнсијјәтдә олмаг да онун иманыны мөһкәмләндирирди. Бу һарадан мә’лумдур? Мәсәлә ондадыр ки, Павел Тимотејлә таныш оларкән о ҝәнҹ иди вә “Листра вә Конјада олан гардашлар Тимотеј һагда јахшы фикирдә идиләр” (Һәвариләрин ишләри 16:2). Бундан әлавә, о ҝүнләрдә бә’зи гардашлар мәктубларла мүраҹиәт едәрәк јығынҹаглары мөһкәмләндирирдиләр. Һәмчинин јығынҹаглары, онлара баш чәкән нәзарәтчиләр дә руһландырырдылар. Бүтүн бунлар, Тимотеј кими ҝәнҹ мәсиһчиләрә руһән инкишаф етмәкдә көмәк едирди (Һәвариләрин ишләри 15:22—32; 1 Петер 1:1).

13. Тимотеј Аллаһын хидмәтчиси вәзифәсинә нә заман тә’јин олунду вә нәјә ҝөрә демәк олар ки, онун руһани инкишафы бунунла дајанмады?

¹³ Исанын Матта 28:19, 20-ҹи ајәләрдә јазылан тапшырығыны нәзәрә алараг, биз әмин ола биләрик ки, бир заман Тимотејин иманы ону, Исадан нүмунә ҝөтүрәрәк вәфтиз олунмаға тәшвиг етди (Матта 3:15—17; Ибраниләрә 10:5—9). Вәфтиз, Тимотејин бүтүн үрәји илә Аллаһа һәср олунмасына ишарә иди. Вәфтиз олунараг, Тимотеј хидмәтчи олду. О замандан е’тибарән онун һәјаты, гүввәси вә үмумијјәтлә саһиб олдуғу һәр шеј Аллаһа мәхсус иди. Бу, онун Аллаһа ибадәтинин ајрылмаз һиссәси, “мүгәддәс хидмәт”и иди. Лакин Тимотеј бунунла кифајәтләнмәди. О, јеткин мәсиһчи хидмәтчиси олараг, руһани инкишафыны дајандырмады. Бу, Тимотејин Павел кими јеткин мәсиһчиләрлә сых үнсијјәтдә олмасы, шәхси өјрәнмәси, һәмчинин тәблиғ фәалијјәтиндә чалышган олмасы сајәсиндә баш верди (1 Тимотејә 4:14; 2 Тимотејә 2:2; Ибраниләрә 6:1).

14. “Әбәди һәјата мејлли олан” инсанлар, Аллаһын хидмәтчиләри олмаг үчүн мүвәффәгијјәтләрә неҹә наил олурлар?

¹⁴ Бу ҝүн дә мәсиһчи хидмәтчиси вәзифәсинә тә’јин олунма буна бәнзәр тәрздә баш верир. “Әбәди һәјата мејлли олан” инсана, Мүгәддәс Китабын өјрәнилмәси васитәсилә, Аллаһ вә Онун нијјәтләри һаггында билик алмаға көмәк едирләр (Һәвариләрин ишләри 13:48, ЈД). Инсан Мүгәддәс Китабын принсипләрини һәјатында тәтбиг етмәји өјрәнир вә шүурлу сурәтдә Аллаһа дуа едир (Мәзмур 1:1—3; Сүлејманын мәсәлләри 2:1—9; 1 Салониклиләрә 5:17, 18). О, иман гардашлары илә үнсијјәтдә олур, “садиг вә ағыллы гул”ун тәшкил вә тәгдим етдији һәр бир шејдән фајда әлдә едир (Матта 24:45—47; Сүлејманын мәсәлләри 13:20; Ибраниләрә 10:23—25). Беләликлә, низама салынмыш тә’лим руһән инкишаф етмәкдә она көмәк едир.

15. Инсан вәфтиз олунаркән нәләр баш верир? (Һәмчинин һашијәјә бахын.)

