“Әҝәр Аллаһ бизимләдирсә, ким бизә гаршы ола биләр?”
“Елә исә бунлар барәдә нә дејәк? Әҝәр Аллаһ бизимләдирсә, ким бизә гаршы ола биләр?” (РОМАЛЫЛАРА 8:31).
1. Исраиллиләрлә бирликдә Мисирдән кимләр чыхды вә онлары буна тәшвиг едән нә олду?
ИСРАИЛЛИЛӘР Мисирдә јашадыглары 215 илин чох һиссәсини көләликдә кечирдиләр. Азад һәјат сүрмәк үчүн Мисирдән чыхдыглары заман исә “гарышыг чох халг да онларла бәрабәр чыхды”. (Чыхыш 12:38). Бу гејри-исраиллиләр, Мисири виран едән вә онун јаланчы аллаһларыны ҝүлүнҹ вәзијјәтә гојан горхунҹ бәлалар јашадылар. Ејни заманда гејри-исраиллиләр, хүсусән дә дөрдүнҹү бәладан башлајараг, Јегованын өз халгыны горумаға гадир олдуғуну ҝөрдүләр (Чыхыш 8:23, 24). Јегованын нијјәтләри һаггында мә’луматлары аз олса да, онлар үчүн бир шеј ајдын иди: Мисир аллаһлары мисирлиләри горуја билмәдикләри һалда, Јегова исраиллиләри мүдафиә етди.
2. Раһаб исраил кәшфијјатчыларыны нәјә ҝөрә мүдафиә етди вә нәдән ҝөрүнүр ки, онун Аллаһа е’тибар етмәси әбәс јерә дејилди?
2 Гырх ил сонра, исраиллиләр Вә’д едилән дијара ҝирмәк үзрә олдуглары заман Мусанын вәрәсәси олан Јешу, кәшфијјат үчүн бу дијара ики нәфәр ҝөндәрди. Онлар орада Јериһонун сакини олан Раһаб адлы гадынла растлашдылар. Мисирдән чыхдыгдан сонра, Јегованын 40 ил әрзиндә исраиллиләрин мүдафиәси үчүн етдији гүдрәтли ишләри барәдә ешитдикләринә әсасән Раһаб билирди ки, Аллаһын хејир-дуасыны газанмаг үчүн Онун халгына тәрәфдар олмаг лазымдыр. Мүдрик гәрар гәбул етдији үчүн, исраиллиләр шәһәри зәбт едән заман о өз аилә үзвләри илә бирликдә мәһв олунмадан гачынды. Онларын мө’ҹүзәли шәкилдә хилас олмалары, шүбһәсиз ки, Аллаһын онларла олдуғуну сүбут едирди. Ҝөрүндүјү кими, Раһаб исраиллиләрин Аллаһына әбәс јерә е’тибар етмәмишди (Јешу 2:1, 9—13; 6:15—17, 25).
3. а) Иса, бәрпа едилмиш Јериһо јахынлығында һансы мө’ҹүзәни етди вә јәһуди руһаниләри буна неҹә мүнасибәт ҝөстәрдиләр? б) Бә’зи јәһудиләр, сонрадан исә гејри-јәһудиләр нәји анладылар?
3 Он беш әср кечдикдән сонра, Иса Мәсиһ бәрпа едилмиш Јериһо јахынлығында јохсул бир кор адама шәфа верди (Марк 10:46—52; Лука 18:35—43). Һәмин адам Исадан она “мәрһәмәт” етмәси үчүн јалварды. Бунунла о, Исанын Аллаһ тәрәфиндән һимајә едилдијини е’тираф етмиш олурду. Јәһуди дин рәһбәрләри вә онларын давамчылары исә, бир гајда олараг, Исанын мө’ҹүзәләриндә, онун Аллаһын ишини иҹра етмәсинә даир сүбутлары ҝөрмәк истәмирдиләр. Бунун әвәзинә, онлар Исаја јерсиз ирад тутурдулар (Марк 2:15, 16; 3:1—6; Лука 7:31—35). Иса онларын тәһрики илә өлдүрүлдүкдән сонра, онун дирилдијини е’тираф етмәјә мәҹбур олдуглары заман белә, Исанын Аллаһ тәрәфиндән дирилдилмәси илә разылашмаг истәмирдиләр. Бундан әлавә, онлар “Рәбб Исаны мүждәләмәкдә” мане олмаға чалышараг, онун давамчыларыны тә’гибә мә’руз едирдиләр. Лакин бә’зи јәһудиләр, сонрадан исә гејри-јәһудиләр бу һадисәләрә диггәт јетирдиләр вә онларын маһијјәтини дүзҝүн баша дүшдүләр. Онлар ајдын ҝөрүрдүләр ки, Аллаһ икиүзлү јәһуди рәһбәрләрини инкар едиб, инди исә Иса Мәсиһин тәвазөкар давамчыларыны һимајә едир (Һәвариләрин ишләри 11:19—21).
