Мөһтәшәм ишләринә ҝөрә Јеговаја һәмд един!
“Мәним гәлбим Рәбби јүксәлдир... Чүнки Гадир, мәним үчүн мөһтәшәм ишләр ҝөрдү” (ЛУКА 1:46—49).
1. Һаглы олараг, Јеговаја һансы мөһтәшәм ишләринә ҝөрә һәмд едирик?
ЈЕГОВА јаратдығы мөһтәшәм ишләринә ҝөрә һәмд едилмәјә лајигдир. Исраил халгынын Мисирдән азад едилмәсини хатырлајараг, Муса пејғәмбәр деди: “Рәббин етдији бүтүн бөјүк ишләри сизин ҝөзләриниз ҝөрдү” (Тәснијә 11:1—7). Мәләк Ҹәбрајыл бакирә Мәрјәмә Исанын доғулаҹағыны сөјләјәндә, Мәрјәм деди: “Мәним гәлбим Рәбби јүксәлдир... Чүнки Гадир, мәним үчүн мөһтәшәм ишләр ҝөрдү” (Лука 1:46—49). Јегованын Шаһидләри олан бизләр, Исраил халгынын Мисир әсарәтиндән азад едилмәси вә севимли Оғлунун гејри-тәбии сурәтдә доғулмасы кими мөһтәшәм ишләринә ҝөрә Јегованы иззәтләндиририк.
2. а) Аллаһын “әзәли мәгсәди” итаәткар инсанлар үчүн нә демәкдир? б) Патмос адасында Јәһјанын башына нә ҝәлди?
2 Јегованын мөһтәшәм ишләриндән чоху, Мәсиһин вә онун Падшаһлығынын васитәсилә итаәткар инсанлары хејир-дуаландырмаға аид олан “әзәли мәгсәд”илә бағлыдыр (Ефеслиләрә 3:8—13). Бу мәгсәд, ихтијар чағында олан һәвари Јәһјаја рө’јада ҝөјүн ачыг гапысындан ичәри бахмаға иҹазә вериләндә, мәрһәлә-мәрһәлә јеринә јетирди. Јәһја, бору сәсинә бәнзәр бир сәс ешитди: “Бураја галх вә бундан сонра баш вермәси ваҹиб олан һадисәләри сәнә ҝөстәрәҹәјәм” (Вәһј 4:1). “Аллаһын кәламы вә Иса Мәсиһин шәһадәти үчүн” Рома һакимијјәти тәрәфиндән Патмос адасына сүрҝүн едилән Јәһјаја “Иса Мәсиһин вәһји” верилди. Һәваринин ҝөрүб ешитдикләри, Аллаһын әзәли мәгсәди һаггында чох шејләри ашкар етди, бу исә, бүтүн мәсиһчиләрин руһани инкишафына вә онларын вахтында руһландырылмасына хидмәт етди (Вәһј 1:1, 9, 10).
3. Јәһјанын рө’јада ҝөрдүјү 24 ағсаггал кимләри тәмсил едир?
3 Јәһја, ҝөјдә ачылмыш гапыдан, башларында таҹ олан вә падшаһлар кими тахтда отуран 24 ағсаггал ҝөрдү. Онлар Аллаһын гаршысында сәҹдә едиб дејирдиләр: “Ја Рәббимиз вә Аллаһымыз, иззәти, һөрмәти вә гүдрәти алмаға лајигсән. Чүнки һәр шеји Сән јаратдын вә һәр шеј Сәнин ирадәнлә мөвҹуд олду вә јаранды” (Вәһј 4:11). Бу ағсаггаллар, Аллаһын вә’д етдији јүксәк мөвгејә саһиб олан бүтүн дирилмиш мәсһ едилән мәсиһчиләри тәмсил едирләр. Онлар, јарадыҹылыгла әлагәдар олан мөһтәшәм ишләринә ҝөрә Јеговаја һәмд етмәјә тәшвиг олунурлар. Јегованын “әбәди гүдрәти вә илаһилији”нә шәһадәт едән ишләр гаршысында биз дә валеһ олуруг (Ромалылара 1:20). Јегова һаггында нә гәдәр чох өјрәнириксә, Ону мөһтәшәм ишләринә ҝөрә иззәтләндирмәјә бир о гәдәр дә чох сәбәб тапырыг.
Јегованын тә’рифәлајиг ишләрини е’лан един!