¹⁵ Нәтиҹәдә, Мүгәддәс Китабы өјрәнән, Јегованы севиб, фидијә гурбанлығына мөһкәм иман инкишаф етдирән инсанда, өзүнү бүтүнлүклә сәмави Атасына һәср етмәк арзусу јараныр (Јәһја 14:1). О, әввәлҹә дуада өзүнү Аллаһа һәср едир вә сонра һәср едилмәсинә ишарә олараг вәфтиз олунур ки, онун шәхси гәрары һаггында һамы билсин. Вәфтиз - онун Аллаһын хидмәтчиси вәзифәсинә тә’јин олунмасы мәрасимидир, чүнки о, мәһз вәфтиз олундуғу андан е’тибарән Аллаһын бүтүнлүклә һәср олунмуш хидмәтчиси - «диа́конос»у кими таныныр. О, дүнјадан ајры галмаға давам етмәлидир (Јәһја 17:16; Јагуб 4:4). О, һеч бир шәрт кәсмәдән, өзүнү “дири, мүгәддәс, Аллаһа мәгбул гурбан кими тәгдим” етмишдир (Ромалылара 12:1)b. Инди о, Аллаһын - Мәсиһи тәглид едән хидмәтчисидир.

Мәсиһчи хидмәти нәдир?

16. Аллаһын хидмәтчиси кими Тимотејин вәзифәләринә нәләр дахил иди?

¹⁶ Тимотејин хидмәти өзүнә нәји дахил едирди? Онун хүсуси вәзифәләри варды: о, сәјаһәт заманы Павели мүшаијәт едирди. Ағсаггал оланда исә Тимотеј иман гардашларыны сә’јлә өјрәдир вә мөһкәмләндирирди. Лакин Исанын вә Павелин хидмәтиндә олдуғу кими, онун да хидмәтиндә әсас јери, хош хәбәри тәблиғ етмәк вә шаҝирдләр һазырламаг тутурду (Матта 4:23; 1 Коринфлиләрә 3:5). Павел Тимотејә јазырды: “Амма сән һәр вәзијјәтдә ајыг дур, әзијјәтә гатлаш, мүждәчи ишини јеринә јетир, өз хидмәтини там шәкилдә иҹра ет” (2 Тимотејә 4:5).

17, 18. а) Мәсиһчиләр һансы хидмәтдә иштирак едирләр? б) Мәсиһчи хидмәтчиси үчүн тәблиғ иши нә дәрәҹәдә ваҹибдир?

¹⁷ Мүасир мәсиһчи хидмәтчиләри илә дә вәзијјәт буна бәнзәрдир. Онлар диггәти, Исанын гурбанлығы сајәсиндә мүмкүн олан хиласа јөнәлдәрәк вә һәлимләрә Јегованын адыны чәкмәји өјрәдәрәк хош хәбәрин тәблиғиндә - инсанлар үчүн хидмәтдә иштирак едирләр (Һәвариләрин ишләри 2:21; 4:10—12; Ромалылара 10:13). Онлар, изтираб чәкән бәшәријјәт үчүн јеҝанә үмид јеринин Падшаһлыг олдуғуну Мүгәддәс Китаб әсасында сүбут едирләр вә ҝөстәрирләр ки, әҝәр Аллаһын принсипләри әсасында јашасаг, һәјатымызы артыг индидән јахшылашдыра биләрик (Мәзмур 15:1—5; Марк 13:10). Лакин мәсиһчи хидмәтчиси “иҹтимаи мүждәни” тәблиғ етмир. Әксинә, өјрәдир ки, “Аллаһа пәрәстиш... индики вә ҝәләҹәк һәјат үчүн үмид верир” (1 Тимотејә 4:8, И—93).

¹⁸ Әлбәттә, Аллаһын хидмәтчиләринин әксәријјәти шәраитдән асылы олараг башга хидмәтләри дә иҹра едирләр. Бир чохларынын аилә илә бағлы вәзифәләри вар (Ефеслиләрә 5:21—6:4). Ағсаггалларын вә хидмәти көмәкчиләрин јығынҹагда вәзифәләри вар (1 Тимотејә 3:1, 12, 13; Титуса 1:5; Ибраниләрә 13:7). Бир чох мәсиһчиләр Падшаһлыг Залларынын тикилмәсиндә иштирак едирләр. Бә’зиләри, Ҝөзәтчи Гүлләси Ҹәмијјәтинин филиалларындан бириндә, көнүллү олараг ишләмәк шәрәфинә лајиг ҝөрүлүбләр. Буна бахмајараг, бүтүн мәсиһчи хидмәтчиләри хош хәбәрин тәблиғи ишиндә иштирак едирләр. Бу һалда истисна јохдур. Инсаны мәсиһчи хидмәтчиси кими таныдан мәһз бу фәалијјәт олмалыдыр.