Аллаһ бу ҝүн кимләри һимајә едир?
4, 5. а) Инсанлар дини һансы әламәтләрә әсасән сечирләр? б) Динин һәгиги олдуғуну мүәјјән етмәк үчүн әсас мәсәлә нәдән ибарәтдир?
4 Бу јахынларда телевизија васитәсилә вердији мүсаһибәсиндә, бир дин хадими һәгиги дини неҹә мүәјјән етмәклә әлагәдар белә сөзләр сөјләди: “Мән гејд етмәк истәјирәм ки, әҝәр инсан һәр һансы динин ганунларына ујғун јашајараг јахшылыға доғру дәјиширсә, јалныз о заман һәмин дини һәгиги һесаб етмәк олар”. Сөзсүз ки, һәгиги дин инсанлары јахшылыға доғру дәјишир. Анҹаг дин инсаны нәҹибләшдирирсә, онда демәк олармы ки, о Аллаһ тәрәфиндән һимајә едилир? Һәгиги динин јеҝанә ме’јары бунданмы ибарәтдир?
5 Һәр кәс сечки азадлығыны, о ҹүмләдән дин сечмәк имканыны гијмәтләндирир. Лакин бу азадлыг, инсанын дүзҝүн сечим едәҹәјинә зәманәт вермир. Мәсәлән, бә’зи инсанлар дини онун үзвләринин сајына, мадди вәзијјәтинә, ајинләринин тәмтәраглы олмасына вә ја аилә ән’әнәләринә әсасән сечирләр. Бүтүн бунлар һәгиги дини мүәјјән етмәкдә һеч бир рол ојнамыр. Лакин әсас мәсәлә бундан ибарәтдир: һансы дин, мө’мин инсанлары Аллаһын ирадәсини јеринә јетирмәјә тәшвиг едир вә онун давамчыларына Аллаһын һимајәси илә әлагәдар әминликлә “Аллаһ бизимләдир” демәјә имкан верән инандырыҹы сүбутлар тәгдим едир?
6. Исанын һансы сөзләри, динин һәгиги вә ја јалан олдуғуну мүәјјән етмәјә имкан верир?
6 Иса, һәгиги ибадәтлә јалан ибадәт арасындакы фәрги ҝөрмәјә имкан верән гајда тә’сис етди: “Јаланчы пејғәмбәрләрдән горунун; онлар јаныныза гојун ҹилдиндә ҝәләрләр, амма дахилдә вәһши гурддурлар. Онлары бәһрәләриндән таныјаҹагсыныз” (Матта 7:15, 16; Малаки 3:18). “Бәһрәләрдән”, јә’ни һәгиги динин фәргләндириҹи әламәтләриндән бә’зиләрини нәзәрдән кечирәрәк вә виҹданла арашдырараг бу ҝүн Аллаһын кимләри һимајә етдијини мүәјјән едәк.
Аллаһын һимајә етдији кәсләрин фәргләндириҹи әламәтләри
7. Јалныз Мүгәддәс Китаба әсасланан биликләри өјрәтмәк нә демәкдир?
7 Онларын тә’лимләри Мүгәддәс Китаба әсасланыр. Иса деди: “Вердијим тә’лим Мәним дејил, Мәни Ҝөндәрәниндир. Ким Онун ирадәсини јеритмәк истәјәрсә, өјрәтдикләримин Аллаһданмы олдуғуну, јохса Өзүмдәнми сөјләдијими биләҹәкдир”. Вә әлавә етди: “Аллаһдан олан Аллаһын сөзләрини динләр” (Јәһја 7:16, 17; 8:47). Бурадан белә нәтиҹә чыхармаг олар ки, Аллаһын һимајәсинә малик олан кәсләр, јалныз Аллаһын өз Кәламында ачыгладығы биликләри өјрәтмәли вә инсан мүдриклијинә вә ја ән’әнәләринә әсасланан тә’лимләри инкар етмәлидирләр (Ишаја 29:13; Матта 15:3—9; Колослулара 2:8).
