Јеговаја лајиг шәкилдә һәрәкәт етмәкдә башгаларына көмәк един

“Сизин үчүн дуа едиб, јалвармагдан ваз кечмирик ки... Рәббә лајиг шәкилдә һәрәкәт едиб, Ону һәр ҹәһәтдән разы саласыныз; һәр ҹүр хејирли ишдә сәмәрә верәсиниз” (КОЛОСЛУЛАРА 1:9, 10).

1, 2. Инсанлара хүсусилә севинҹ вә мәмнунлуг ҝәтирән нәдир?

“БИЗ бир фермада, гошма вагонда јашајырыг. Јерли әһалијә хош мүждәни тәблиғ етмәјә даһа чох вахт ајырараг садә һәјат тәрзи сүрүрүк. Аллаһ да бизи бол-бол хејир-дуаландырыр: артыг бир чох инсанлара һәјатларыны Јеговаја һәср етмәјә көмәк етмишик” - бу, Ҹәнуби Африка Республикасында таммүддәтли хидмәт едән әр-арвадын сөзләридир.

² Јәгин сиз разылашаҹагсыныз ки, башгаларына хидмәт етмәк севинҹ ҝәтирир. Бә’зиләри мүнтәзәм олараг хәстәләрә, мәзлумлара вә ја тәнһалара көмәк етмәјә ҹәһд ҝөстәрир вә бундан мәмнунлуг дујурлар. Мәсиһчиләр әминдирләр ки, Јегова Аллаһ вә Иса Мәсиһ һаггындакы билији башгалары илә бөлүшмәклә онлара бөјүк көмәклик едирләр. Мәсиһин фидијә гурбанлығыны гәбул етмәк вә Аллаһла јахшы мүнасибәт јаратмаг үчүн инсанлара мәһз бу көмәк едәҹәкдир, бунун сајәсиндә исә онлар әбәди һәјаты ала биләрләр (Һәвариләрин ишләри 3:19—21; 13:48).

3. Биз диггәтимизи һансы нөв көмәклијә ҹәмләшдирмәлијик?

³ Бәс артыг мәсиһчи “јолу” илә ҝедәрәк Аллаһа хидмәт едәнләрә көмәк етмәк барәдә нә демәк олар? (Һәвариләрин ишләри 19:9). Шүбһәсиз ки, онлара бөјүк мараг ҝөстәририк, анҹаг истисна һал дејил ки, онлар үчүн даһа чох вә ја даима көмәк етмәји нәзәрдән гачырырыг. Бундан әлавә, бизә елә ҝәлә биләр ки, вәзијјәтимизлә әлагәдар һәмиманлыларымыза јалныз бир аз көмәк едә биләрик, аз көмәк етмәјин мүгабилиндә исә аз да мәмнунлуг дујуруг (Һәвариләрин ишләри 20:35). Колослулара јазылан мәктубдан һәм башгаларына, һәм дә һәмиманлыларымыза көмәк етмәјә даир нә исә өјрәнә биләрик.

4. а) Павел Колосдакы мәсиһчиләрә мәктубуну һансы шәраитләрдә јазмышды? б) Епафра илә Павели бирләшдирән нә иди?

⁴ Һәвари Павел Колосдакы мәсиһчиләрә мәктуб јазаркән ев дустағы олдуғуна бахмајараг, башгалары илә ҝөрүшмәјә иҹазәси варды. Ҝөзләндији кими, Павел өзүнүн мәһдуд азадлығындан Аллаһын Падшаһлығы һаггындакы мүждәни е’лан етмәк үчүн истифадә едирди (Һәвариләрин ишләри 28:16—31). Павелин јанына һәмиманлылары да ҝәлирди; еһтимал ки, бә’зиләрини гыса мүддәтә һәбс едиб онунла бирликдә мәһбус едирдиләр (Колослулара 1:7, 8; 4:10). Онларын арасында, Кичик Асијадакы (мүасир Түркијә) Ефес шәһәриндән шәрг тәрәфә - дүзән әразидә јерләшән Фрикијанын Колос шәһәриндән олан чох чалышган мүждәчи Епафра да варды. Епафра Колосдакы јығынҹағын јаранмасында иштирак етмиш вә гоншу Лаодикија вә Ијераполисдәки јығынҹаг үчүн хидмәт едирди (Колослулара 4:12, 13). Епафра Ромаја, Павелин јанына нә үчүн ҝедирди вә Павелин бу һәрәкәтә мүнасибәтиндән биз нә өјрәнә биләрик?

