Үрәјини горујараг әхлаги ҹәһәтдән тәмиз гал
“Һәр шејдән әввәл өз үрәјини гору, чүнки һәјат чешмәси одур” (СҮЛЕЈМАНЫН МӘСӘЛЛӘРИ 4:23, МКШ).
1-3. а) Инсанлар әхлаги тәмизликләрини гијмәтләндирмәдикләрини чох вахт неҹә ҝөстәрирләр? Нүмунә ҝәтирин. б) Әхлаги тәмизлијин дәјәрини нәзәрдән кечирмәк нәјә ҝөрә ваҹибдир?
ШӘКИЛ дәбдән дүшмүш кими ҝөрүнүрдү. Еһтимал ки, евин ҝөрүнүшүнә ујғун ҝәлмирди. Һәр неҹә олса да, бу шәклин саһиби, шүбһәсиз ки, онда фајдалы бир шеј ҝөрмүрдү. Нәһајәт шәкли көһнә әшјалар сатылан мағазада сатыша гојурлар. Гијмәти исә 29 АБШ доллары. Бир нечә ил өтдүкдән сонра мә’лум олур ки, шәклин тәхмини гијмәти милјон доллардыр! Әслиндә бу надир шаһ әсәри иди. Өз хәзинәсини гијмәтләндирмәјән кечмиш саһибин һиссләрини тәсәввүр етмәк олар!
2 Буна бәнзәр һал чох вахт әхлаги тәмизликлә баш верир. Бу ҝүн олдугҹа чох инсан әхлаги тәмизлијини лазымынҹа гијмәтләндирмир. Бә’зиләри онун мүасир һәјата ујғун ҝәлмәдијини дүшүнәрәк, дәбдән дүшмүш сајырлар. Бу ҹүр адамлар өз әхлаги тәмизликләриндән уҹуз гијмәтә имтина едирләр. Бә’зиләри өз әхлаги тәмизликләрини бир анлыг ҹинси мәмнунлуға дәјиширләр. Диҝәрләри исә әхлаги тәмизликләрини тај-тушларынын вә ја әкс ҹинсдән олан һансыса шәхсин һөрмәтини газанмаг үчүн гурбан верирләр (Сүлејманын мәсәлләри 13:20).
3 Чохлары әхлаги тәмизликләринин нә гәдәр дәјәрли олдуғуну олдугҹа ҝеҹ анламаға башлајырлар. Әхлаги тәмизлији итирмәк өзү илә чох вахт кәдәр ҝәтирир. Мүгәддәс Китабда дејилдији кими, әхлагсызлығын нәтиҹәси зәһәр вә “јовшан кими аҹы” ола биләр (Сүлејманын мәсәлләри 5:3, 4, МКШ). Бу ҝүн дүнјада һөкм сүрән әхлаг позғунлуғуну нәзәрә алараг, сән өз әхлаги тәмизлијини неҹә гијмәтләндирә вә горујуб сахлаја биләрсән? Бунунла әлагәдар ата биләҹәјимиз үч аддыма диггәт јетирәк.
Үрәјини гору
4. Символик үрәк нәдир вә ону нәјә ҝөрә горумаг лазымдыр?
4 Әхлаги ҹәһәтдән тәмиз галмағын ачары — үрәји горумагдыр. Мүгәддәс Китабда мәсләһәт верилир: “Һәр шејдән әввәл өз үрәјини гору, чүнки һәјат чешмәси одур” (Сүлејманын мәсәлләри 4:23, МКШ). Бурада һансы “үрәкдән” бәһс едилир? Бурада бәдәнимизин органындан данышылмыр. Бу, символик “үрәкдир”. О бизим дахили вәзијјәтимизә — дүшүнҹәләримизә, һиссләримизә вә мејлләримизә аиддир. Мүгәддәс Китабда охујуруг: “Аллаһын Рәбби бүтүн үрәјинлә вә бүтүн ҹанынла вә бүтүн гүввәтинлә севәҹәксән” (Тәснијә 6:5). Иса деди ки, бу ән бөјүк әмрдир (Марк 12:29, 30). Тамамилә ајдындыр ки, бизим үрәјимиз чох гијмәтлидир. О бизим ону горумағымыза лајигдир.