8. Ибадәтдә Аллаһын адыны истифадә етмәк нә үчүн ваҹибдир?
8 Онлар Аллаһын Јегова адыны истифадә едир вә ону бәјан едирләр. Ишаја әввәлҹәдән пејғәмбәрлик етмишди: “О ҝүн дејәҹәксиниз: Рәббә [“Јеговаја”, ЈД] шүкр един, онун исмини чағырын, халглар арасында онун ишләрини билдирин, исми уҹалдығыны анын. Рәббә тәрәннүм един; чүнки өјүнәҹәк ишләр етди; бүтүн дүнјада бу билинсин” (Ишаја 12:4, 5). Иса өз шаҝирдләрини: “Еј ҝөјләрдә олан Атамыз, адын мүгәддәс тутулсун” сөзләри илә дуа етмәјә өјрәдирди (Матта 6:9). Буна ҝөрә дә мәсиһчиләр — неҹә ки, јәһудиләр, еләҹә дә гејри-јәһудиләр — “Аллаһын... ады наминә халг” кими хидмәт етмәли идиләр (Һәвариләрин ишләри 15:14). Ҝөрүндүјү кими, Аллаһын “ады наминә” тәшкил едилән халга мәнсуб олдугларына ҝөрә гүрур дујан инсанлары О, мәмнунијјәтлә һимајә едир.
9. а) Нәјә ҝөрә һәгиги динин үзвләринә севинҹли олмаг хасдыр? б) Ишаја һәгиги вә јалан дини неҹә мүгајисә етди?
9 Онлар Аллаһа хас олан севинҹи әкс етдирирләр. “Мүждәнин” мәнбәји олан Јегова — “бәхтијар Аллаһдыр” (1 Тимотејә 1:11, ЈД). Бәс Онун хидмәтчиләринин өзләрини бәдбәхт һисс етмәјә вә ја һәр шејә даима писсимист нөгтеји-нәзәрлә бахмаға әсаслары вармы? Дүнјадакы дәһшәтли шәраитә вә шәхси проблемләринә бахмајараг, мәсиһчиләр севинҹ руһуну горујуб сахлаја билирләр, чүнки мүнтәзәм олараг бол-бол руһани гида гәбул едирләр. Ишаја онлары јалан динин тәрәфдарлары илә мүгајисә етди: “Бундан өтрү Рәб Јегова белә дејир: будур, гулларым јејәҹәкләр вә сиз аҹ галаҹагсыныз; будур, гулларым ичәҹәкләр вә сиз сусуз галаҹагсыныз; будур, гулларым севинәҹәкләр вә сиз утанаҹагсыныз; будур, гулларым үрәк фәрәһиндән тәрәннүм едәҹәкләр вә сиз үрәк сызылтысындан фәрјад едәҹәксиниз вә руһ гырыглығындан өтрү улајаҹагсыныз” (Ишаја 65:13, 14).
10. Һәгиги динә мәнсуб олан инсанлар, тәҹрүбә вә сәһвләрә јол вермәк үсуллары илә өјрәнмәкдән неҹә гачынырлар?
10 Онлар өз һәрәкәт тәрзләрини вә гәбул етдикләри гәрарлары Мүгәддәс Китабын принсипләринә әсасландырырлар. “Бүтүн үрәјинлә Рәббә ҝүвән вә өз анлајышына архаланма; бүтүн јолларында ону таны, о да сәнин јолларыны доғрулдар” (Сүлејманын мәсәлләри 3:5, 6). Аллаһ, Онун мүдриклијинә е’тинасызлыг ҝөстәрәрәк бир-биринә зидд олан инсан нәзәријјәләринә мүраҹиәт едәнләри дејил, рәһбәрлик үчүн Она мүраҹиәт едәнләри һимајә едир. Инсанын өз һәјатыны Аллаһын Кәламы илә мүвафигләшдирмәјә нә дәрәҹәдә һазыр олмасыны, онун тәҹрүбә вә сәһвләрә јол вермәк үсуллары илә өјрәнмәкдән өзүнү нә дәрәҹәдә азад етмәси мүәјјән едир (Мәзмур 119:33; 1 Коринфлиләрә 1:19—21).