Колос мәсиһчиләринә тә’сир бағышлајан көмәк

5. Павел Колосдакы мәсиһчиләрә мәктубуну нә үчүн јазды?

⁵ Колос јығынҹағында јаранан вәзијјәт барәдә Павеллә мәсләһәтләшмәк үчүн, Епафра Ромаја әзијјәтли бир сәјаһәт етмишди. О, Павелә Колосдакы мәсиһчиләрин иманы вә мәһәббәти, һәмчинин онларын мүждә уғрунда чәкдикләри әзијјәт барәдә данышды (Колослулара 1:4—8). Јәгин ки, Епафра, Колос мәсиһчиләринин руһани инкишафына тәһлүкә јарадан пис тә’сирләр барәдә олан нараһатчылығыны да бөлүшдү. Буна ҹаваб олараг, Павел, јаланчы мүәллимләр тәрәфиндән јајылан фикирләрин јалан олдуғуну сүбут едән илһамланмыш мәктуб јазды. Павел әсас диггәти Иса Мәсиһин мүһүм ролуна јөнәлдирa. Анҹаг Павелин һәмиманлылара көмәклији тәкҹә Мүгәддәс Китабын әсас һәгигәтләрини гејд етмәкләми баша чатыр? Павел Колосдакы мәсиһчиләрә даһа неҹә көмәк етди вә бундан, башгаларына көмәк етмәклә әлагәдар биз нә өјрәнә биләрик?

6. Колосдакы мәсиһчиләрә јаздығы мәктубунда Павел әсас диггәти нәјә јөнәлдир?

⁶ Павелин мәктубунун ҝириш сөзләри бизә, диггәтимиздән јајына биләҹәк көмәклик үсулу һаггында тәсәввүр верир. Бу үсул инсанлара узаг мәсафәдән көмәк етмәјә имкан јарадыр (Павел вә Епафра Колос шәһәриндә дејилдиләр). Павел јазыр: “Сизин үчүн даим дуа едәрәк, Рәббимиз Иса Мәсиһин Атасы Аллаһа шүкр едирик”. Бәли, бу хүсуси дуалар, мәһз Колосдакы мәсиһчиләр үчүн едилирди. Сонра Павел әлавә едир: “Буна ҝөрә дә ешитдијимиз ҝүндән сизин үчүн дуа едиб, јалвармагдан ваз кечмирик ки, там һикмәт вә руһани идракла Аллаһын ирадәсини бүтүнлүклә гаврајасыныз” (Колослулара 1:3, 9).

7, 8. Шәхси дуаларымызда вә јығынҹагларда сөјләнилән дуаларда чох вахт һансы мөвзулара тохунулур?

⁷ Мә’лумдур ки, Јегова “дуаны ешидән” Аллаһдыр, демәли, шүбһә етмәмәк олар ки, Онун ирадәсинә ујғун олан дуаларымызы һазырлыгла динләјир (Мәзмур 65:2; 86:6; Сүлејманын мәсәлләри 15:8, 29; 1 Јәһја 5:14). Бәс башгалары үчүн етдијимиз дуалар һаггында нә демәк олар?