5. Үрәк неҹә һәм гијмәтли, һәм дә тәһлүкәли ола биләр?
5 Лакин Мүгәддәс Китабда һәм дә дејилир ки, “үрәк һәр шејдән зијадә алдадыҹыдыр вә чох чүрүкдүр” (Јеремја 17:9). Үрәк һансы мә’нада алдадыҹы олуб бизим үчүн тәһлүкәјә чеврилә биләр? Нүмунә үчүн: автомобил бөјүк фајда ҝәтирир, һәтта фөвгәл’адә вәзијјәтләрдә бә’зән һәјаты хилас да едә биләр. Лакин әҝәр сүрүҹү машыны идарә етмирсә, даима сүкандан јапышмырса, һәмин автомобил асанлыгла өлдүрүҹү силаһ ола биләр. Буна бәнзәр тәрздә, әҝәр сән үрәјини горумасан, дахили истәкләринин вә мејлләринин ихтијарында олаҹагсан, бу исә фәлакәтә ҝәтирә биләр. Аллаһын Кәламы хәбәрдар едир: “Өз үрәјинә ҝүвәнән ағылсыздыр; фәгәт ким һикмәтлә јеријәрсә, о гуртулур” (Сүлејманын мәсәлләри 28:26). Сән, јола дүшмәздән әввәл хәритәјә бахдығын кими, әҝәр Аллаһын Кәламынын сәнә рәһбәрлик етмәсинә имкан верирсәнсә, һикмәтлә јеријиб фәлакәтдән гуртула биләрсән (Мәзмур 119:105).
6, 7. а) Мүгәддәслик нәдир вә бу, Јеһованын хидмәтчиләри үчүн нәјә ҝөрә ваҹибдир? б) Гејри-камил инсанларын Јеһованын мүгәддәслијини әкс етдирмәк имканында олдугларыны һарадан билирик?
6 Бизим үрәјимиз өзү-өзлүјүндә әхлаги тәмизлијә мејлли дејил. Биз она бу јолу өјрәтмәлијик. Буну етмәјин үсулларындан бири — әхлаги тәмизлијин һәгиги дәјәри үзәриндә дәриндән дүшүнмәкдир. Бу кејфијјәт мүгәддәсликлә, јә’ни тәмизликлә вә ҝүнаһдан узаглашмагла сых бағлыдыр. Мүгәддәслик — Јеһова Аллаһын шәхсијјәтинин ајрылмаз һиссәси олан гијмәтли кејфијјәтдир. Мүгәддәс Китабын јүзләрлә ајәси бу кејфијјәти Јеһова илә әлагәләндирир. Мүгәддәс Китабда һәтта дејилир ки, “мүгәддәслик Јеһоваја мәхсусдур” (Чыхыш 28:36, ЈД). Белә исә, бу чох јүксәк кејфијјәтлә гејри-камил инсанлар арасында һансы бағлылыг вар?