11. а) Нәјә ҝөрә һәгиги динин үзвләри руһаниләрә вә дүнјәвиләрә ајрылмырлар? б) Рәһбәрлији үзәрләринә ҝөтүрән кәсләр, Аллаһын халгына һансы нүмунәни верирләр?
11 Онларын јығынҹағы, биринҹи әсрин мәсиһчиләринин јығынҹағы кими тәшкил едилиб. Иса нөвбәти принсипи верди: “Сиз өзүнүзә “Мүәллим” дедиртмәјин; чүнки сизин Мүәллиминиз бирдир, о да Мәсиһдир вә сиз һамыныз гардашсыныз. Јер үзүндә кимсәјә ата демәјин; чүнки Атаныз бирдир, сәмави Атадыр. Нә дә насеһ дедиртмәјин; чүнки Насеһиниз бирдир — Мәсиһдир. Аранызда ән бөјүк олан, диҝәрләринин нөкәри олсун” (Матта 23:8—11). Өзләринә јүксәк ад верән вә дүнјәвиләрин үзәриндә өзләрини јүксәлдән тәкәббүрлү руһаниләрә, һамынын гардаш сајылдығы јығынҹагда јер јохдур (Ејуб 32:21, 22). Аллаһын сүрүсүнү отаран кәсләрә белә бир әмр верилир: “Она мәҹбури дејил, көнүллү вә Аллаһа мәгбул олан шәкилдә, биабырчы газанҹ үчүн дејил, шөвглә нәзарәт един. Сизә тапшырыланлара гаршы зүлмкар јох, сүрүјә нүмунә олун” (1 Петер 5:2, 3). Әсл мәсиһчи чобанлары башгаларынын иманы үзәриндә һакимијјәти өз үзәрләринә ҝөтүрмәјә ҹан атмырлар. Онлар, Аллаһа хидмәтдә мәсиһчиләрин “әмәкдашлары” кими јахшы нүмунә вермәјә чалышырлар (2 Коринфлиләрә 1:24).
12. Аллаһ, Онун һимајәсини арзу едән кәсләрә инсан һакимијјәтләринә мүнасибәтдә һансы таразлашмыш мөвгеји тутмағы әмр едир?
12 Онлар инсан һакимијјәтләринә табе олур, анҹаг бунунла белә битәрәфлији горујурлар. Әҝәр кимсә “үзәриндә олан һакимләрә табе” дејилсә, Аллаһын һимајәсинә үмид едә билмәз. Нәјә ҝөрә? Она ҝөрә ки, “мөвҹуд олан һакимләр дә Аллаһ тәрәфиндән тә’јин олунмушдур. Буна ҝөрә, һакимә мүгавимәт ҝөстәрән Аллаһын гурдуғуна гаршы дурур” (Ромалылара 13:1, 2). Лакин Иса анлајырды ки, мәнафеләр тоггуша биләр, буна ҝөрә дә деди: “Гејсәринкини гејсәрә, Аллаһынкыны Аллаһа верин” (Марк 12:17). Аллаһын һимајәсинә малик олмаг истәјәнләр “әввәлҹә Онун [Аллаһын] Падшаһлығыны вә Онун салеһлијини” ахтармалы вә ејни заманда Аллаһа мүнасибәтдә јүксәк вәзифәләрини јеринә јетирмәјә имкан верән дөвләт ганунларына табе олмалыдырлар (Матта 6:33, И—93; Һәвариләрин ишләри 5:29). Иса битәрәфлијин ваҹиблијини, шаҝирдләри һаггында нөвбәти сөзләри дејәркән гејд етди: “Мән дүнјадан олмадығым кими, онлар да дүнјадан дејилләр”. Сонрадан әлавә етди: “Мәним Падшаһлығым бу дүнајадан дејилдир” (Јәһја 17:16; 18:36, И—93).
13. Аллаһын халгыны мүәјјән етмәкдә мәһәббәт һансы ролу ојнајыр?