⁸ Тез-тез “дүнјадакы гардашларымыз” барәдә дүшүнмәк вә онлар үчүн дуа етмәк олар (1 Петер 5:9). Вә јахуд, тәбии фәлакәтдән зәрәр чәкән әразиләрдә јашајан мәсиһчиләр вә башга инсанлар үчүн, Јеговаја дуа етмәк олар. Биринҹи әсрдә Јәһудејадакы гытлыг һаггында ешидәндә шаҝирдләр, јәгин ки, гардашларына јардым ҝөндәрмәздән әввәл онлар үчүн чохлу дуа етмишдиләр (Һәвариләрин ишләри 11:27—30). Бизим ҝүнләримиздә бүтүн мәсиһчи гардашлығы вә ја гардашларын бөјүк групу үчүн дуалар мәсиһчи ҝөрүшләриндә едилир: бу ҝөрүшләрдә чохлу адамлар иштирак едир вә “амин” демәк үчүн, сөһбәтин кимләр һаггында ҝетдијини онлар баша дүшмәлидирләр (1 Коринфлиләрә 14:16).

Гој дуаларыныз конкрет олсун

9, 10. а) Конкрет шәхсләр һаггында дуа етмәјин мүнасиб олдуғуну һансы нүмунәләр ҝөстәрир? б) Конкрет олараг Павел үчүн кимләр дуа едирди?

⁹ Лакин Мүгәддәс Китабда башгалары үчүн сөјләнилән диҝәр,- даһа конкрет дуалар да јазылыб. Исанын, Лука 22:31, 32-ҹи ајәләриндә јазылан сөзләри барәдә дүшүнәк. Исанын 11 садиг һәвариси ону дөврәјә алмышдыр. Онлары, Аллаһын көмәјинә еһтијаҹлары олаҹаг чәтин анлар ҝөзләјирди, Иса онлар үчүн дуа едирди (Јәһја 17:9—14). Лакин Иса, һәвариләрин сырасындан Петери ајырараг, бу шаҝирди үчүн хүсуси хаһишлә дуа етди. Диҝәр нүмунәләр: Елиша Аллаһа дуа етди ки, конкрет бир инсана - онун хидмәтчисинә көмәк етсин (2 Краллар 6:15—17). Һәвари Јәһја, Гајын физики вә руһани рифаһы үчүн дуа едирди (3 Јәһја 1, 2). Башга дуаларда да мәһдуд сајда инсанлар һаггында хаһишләр әкс олунур (Ејуб 42:7, 8; Лука 6:28; Һәвариләрин ишләри 7:60; 1 Тимотејә 2:1, 2).

¹⁰ Павелин мәктубу конкрет дуалар һаггындакы мәсәләјә даһа чох ајдынлыг ҝәтирир. О, өзү һаггында, јахуд өзү вә јолдашлары һаггында дуа етмәји хаһиш едирди. Колослулара јазылан мәктубун 4:2, 3-ҹү ајәләриндә охујуруг: “Дуада сабит олун вә онда шүкран илә ојаг дурун; ејни заманда бизим үчүн дә дуа един ки, кәламы тәблиғ етмәк үчүн Аллаһ бизә бир гапы ачсын вә уғрунда һәбс едилдијим Мәсиһин сиррини е’лан едим”. Диҝәр нүмунәләр исә бунлардыр: Ромалылара 15:30; 1 Салониклиләрә 5:25; 2 Салониклиләрә 3:1; Ибраниләрә 13:18.

11. Ромада оларкән Епафра нә барәдә дуа едирди?

