Башгаларына еһтијаҹ дујмағымызын сәбәби

“Ики нәфәр бир нәфәрдән јахшыдыр... Чүнки дүшәрләрсә, бири достуну галдырар” (Сүлејман падшаһ).

ГӘДИМ ИСРАИЛ падшаһы Сүлејман демишдир: “Ики нәфәр бир нәфәрдән јахшыдыр, чүнки әмәкләри үчүн јахшы мүкафатлары олар. Чүнки дүшәрләрсә, бири достуну галдырар; фәгәт јалныз олуб дүшәнин вај башына! Ону галдыраҹаг кимсә јохдур” (Ваиз 4:9, 10). Бурада инсан тәбиәтинин ҝөркәмли билиҹиси Сүлејман вурғулајыр ки, биз үнсијјәтә вә достлуг мүнасибәтләринә еһтијаҹ дујуруг вә јахшы оларды ки, өзүмүзү инсанлардан тәҹрид етмәјәк. Лакин бу ади бир инсан фикри дејилдир. Сүлејманын сөзләри — јухарыдан, Аллаһдан назил олан мүдриклијин бәһрәсидир.

Инсанын өзүнү тәҹрид етмәси мүдрик давраныш дејил. Инсанлар бир-бирләринә лазымдырлар. Биз һамымыз әтрафымыздакы инсанлардан ала биләҹәјимиз дәстәк вә көмәјә еһтијаҹ дујуруг. Мүгәддәс Китаб мәсәлиндә дејилир: “Тәнһалығы севән нијјәтинин ардынҹа дүшмүш олар, сағлам шүурун әлејһинә чыхар” (Сүлејманын мәсәлләри 18:1, МКШ). Буна ҝөрә дә тәәҹҹүблү дејил ки, сосиологлар инсанлары мүәјјән бир група аид олмаға вә башгалары илә марагланмаға тәшвиг едирләр.

Профессор Роберт Путнам иҹтимаи һәјатын дирчәлишинә даир төвсијәләрдән бирини хатырладыр; бу, “Аллаһа иман етмәјин ҝөстәрдији тә’сирин ҝүҹләндирилмәсидир”. Бунунла бағлы Јеһованын Шаһидләринин нүмунәси мараглыдыр: онлар бүтүн дүнјада мөвҹуд олан аиләјә бәнзәр јығынҹагларында өзләрини мүһафизә олунмуш һисс едирләр. Һәвари Петерин сөзләринә әсасән онлар ‘Аллаһдан горхан’ бүтүн ‘гардашлығы севирләр’ (1 Петер 2:17). Јеһованын Шаһидләри тәҹрид олунмагдан вә онун зәрәрли нәтиҹәләриндән гачынырлар, чүнки онларын һәгиги ибадәтлә бағлы чохлу ишләри вар: онлар даима чалышырлар ки, јахынларына Аллаһын Кәламындакы һәгигәти өјрәнмәкдә көмәк етсинләр (2 Тимотејә 2:15).

Мәһәббәт вә достлуг мүнасибәтләри онларын һәјатыны дәјишмишдир

Јеһованын Шаһидләри, һәр бир үзвү ваҹиб олан бирләшмиш ҹәмијјәти тәшкил едирләр. Латын Америкасында јашајан бир аиләнин үзвләри олан Миҝелин, Фројланын вә Алма-Рутун нүмунәсини нәзәрдән кечирәк. Онлар ҹыртданбојлулуға сәбәб олан сүмүк тохумаларында зәдә илә доғулмушлар. Онларын үчү дә әлил арабасында ҝәзирләр. Јеһованын Шаһидләри илә үнсијјәт онларын һәјатына неҹә тә’сир етмишдир?

Миҝел дејир: “Сон дәрәҹәдә ҝәрҝин анларым олуб, лакин Јеһованын халгы илә үнсијјәтдә олмаға башладыгдан сонра, һәјатым дәјишди. Өзүнү инсанлардан тәҹрид етмәк чох тәһлүкәлидир. Јығынҹаг ҝөрүшләриндә һәмиманлыларла үнсијјәт етмәк, һәр һәфтә онларла бирликдә олмаг мәмнунлуг һисси дујмагда мәнә чох көмәк етди”.

Алма-Рут әлавә едир: “Һәрдән бәрк мә’јуслуға гапылырдым вә чох гәмли олурдум. Анҹаг Јеһова һаггында өјрәнмәјә башладыгдан сонра, Онунла сых мүнасибәтләр гура биләҹәјими анладым. Бу мүнасибәтләр мәним үчүн һәјатда чох дәјәрли олду. Доғмаларымыз бизә бөјүк көмәклик ҝөстәрдиләр вә бу, аиләмизи даһа да јахынлашдырды”.

