Гәддарлығын сону ҝәләҹәкми?

ЧОХЛАРЫ разылашарлар ки, дүнјадакы гәддарлығын әсас сәбәби худбинликдир. Онилликләр өнҹә јашајан худбин нәслин сәпдији тохумлардан јалныз өзләрини дүшүнән инсанларын чохлуг тәшкил етдији ҹәмијјәт ҹүҹәрди. Чохлары истәдикләринә наил олмаг үчүн һәр шејә, әксәр һалларда исә гәддарлыға белә әл атырлар. Буну јалныз ајры-ајры инсанлар дејил, бүтөв халглар һаггында да демәк олар.

Инсан һәјаты артыг гијмәтдән дүшүб. Бә’зиләри гәддарлыг етмәкдән һәтта зөвг алыр. Онлар буна әјләнҹә кими бахыр, башгаларына јалныз һәзз алмаг үчүн зәрәр јетирдикләрини е’тираф едән ҹинајәткарлардан хошлары ҝәлир. Бәс зоракылыг вә гәддарлыгла долу филмләри севән милјонларла адамлар һагда нә демәк олар? Кино сәнајеси онларын марағыны ҝөрәрәк белә филмләр чәкир вә јүксәк ҝәлир әлдә едир. Әјләнҹәли верилишләрдә вә хәбәрләрдә гәддарлыг даима ҝөстәрилдији үчүн бир чохлары һиссијјатсыз олмушлар.

Гәддарлыг чох вахт инсана психоложи зәрәр вурур вә онун да башгалары илә ејни ҹүр рәфтар етмәсинә ҝәтириб чыхарыр. Мексика Милли Мүстәгил Университетиндә дәрс дејән Ноеми Диас Маррокин гәддарлыгдан доған зоракылыг һаггында гејд едир: «Инсанлар зоракылыг етмәји өјрәнирләр, бу, мәдәнијјәтимизин бир һиссәсидир... Зоракылыға иҹазә вериләндә вә она тәшвиг едиләндә биз зоракылыг етмәји өјрәнирик». Демәли, чох еһтимал ки, пис рәфтарын гурбаны оланлар башгалары илә өзләринин мә’руз галдығы гәддарлыгла рәфтар едәҹәкләр.

Диҝәр һалларда исә ичкидән вә наркотикдән суи-истифадә едәнләр вәһшилијә јол верә биләрләр. Әһалинин гејдинә галмадығы үчүн һөкумәтдән наразы оланлар һаггында да ејни шеји демәк олар. Онлардан бә’зиләри өз фикирләрини танытмаг мәгсәдилә, чох вахт ҝүнаһсызларын ганы баһасына баша ҝәлән гәддарлыға вә терроризмә әл атырлар.

Сизи бир фикир дә нараһат едә биләр: «Инсанлар гәддарлығы һарадан өјрәнибләр? Һазыркы вәзијјәтин сәбәби нәдәдир?»

Гәддарлығын архасында әслиндә ким дурур?

Мүгәддәс Китаб Шејтан Иблиси «бу әсрин танрысы» адландырараг, онун дүнја үзәриндә ҝүҹлү тә’сирә малик олдуғуну ҝөстәрир (2 Коринфлиләрә 4:4). О, каинатда мөвҹуд олан ән худбин вә гәддар шәхсијјәтдир. Иса, мүнасиб олараг, ону «инсан гатили» вә ‘јаланын атасы’ кими тәсвир етмишди (Јәһја 8:44).

Адәм вә Һәвванын итаәтсизлик јолу тутдуглары вахтдан бәри бәшәријјәт Шејтанын ҝүҹлү тә’сири алтына дүшүб (Јарадылыш 3:1-7, 16-19). Илк инсанларын Јеһоваја арха чевирмәсиндән тәхминән 15 әср сонра үсјанкар мәләкләр јердә инсан кими јашајараг гадынларла ҹинси әлагәјә ҝирдиләр вә онларын Нефилим адланан өвладлары дүнјаја ҝәлди. Нефилимләрин сәҹијјәви хүсусијјәти нә иди? Адлары бу суала ҹаваб верир. Бу ад «башгаларыны вуруб јыхан» демәкдир. Нефилимләр елә гәддарлыг вә позғунлуглар едирдиләр ки, бүтүн бунлара анҹаг Аллаһын ҝөндәрдији Дашгын сон гоја билди (Јарадылыш 6:4, 5, 17, КМ). Онларын һамысы Дашгында гырылса да, аталары ҝөзәҝөрүнмәз ҹинләр кими руһани аләмә гајытдылар (1 Петер 3:19, 20).