¹¹ Һәмин сөзләри Павелин Ромадакы јолдашлары аггында да демәк олар. “Епафра сизә салам ҝөндәрир. О, һәр заман дуаларында сизин үчүн сә’ј ҝөстәрир” (Колослулара 4:12, И—93). “Сә’ј ҝөстәрир” кими гејд олунан сөз өзлүјүндә, гәдимдә кечирилән идман ојунлары заманы идманчынын сәрф етдији гүввә, онун апардығы мүбаризә барәсиндәки фикри дашыјыр. Демәк олармы ки, Епафра үрәкдән етдији дуаны, үмумијјәтлә дүнјада вә јахуд да Кичик Асијада јашајан бүтүн иманлылар үчүн сөјләјирди? Павел, Епафранын мәһз Колос мәсиһчиләри үчүн дуа етдијини ҝөстәрир. Епафра онларын вәзијјәтләрини билирди. Биз бүтүн Колос мәсиһчиләрини адбаад танымырыг, онларын гаршылашдыглары проблемләрдән дә хәбәримиз јохдур, амма ҝәлин бу проблемләри тәсәввүрүмүзә ҝәтирәк. Ола биләр ки, һөкм сүрән фәлсәфәләрин тә’сиринә гаршы дурмаг ҝәнҹ Линус үчүн чәтин иди, Руфуса исә әввәлки јәһуди ән’әнәләринә гајытмаг истәјинә тәслим олмамаг үчүн ҝүҹ тәләб олунурду. Имансыз әри олан Персисә, ушагларыны Рәббин тәрбијәси илә јетишдирсин дејә, чох ҝүман ки, тәһәммүл вә мүдриклик лазым иди, өлүмҹүл хәстәликдән әзијјәт чәкән Асинкритин исә әлавә тәсәллијә еһтијаҹы варды. Бәли, Епафра, доғма шәһәриндәки јығынҹағын үзвләрини таныјараг онлар үчүн үрәкдән дуа едирди, чүнки неҹә о, еләҹә дә Павел арзу едирдиләр ки, Јеговаја садиг олан бу инсанлар, Она лајиг тәрздә даврансынлар.

12. Шәхси дуалар неҹә даһа конкрет ола биләр?

¹² Бу нүмунәләрин әсасында башгаларына көмәк етмәјин неҹә мүмкүн олдуғуну ҝөрүрсүнүзмү? Артыг гејд олундуғу кими, мәсиһчи јығынҹагларында едилән дуалар - бу ҝөрүшләрдә чохлу инсанлар олдуғундан - даһа чох үмуми характер дашыјыр. Лакин бизим шәхси вә аиләви дуаларымыз тамамилә конкрет ола биләр. Әлбәттә, бә’зән Аллаһдан бүтүн сәјјаһ нәзарәтчиләр вә руһани чобанлар үчүн хејир-дуа вә рәһбәрлик һаггында хаһиш едә биләрик. Ахы нәјә ҝөрә бә’зән даһа дәгиг олмајаг? Нәјә ҝөрә јығынҹағымыза ҝәлән рајон нәзарәтчисинин вә ја китабөјрәнмә рәһбәринин адыны чәкәрәк онун үчүн дуа етмәјәк? Филипилиләрә 2:25—28-ҹи вә 1 Тимотејә 5:23-ҹү ајәләриндә ҝөстәрилдији кими, Павел конкрет олараг Тимотејин вә Епафранын сағламлығы үчүн нараһат олурду. Адларыны билдијимиз хәстә олан кәсләр үчүн, биз дә белә гајғы ҝөстәрә биләрикми?

13. Шәхси дуаларымызда һансы вәзијјәтләр барәдә данышмағымыз мүнасиб оларды?

¹³ Ајдын мәсәләдир ки, өзҝәсинин ишинә гарышмаг олмаз, анҹаг таныдығымыз вә бизә әзиз олан адамларын рифаһы үчүн сәмими марагларымызы дуада ифадә етмәк тамамилә мүнасиб оларды (1 Петер 4:15; 1 Тимотејә 5:13). Тутаг ки, бир гардаш иш јерини итириб, биз исә ону башга ишлә тә’мин едә билмирик. Лакин шәхси дуамызда онун адыны чәкиб, мәһз онун гаршылашдығы чәтинлик барәдә даныша биләрик (Мәзмур 37:25; Сүлејманын мәсәлләри 10:3). Вә ја ола биләр ки, артыг ҝәнҹ олмајан баҹы јалныз “Рәббә бағлы” олан кишијә әрә ҝетмәк гәрарына ҝөрә һәлә дә субајдыр вә ушаглары јохдур (1 Коринфлиләрә 7:39). Нәјә ҝөрә шәхси дуаларымызда Јеговадан хаһиш етмәјәк ки, о баҹыны хејир-дуаландырсын вә хидмәтдә һәдсиз сәдагәти горујуб сахламагда көмәк етсин? Даһа бир нүмунә: ики ағсаггал сәһвә јол верән гардаша өјүд верир. Нәјә ҝөрә ағсаггалардан һәр бири вахташыры о гардашын адыны чәкәрәк, шәхси дуаларында ону хатырлатмасынлар?

