Охуҹуларын суаллары

Гоһумлар арасындакы никаһа даир Мусанын ганунунда олан мәһдудијјәтләрә мәсиһчиләр бу ҝүн нә дәрәҹәдә риајјәт етмәлидир?

Јеһованын Исраил халгына вердији ганунда, тој мәрасими вә адәтләри һаггында чох аз мә’лумат верилир. Лакин орада ҝөстәрилир ки, мүәјјән гоһумлар арасында никаһын гадағандыр. Мисал үчүн, “Левилиләр” китабынын 18:6-20 ајәләриндә јахын әгрәбалар арасында бағланан никаһы гадаған едән сијаһыја раст ҝәлирик. Бу ајәләрдә, һансы јахын гоһумлар арасында ҹинси әлагәјә јол верилмәдији бүтүн тәфәррүаты илә тәсвир едилир. Әлбәттә, мәсиһчиләр Мусанын гануну алтында дејилләр вә она табе олмаг мәс’улијјәтини дашымырлар (Ефеслиләрә 2:15; Колослулара 2:14). Анҹаг бу о демәк дејил ки, мәсиһчиләр һәјат јолдашы сечәркән бу мәсәләјә садәҹә олараг е’тинасызлыг ҝөстәрә биләрләр. Бунун үчүн бир нечә сәбәб вар.

Илк нөвбәдә, јахын гоһумлар арасындакы никаһы тәнзимләјән дөвләт ганунлары мөвҹуддур, мәсиһчиләр исә әсас е’тибары илә јашадыглары өлкәнин ганунларына табе олмаға борҹлудурлар (Матта 22:21; Ромалылара 13:1). Тәбии ки, бу ганунлар мүхтәлиф өлкәләрдә фәрглидир. Бу ҹүр ганунларын әксәријјәти, башлыҹа олараг ҝенетик амилләри нәзәрә алыр. Мә’лумдур ки, јахын гоһумлар арасындакы никаһдан төрәнән ушаглар чох вахт ҝенетик чатышмазлыглара вә хәстәликләрә дүчар олурлар. Бу сәбәбә ҝөрә, еләҹә дә үзәрләриндә “олан һакимләрә табе” олдуглары үчүн, мәсиһчиләр аилә гураркән, никаһла бағлы јерли ганунлара риајәт едирләр.

Бундан әлавә, бу вә ја диҝәр әразидә нәјин мүнасиб олуб-олмадығы илә әлагәдар суаллар јараныр. Демәк олар ки, һәр бир мәдәнијјәтдә јахын гоһумлар арасындакы никаһы тәнзимләјән гајда вә ән’әнәләр мөвҹуддур, чүнки белә никаһлар чох вахт ган гоһумлуғу һесаб едилир вә бу сәбәбдән гадаған олунур. Мүәјјән гоһумлар арасындакы никаһла бағлы гадағалар халгын мәдәнијјәтиндән асылы олараг фәрглидир, анҹаг “Британија енсиклопедијасы”нда гејд олунур ки, “үмумијјәтлә, инсанлар арасында ҝенетик гоһумлуг нә гәдәр јахындырса, ҹинси әлагәјә даир гадағалар да бир о гәдәр ҹиддидир”. Беләликлә, арада ган гоһумлуғу олмаса да, мәсиһчиләр Аллаһын адына вә мәсиһчи јығынҹағына ләкә ҝәтирмәмәк үчүн, мөвҹуд олан ән’әнәләрә вә ја һәмин әразидә јашајан инсанларын һиссләринә гаршы тамамилә е’тинасызлыг ҝөстәрмәјәҹәкләр (2 Коринфлиләрә 6:3).

Аллаһын бизә бәхш етдији виҹдан һаггында да унутмаг лазым дејил. Һәр бир инсан анаданҝәлмә һиссләрә - јахшыны вә писи, хејири вә шәри сечмәк габилијјәтинә маликдир (Ромалылара 2:15). Әҝәр виҹдан налајиг һәрәкәтләр нәтиҹәсиндә тәһриф олунмајыб вә ја сәртләшмәјибсә, инсана нәјин нормал вә мүнасиб, нәјин исә гејри-тәбии вә ијрәнҹ олдуғуну билдирир. Јеһова, исраиллиләрә јахын гоһумларын никаһа дахил олмасыны гадаған едән ганун верәркән, һәмин һәгигәтә истинад етмишди. Мүгәддәс Китабда охујуруг: “Ичиндә отурмуш олдуғунуз Мисир дијарынын ишләри кими етмәјәҹәксиниз; вә сизи апармагда олдуғум Кән’ан дијарынын ишләри кими дә етмәјәҹәксиниз; вә онларын ганунлары илә ҝетмәјәҹәксиниз” (Левилиләр 18:3). Мәсиһчиләр Мүгәддәс Китаб әсасында тәрбијә едилмиш виҹданларыны горујур, бу дүнјанын хејир вә шәрә даир тәһриф едилмиш анлајышы илә она позуҹу тә’сир ҝөстәрмәсинә јол вермирләр (Ефеслиләрә 4:17-19).

Белә олан һалда һансы нәтиҹәјә ҝәлә биләрик? Мәсиһчиләр Мусанын гануну алтында олмасалар да, виҹданлары ајдын шәкилдә дејир ки, ата илә гыз, ана илә оғул, баҹы илә гардаш кими јахын гоһумлар арасында никаһ, мәсиһчиләр үчүн тамамилә јол верилмәздир дејилa. Узаг гоһумлара ҝәлдикдә исә, мәсиһчиләр е’тираф едирләр ки, гануни никаһлары тәнзимләјән ганун вә низамнамәләр, һәмчинин ҹәмијјәтдә вә һәр һансы халгын мәдәнијјәтиндә гәбул едилмиш нормалар мөвҹуддур. Мәсиһчиләр, Мүгәддәс Китабда “һәр кәс никаһа һөрмәт етсин” дејә јазылан тапшырығы јеринә јетирмәк үчүн, бүтүн бунлары нәзәрә алмалыдырлар (Ибраниләрә 13:4).

[Һашијә]