4, 5. Давудун Јеговаја неҹә һәмд етдијинә аид бир нечә нүмунә чәкин.
4 Мәзмурчу Давуд, Аллаһа мөһтәшәм ишләринә ҝөрә һәмд едирди. Мәсәлән, Давуд охујурду: “Сионда јашајан Рәббә тәрәннүм един; халглар арасында [“тә’рифәлајиг”, ЈД] ишләрини е’лан ејләјин. Мәнә аҹы, ја Рәбб... мәндән нифрәт едәнләр үзүндән чәкдијим дәрдә бах ки, бүтүн сәнин һәмдини изаһ едим. Сион гызынын гапыларында сәнин гуртарышынла мәсрур олум” (Мәзмур 9:11, 13, 14). Давуд, оғлу Сүлејмана мә’бәдин чертјожуну вериб, бу сөзләрлә Аллаһа һәмд етди: “Ја Рәбб, бөјүклүк вә гүдрәт вә ҹамал вә зәфәр вә иззәт сәниндир... Ја Рәбб, падшаһлыг сәниндир вә сән, баш олараг һәр шејдән јүксәксән. Вә инди, еј Аллаһымыз, биз сәнә шүкр едәрик вә ҝөзәл исминә һәмд едәрик” (1 Тарихләр 29:10—13).
5 Мүгәддәс Јазылар бизи, дөнә-дөнә вә тә’кидлә Аллаһа Давуд кими һәмд етмәјә дә’вәт едир. “Мәзмурлар” китабында Аллаһа мүраҹиәт олунан чохсајлы һәмд сөзләри вар вә бу нәғмәләрдән тәхминән јарысы Давуд тәрәфиндән јазылмышдыр. О, даим Јеговаја һәмд вә миннәтдарлығыны билдирирди (Мәзмур 69:30). Бундан әлавә, Давудун вә диҝәр хидмәтчиләрин Аллаһдан илһам алараг јаздыглары әсәрләр, кечмиш заманлардан бәри Јеговаја һәмд етмәк үчүн истифадә олунур.
6. Аллаһ тәрәфиндән илһамланмыш мәзмурларын бизим үчүн фајдасы нәдир?
6 Мәзмурлар, Јегованын хидмәтчиләри үчүн неҹә дә фајдалыдыр! Рифаһымыз үчүн етдији бүтүн мөһтәшәм ишләринә ҝөрә Аллаһа тәшәккүр етмәк истәјәндә, “Мәзмурлар” китабындан олан ҝөзәл сөзләрә мүраҹиәт етмәк јеринә дүшәрди. Мәсәлән, ҝүнүн башланғыҹында Јегованы бу ҹүр сөзләрлә иззәтләндирмәк һисси дуја биләрик: “Рәббә шүкр етмәк, еј Уҹа олан, сәнин исминә тәрәннүм етмәк, сабаһ инајәтини вә һәр ҝеҹә сәдагәтини... е’лан етмәк јахшыдыр. Чүнки, ја Рәбб, ишинлә мәни севиндирдин; сәнин әлләринин ишләриндән өтрү севинҹлә тәрәннүм едирәм” (Мәзмур 92:1—4). Руһани инкишафымыза әнҝәл олан манеәләрин өһдәсиндән ҝәлдијимиз заман исә, олсун ки, мәзмурчунун етдији кими, севинҹ вә миннәтдарлығымызы дуада ифадә етмәк истәјирик. Мәзмурчу охујурду: “Ҝәлин, Рәббә тәрәннүм едәк; гуртулушумуз гајасына севинҹлә нида едәк. Өнүнә шүкранла ҝедәк; она мәзмурларла севинҹлә нида едәк” (Мәзмур 95:1, 2).
7. а) Мәсиһчиләрин ифа етдикләри нәғмәләрдә диггәтәлајиг олан нәдир? б) Јығынҹаға бир аз тез ҝәлмәјин вә ҝөрүшүн сонуна гәдәр галмағын сәбәбләриндән бири һансыдыр?