14. Конкрет едилән дуалар башгаларына неҹә көмәк едә биләр?

¹⁴ Шәхси дуаларымызда Јегованын көмәклијинә, Онун тәсәллисинә, мүдриклијинә, мүгәддәс руһуна вә ја руһун сәмәрәләриндән биринә еһтијаҹ дујанлары һәмишә хатырлатмаг олар. Арамыздакы узаг мәсафәјә вә ја башга сәбәбләрә ҝөрә ола биләр ки, биз онлара мадди ҹәһәтдән вә ја билаваситә көмәк едә билмирик. Лакин баҹы-гардашларымыз үчүн дуа етмәји унутмајаг. Биз билирик ки, онлар Јеговаја лајиг шәкилдә һәрәкәт етмәк истәјирләр, амма буну һәмишә етмәк үчүн онларын көмәјә чох еһтијаҹлары ола биләр. Вә көмәк етмәк үсулларындан бири, бизим онлар үчүн етдијимиз дуалардыр (Мәзмур 18:2; 20:1, 2; 34:15; 46:1; 121:1—3).

Башгаларына дајаг олун

15. Колослулара јазылан мәктубун сонунҹу һиссәси бизи нә үчүн марагландырмалыдыр?

¹⁵ Сәмими, конкрет дуалар - башгаларына, хүсусән дә бизим доғмаларымыз вә јахынларымыза едә биләҹәјимиз јеҝанә көмәк үсулу дејил. Бу, Павелин Колослулара јаздығы мәктубундан ајдын олур. Бир чох алимләрин рә’јләринә ҝөрә, өз мәктубунда тә’лимләри гејд едәндән вә практики мәсләһәтләр верәндән сонра, Павел шәхсән таныдығы кәсләри саламлајыр (Колослулара 4:7—18). Лакин, артыг ајдынлашдырдығымыз кими, мәктубун сонунҹу һиссәсиндә саламлардан әлавә, гијмәтли мәсләһәт дә вар.

16, 17. Колослулара 4:10, 11-ҹи ајәләриндә хатырладылан гардашлар һаггында нә демәк олар?

¹⁶ Павел јазырды: “Мәнимлә бирликдә мәһбус олан Аристарх вә Барнабанын әмиси оғлу Марк да сизә салам ҝөндәрир (Марк һаггында әмрләри алмысыныз; јаныныза ҝәлдикдә ону гәбул един). Јустус адланан Јешу да сизә салам ҝөндәрир; сүннәтлиләрдән јалныз бунлар Аллаһын Падшаһлығы үчүн мәним әмәкдашларымдыр вә онлар мәнә тәсәлли вердиләр” (Колослулара 4:10, 11, И—93).

¹⁷ Бу ајәләрдә, Павел диггәтә лајиг олан гардашларын адыны чәкир. О гејд едир ки, бу гардашлар сүннәтлиләрдән, даһа доғрусу, јәһудиләрдәндир. Ромада сүннәтли јәһудиләр чох иди вә онлардан бә’зиләри мәсиһчи олдулар. Лакин Павелин гејд етдији гардашлар онун көмәјинә ҝәлирдиләр. Јәгин ки, онлар гејри-јәһудиләрдән олан мәсиһчиләрлә үнсијјәтдә олмагдан утанмырдылар вә Павеллә бирликдә гејри-јәһудиләрә севинҹлә тәблиғ едирдиләр (Ромалылара 11:13; Галатијалылара 1:16; 2:11—14).

18. Павел, онунла оланлар барәдә һансы фикирдә иди?