7 Јеһова Өз Кәламында бизә бујурур: “Мүгәддәс олун, чүнки Мән мүгәддәсәм” (1 Петер 1:16). Бәли, Јеһованын мүгәддәслијини тәглид етмәк вә Онун ҝөзләриндә тәмиз олмаг бизим гүввәмиз дахилиндәдир: бунун үчүн тәмиз һәјат сүрмәк лазымдыр. Беләликлә, биз натәмиз, ләкәләјиҹи ишләрдән гачынанда, Күлл-Ихтијар Аллаһын шәхсијјәтинин ҝөзәл ҹизҝиләрини тәглид етмәк кими јүксәк мәгсәдә јахынлашырыг (Ефеслиләрә 5:1). Бунун бизим имканларымыздан үстүн олдуғуну дүшүнмәмәлијик, чүнки Јеһова биздән баҹармадығымыз иши һеч заман тәләб етмәјән мүдрик вә ағыллы Рәһбәрдир (Мәзмур 103:13, 14; Јагуб 3:17). Руһани вә әхлаги ҹәһәтдән тәмиз галмаг үчүн, сөзсүз ки, сә’ј ҝөстәрмәк лазымдыр. Һәвари Павел, ‘Мәсиһә олан садә вә тәмиз сәдагәтдән’ данышаркән, Мәсиһин бунлара лајиг олдуғуну сөјләди (2 Коринфлиләрә 11:3). Мәҝәр Мәсиһин вә онун Атасынын гаршысында әхлаги ҹәһәтдән тәмиз галмаг үчүн вар гүввәмизлә сә’ј ҝөстәрмәјә борҹлу дејиликми? Ахы онлар бизә о гәдәр мәһәббәт ҝөстәрибләр ки, биз онлара һәмишә борҹлу олаҹағыг (Јәһја 3:16; 15:13). Биз шадыг ки, әхлаги ҹәһәтдән тәмиз һәјат сүрәрәк миннәтдарлығымызы билдирмәк имканымыз вар. Әҝәр әхлаги тәмизлијимизә бу нөгтеји-нәзәрдән бахырыгса, биз ону гијмәтләндирәҹәк вә үрәјимизи горујаҹағыг.
8. а) Символик үрәјимизи неҹә гидаландыра биләрик? б) Сөһбәтләримиз бизим һаггымызда нәји ашкар едә биләр?
8 Биз руһани гидамыза диггәт јетирмәклә дә үрәјимизи горујуруг. Биз мүнтәзәм олараг ағлымызы вә үрәјимизи јахшы руһани гида илә гидаландырмалы вә диггәтимизи Аллаһын Падшаһлығы һаггындакы хош хәбәрә јөнәлтмәлијик (Колослулара 3:2). Һәтта бизим сөһбәтләримиздә дә бу ҹүр әһвал-руһијјә әкс олунмалыдыр. Әҝәр биз ҹисмани, әхлагсыз шејләрдән данышан инсанлар кими танынырыгса, бу, бизим үрәјимизин вәзијјәтини үзә чыхарыр (Лука 6:45). Ән јахшысы, гој бизи руһани вә инкишафетдириҹи мөвзуда данышан инсанлар кими танысынлар (Ефеслиләрә 5:3). Үрәји горумаг үчүн бә’зи ҹидди тәһлүкәләрдән чәкинмәк лазымдыр. Ҝәлин онлардан икисини мүзакирә едәк.
Ҹинси әхлагсызлыгдан чәкин
9-11. а) 1 Коринфлиләрә 6:18 ајәсиндәки өјүдә мәһәл гојмајанларын ҹидди әхлагсыз һәрәкәт ишләтмәк еһтималы нәјә ҝөрә артыгдыр? Нүмунә ҝәтирин. б) Ҹинси әхлагсызлыгдан чәкинириксә, нәдән кәнар ҝәзмәлијик? ҹ) Садиг Ејуб бизә нәдә ҝөзәл нүмунә вериб?
9 Јеһова һәвари Павели, бир чох инсанлара үрәкләрини горумаға вә әхлаги ҹәһәтдән тәмиз галмаға көмәк едән нәсиһәти јазмаг үчүн илһамландырмышдыр. Павел јазмышдыр: “Ҹинси әхлагсызлыгдан чәкинин” (1 Коринфлиләрә 6:18). Диггәт јетирәк ки, о садәҹә олараг “ҹинси әхлагсызлыг етмәјин” демирди. Мәсиһчиләр бундан даһа артығыны етмәлидирләр. Онлар бу ҹүр әхлагсызлыгдан, санки өлүмҹүл тәһлүкәдән олдуғу кими гачмалыдырлар. Әҝәр биз бу өјүдә е’тинасыз јанашырыгса, онда ҹидди әхлагсыз һәрәкәт едәҹәјимизә вә Аллаһын лүтфүнү итирәҹәјимизә даһа чох еһтимал олар.