7 Биз, јығынҹаг ҝөрүшләриндә вә конгресләрдә Јеговаја һәмд нәғмәләрини тез-тез бирликдә охујуруг. Диггәтәлајигдир ки, бу нәғмәләрдән бир чоху, илһамланмыш “Мәзмурлар” китабындакы фикирләрә әсасланыб. Биз неҹә дә шадыг ки, бу ҝүн, Јегованы һәмд етмәк үчүн руһландырыҹы мүасир нәғмәләр мәҹмуәсинә маликик! Аллаһа һәмд нәғмәсини ифа етмәк — ҝөрүшләрә бир аз тез ҝәлмәк вә ҝөрүш гуртармајынҹа ҝетмәмәк үчүн тутарлы сәбәбләрдән биридир. Чүнки белә олдугда, һәмиманлыларымызла бирликдә Јеговаја нәғмә вә дуада һәмд едә биләрик.
“Јага һәмд един!”
8. “Һалелуја” сөзүнүн мә’насы нәдир?
8 Јеговаја һәмд етмәк һаггындакы фикир, “Рәббә (Јага) һәмд един!” мә’насыны дашыјан гәдим ибрани ифадәсиндән транслитерасија олунан (бир әлифбанын һәрфләринин башга әлифбанын һәрфләри илә верилмәси) “һалелуја” сөзүнә дахилдир. Мәсәлән, Мәзмур 135:1—3-ҹү ајәләриндә сәмими вә һәмчинин тә’кидли дә’вәт ҝөрүрүк: “Рәббә һәмд един. Рәббин исминә һәмд един; еј Рәббин гуллары, еј сизләр, Рәббин евиндә, Аллаһымыз евинин һәјәтләриндә дуранлар, һәмд един. Рәббә һәмд един; чүнки Рәбб јахшыдыр; исминә тәрәннүм един; чүнки дадлыдыр”.
9. Јеговаја һәмд етмәјә бизи тәшвиг едән нәдир?
9 Аллаһын валеһедиҹи јарадыҹылығы вә рифаһымыз үчүн етдији бүтүн ишләри барәдә дәриндән дүшүнәндә, сәмими миннәтдарлыг һисси бизи Она һәмд етмәјә руһландырыр. Јегованын гәдимдә өз халгы үчүн етдији мө’ҹүзәли ишләри һаггында фикирләшәндә, үрәјимиз бизи Ону иззәтләндирмәјә тәшвиг едир. Һәмчинин Јегованын ҝәләҹәкдә һәјата кечирәҹәји әзәмәтли ишләр үзәриндә дүшүнәндә исә, биз һәмд вә миннәтдарлыг ифадә етмәјә чалышырыг.
10, 11. Нәјә ҝөрә артыг бизим мөвҹудлуғумуз Аллаһа һәмд етмәјимизә әсас верир?
10 Артыг мөвҹудлуғумузун өзү, Јеговаја һәмд етмәјә әсас верир. Давуд охујурду: “[Јегова] сәнә шүкр едәрәм; чүнки чох ҝөзәл вә валеһедиҹи сурәтдә јарадылмышам; ишләрин һејрәтләндириҹидир; вә ҹаным буну чох јахшы билир” (Мәзмур 139:14). Бәли, доғрудан да “валеһедиҹи сурәтдә јарадылмышыг” вә биз ҝөрмә, ешитмә, дүшүнмә габилијјәти кими гијмәтли бәхшишләрә маликик. Мәҝәр бу бизи, Јараданымызы иззәтләндирәҹәк тәрздә јашамаға тәшвиг етмирми? Павел, “беләликлә, јејирсинизсә, ичирсинизсә, нә едирсинизсә һәр шеји Аллаһын иззәти үчүн един” дејәркән, мәһз буну нәзәрдә тутурду (1 Коринфлиләрә 10:31).
11 Әҝәр биз Јегованы һәгигәтән дә севириксә, һәр шеји Онун иззәти үчүн едәҹәјик. “Аллаһын олан Рәбби бүтүн үрәјинлә, бүтүн ҹанынла, бүтүн дүшүнҹәнлә вә бүтүн гүввәтинлә сев” әмрини Иса биринҹи әмр адландырды (Марк 12:30; Тәснијә 6:5). Биз, һеч бир шүбһә олмадан Јегованы севмәли, Она Јараданымыз вә “һәр бир јахшы бәхшиш вә һәр камил һәдијјә” Верәнимиз кими һәмд етмәлијик (Јагуб 1:17; Ишаја 51:13; Һәвариләрин ишләри 17:28). Буну етмәјимиз мүнасибдир, чүнки идракы, руһани кејфијјәти, физики гүввәни — бүтүн исте’дад вә габилијјәтләри бизә Јегова вериб. Буна ҝөрә дә, Јараданымыз кими, О, бизим мәһәббәт вә һәмдимизә лајигдир.