Үсјанкар мәләкләрин гәддарлығы Исанын ҝүнләриндә ҹин тутмуш оғланын һадисәсиндән ачыг-ајдын ҝөрүнүр. Ҹин һәр дәфә ушағы тутанда о гыҹ олурду, ҹин ону һәлак етмәк үчүн ҝаһ ода, ҝаһ да суја атырды (Марк 9:17-22). Бәли, ‘пис руһи гүввәләр’ гәддар башчылары Шејтан Иблис кими рәһмсиздирләр (Ефеслиләрә 6:12).

Мүгәддәс Китабын пејғәмбәрлик етдији кими, ҹинләр бизим ҝүнләрдә дә инсанлар арасында гәддарлығы јајмаға давам едирләр: «Ахыр ҝүнләрдә чәтин анлар ҝәләҹәкдир. Чүнки инсанлар худбин,.. ловға, тәкәббүрлү,.. нанкор, гүдсијјәтдән мәһрум, шәфгәтсиз, барышмаз, бөһтанчы, нәфсини сахламајан, азғын, рәһмсиз, јахшылығын дүшмәни, хаин, еһтијатсыз, мәғрур олаҹаг, зөвгү Аллаһдан чох севәҹәк. Аллаһ јолунда имиш кими ҝөрүнәҹәк, амма о јолун гүдрәтини инкар едәҹәкләр» (2 Тимотејә 3:1-5).

Мүгәддәс Китаб пејғәмбәрликләри ҝөстәрир ки, јашадығымыз ҝүнләр хүсусилә чәтиндир, чүнки Иса Мәсиһин башчылыг етдији Аллаһын Падшаһлығы 1914-ҹү илдә гуруланда Шејтан вә онун ҹинләри ҝөјдән говулдулар. Мүгәддәс Китаб бәјан едир: «Јерә вә дәнизә вај олсун! Чүнки иблис, вахтынын аз олдуғуну биләрәк, бөјүк гәзәблә јаныныза енди» (Вәһј 12:5-9, 12).

Бу о демәкдир ки, вәзијјәт һеч ҹүр јахшылаша билмәз? Јухарыда ады чәкилән Диас Маррокинин сөзләринә ҝөрә, инсанлар тәдриҹән хошаҝәлмәз давранышы тәрҝидә биләрләр. Анҹаг Шејтанын бу ҝүн бүтүн дүнјаја тә’сир етдијини нәзәрә алсаг, инсан дүшүнҹә тәрзинә вә давранышына фәргли вә даһа үстүн гүввәнин тә’сир етмәсинә јол вермәсә, чәтин ки зоракылығы тәрҝидә билсин. Бу һансы гүввәдир?

Дәјишилмәк нәјин сајәсиндә мүмкүндүр?

Аллаһын мүгәддәс руһу мөвҹуд олан ән гүдрәтли гүввәдир вә о, ҹинләрин истәнилән тә’сиринә үстүн ҝәлә биләр. О, инсанлар арасында мәһәббәтә вә онларын фираванлығына сәбәб олур. Јеһованы разы салмаг истәјән һәр кәс Онун руһуну алмаг үчүн гәддарлыға охшајан һәрәкәтләрдән дә узаг дурмалыдыр. Бу о демәкдир ки, инсан Аллаһын ирадәсинә ујғун олмаг үчүн өз шәхсијјәтини дәјишдирмәлидир. Бәс Аллаһын ирадәси нәдән ибарәтдир? Бизим үчүн бу, мүмкүн олан гәдәр Аллаһы тәглид етмәкдир. Белә ки, биз инсанлара Аллаһын ҝөзү илә бахмалыјыг (Ефеслиләрә 5:1, 2; Колослулара 3:7-10).