Мәсиһчи хидмәтчисинин дүшүнҹә тәрзи

19, 20. Мәсиһчи хидмәтчиләри өзләриндә һансы дүшүнҹә тәрзини инкишаф етдирмәлидирләр?

¹⁹ Христиан аләминин дин рәһбәрләринин әксәријјәти, өзләринә хүсуси һөрмәт ҝөстәриләҹәјини ҝөзләјир вә “ҹәнаб”, “ата” вә ја “кешиш баба” кими титуллар дашыјырлар. Лакин мәсиһчи хидмәтчиси билир ки, еһтирам ҝөстәрилмәјә јалныз Јегова лајигдир (1 Тимотејә 2:9, 10). Мәсиһчи хидмәтчиләриндән һеч бири белә јүксәк еһтирам иддиасында дејилләр вә хүсуси титуллар алмаға ҹан атмырлар (Матта 23:8—12). Мәсиһчи билир ки, диакони́а сөзүнүн әсас мә’насы “хидмәт” демәкдир. Бу сөзлә әлагәли олан фе’л, бә’зән Мүгәддәс Китабда ајры-ајры инсанлара ҝөстәрилән хидмәтә, мисал үчүн, сүфрә архасында гуллуг етмәк мә’насында ишләнилир (Лука 4:39; 17:8; Јәһја 2:5). Бу фе’л, мәсиһчи хидмәти илә әлагәдар даһа бөјүк мә’нада тәтбиг едилсә дә, диа́конос јенә дә хидмәтчи олараг галыр.

²⁰ Буна ҝөрә дә мәсиһчи хидмәтчисинин ловғаланмаға һеч бир әсасы јохдур. Мәсиһчи хидмәтчиләри - һәтта јығынҹагда хүсуси вәзифәләри иҹра етсәләр дә, садәҹә олараг “гуллар”дырлар. Иса деди: “Аранызда бөјүк олмаг истәјән, диҝәрләринин нөкәри олсун. Вә аранызда биринҹи олмаг истәјән, диҝәрләринин гулу олсун” (Матта 20:26, 27). Иса ади гулун ишини јеринә јетирәрәк, јә’ни шаҝирдләринин ајагларыны јујараг, онлара өзләриндә һансы дүшүнҹә тәрзини инкишаф етдирмәли олдугларыны ҝөстәрди (Јәһја 13:1—15). Неҹә дә тәвазөкар хидмәтдир! Буна ҝөрә дә, мәсиһчиләр Јегова Аллаһа вә Иса Мәсиһә тәвазөкарлыгла хидмәт едирләр (2 Коринфлиләрә 6:4; 11:23). Онлар бир-бирләринә хидмәт едәрәк тәвазөкарлыг ҝөстәрирләр. Хош хәбәри тәблиғ едәндә исә, онлар иманда олмајан гоншуларына тәмәннасыз хидмәт едирләр (Ромалылара 1:14, 15; Ефеслиләрә 3:1—7).

Хидмәтдә сарсылмазлыг

21. Хидмәтдә ҝөстәрдији сарсылмазлыға ҝөрә Павел һансы мүкафаты алды?

²¹ Хидмәтчи олмаг үчүн Павелә сарсылмазлыг ҝәрәк иди. О, Колос шәһәриндән олан мәсиһчиләрә хош хәбәри тәблиғ етмәк үчүн чох сыхынтылар чәкдијини сөјләди (Колослулара 1:24, 25). Лакин онун сарсылмазлығы сајәсиндә бир чохлары хош хәбәри гәбул едиб, Аллаһын хидмәтчиләри олдулар. Онлар, Аллаһын оғуллары вә Иса Мәсиһин гардашлары олараг, нәтиҹәдә Мәсиһлә бәрабәр ҝөјдә руһани мәхлуглар олмаг үмидини алдылар. Сарсылмазлыг ҝөстәрдикләри үчүн неҹә дә бөјүк мүкафатдыр!