Миҝелин атасы она мәһәббәтлә јазмағы вә охумағы өјрәдирди. Сонрадан Миҝел бу ишдә Фројлана вә Алма-Рута көмәк етди. Бу, онларын руһани ҹәһәтдән инкишаф етмәләри үчүн ваҹиб иди. Алма-Рут дејир: “Охумағы баҹармағымыз сајәсиндә чох шејә наил ола билмишик, чүнки артыг биз Мүгәддәс Китабы вә она әсасланан нәшрләри охумагла руһән гидалана билирик”.

Һазырда Миҝел мәсиһчи ағсаггалы кими хидмәт едир. Фројлан Мүгәддәс Китабы доггуз дәфә охујуб. Алма-Рут исә 1996-ҹы илдә пионер хидмәтинә башлајараг, Падшаһлығын таммүддәтли тәблиғчиси кими Јеһоваја хидмәтини ҝенишләндирмишдир. О гејд едир: “Бу мәгсәдимә Јеһованын көмәји сајәсиндә наил олдум. Бу ишдә мәнә әзиз баҹыларым көмәк едирләр; онлар мәнә јалныз тәблиғ етмәкдә дејил, һәмчинин өјрәтмәк ишиндә дә көмәк едирләр. Һазырда мәним башламаға наил олдуғум 11 Мүгәддәс Китаб өјрәнмәм вар”.

Һәмчинин Емилија да јахшы нүмунә верир. Бәдбәхт һадисә нәтиҹәсиндә онун һәр ики ајағы вә онурға сүмүјү зәдәләнмишдир вә инди о, әлил арабасындан истифадә етмәк мәҹбуријјәтиндәдир. Јеһованын Шаһидләри Мүгәддәс Китабы онунла Мексикада өјрәнмишләр вә о, 1996-ҹы илдә вәфтиз олунмушдур. Емилија дејир: “Һәгигәти билмәздән әввәл һәјатыма сон гојмаг истәјирдим; јашамаг истәмирдим. Бошлуг һисс едир вә ҝеҹә-ҝүндүз ағлајырдым. Анҹаг Јеһованын халгы илә үнсијјәтдә олмаға башлајанда баҹы-гардашларын мәни севдикләрини һисс етдим. Онлар мәнә шәхси мараг ҝөстәрирләр, бу исә мәнә ҝүҹ верир. Бир ағсаггал мәним үчүн бир гардаш вә ја бир ата кими олду. О вә бир нечә хидмәти көмәкчи мәни арабамла ҝөрүшә вә тәблиғ хидмәтинә апарырлар”.

1992-ҹи илдә Јеһованын Шаһиди кими вәфтиз олунан Хосе тәк јашајыр. Онун 70 јашы вар. О, 1990-ҹы илдә тәгаүдә чыхмышдыр. Хосе әввәлләр депрессијадан әзијјәт чәкирди. О, бир дәфә Јеһованын Шаһиди илә сөһбәт етдикдән сонра, мәсиһчи ҝөрүшләринә ҝәлмәјә башлады. Орада ешитдикләри вә ҝөрдүкләри онун хошуна ҝәлирди. Мисал үчүн, Хосе диггәт јетирди ки, гардашлары достлуг мүнасибәтләри бирләшдирир вә о, онларын диггәтини шәхсән өз үзәриндә һисс едирди. Инди јығынҹағын ағсаггаллары вә хидмәти көмәкчиләри онун гајғысына галырлар (1 Петер 5:2; Филипилиләрә 1:1). Бу һәмиманлылар онун үчүн “тәсәлли” олдулар (Колослулара 4:11). Онлар Хосени һәкимә апарыр, евдә она баш чәкирләр. Гардашлар она, һәтта кечиртдији дөрд ҹәрраһијјә әмәлијјаты заманы да көмәк едирдиләр. Хосе дејир: “Онлар мәним үчүн нараһат олурлар. Онлар мәним аиләмдир. Өзүмү онларын арасында јахшы һисс едирәм”.

Вермәк — әсл бәхтијарлыг ҝәтирир

Сүлејман падшаһ бүтүн ҝүҹүмүзү вар-дөвләт јығмаға сәрф етмәјин нә дәрәҹәдә әбәс олдуғуну тәсвир етдикдән дәрһал сонра ‘ики нәфәрин бир нәфәрдән јахшы олдуғуну’ демишдир (Ваиз 4:7-9). Ахы бу ҝүн инсанларын чоху мәһз белә давранырлар, бу заман онлар неҹә ки, аилә дахилиндәки, еләҹә дә ондан кәнардакы инсани мүнасибәтләри гурбан вердикләрини нәзәрә алмырлар.

