Гәддар дүнја

ТӘК јашајан 64 јашлы Марија өз евиндә өлү тапылды. О дөјүлмүш вә мәфтиллә боғулуб өлдүрүлмүшдү.

Гәзәбләнмиш издиһам үч полиси ики ушағын оғурланмасында ҝүнаһландырараг дөјдү. Сонра икисинин үстүнә бензин төкүб јандырды. Үчүнҹү полис гачмаға мүвәффәг олду.

Аноним зәнҝ нәтиҹәсиндә түкүрпәдиҹи гәтл һадисәси ашкар олунду. Мә’зунијјәтдә олан дөрд кишинин ҹәсәди бағда торпагдан газылыб чыхарылды. Онларын ҝөзләри вә әлләри бағлы иди. Мејитләр јарыланда ашкар олунду ки, кишиләрин һамысы дири-дири басдырылмышды.

Бу вәһшиликләр зоракылыгла долу горхулу филмләрдән сәһнәләр дејил, олмуш һадисәләрдир вә бу јахынларда бир Латын Америкасы өлкәсиндә чыхан гәзетләрин башлыгларынын әсас мөвзусуну тәшкил едирди. Лакин белә дәһшәтли һадисәләр тәкҹә һәмин өлкәдә баш вермир.

Бу ҝүн гәддарлыг ади һала чеврилиб. Партлајышлар, террор актлары, гәтл һаллары, атышмалар вә зорламалар төрәдилән зоракылығын јалныз кичик бир һиссәсидир. Хәбәрләрдә вәһшиликләрдән о гәдәр данышырлар ки, артыг гәддарлыг һаггында ешитмәк вә ја белә һадисәләри ҝөрмәк инсанлары сарсытмыр.

Ола биләр, сиз чаш-баш галмысыныз: «Бу дүнјаја нә олуб? Доғруданмы башгаларынын һиссләринә вә һәјата һөрмәт тамамилә итиб?» Нә үчүн биз белә дүнјада јашамалыјыг?

Анҹаг инди, ҝәлин, Канадада јашајан 69 јашлы Һаринин нүмунәсинә нәзәр салаг. О өзү хәрчәнҝ, јолдашы исә сәпәләнмиш склероз хәстәлијиндән әзијјәт чәкир. Достлары вә гоншулары һәмишә бу гоҹалара әл тутурлар. Һари дејир: «Онлар бизә көмәк етмәсәјдиләр, һеч билмирәм ахырымыз неҹә оларды». Канадада апарылан арашдырма нәтиҹәсиндә мә’лум олмушдур ки, јашлыларын гајғысына галанларын 50 фаиздән чоху онлара јад олан адамлардыр. Сиз дә хејирхаһ вә меһрибан адамлары танымамыш олмазсыныз. Бәли, инсанлар шәфгәтли вә хејирхаһ ола биләрләр.

Бәс онда нә үчүн вәһшиликләр төрәдилир? Инсанлары гәддарлыға тәһрик едән нәдир? Башгалары илә амансыз даврананлар дәјишилә биләрләрми? Гәддарлығын сону ҝәләҹәкми? Әҝәр ҝәләҹәксә, бу неҹә вә нә заман олаҹаг?

[Иҹазә илә]

Гатар: CORDON PRESS