10 Нүмунәјә бахаг: ана мүһүм һадисә илә әлагәдар оғлуну јујундурур вә сәлигә илә ҝејиндирир. Оғул аилә јола дүшәнә гәдәр бајырда ојнамаға иҹазә истәјир. Ана бир шәртлә разылыг верир: “Бах о ҝөлмәчәјә јахын ҝетмә. Әҝәр палтарыны батырсан, ҹәзаланаҹагсан”. Лакин бир нечә дәгигәдән сонра ана оғлуну ҝөлмәчәнин кәнарында ајагларынын уҹунда дурараг ләнҝәр вурдуғуну ҝөрүр. Оғул үстүнү, һәлә ки, батырмајыб. Лакин анасынын ҝөлмәчәјә јахын ҝетмәмәк хәбәрдарлығына мәһәл гојмур вә фәлакәт, демәк олар ки, гачылмаздыр (Сүлејманын мәсәлләри 22:15). Нә етмәли олдугларыны билән бир чох ҝәнҹләр вә һәтта јеткин јашлы инсанлар белә буна бәнзәр сәһвләрә јол верирләр. Һансы тәрздә?
11 Чохлары өзләрини “рәзил еһтирасларына” тәслим етдикләри бир вахтда, јолверилмәз ҹинси әлагәләр тәблиғ едән чохлу сәнаје инкишаф етмишдир (Ромалылара 1:26, 27). Порнографија журналлары, китаблары, филмләри вә Интернети башына алыб. Бу ҹүр тәсвирләри өз ағлына бураханлар, сөзсүз ки, ҹинси әхлагсызлыгдан чәкинмирләр. Онлар Мүгәддәс Китабын хәбәрдарлығына е’тинасызлыг ҝөстәрәрәк, ҹинси әхлагсызлыға бармагарасы јанашыр вә онун кәнарында ләнҝәр вурурлар. Үрәкләрини горумаг әвәзинә, онлар ону, еһтимал ки, узун илләр бејинә һәкк олан ајдын сурәтләрлә зәһәрләјирләр (Сүлејманын мәсәлләри 6:27). Ҝәлин, ону ҝүнаһ ишләтмәјә мејлләндирә билән шејләрә бахмамаг үчүн өз ҝөзләри илә әһд бағлајан садиг Ејубдан нүмунә ҝөтүрәк (Ејуб 31:1). Бах бу, тәглид едилмәли нүмунәдир!
12. Ҝөрүшә чыхдыглары заман мәсиһчиләр ҹинси әхлагсызлыгдан неҹә чәкинә биләрләр?
12 Хүсусилә дә евләнмәк фикирләри олан оғланла гыз ҝөрүшә чыхдыглары заман ‘ҹинси әхлагсызлыгдан чәкинмәлидирләр’. Бу дөвр үмидлә долу севинҹли бир дөвр олмалыдыр, лакин бә’зи ҝәнҹ оғлан вә гызлар әхлагсызлыға е’тинасыз јанашараг һәмин дөврү ләкәләјирләр. Онлар бир-бирләрини хошбәхт аилә үчүн мөһкәм тәмәл сајылан тәмәннасыз мәһәббәтә, өзүнә һаким олмаға вә Јеһоваја итаәткарлыға әсасланан имкандан мәһрум едирләр. Бир мәсиһчи әр-арвад ҝөрүшә чыхдыглары заман әхлагсызлыға јол вермишдир. Евләндикдән сонра, арвад виҹданынын она әзаб вердијини вә һәтта тојдан да севинҹ дујмадығыны е’тираф етмишдир. О дејир: “Мән дәфәләрлә Јеһовадан үз истәмишәм, лакин һәмин вахтдан једди ил кечсә дә, әввәлки кими виҹдан әзабы чәкирәм”. Бу ҹүр ҝүнаһа јол верәнләрин мәсиһчи ағсаггалларындан көмәк истәмәләри чох ваҹибдир (Јагуб 5:14, 15). Буна бахмајараг, бир чох мәсиһчиләр ҝөрүшә чыхдыглары заман мүдрик давраныр вә бу ҹүр тәһлүкәдән гачырлар (Сүлејманын мәсәлләри 22:3). Онлар һиссләринин әкс олунма тәрзинә һүдудлар гојурлар. Онлар кимин исә мүшајиәти алтында ҝөрүшә чыхыр вә биләрәкдән тәнһалыға чәкилмирләр.