22, 23. а) Нәјә ҝөрә буҝүнкү мәсиһчи хидмәтчиләринә сарсылмаз олмаг лазымдыр? б) Мәсиһчи сарсылмазлығы һансы ҝөзәл бәһрәләри верир?

²² Бу ҝүн Аллаһын һәгиги хидмәтчиләринә дә сарсылмазлыг ҝәрәкдир. Бир чохлары ҝүндәлик олараг хәстәликләрдән вә гоҹалығын ҝәтирдији насазлыглардан әзијјәт чәкирләр. Валидејнләр - чох вахт да тәнһа валидејнләр - ушагларын тәрбијәсинә чох гүввә сәрф едирләр. Ушаглар мәктәбдә пис тә’сирләрә ҹәсарәтлә мүгавимәт ҝөстәрирләр. Чох мәсиһчиләр ҹидди игтисади чәтинликләр ичиндә јашајырлар. Башга әксәријјәти дә тә’гибләрә мә’руз галыр вә ја буҝүнкү “чәтин анлар”ын ағырлыглары илә гаршылашырлар (2 Тимотејә 3:1). Бәли, бу ҝүн Јегованын алты милјондан артыг хидмәтчиси һәвари Павел кими дејә биләрләр: “Һәр шејдә өзүмүзү Аллаһын хидмәтчиләри кими тәгдим едирик: бөјүк дөзүмлүлүкдә” (2 Коринфлиләрә 6:4). Мәсиһчи хидмәтчиләри тәслим олмурлар. Онларын сарсылмазлығы тә’рифә лајигдир.

²³ Бундан әлавә, һәвари Павелин өз тәҹрүбәсиндә әмин олдуғу кими, сарсылмазлыг ҝөзәл бәһрәләр ҝәтирир. Биз, сарсылмазлыг ҝөстәрәрәк, Јегова илә сых мүнасибәти горујур вә Онун үрәјини севиндиририк (Сүлејманын мәсәлләри 27:11). Иманда мөһкәмләнир вә шаҝирдләр һазырлајараг, мәсиһчи гардашлығынын сајыны артырырыг (1 Тимотејә 4:16). Јегова хидмәтчиләринә көмәк едир вә бу сон ҝүнләрдә онларын хидмәтини хејир-дуаландырыр. Бунун сајәсиндә 144 000-нин галығы топланыб, милјонларла башга инсанлар исә јер үзү ҹәннәтдә әбәдијјән јашамаг үчүн мөһкәм үмид әлдә едибләр (Лука 23:43; Вәһј 14:1). Мәсиһчи хидмәтиндә һәгигәтән дә Јегованын мәрһәмәти әкс олунур (2 Коринфлиләрә 4:1). Буна ҝөрә дә, ҝәлин бу хидмәтин гәдрини биләк вә онун бәһрәләринин әбәди олаҹағы үчүн миннәтдар олаг! (1 Јәһја 2:17).

[Һашијәләр]

Изаһ едә биләрсинизми?

• Биринҹи әсрин бүтүн мәсиһчиләри үзәринә һансы вәзифә гојулмушду?

• Инсан мәсиһчи хидмәтчиси вәзифәсинә нә заман вә ким тәрәфиндән тә’јин олунур?

• Мәсиһчи хидмәтчиси һансы дүшүнҹә тәрзини инкишаф етдирмәлидир?

• Нәјә ҝөрә мәсиһчи хидмәтчиси чәтинликләрә сарсылмазлыгла таб ҝәтирмәлидир?

[14 вә 15-ҹи сәһифәләрдәки шәкилләр]

Аллаһын Кәламыны Тимотејә “ушаглыгдан е’тибарән” өјрәтмишдиләр. О, вәфтиз олунаркән, Аллаһын хидмәтчиси вәзифәсинә тә’јин олунду.

[16-ҹы сәһифәдәки шәкил]

Вәфтиз - Аллаһа һәср олунмаға вә Аллаһын хидмәтчиси вәзифәсинә тә’јин едилмәјә ишарәдир.

[18-ҹи сәһифәдәки шәкил]

Мәсиһчи хидмәтчиләри хидмәт етмәјә һазырдырлар.