Аллаһын ишләрини өјрәнәндә әмин олаҹагсыныз ки, Јеһова адамлара һеч вахт лагејд јанашмајыб вә онлара, һәтта һејванлара белә мүнасибәтиндә әдаләтсизлијә јол вермәјибa (Ганунун тәкрары 22:10; Мәзмур 36:7; Сүлејманын мәсәлләри 12:10). О, нә гәддарлығы, нә дә гәддарлыг едәнләри гәбул едир (Сүлејманын мәсәлләри 3:31, 32). Јеһованын мәсиһчиләрдән ҝејинмәји тәләб етдији јени мәнлик башгаларыны өзләриндән үстүн сајмаға вә инсанлара һөрмәтлә јанашмаға көмәк едир (Филипилиләрә 2:2-4). Јени мәсиһчи мәнлијини ҝејинән ‘шәфгәтли, хејирхаһ, тәвазөкар, һәлим вә сәбирли’ олур. О, һәмчинин «камил бирлијин бағы олан мәһәббәти» дә тәзаһүр етдирир (Колослулара 3:12-14). Сизҹә, чохлары бурада јазылан кими олмаға ҹан атсајды, дүнја башга ҹүр олмаздымы?

Анҹаг инсанын јахшыја доғру һәмишәлик дәјишилмәси сизин үчүн инанылмаз ола биләр. Ҝәлин бир һәјати нүмунәјә нәзәр салаг. Мартинb ушагларынын ҝөзү гаршында һәмишә арвадынын үстүнә гышгырар, ону бәрк дөјәрди. Бир дәфә вәзијјәт о дәрәҹәдә пис олду ки, ушаглар көмәк үчүн гоншулара гачасы олдулар. Бир нечә илдән сонра онлар Мүгәддәс Китабы Јеһованын Шаһидләри илә аиләви олараг өјрәнмәјә башладылар. Мартин өјрәнди ки, неҹә инсан олмалыдыр вә башгалары илә неҹә рәфтар етмәлидир. О дәјишилә билдими? Онун јолдашы ҹаваб верир: «Әввәлләр әрим өзүндән чыханда тамамилә башга адам олурду. Буна ҝөрә дә, узун мүддәт әрзиндә евимиз дөјүш мејданына бәнзәјиб. Мартинә дәјишилмәјә көмәк етдији үчүн Јеһоваја миннәтдарлығымы билдирмәјә сөз тапа билмирәм. Инди о, гајғыкеш ата вә чох јахшы әрдир».

Бу олмуш һадисәләрдән јалныз биридир. Бүтүн јер үзүндә, Јеһованын Шаһидләри илә Мүгәддәс Китабы өјрәнән милјонларла инсан гәддарлыға сон гојмушдур. Бәли, дәјишилмәк мүмкүндүр.

Тезликлә гәддарлыға сон гојулаҹаг

Артыг ҝөјләрдә гурулмуш, мәрһәмәтли һөкмдар Иса Мәсиһин башчылыг етдији Аллаһын Падшаһлығы јахын заманда бүтүн јер үзүнү идарә едәҹәк. О, артыг ҝөјләри гәддарлығын мәнбәји олан Шејтандан вә онун ҹинләриндән тәмизләјиб. Тезликлә Аллаһын Падшаһлығы өзүнүн јер үзүндәки сүлһсевәр тәбәәләринин бүтүн еһтијаҹларыны өдәјәҹәкдир (Мәзмур 37:10, 11; Јешаја 11:2-5). Јалныз бу Падшаһлыг дүнјанын проблемләрини һәлл едәҹәк. Бәс о вахтаҹан сиз өзүнүз гәддарлығын гурбаны олсаныз, онда неҹә?

Интигам алмағын һеч бир фајдасы јохдур, бу даһа чох гәддарлыг доғураҹаг. Мүгәддәс Китаб бизи Јеһоваја бел бағламаға чағырыр, О өз вахтында ‘һәр кәсә әмәлләринә ҝөрә, ишләринин бәһрәсинә ҝөрә әвәз верәҹәк’ (Јеремја 17:10). («Гәддарлыгла үзләшәндә нә етмәли?» адлы чәрчивәјә бахын.) Бәлкә дә сиз ҹинајәтин гурбаны олдуғунуз үчүн әзијјәт чәкирсиниз (Ваиз 9:11). Анҹаг Аллаһ истәнилән гәддарлығын нәтиҹәләрини, һәтта өлүмү белә арадан галдыра биләр. Онун вә’динә әсасән, вәһшиҹәсинә гәтлә јетириләнләр һәјата гајыдаҹаглар (Јәһја 5:28, 29).