13. Нәјә ҝөрә мәсиһчиләр Јеһоваја хидмәт етмәјән кәсләрлә ҝөрүшә чыхмалы дејилләр?
13 Јеһоваја хидмәт етмәјән кәслә ҝөрүшә чыхан мәсиһчиләр ҹидди проблемләрлә гаршылаша биләрләр. Мисал үчүн, сән өз һәјатыны Јеһова Аллаһы севмәјән кәслә неҹә бағлаја биләрсән? Чох ваҹибдир ки, мәсиһчиләр Јеһованы севән вә Онун әхлаг нормаларына һөрмәт ҝөстәрән кәсләрлә ејни бојундуруға ҝирсинләр. Аллаһын Кәламы бизи хәбәрдар едир: “Имансызларла ејни бојундуруға ҝирмәјин. Ахы салеһлик илә ганунсузлуг арасында нә ортаглыг ола биләр? Ишыгла гаранлыг арасында нә шәриклик ола биләр?” (2 Коринфлиләрә 6:14).
14, 15. а) Бә’зиләри “ҹинси әхлагсызлыг” сөзүнүн мә’насыны сәһв олараг неҹә баша дүшүрләр? б)“Ҹинси әхлагсызлыг” өзүнә һансы мәшғулијјәтләри дахил едир вә мәсиһчиләр ондан неҹә чәкинә биләрләр?
14 Мә’луматлы олмаг да чох ваҹибдир. Әҝәр ҹинси әхлагсызлығын нә олдуғуну дәгиг мүәјјән едә билмәсәк, ондан лазыми тәрздә чәкинә билмәрик. Буҝүнкү дүнјада бә’зиләри “ҹинси әхлагсызлығын” нә олдуғуну дүзҝүн баша дүшмүрләр. Онлар ҝүман едирләр ки, әсл ҹинси әлагәдә олмадан, ҹинси мејлләрини никаһдан кәнарда тә’мин едә биләрләр. Һәтта бә’зи мө’тәбәр сағламлыг институтлары белә арзуолунмаз һамиләлик һалларынын сајыны азалтмаға чалышараг, ҝәнҹләри һамиләликлә нәтиҹәләнмәјән тәһриф олунмуш формада ҹинси әхлагсызлыгла мәшғул олмаға тәшвиг едирләр. Бу ҹүр мәсләһәтләр тамамилә дүзҝүн дејил. Никаһдан кәнар һамиләликдән гачынмаг әхлаги ҹәһәтдән тәмиз галмаға бәрабәр дејил вә “ҹинси әхлагсызлыг” сөзүнүн әсл мә’насы да бу гәдәр мәһдуд дејил.