¹⁸ Павелин бу гардашлар һаггында сөјләдији фикрә диггәт јетирин: “Бунлар Аллаһын Падшаһлығы үчүн мәним әмәкдашларымдыр вә онлар мәнә тәсәлли вердиләр [“дајаг олдулар”, ЈД]”. Павелин истифадә етдији Јунан сөзү, Мүгәддәс Китабда јалныз бу јердә ишләнилир. Бир чох тәрҹүмәчиләр бу сөзү “тәсәлли” кими ифадә едирләр. Лакин “тәсәлли” сөзү башга Јунан сөзүндән (паракале́о) тәрҹүмә олунур. Павел бу сөзү Колослулара мәктубунда истифадә едир, анҹаг 4:11-ҹи ајәсиндә јох (Матта 5:4; Һәвариләрин ишләри 4:36; 9:31; 2 Коринфлиләрә 1:4; Колослулара 2:2; 4:8).

19, 20. а) Павелин, Ромада она көмәк едән гардашлара аид ишләтдији сөзүн мә’насы нәдир? б) О гардашлар, еһтимал едилдији кими, Павелә неҹә көмәк едирдиләр?

¹⁹ Павелин, адларыны чәкдији кәсләр, ҝөрүндүјү кими, она јалныз сөзлә тәсәлли вермирдиләр. Колослулара 4:11-ҹи ајәсиндә “дајаг” кими ишләдилән Јунан сөзү, дини олмајан мәтнләрдә хәстәлији јүнҝүлләшдирән дәрман мә’насында ишләдилирди. Павелин јанында олан мәсиһчи гардашлар она һансы көмәклији ҝөстәрә биләрдиләр?

²⁰ Павелә, јанына ҝәләнләри гәбул етмәјә иҹазә верилсә дә о, бир чох ваҹиб ишләри, мисал үчүн, гида вә гыш үчүн ҝејим алмағы өзү едә билмәзди. Өјрәнмәк үчүн тумарлары вә ја јазы ләвазиматларыны о, неҹә әлдә едә биләрди? (2 Тимотејә 4:13). Еһтимал етмәк олар ки, гардашлар, Павелин әсас тәләбатларыны тә’мин етмәклә, ваҹиб олан шејләри алмагла вә бу кими ишләри јеринә јетирмәклә она көмәк едирдиләр. Чох ҝүман ки, Павел бу вә ја диҝәр јығынҹағда ишләрин ҝедишатына нәзарәт етмәји вә һәмин јығынҹағы руһландырмағы ваҹиб билирди. Павел һәбсдә олдуғу үчүн бу мүмкүн дејилди; анҹаг һәмин гардашлар онун әвәзинә бу јығынҹаға баш чәкир, Павелин демәк истәдији сөзләри онлара чатдырыр вә һесабатларла ҝери гајыдырдылар. Бу, һәгигәтән дә “дајаг” иди.

21, 22. а) Колослулара 4:11-ҹи ајәсиндәки сөзләр бизи нә үчүн марагландырмалыдыр? б) Биз Павелин јолдашларынын нүмунәсинә нәдә риајәт едә биләрик?

²¹ Павелин, она “дајаг” олан гардашлар һаггында јаздыглары, башгаларына неҹә јардым етмәк лазым олдуғуну баша дүшмәкдә бизә дә көмәк едир. Һәмиманлыларымыз Јегованын әхлаг нормаларына риајәт едәрәк, мәсиһчи јығынҹагларына ҝәләрәк вә тәблиғ ишиндә иштирак едәрәк Она лајиг шәкилдә һәрәкәт едирләр. Онлар буна ҝөрә тә’рифә лајигдирләр. Бәс биз, Павелин јолдашлары кими, онлара “дајаг” олараг, даһа артыг көмәклик едә билмәрикми?