Бу ҹүр аҹҝөзлүк вә худбинлик руһу үзүндән бир чохлары өзләрини инсанлардан тәҹрид едирләр. Нәтиҹәдә бу онлара нә хошбәхтлик ҝәтирир, нә дә мәмнунлуг, чүнки бу руһун тә’сири алтына дүшдүкдә инсан чох вахт мә’јуслуг вә үмидсизлик һисси кечирир. Вә әксинә, јухарыда ҝәтирилән нүмунәләрдән ҝөрүнүр ки, Јеһоваја хидмәт едән, Она вә јахынларына олан мәһәббәтдән ирәли ҝәләрәк давранан кәсләрлә үнсијјәтдә олмаг неҹә дә фајдалыдыр. Мүнтәзәм олараг мәсиһчи ҝөрүшләринә ҝәлмәк, һәмиманлыларымызын көмәк вә дәстәк олмалары, һәмчинин хидмәтдә сә’јлә иштирак етмәк инсанлардан тәҹрид едилмә илә бағлы јаранан мәнфи һиссләрин өһдәсиндән ҝәлмәкдә һәлледиҹи рол ојнамышдыр (Сүлејманын мәсәлләри 17:17; Ибраниләрә 10:24, 25).

Бир-биримиздән асылы олдуғумуз үчүн, башгаларына көмәк едәркән мәмнунлуг дујмағымыз тамамилә тәбиидир. Чәкдији зәһмәти башгаларынын хејринә хидмәт едән Алберт Ејнштејн демишдир: “Инсанын дәјәри... онун гәбул етмәјә һазыр олдуғу шејләрә әсасән дејил, вердији шејләрә әсасән мүәјјән едилмәлидир”. Бу, Рәббимиз Иса Мәсиһин сөзләринә мүвафигдир: “Вермәк алмагдан даһа бөјүк бәхтијарлыг ҝәтирир” (Һәвариләрин ишләри 20:35). Башгаларындан мәһәббәт ҝөрмәк јахшыдыр, лакин башгаларына мәһәббәт ҝөстәрмәк дә чох фајдалыдыр.

Узун илләр әрзиндә јығынҹаглара баш чәкиб, онлара руһани көмәклик ҝөстәрән вә мадди ҹәһәтдән имканлары мәһдуд олан мәсиһчиләрә јығынҹаг ҝөрүшләри кечирмәк үчүн залларын тикилмәсиндә көмәк едән бир сәјјаһ нәзарәтчи өз һиссләри илә бөлүшүр: “Гардашларыма хидмәт етмәкдән әлдә етдијим севинҹ вә онларын үзүндәки миннәтдарлыг ифадәси тәшвиг едир ки, башгаларына көмәк етмәк имканлары ахтармаға давам едим. Тәҹрүбәм мәни әмин едир ки, башгаларына шәхси мараг ҝөстәрмәк хошбәхтлијин ачарыдыр. Мән һәмчинин билирәм ки, биз ағсаггаллар “јелдән сахланаҹаг бир јер кими... гураг јердә ахар сулар кими, јоруҹу дијарда бөјүк гаја көлҝәси кими” олмалыјыг” (Ишаја 32:2).

Бир јердә јашамаг нә хошдур!

Башгаларына көмәк вә Јеһоваја хидмәт едән кәсләрлә достлуг мүнасибәтләри, сөзсүз ки, бөјүк фајда вә әсл бәхтијарлыг ҝәтирир. Мәзмурчу нида етмишдир: “Будур, гардашларын бир јердә јашамасы нә јахшыдыр вә нә хошдур” (Мәзмур 133:1). Миҝелин, Фројланын вә Алма-Рутун нүмунәси ҝөстәрир ки, гаршылыглы көмәк етмәкдә аиләнин бирлији ваҹиб рол ојнајыр. Вә һәгиги ибадәтдә бирләшмәк доғрудан да хејир-дуадыр! Һәвари Павел әрләрә вә арвадлара үнванладығы мәсләһәтләрдән сонра јазыр: “Нәһајәт, һамыныз һәмфикир, башгаларынын дәрдләринә шәрик, гардаш севән, шәфгәтли, меһрибан, тәвазөкар олун” (1 Петер 3:8).

Әсл достлуг неҹә ки, емосионал, еләҹә дә руһани ҹәһәтдән бөјүк фајда ҝәтирир. Павел иман гардашларына мүраҹиәт едәрәк, онлары дә’вәт едир: “Ҹәсарәтсизләри руһландырын, зәифләрә јардым един, һамыја гаршы сәбирли олун... Һәмишә бир-биринизә вә һамыја јахшылыг етмәјә чалышын” (1 Салониклиләрә 5:14, 15).