Бахмајараг ки, гәддарлығын гурбаны олмаг тәһлүкәси һәлә дә галмагдадыр, Аллаһла јахын мүнасибәтләр вә Онун вә’дләринә мөһкәм инам бизә тәсәлли верә биләр. Мәсәлән, Сара ики оғлуну атасыз боја-баша чатдырыб, онлара јахшы тәһсил вермишди. Оғуллары гоҹа јашында ону атыб, нә мадди көмәк ҝөстәрдиләр, нә дә хәстә вахтында гајғысына галдылар. Лакин һал-һазырда Јеһованын Шаһиди олан Сара дејир: «Һәрдән мәни гәм-гүссә бүрүјүр, амма Јеһова һеч вахт мәни тәрк етмир. Руһани баҹы-гардашларымын даима гајғыма галмасында Онун көмәјини ҝөрүрәм. Мән әминәм ки, Аллаһ тезликлә јалныз мәним јох, гүввәсинә бел бағлајан вә әмрләринә риајәт едән бүтүн инсанларын проблемләрини һәлл едәҹәк».

Саранын һаггында данышдығы руһани баҹы-гардашлар кимләрдир? Онлар Саранын һәмиманлылары, Јеһованын Шаһидләридир. Үмумдүнја гардашлығы тәшкил едән бу мәрһәмәтли инсанлар мөһкәм инанырлар ки, тезликлә гәддарлығын сону ҝәләҹәк (1 Петер 2:17). Нә гәддарлыға ҝөрә әсас мәс’улијјәти дашыјан Шејтан Иблис, нә дә онун кими давранан инсанлар сағ галаҹаглар. Бир јазычынын «залым ера» адландырдығы бу дөвр кечмишдә галаҹаг. Нә үчүн Јеһованын Шаһидләри илә әлагә сахлајараг бу үмид һаггында даһа чох өјрәнмәјәсиниз?

[Һашијәләр]

[6-ҹы сәһифәдәки чәрчивә]

Гәддарлыгла үзләшәндә нә етмәли?

Аллаһын Кәламы гәддарлыгла үзләшәндә нә етмәли олдуғумуза даир мәсләһәтләр верир. Бу һикмәтли кәламлары неҹә тәтбиг едә биләҹәјиниз үзәриндә дүшүнүн:

«Демә “бу пислијин әвәзини чыхаҹағам” Рәбби ҝөзлә, гој О сәни хилас етсин» (Сүлејманын мәсәлләри 20:22).

«Әҝәр ҝөрүрсән ки... јохсуллара зүлм едилир, әдаләт вә салеһлик ајаг алтында тапдаланыр, ҝөрдүјүнә тәәҹҹүб етмә. Чүнки һәр вәзифә саһибинә өзүндән јухарыда бир нәзарәтчи гојулуб» (Ваиз 5:8).

«Һәлимләр нә бәхтијардырлар! Чүнки јери мирас алаҹаглар» (Матта 5:5).

«Буна ҝөрә, инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един» (Матта 7:12).

«Һеч кимә пислик әвәзинә пислик етмәјин, лакин бүтүн инсанларын гаршысында јахшы шејләрә диггәт јетирин. Мүмкүнсә, әлиниздән ҝәлдији гәдәр бүтүн адамларла сүлһдә олун. Еј севимлиләр, гисас алмајын, анҹаг Аллаһын гәзәбинә јол верин. Чүнки јазылмышдыр: “Рәбб дејир: Гисас Мәнимдир, әвәзини Мән верәҹәјәм”» (Ромалылара 12:17-19).

«Мәсиһ дә бизә бир нүмунә гојараг, бизим үчүн изтираб чәкди ки, биз Онун изләри илә ҝедәк... Сөјүләркән, ҹавабында сөјмәди; әзаб чәкәркән, тәһдид етмәди, әксинә әдаләтлә мүһакимә Едәнә Өзүнү тәслим етди» (1 Петер 2:21-23).

[7-ҹи сәһифәдәки шәкилләр]

Јеһова чохларына гәддарлыгдан әл чәкмәји өјрәдиб.