13 Онлар инсанларын кимлијинә бахмыр вә “һамыја... јахшылыг едирләр” (Галатијалылара 6:10). Мәсиһчи мәһәббәти тәрәфҝирлик етмир вә иргиндән, вар-дөвләтиндән, тәһсилиндән, миллијјәтиндән вә дилиндән асылы олмајараг бүтүн инсанлары әһатә едир. Әҝәр инсанлар һамыја, хүсусән дә иманлылар аиләсинә јахшылыг едирләрсә, бу онларын Аллаһ тәрәфиндән һимајә олундугларыны мүәјјән етмәкдә көмәк едир. Иса деди: “Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк” (Јәһја 13:35; Һәвариләрин ишләри 10:34, 35).
14. Аллаһын һимајәсинә малик оланлар һәмишәми һамы тәрәфиндән бәјәнилибләр? Изаһ един.
14 Онлар, Аллаһын ирадәсини иҹра едәрәк, тә’гибләрә таб ҝәтирмәјә һазырдырлар. Иса өз давамчыларыны хәбәрдар етди: “Әҝәр Мәни тә’гиб етдиләрсә, сизи дә тә’гиб едәҹәкләр; әҝәр Мәним сөзүмә риајәт етдиләрсә, сизин дә сөзүнүзә риајәт едәҹәкләр” (Јәһја 15:20; Матта 5:11, 12; 2 Тимотејә 3:12). Аллаһын һимајә етдији кәсләр, һеч бир заман һамы тәрәфиндән бәјәнилмәјибләр. Нүмунә үчүн, өз иманы васитәсилә дүнјаны мүһакимә едән Нуһу ҝөстәрмәк олар (Ибраниләрә 11:7). Бу ҝүн Аллаһ тәрәфиндән һимајә олунмағы арзу едәнләр, тә’гибләрдән гачынмаг мәгсәди илә Аллаһын Кәламына аз әһәмијјәт вермәји вә ја Мүгәддәс Китабын принсипләринә зидд давранмағы һеч фикирләринә белә ҝәтирмирләр. Нә гәдәр ки, онлар Аллаһа сәдагәтлә хидмәт едирләр, әтрафдакылар онлара һәмишә “тәәҹҹүб едиб... сөјәҹәкләр” (1 Петер 2:12; 3:16; 4:4).
Бүтүн дәлилләри ҝөтүр-гој етмәк вахты ҝәлиб чатыб
15, 16. а) Аллаһын һимајәсинә малик олан дин групуну мүәјјәнләшдирмәкдә һансы суаллар көмәк едәҹәкдир? б) Милјонларла инсанлар һансы нәтиҹәјә ҝәлмишләр вә нә үчүн?
15 Өзүнүздән сорушун: һансы дин групу, тә’лимләри чох инсанларын фикриндән фәргләнсә белә, ҹидди олараг Аллаһын Кәламына риајәт етмәклә таныныр? Һансы груп, Аллаһын шәхси адынын ваҹиблијини гејд едир вә һәтта онун адыны дашыјыр? Инсанларын диггәтини бәшәријјәтин проблемләринин јеҝанә һәлли кими никбинликлә Аллаһын Падшаһлығына јөнәлдән кимләрдир? Һәјатда ҝеридә галанлар кими танынмаг тәһлүкәси алтында кимләр Мүгәддәс Китабын давраныш нормаларына риајәт едир? Һансы групун мәваҹиб алан руһаниләри јохдур вә бунунла белә бүтүн үзвләри тәблиғчидир? Сијасәтдә иштирак етмәсәләр дә, гануна табе олан вәтәндашлар кими кимләр тә’рифләнир? Мәһәббәтдән ирәли ҝәләрәк, башгаларына Аллаһ вә Онун нијјәтләри һаггында өјрәнмәјә көмәк едән кимләрдир? Бәс бүтүн бу мүсбәт ҹәһәтләринә бахмајараг, кимләр тә’гиб олунур, әлә салыныр вә нифрәт едилир?
16 Бүтүн дүнјада милјонларла инсанлар әлләриндә олан бүтүн дәлилләри ҝөтүр-гој едиб вә әмин олублар ки, јалныз Јегованын Шаһидләри һәгиги динә е’тигад едирләр. Онлар, Јегованын Шаһидләринин өјрәтдикләринә, давранышларына вә онларын дининин ҝәтирдији фајдаја әсасән белә нәтиҹәјә ҝәлмишләр (Ишаја 48:17). Милјонларла инсанлар Зәкарја 8:23 ајәсиндә габагҹадан јазылан сөзләри дејирләр: “Сизинлә ҝедирик, чүнки Аллаһын сизинлә бәрабәр олдуғуну ешитдик”.
