Гәлб раһатлығы ахтарышында
АЛБЕРТИН хошбәхт аиләси варды. О, һәјат јолдашы илә бирликдә ики ҝөзәл ушаг бөјүдүрдү. Анҹаг һәјатында нәјинсә чатышмадығыны һисс едирди. Иш ахтардығы бир вахтда, Алберт сијасәтә гошулуб сосиализм идејаларыны гәбул етди. Һәтта Коммунист Партијасынын фәал үзвү олду.
Лакин Албертин коммунизмә бағладығы үмидләри тезликлә боша чыхды. О, сијасәтлә әлагәсини кәсди вә өзүнү бүтөвлүклә аиләсинә һәср етди. Аиләсинин хошбәхтлији һәјатынын јеҝанә мә’насына чеврилди. Лакин дахилиндәки бошлуг һисси Алберти тәрк етмирди, о, әсл гәлб раһатлығына наил ола билмирди.
Албертин кечирдији һиссләр чохларына танышдыр. Һәјатын мә’насыны ахтаран милјонларла инсанлар мүхтәлиф идеоложи, фәлсәфи вә дини нәзәријјәләри сынагдан кечирмишләр. 1960-ҹы илләрдә Гәрбдә јаранан «һиппи» һәрәкаты мөвҹуд олан әхлаги нормалара вә иҹтимаи дәјәрләрә гаршы бир үсјан иди. Бу һәрәкатын идејалары илә мараглананлар хүсусилә дә ҝәнҹ нәслин нүмајәндәләри иди. Онлар хошбәхтлији вә һәјатын мә’насыны биһушедиҹи наркотикләрдә, һәрәкатын лидерләринин вә гуру адланан руһаниләрин фәлсәфи нәзәријјәләриндә ахтарырдылар. Лакин бу шејләрдән һеч бири онлара әсл хошбәхтлик ҝәтирмәди. Әксинә, бу һәрәкат наркотикләрә гуршанмыш вә әхлагсыз һәјат тәрзи сүрән ҝәнҹләрин чохалмасына вә ҹәмијјәтдә әхлаг нормаларынын даһа сүр’әтлә ашағы енмәсинә сәбәб олду.
Әсрләр боју инсанлар хошбәхтлији вар-дөвләтдә, һакимијјәтдә вә ја тәһсилдә ахтармышлар. Анҹаг мә’лум олдуғу кими бу јоллар да мә’јуслуға ҝәтириб чыхарыр. Иса демишдир: «Инсан һәјаты онун вар дөвләтинин чохлуғундан асылы дејилдир» (Лука 12:15). Әксинә, адәтән вар-дөвләт һәрислији бәдбәхтлик ҝәтирир. Мүгәддәс Китабда дејилир: «Варланмаг истәјәнләр исә јолдан чыхыр вә тора дүшүрләр вә инсанлары фәлакәтә вә һәлака апаран бир чох мә’насыз вә зијанвериҹи еһтираслара гапылырлар. Чүнки һәр ҹүр пислијин көкү пулпәрәстликдир. Буна гапылан бә’зиләри... өзләринә бир чох әзаблар чәкдирдиләр» (1 Тимотејә 6:9, 10).
Бәс гәлб раһатлығыны вә һәјатын мә’насыны неҹә тапмаг олар? Сынајыб сәһвләрә јол верәрәкми? Доғруданмы бу гејри-реал бир шејдир? Хошбәхтликдән, бу белә дејил. Нөвбәти мәгаләдән ҝөрәҹәјимиз кими, бу проблемин һәлли јалныз инсанлара хас олан ән ваҹиб тәләбатын өдәнилмәсиндән ибарәтдир.
[3-ҹү сәһифәдәки шәкил]
Вар-дөвләт, һакимијјәт вә ја тәһсил гәлб раһатлығы тапмагда сизә көмәк едәҹәкми?