Хејирхаһ ишләр Аллаһы иззәтләндирир
МӘСИҺЧИЛӘР хејирхаһ ишләри вә нүмунәви давранышлары илә Аллаһы иззәтләндирирләр (1 Петер 2:12). Бу, сон илләр әүзиндә Италијада баш верән һадисәләрдән ҝөрүнүр.
1997-ҹи илин сентјабр ајында Марке вә Умбрија вилајәтләриндә баш верән ҝүҹлү зәлзәлә нәтиҹәсиндә 90 000 ев зәдәләнмишдир. Јеһованын Шаһидләри груплара бөлүнәрәк, һәмиманлыларына вә башга инсанлара дәрһал көмәк тәклиф етдиләр. Зәрәр чәкәнләрә гошма вагонлар, јатаг кисәләри, мәтбәх пиләтәләри, ҝенераторлар вә башга әшјалар верилди. Бу ҹүр јардым диггәтдән јајынмады.
“Чентро” гәзетиндә гејд едилирди: “Зәрәр чәкәнләрә көмәк етмәк үчүн Розето шәһәриндән (Терамо вилајәти) биринҹи Јеһованын Шаһидләри ҝәлдиләр... Вахташыры дуа етмәк үчүн бир јерә топлашмагдан савајы, Јеһоваја садиг олан бу инсанлар, зәрәр чәкәнләрә һансы динә мәнсуб олдугларыны сормадан, көмәк ҝөстәрмәклә хејирхаһлыг едирләр”.
Даһа чох зәрәр чәкән шәһәрләрдән бири олан Ночера-Умбранын бәләдијјә рәиси Јеһованын Шаһидләринә јазмышды: “Ночеранын сакинләринә ҝөстәрдијиниз көмәјә ҝөрә сизә шәхсән үрәкдән миннәтдарлығымы билдирирәм. Бунунла, бүтүн шәһәр әһалисинин һиссләрини ифадә етдијими дүшүнүрәм”. Бундан әлавә, Дахили Ишләр Назирлији Јеһованын Шаһидләринин јығынҹағыны (“Congregazione Cristiana dei Testimoni di Geova”), “Умбрија вә Марке вилајәтләринин сакинләринә көмәк едәркән ҝөстәрдикләри сә’ј вә әмәји гејд едәрәк”, фәхри фәрман вә медал илә мүкафатландырды.
Италијанын шималында јерләшән Пјемонти вилајәтиндә 2000-ҹи илин октјабрында ҝүҹлү дашгын баш верди. Шаһидләр јенә дә тезҹә көмәјә ҝәлдиләр. Бу хејирхаһ иш дә нәзәрдән јајынмады. Пјемонти вилајәтинин һөкумәт органлары, “дашгындан зәрәр чәкәнләрә көнүллү сурәтдә көмәк ҝөстәрдикләринә” ҝөрә Шаһидләри шәрәф нишаны илә тәлтиф етдиләр.
Иса Мәсиһ шаҝирдләринә бу ҝөстәриши вермишдир: “Гој сизин нурунуз инсанларын гаршысында елә парласын ки, хејирхаһ ишләринизи ҝөрсүнләр вә Ҝөјләрдәки Атаныза һәмд етсинләр” (Матта 5:16). Јеһованын Шаһидләри јахынларына руһани вә башга саһәләрдә көмәк ҝөстәрәрәк, “хејирхаһ ишләри” илә өзләрини дејил, Аллаһы севинҹлә иззәтләндирирләр.