12. Јегованын мөһтәшәм ишләри вә Мәзмур 40:5-ҹи ајәсиндәки сөзләр сиздә һансы һиссләри ојадыр?
12 Јегованын мөһтәшәм ишләри бизә, Ону севмәјә вә иззәтләндирмәјә сајсыз-һесабсыз әсаслар верир! Давуд охујурду: “Ја Рәбб Аллаһым, јаратдығын харигәләр вә бизим үчүн дүшүнҹәләрин чохдур; сәнә бәнзәјән јохдур. Онлары е’лан едиб сөјләмәк истәсәм, саја ҝәлмәз” (Мәзмур 40:5). Давуд Јегованын бүтүн валеһедиҹи ишләрини саја билмирди, онлары биз дә саја билмәрик. Буна бахмајараг, ҝәлин һәр дәфә, диггәтимиз Аллаһын мөһтәшәм ишләриндән биринә јөнәләндә Она һәмд едәк.
Аллаһын әзәли мәгсәди илә бағлы олан ишләр
13. Үмидимиз һансы тәрздә Аллаһын мөһтәшәм ишләри илә сых бағлыдыр?
13 Ҝәләҹәјә үмидимиз, Аллаһын әзәли мәгсәдинә аид олан һәмин мөһтәшәм вә тә’рифәлајиг ишләрлә сых бағлыдыр. Әдән бағындакы үсјандан сонра, Јегова үмидвериҹи илк пејғәмбәрлији билдирди. Аллаһ, илана һөкм чыхарараг, деди: “Сәнинлә гадын арасына вә сәнин зүрријјәтинлә онун зүрријјәти арасына дүшмәнчилик гојаҹағам; о сәнин башыны әзәҹәк вә сән онун топуғуну чалаҹагсан” (Тәквин 3:15). Јегова, Үмумдүнја туфаны илә әхлагсыз дүнјаны мәһв етдији заман мөһтәшәм иш ҝөстәрәрәк Нуһу вә аиләсини горујуб сахладыгдан сонра да, вә’д едилән Зүрријјәтә бәсләнән үмид сәдагәтли инсанларын үрәјиндә јашајырды (2 Петер 2:5). Ибраһим вә Давуд кими адамлара верилән пејғәмбәрлик вә’дләри, Јегованын һәмин Зүрријјәт васитәсилә һәјата кечирәҹәји ишләр һаггында даһа чох өјрәнмәјә имкан верди (Тәквин 22:15—18; 2 Самуел 7:12).
14. Јегованын бәшәријјәт наминә етдији мөһтәшәм ишләриндән бири нәдән ибарәтдир?
14 Јегованын бәшәријјәтин рифаһы наминә етдији мөһтәшәм ишләриндән бири ондан ибарәтдир ки, Өзүнүн ваһид Оғлуну — вә’д едилән Зүрријјәти, Иса Мәсиһи — фидијә гурбаны кими верди (Јәһја 3:16; Һәвариләрин ишләри 2:29—36). Фидијә, Аллаһла барышмаг үчүн бир тәмәл иди (Матта 20:28; Ромалылара 5:11). Јегова, Онунла барышан илк инсанлары ерамызын 33-ҹү илинин Пентикост ҝүнүндә тәшкил олунан мәсиһчи јығынҹағында бирләшдирди. Һәмин шәхсләр мүгәддәс руһун көмәклији илә хош хәбәри һәр јердә тәблиғ едирдиләр. Онлар, Исанын өлмәси вә дирилмәсинин итаәткар инсанлара, Аллаһын сәмави Падшаһлығынын рәһбәрлији алтында әбәди хејир-дуалара наил олмаға имкан вердијини изаһ едирдиләр.
15. Бизим зәманәмиздә Јегова һансы валеһедиҹи ишләри ҝөрүр?