Бу сәбәбдән башгаларына әмәлдә көмәк етмәк үчүн имканлар ахтарын. “Һамыја, хүсусән иманлылар аиләсинә јахшылыг едәк”, чүнки бу, һәјата әсл мә’на вә мәмнунлуг ҝәтирир (Галатијалылара 6:9, 10). Мәсиһин шаҝирди Јагуб јазырды: “Әҝәр гардашларыныздан вә јахуд баҹыларыныздан бири чылпагдырса вә ҝүндәлик јемәкдән мәһрумдурса вә сизләрдән бири онлара, “Саламат ҝедин. Исинин вә дојун”, — дејиб, онларын бәдәни үчүн зәрури олан шејләри вермирсә, нә фајдасы вардыр?” (Јагуб 2:15, 16). Ҹаваб мә’лумдур. Биз ‘јалныз өз мәнфәәтимизи дејил, башгаларынын да мәнфәәтини ҝүдмәлијик’ (Филипилиләрә 2:4).

Јеһованын Шаһидләри башгаларына мадди јардым ҝөстәрмәкдән савајы, хүсуси һалларда вә ја тәбии фәлакәтләр заманы, онлар һәмчинин јахынларына сон дәрәҹәдә ваҹиб көмәклик етмәјә, мәһз онлара Аллаһын Падшаһлығы һаггында хош хәбәри тәблиғ етмәјә сә’ј ҝөстәрирләр (Матта 24:14). 6 000 000-дан чох Шаһидин бу үмид вә тәсәлли хәбәрини бәјан етмәкдә иштирак етмәси, онларын башгаларына сәмими вә мәһәббәт долу мараг ҝөстәрдикләрини ҝөстәрир. Анҹаг Мүгәддәс Китаб васитәсилә ҝөстәрилән јардым бәшәријјәтин даһа бир еһтијаҹынын тә’мин едилмәсинә көмәк едир. Һансы?

Ән зәрури еһтијаҹларын тә’мин едилмәси

Әсл мә’нада хошбәхт олмаг үчүн, биз Аллаһла лазыми мүнасибәтләрә малик олмалыјыг. Бир китабда белә дејилир: “Инсан һәр заман вә һәр јердә, тарихин башланғыҹындан бу ҝүнә кими өзүндән јүксәк вә ҝүҹлү һесаб етдији нәјә исә мүраҹиәт етмәјә тәшвиг олунур. Бу ҝөстәрир ки, дин инсан тәбиәтинә хасдыр вә елм тәрәфиндән гәбул олунмалыдыр. [...] Инсанын али варлығын үмумдүнја характерли ахтарышы вә она иманы бизи ләрзәјә ҝәтирмәли, валеһ етмәли биздә дәрин һөрмәт һисси һасил етмәлидир” (Kressi Morrison, “Man Does Not Stand Alone”).

Иса Мәсиһ демишдир: “Нә бәхтијардырлар руһән јохсуллар; чүнки Ҝөјләрин Падшаһлығы онларындыр” (Матта 5:3, И–93). Узун мүддәт өзүнү башгаларындан тәҹрид етмәк инсаны әмин-аманлыгдан мәһрум едир. Јараданымыздан ајрылмаг исә даһа ҹиддидир (Вәһј 4:11). “Аллаһ билији” газанмаг вә ону тәтбиг етмәк һәјатымызда ваҹиб јери тутмалыдыр (Сүлејманын мәсәлләри 2:1-5). Бәли, биз өз руһани тәләбатларымызы тә’мин етмәјә гәти гәрарлы олмалыјыг, чүнки биз башгалары вә Аллаһ олмадан кечинә билмәрик. Хошбәхтлик вә һәјатда әсл мәмнунлуг ‘дүнја үзәриндә... Уҹа олан’ Јеһова илә јахшы мүнасибәтләрдән асылыдыр (Мәзмур 83:18).

[5-ҹи сәһифәдәки шәкил]

Миҝел: “Сон дәрәҹәдә ҝәрҝин анларым олуб, лакин Јеһованын халгы илә үнсијјәтдә олмаға башладыгдан сонра, һәјатым дәјишди”.

[5-ҹи сәһифәдәки шәкил]

Алма-Рут: “Јеһова һаггында өјрәнмәјә башладыгдан сонра, Онунла сых мүнасибәтләр гура биләҹәјими анладым”.

[6-ҹы сәһифәдәки шәкил]

Емилија: “Һәгигәти билмәздән әввәл... бошлуг һисс едирдим”.

[7-ҹи сәһифәдәки шәкил]

Аллаһын һәгиги хидмәтчиләри илә үнсијјәтдә олмаг руһани тәләбатлары тә’мин етмәјә көмәк едир.