17. Јегованын Шаһидләринин дининин һәгиги олдуғуну иддиа етмәк, онлар тәрәфиндән нәјә ҝөрә ловғалыг сајылмыр?
17 Јалныз онларын Аллаһ тәрәфиндән һимајә едилдикләрини иддиа етмәк, Јегованын Шаһидләри тәрәфиндән ловғалыг дејилми? Бәс мисирлиләрин башга динә мәнсуб олмаларына бахмајараг, Мисирдә јашајан исраиллиләрин Аллаһын һимајәсинә малик олдугларыны сөјләмәк онлар тәрәфиндән ловғалыгмы һесаб олунурду? Аллаһын иудаизм тәрәфдарларыны јох, онлары һимајә етдијини сөјләмәк биринҹи әсрин мәсиһчиләри тәрәфиндән ловғалыгмы сајылырды? Дәлилләр ҝөз гаршысындадыр. Јегованын Шаһидләри, Исанын габагҹадан дедији пејғәмбәрлијә әсасән, сон заманларда онун һәгиги давамчыларынын јеринә јетирмәли олдуглары иши 235 өлкәдә иҹра едирләр: “Падшаһлыг һаггында олан бу Мүждә милләтләрин һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир” (Матта 24:14, И—93).
18, 19. а) Јегованын Шаһидләринә мүгавимәт ҝөстәрсәләр белә, нәјә ҝөрә онларын тәблиғ ишини дајандырмаға әсаслары јохдур? б) Јегованын Шаһидләринин Аллаһ тәрәфиндән һимајә едилдикләрини Мәзмур 41:11 ајәси неҹә тәсдиг едир?
18 Јегованын Шаһидләри бундан сонра да бу тапшырығы јеринә јетирәҹәк вә тә’гибләрә вә ја мүгавимәтләрә онларын фәалијјәтини дајандырмаға јол вермәјәҹәкләр. Јегованын иши јеринә јетирилмәлидир вә бу белә дә олаҹаг. Өтән әсрдә Аллаһын ирадәсини һәјата кечирмәкдә Јегованын Шаһидләринә мане олмаг ҹәһдләринин һамысы мүвәффәгијјәтсизликлә нәтиҹәләнирди, чүнки Јегова вә’д етмишдир: “Сәнә гаршы дүзәлдилән һеч бир силаһ ишә јарамајаҹаг; вә һөкмдә сәнә гаршы галхан һәр дили сучлу чыхараҹагсан. Рәбб гулларынын мирасы будур вә онларын салеһлији мәндәндир, Рәбб дејир” (Ишаја 54:17).
19 Бу ҝүн бүтүн дүнјадакы мүгавимәтләрә бахмајараг, Јегованын Шаһидләринин һәмишә олдуғундан даһа ҝүҹлү вә фәал олмалары сүбут едир ки, Јегова онларын ишиндән мәмнундур. Давуд падшаһ деди: “Бунунла билирәм ки, мәндән хошланырсан, чүнки дүшмәним үзәримдә өјүнмүр” (Мәзмур 41:11; 56:9, 11). Јегованын дүшмәнләри, Онун халгы үзәриндә гәләбә газанмајаҹалар, чүнки онларын Рәһбәри Иса Мәсиһ, сонунҹу гәләбәјә доғру ирәлиләјир!
Ҹаваб верә биләрсинизми?
• Гәдимдә Аллаһын һимајәсинә кимләр малик иди?
• Һәгиги динин бә’зи фәргләндириҹи әламәтләри һансылардыр?
• Јегованын Шаһидләринин Аллаһ тәрәфиндән һимајә едилдијинә шәхсән сизи нә әмин едир?
[23-ҹү сәһифәдәки шәкил]
Аллаһын һимајәсини арзу едән кәсләрин тә’лимләри истисна олараг Аллаһын Кәламына әсасланмалыдыр.
[25-ҹи сәһифәдәки шәкил]
Мәсиһчи ағсаггаллары сүрү үчүн нүмунә кими хидмәт едирләр.