15 “Ҹинси әхлагсызлыг” кими тәрҹүмә олунан јунан сөзү порнéја, олдугҹа ҝениш мә’наја мәхсусдур. Бу сөз, бир-бири илә никаһда олмајан инсанларын ҹинси әлагәсинә аиддир вә ҹинсијјәт органларындан јанлыш тәрздә истифадә етмәји нәзәрдә тутур. Порнéја өзүнә анус вә ағыз васитәсилә ҹинси әлагәни, һәмчинин башгасынын ҹинсијјәт органыны һиссә ҝәтирмәк — адәтән фаһишәханаларда олан һәрәкәтләрлә бағлы олан һәрәкәтләри дахил едир. Бу ҹүр мәшғулијјәтләрин ҹинси әхлагсызлыг олмадығыны дүшүнән инсанлар өзләрини алдадырлар вә әслиндә Шејтанын тәләләриндән биринә дүшүбләр (2 Тимотејә 2:26). Бундан әлавә, әхлаги тәмизлији горујуб сахламаг, ҹинси әхлагсызлыг сајылан мәшғулијјәтләрдән чәкинмәкдән даһа чох мә’на дашыјыр. Ҹинси әхлагсызлыгдан гачмаг үчүн, ағыр ҝүнаһ олан порнéјаја сәбәб ола биләҹәк ҹинси натәмизлијин һәр бир нөвүндән вә налајиг давранышдан гачынмалыјыг (Ефеслиләрә 4:19). О заман биз әхлаги ҹәһәтдән тәмиз галаҹағыг.
Ешгбазлығын тәһлүкәсиндән чәкин
16. Мәһәббәтин тәзаһүрү һансы һалларда мүнасибдир вә буну Мүгәддәс Китабын һансы нүмунәси ајдынлашдырыр?
16 Әхлаги ҹәһәтдән тәмиз галмаг үчүн биз даһа бир тәһлүкәдән — ешгбазлыгдан горунмалыјыг. Ким исә тә’кидлә тәсдиг етмәјә чалышар ки, ешгбазлыг һәм киши, һәм дә гадын үчүн гәбаһәтсиз вә зәрәрсиз әјләнҹәдир. Еһтимал ки, мүәјјән шәраитләрдә романтик давранышлар јериндә олар. Мәсәлән, Исһаг Ребека илә “ојнашырды” вә кәнардан нәзәрә чарпырды ки, онлар садәҹә олараг баҹы-гардаш дејилдиләр (Тәквин 26:7-9). Ахы онлар әр вә арвад идиләр. Онларын арасында олан мәһәббәт тәзаһүрү мүнасиб иди. Ешгбазлыг тамамилә башга шејдир.
17. Ешгбазлыг нәдир вә бу проблемин һәллинә неҹә јанашмаг олар?
17 Евләнмәк фикри олмадан романтик мараг ҝөстәрмәји ешгбазлыг кими мүәјјән етмәк олар. Инсанлар мүрәккәб мәхлуглардыр вә шүбһә јохдур ки, ешгбазлығын бә’зи формалары ҝүҹлә сечилә билән чохсајлы формалар гәбул едә биләр (Сүлејманын мәсәлләри 30:18, 19). Буна ҝөрә дә бу мәсәләдә сәрт гајдалар көмәк етмәјәҹәк. Әксинә, даһа јүксәк олан нә исә — виҹданла өзүнү анализ етмәк вә дүшүнҹәли тәрздә Мүгәддәс Китаб принсипләрини тәтбиг етмәк тәләб олунур.
18. Бә’зиләрини ешгбазлыға тәшвиг едән нә олур вә ешгбазлыг нәјә ҝөрә зәрәрлидир?
18 Дүзүнә галса, бизләрдән әксәријјәтимиз, өзүмүзә гаршы әкс ҹинс тәрәфиндән романтик мараг һисс едәндә мәмнунлуг дујуруг. Бу тәбиидир. Бәс әҝәр биз бу ҹүр мараг ојатмаға чалышараг ешгбазлыг етмәјә башлајырыгса, неҹә? Ола биләр ки, биз өз ҝөзүмүздә бөјүмәк вә ја башга инсанда һиссләр ојатмаг истәјирик. Бәс бу заман башгаларына вердијимиз ағры барәдә дүшүнмүшүкмү? Мәсәлән, Сүлејманын мәсәлләри 13:12 ајәсиндә (МКШ) дејилир: “Ҝеҹикән үмид үрәји хәстәләндирир”. Әҝәр биз дүшүнҹәли шәкилдә киминләсә ешгбазлыг едириксә, еһтимал ки, биз о инсанын бундан өтрү өзүнү неҹә һисс етдијини билмирик. Һәмин инсанда јахын достлуға вә һәтта баш тута биләҹәк никаһа үмид јарана биләр. Бунунла әлагәдар јаранан үмидсизлик чох изтираблы олур (Сүлејманын мәсәлләри 18:14). Биләрәкдән башгаларынын һиссләри илә ојнамаг гәддарлыгдыр.