15 Бизим зәманәмиздә Јегова, мәсһ едилмиш мәсиһчиләрин ахырынҹы үзвләрини топламагла мө’ҹүзәли ишләр етмишдир. Мәсиһлә ҝөјләрдә һөкмранлыг едәҹәк 144 000-дән олан шәхсләрин мөһүрләнмәсинин баша чатмасы үчүн, инди мәһведиҹи күләкләр тутулур (Вәһј 7:1—4; 20:6). Јегова гајғы ҝөстәрди ки, мәсһ едилмиш мәсиһчиләр јалан динләрин дүнја империјасы олан “бөјүк Бабилин” руһани әсарәтиндән азад олунсун (Вәһј 17:1—5). 1919-ҹу илдә азад олунмалары вә о вахтдан бәри Аллаһын мүдафиәсини һисс етмәләри мәсһ едилмишләрә һансы имканы верди? Бу, ити сүр’әтлә јахынлашмагда олан “бөјүк мәшәггәт” заманы Јегова, Шејтанын пис системини мәһв етмәздән әввәл, онларын сон шәһадәтлик ишиндә иштирак едәрәк “парылдамаларына” имкан верир (Матта 24:21; Даниел 12:3; Вәһј 7:14).
16. Падшаһлыг һаггындакы мүасир үмумдүнја тәблиғ иши сајәсиндә нә баш верир?
16 Јегованын мәсһ едилмиш Шаһидләри, Падшаһлыг һаггындакы үмумдүнја тәблиғ ишинә даир рәһбәрлији ҹидди-ҹәһдлә өз үзәрләринә ҝөтүрдүләр. Бунун сајәсиндә, Јеговаја ибадәт етмәјә башлајан “башга гојунларын” сајы бу ҝүн ҝет-ҝедә чохалыр (Јәһја 10:16). Биз шадыг ки, Јеговаја һәмд етмәк үчүн јер үзүндәки һәлим инсанларын бизә гошулмаға һәлә дә фүрсәтләри вар. “Ҝәл!” дә’вәтини гәбул едән шәхсләр бөјүк мәшәггәт заманы горунаҹаг вә бунун нәтиҹәсиндә Јеговаја әбәдијјән һәмд едә биләҹәкләр (Вәһј 22:17).
Минләрлә инсанлар һәгиги ибадәтә ахышырлар
17. а) Тәблиғ фәалијјәтимизлә әлагәдар Јегова һансы мөһтәшәм ишләри ҝөрүр? б) Зәкарја 8:23 ајәсиндәки сөзләр неҹә јеринә јетир?
17 Инди Јегова, бизим тәблиғ фәалијјәтимизлә әлагәдар валеһедиҹи вә тә’рифәлајиг ишләр ҝөрүр (Марк 13:10). О, сон илләрдә “бөјүк вә фәалијјәт үчүн ҝениш гапы” ачыбдыр (1 Коринфлиләрә 16:9). О, һәгигәтин дүшмәнләринин әввәлләр манечилик төрәтдикләри ҝениш әразиләрдә хош хәбәрин е’лан олунмасыны мүмкүн етди. Бу вахта гәдәр руһани зүлмәтдә јашајанларын чоху, Јеговаја ибадәт етмәк дә’вәтини гәбул едир вә онларын үзәриндә бу пејғәмбәрлик сөзләри јеринә јетир: “Ордуларын Рәбби белә дејир: О ҝүнләрдә милләтләрин һәр чешид дилләриндән он адам бир Јәһудинин әтәјинә јапышаҹаглар вә: “Сизинлә ҝедирик, чүнки Аллаһын сизинлә бәрабәр олдуғуну ешитдик” дејәрәк јапышаҹаглар” (Зәкарја 8:23). Он нәфәрин мүраҹиәт етдији шәхсләр руһани јәһудиләрин, јә’ни мүасир зәманәдәки мәсһ едилмиш мәсиһчиләрин галығыдыр. Он рәгәми јер үзүндә нәјинсә тамлығынын рәмзи олдуғу үчүн, “он адам” — “Аллаһын Исраили” илә бирләшән вә “тәк сүрү” әмәлә ҝәтирән “бөјүк издиһамы” тәмсил едир (Вәһј 7:9, 10; Галатијалылара 6:16). Бу гәдәр инсанларын бирликдә Јегова Аллаһа мүгәддәс хидмәти иҹра етдикләрини ҝөрмәк неҹә дә фәрәһлидир!
18, 19. Јегованын тәблиғ фәалијјәтинә хејир-дуа вермәси нәдән ҝөрүнүр?
18 Јалан динин бөјүк тә’сири олан, һәтта һеч кимсәнин хош хәбәри гәбул етмәјәҹәји зәнн едилән өлкәләрдә он минләрлә — јүз минләрлә инсанларын һәгигәтин тәрәфинә кечдијини ҝөрүб неҹә севинмәјәсән. Бу ил нәшр олунан “Јегованын Шаһидләринин салнамәси”нә бахын вә Падшаһлыг тәблиғчиләринин сајынын јүз миндән тәхминән милјона гәдәр чатан өлкәләрә диггәт јетирин. Бу, инандырыҹы сурәтдә тәсдиг едир ки, Јегова Падшаһлыг һаггындакы тәблиғ ишинә хејир-дуа верир (Сүлејманын мәсәлләри 10:22).