²² Әҝәр сиз 1 Коринфлиләрә 7:37 (ЈД) ајәсиндәки принсипә мүдрикликлә риајәт едән вә һазырда мүәјјән сәбәбләр уҹбатындан гоһумларындан узагда јашајан бир баҹыны таныјырсынызса, ону аиләнизлә бирликдә һансыса бир ишдә мәшғул олмаг үчүн дә’вәт етмәк олмазмы? Нәјә ҝөрә ону наһар вә ја шам јемәјинә, јахуд да достларла вә гоһумларла гејд етдијиниз кичик достлуг ҝөрүшләринә дә’вәт етмәјәсиниз? Бәлкә дә аиләниз ону өзү илә конгресә вә ја мә’зунијјәтә апара биләрди? Вә јахуд она мүнасиб вахтда сизинлә бирликдә базарлыға ҝетмәји тәклиф един. Һәмин сөзләри дул гадынлар вә кишиләр, һәмчинин чәтинликлә јеријәнләр һаггында да демәк олар. Башларына ҝәлән һадисәләр һаггында сөһбәтләри, јахуд да мејвә вә ја ушаг ҝејими сечмәк барәдәки ади биликләри сизин үчүн чох дәјәрли ола биләр (Левилиләр 19:32; Сүлејманын мәсәлләри 16:31). Сиз онларла даһа да јахын ола биләрсиниз. О заман, мисал үчүн әҝәр аптекдән дәрман алмаг лазым ҝәләрсә, сиздән көмәк диләмәк онлара асан олаҹаг. Ромада гардашлар Павелә әмәлләри илә көмәк едирдиләр, она дајаг идиләр. Буна сизин дә ҝүҹүнүз чатар. Бу, әввәлләр олдуғу кими, инди дә мәһәббәт телләрини мөһкәмләндирир вә Јеговаја бирликдә хидмәт етмәк сә’јини горујуб сахлајыр.

23. Бизләрдән һәр биримизин нәјә вахт ајырмасы јахшы оларды?

²³ Һәр биримиз бу мәгаләдә тәсвир олунан вәзијјәтләр үзәриндә дүшүнмәлијик. Бунлар садә нүмунәләрдир, лакин бу нүмунәләр бизә, баҹы-гардашларымыза “дајаг” кими хидмәт едә биләҹәјимиз реал вәзијјәтләр һаггында хатырлада биләр. Биз, өзүмүзү бүтүнлүклә хејријјәчилијә һәср етмәјә тәшвиг олунмуруг. Колослулара 4:11-ҹи ајәсиндә хатырладылан гардашлар буна ҹан атмырдылар. Онлар “Аллаһын Падшаһлығы үчүн” (И—93) әмәкдашлар идиләр. Вә онларын Павелә “дајаг” олмалары, бирбаша бу һадисә илә бағлы иди. Ҝәлин биз дә ејнилә белә давранаг!

24. Башгалары үчүн дуа етмәјимизин вә онлара дајаг олмаг истәјимизин әсас сәбәби нәдир?

²⁴ Шәхси дуаларымызда башгаларынын адыны чәкмәјимизин вә онлара дајаг олмаг истәјимизин сәбәби будур: биз инанырыг ки, баҹы-гардашларымыз “Рәббә лајиг шәкилдә һәрәкәт едиб, Ону һәр ҹәһәтдән разы салмаға” сә’ј ҝөстәрирләр (Колослулара 1:10). Лакин ваҹиб олан тәкҹә бу дејил: Павелин сөзләринә ҝөрә Колос мәсиһчиләри үчүн етдији дуаларда Епафра арзу едирди ки, онлар “долғунлуға наил оланлар вә Аллаһын бүтүн ирадәсинә мөһкәм әмин оланлар кими”дурсунлар (Колослулара 4:12, ЈД). Бәс бизим һәр биримиз буна неҹә наил ола биләрик? Буна нөвбәти мәгаләдә бахарыг.

[Һашијә]

Сиз диггәт јетирдинизми?

• Шәхси дуаларын васитәсилә башгаларына даһа артыг неҹә көмәк етмәк олар?

• Бә’зи мәсиһчиләр Павелә һансы мә’нада “дајаг” идиләр?

• Биз һансы һалларда башгаларына “дајаг” ола биләрик?

• Баҹы-гардашларымыз үчүн дуа едәркән вә онлары руһландырмаға сә’ј ҝөстәрәркән биз һансы мәгсәди ҝүдүрүк?

[10-ҹу сәһифәдәки шәкил]

Һәмиманлылардан кими исә аиләнизин мәшғулијјәтләриндә иштирак етмәјә дә’вәт етмәк олмазмы?

[Иҹазә илә]

Green Chimney’s Фарм-ын илтифатлы иҹазәси илә