19. Ешгбазлыг мәсиһчи никаһыүчүн һансы тәһлүкәни јарада биләр?
19 Аиләли инсанларла ешгбазлыг етмәкдән чәкинмәк хүсусилә ваҹибдир. Аиләли олан инсана гаршы романтик мараг бәсләмәк јолверилмәздир вә аиләли инсан да өз әриндән вә ја арвадындан башга һеч кимә бу ҹүр мараг ҝөстәрмәмәлидир. Кәдәрли олса да, бә’зи мәсиһчиләр јанлыш олараг дүшүнүрләр ки, никаһда олмадыглары кәсләрлә ешгбазлыг етмәк мүнасибдир. Ким исә бу ҹүр “доста” ән ҝизли һиссләрини е’тибар едир вә һәтта өз һәјат јолдашына демәдији фикирләри онунла бөлүшүр. Нәтиҹәдә романтик һиссләр никаһы зәифләдән вә һәтта дағыда билән емосионал бағлылыға чеврилир. Никаһда олан мәсиһчиләр Исанын зина һаггындакы мүдрик хәбәрдарлығыны, јә’ни бу һиссин үрәкдә баш галдырдығына даир хәбәрдарлығыны јадда сахламалыдырлар (Матта 5:28). Буна ҝөрә дә ҝәлин үрәјимизи горујаг вә бу ҹүр фаҹиәли һаллара ҝәтириб чыхараҹаг вәзијјәтләрдән гачаг.
20. Әхлаги тәмизлијимизә неҹә јанашмалыјыг?
20 Е’тираф етмәк лазымдыр ки, буҝүнкү әхлагсыз дүнјада әхлаги ҹәһәтдән тәмиз галмаг асан дејил. Лакин јадда сахла ки, әхлаги тәмизлији горујуб сахламаг, ону итириб јенидән әлдә етмәкдән олдугҹа асандыр. Сөзсүз ки, Јеһова ‘бол-бол бағышлаја’ билир вә сәмимијјәтлә өз ҝүнаһларындан төвбә едәнләри тәмизләмәјә гадирдир (Ишаја 55:7). Буна бахмајараг, Јеһова әхлагсызлыг едәнләри, онун нәтиҹәләриндән мүдафиә етмир. Бу нәтиҹәләр өзү барәдә узун илләр вә һәтта өмрү боју хатырлада биләр (2 Самуел 12:9-12). Һәр неҹә олса да, үрәјини горујараг әхлаги ҹәһәтдән тәмиз гал. Јеһованын ҝөзүндә әхлаги тәмизлијини хәзинә кими гијмәтләндир вә ону һеч заман итирмә!
Неҹә ҹаваб верәрдиниз?
• Әхлаги тәмизлик нәдир вә нәјә ҝөрә олдугҹа ваҹибдир?
• Үрәјимизи неҹә горуја биләрик?
• Ҹинси әхлагсызлыгдан чәкинмәк нә демәкдир?
• Ешгбазлыгдан нәјә ҝөрә гачынмалыјыг?
[9-ҹу сәһифәдәки шәкил]
Автомобили лазыми кими идарә етмәјәндә тәһлүкә јарада биләр.
[10-ҹу сәһифәдәки шәкилләр]
Хәбәрдарлыға мәһәл гојмајанда нә баш верә биләр?
[11-ҹи сәһифәдәки шәкил]
Ҝөрүшә чыхан заман тәмизлији горујуб сахлајанлар севинҹ әлдә едир вә Јеһованы иззәтләндирирләр.