19 Јегованын халгы олан бизләр, сәмави Атамыза она ҝөрә һәмд едиб, миннәтдарлыг билдиририк ки, О, һәјатымыза һәгиги мә’на вериб, бизә севинҹ, мәмнунлуг ҝәтирән хидмәти һәвалә едиб вә ҝәләҹәјә никбинликлә бахмағымыза әсас вериб. Биз, Аллаһын бүтүн вә’дләринин јеринә јетмәсини сәбирсизликлә ҝөзләјир вә әбәди һәјата үмид бәсләјәрәк, өзүмүзү “Аллаһын мәһәббәтиндә” сахламаға гәти гәрарлыјыг (Јәһуда 20, 21). Аллаһа һәмд едән бөјүк издиһамын сајынын инди тәхминән 6 000 000 нәфәр олмасы неҹә дә севиндириҹидир! Јегованын ачыг-ашкар хејир-дуасы сајәсиндә, мәсһ едилмишләрин галығы башга гојунлар сырасындан олан јолдашлары илә бирликдә 235 өлкәдә 91 000 јығынҹаг тәшкил едибләр! Биз һамымыз, “садиг вә ағыллы гул”ун даими зәһмәти сајәсиндә дәјәрли тәрздә руһән гидаланырыг (Матта 24:45). Инкишаф едән теократик тәшкилат, Јегованын Шаһидләринин 110 филиалы васитәсилә Падшаһлыг ишинә гајғыкешликлә рәһбәрлик ҝөстәрир. Биз Јеговаја миннәтдарыг ки, инсанларын гәлбини өз әмлаклары илә Она “еһтирам етмәјә” тәшвиг едир (Сүлејманын мәсәлләри 3:9, 10). Бунун сајәсиндә үмумдүнја тәблиғ ишимиз давам едир, лазым ҝәләндә исә, чапханалар, Бејт-елләр, миссионер евләри, Падшаһлыг вә конгрес Заллары тикилир.
20. Јегованын мөһтәшәм вә тә’рифәлајиг ишләри үзәриндә дәриндән дүшүнмәк бизи нәјә тәшвиг етмәлидир?
20 Сәмави Атамызын мөһтәшәм вә тә’рифәлајиг ишләринин һамысыны садаламаг мүмкүн дејил. Ахы сәмими гәлбли инсан Јеговаја һәмд едән издиһама неҹә гошулмасын?! Гој Јегованы севәнләрин һамысы севинҹлә нида етсинләр: “Рәббә [“Јеговаја”, ЈД] һәмд един. Рәббә ҝөјләрдән һәмд един; она јүксәкликдә һәмд един. Еј бүтүн мәләкләри, она һәмд един... Ҝәнҹ иҝидләр вә гызлар; ихтијарлар вә көрпәләр; Рәббин исминә һәмд етсинләр; чүнки јалныз онун исми јүксәлмишдир; онун ҹалалы јерин вә ҝөјләрин үстүндәдир” (Мәзмур 148:1, 2, 12, 13). Ҝәлин, мөһтәшәм ишләринә ҝөрә Јеговаја һәм инди, һәм дә әбәдијјән һәмд едәк!
Сиз неҹә ҹаваб верәрдиниз?
• Јегованын тә’рифәлајиг ишләриндән бә’зиләри һансылардыр?
• Сизи Јеговаја һәмд етмәјә тәшвиг едән сәбәбләр һансылардыр?
• Бизим үмидимиз Аллаһын мөһтәшәм ишләри илә неҹә бағлыдыр?
• Падшаһлыг һаггындакы тәблиғ иши илә әлагәдар Јегова тә’рифәлајиг һансы ишләри ҝөрүр?
[6-ҹы сәһифәдәки шәкил]
Башгалары илә бирликдә нәғмә охујараг, Јеговаја үрәкдән һәмд едирсинизми?
[9-ҹу сәһифәдәки шәкилләр]
Јеговаја һәмд етмәкдә һәлим инсанларын бизә гошулмаға һәлә дә фүрсәтләри олдуғуна биз неҹә дә шадыг.