Аллаһын сөзү һеч вахт боша чыхмыр
«Аллаһыныз Рәббин һаггынызда дедији бүтүн јахшы шејләрдән һеч бири боша чыхмады. Һамысы сизин үчүн јеринә јетди» (ЈЕШУА 23:14).
1. Јешуа ким иди вә өмрүнүн сонуна јахын нә етди?
О, ШҮҸАӘТЛИ вә горхмаз сәркәрдә, мөһкәм имана саһиб олан нөгсансыз адам иди. О, Мусанын сағ әли олмуш вә Јеһова ону Исраил халгыны горхунҹ сәһрадан сүд вә бал ахан дијара кечирмәк үчүн сечмишди. Халгын дәрин еһтирамыны газанмыш бу адам — Јешуа өмрүнүн сонуна јахын Исраилин ағсаггаллары гаршысында тә’сирли сон нитгини сөјләди. Шүбһә јохдур ки, Јешуанын сөзләри ону динләјәнләрин иманыны мөһкәмләндирди. Онун сөзләри сәнин дә иманына ҝүҹлү тә’сир едә биләр.
2, 3. Јешуа исраилли ағсаггалларла данышанда Исраилдә вәзијјәт неҹә иди вә о нә деди?
2 О заман Исраилдә олан вәзијјәти тәсәввүр ет: «Рәбб Исраиллиләрә һәр тәрәфдән дүшмәнләриндән әмин-аманлыг верәндән сонра узун мүддәт кечди. Артыг Јешуа гоҹалыб јаша долмушду. О бүтүн Исраили, ағсаггаллары, башчылары, һакимләри вә мә’мурлары чағырды вә онлара деди: “Мән гоҹалмышам, јашым чохдур”» (Јешуа 23:1, 2).
3 Јүз он јашына чатмыш Јешуа Аллаһын халгынын тарихинин ән һәјәҹанлы дөврләриндән бириндә јашамышды. О, Јеһованын мөһтәшәм ишләринин вә бир чох вә’дләринин јеринә јетмәсинин ҹанлы шаһиди олмушду. Буна ҝөрә дә, шәхси тәҹрүбәсинә әсасланараг әминликлә деди: «Бүтүн гәлбинизлә вә варлығынызла билирсиниз ки, Аллаһыныз Рәббин һаггынызда дедији бүтүн јахшы шејләрдән һеч бири боша чыхмады. Һамысы сизин үчүн јеринә јетди. Онун сөзләриндән һеч бири боша чыхмады» (Јешуа 23:14).
4. Јеһова исраиллиләрә һансы вә’дләри вермишди?
4 Јешуанын ҝүнләриндә Јеһованын һансы сөзләри јеринә јетди? Бу мәгаләдә Јеһованын исраиллиләрә вердији үч вә’ди нәзәрдән кечирәҹәјик. Аллаһ вә’д етмишди ки, биринҹиси, онлары көләликдән гуртараҹаг, икинҹиси, онлары мүдафиә едәҹәк, үчүнҹүсү исә, онларын гајғысына галаҹаг. Јеһова мүасир халгына да буна бәнзәр вә’дләр вермишдир вә биз һәјатымыз боју онларын јеринә јетдијини мүшаһидә едирик. Јеһованын бизим дөврдә нәләр етдијини мүзакирә етмәздән әввәл, ҝәлин Јешуанын ҝүнләринә нәзәр салаг.
Јеһова Өз халгыны гуртарыр
5, 6. Јеһова исраиллиләри Мисир көләлијиндән неҹә гуртарды вә бу һадисә нәји ҝөстәрди?
5 Мисир көләлијиндә әзаб чәкән исраиллиләр фәрјад едәндә Јеһова онлара нәзәр салды (Чыхыш 2:23-25). Јеһова јанан колун ортасындан Мусаја деди: «Мән она ҝөрә ҝәлдим ки, онлары [халгымы] Мисирлиләрин әлиндән гуртарыб бу өлкәдән чыхарым вә ҝениш, не’мәтли бир дијара, сүд вә бал ахан торпаға... апарым» (Чыхыш 3:8). Јеһованын бу вә’динин јеринә јетмәсини мүшаһидә етмәк неҹә дә мараглы иди! Фир’он исраиллиләри бурахмагдан имтина едәндә Муса она билдирди ки, Аллаһ Нил чајыны гана чевирәҹәк. Јеһованын сөзү боша чыхмады. Нил чајынын сулары гана дөндү, ичиндәки бүтүн балыглар тәләф олду вә чајын сујуну ичмәк мүмкүн дејилди (Чыхыш 7:14-21). Лакин фир’он тәрслијиндән дөнмәди. Јеһова, һәр бирини габагҹадан тәсвир едәрәк, даһа доггуз бәла ҝөндәрди (Чыхыш 8-12 фәсилләр). Мисир торпағында олан бүтүн илкинләрин өлүмү илә нәтиҹәләнән онунҹу бәладан сонра фир’он исраиллиләрә өлкәни тәрк етмәји әмр етди. Исраиллиләр тәләм-тәләсик јығышыб Мисирдән чыхдылар! (Чыхыш 12:29-32).
6 Исраиллиләр Мисир көләлијиндән гуртардыгдан сонра Јеһованын сечилмиш халгы олдулар. Бу, Јеһованы вә’дләрини јеринә јетирән, сөзү һеч вахт боша чыхмајан вә бүтүн милләтләрин танрыларындан үстүн олан бир Аллаһ кими уҹалтды. Исраиллиләрин гуртулушу барәдә охујанда иманымыз һәгигәтән дә мөһкәмләнир. Бу һадисәләри јашамағын нә демәк олдуғуну бир тәсәввүрүнә ҝәтир! Јешуа анлады ки, ‘бүтүн јер үзүндә Һагг-Таала’ јалныз Јеһовадыр (Мәзмур 83:18).
Јеһова халгыны мүдафиә едир
7. Јеһова исраиллиләри фир’онун ордусундан неҹә мүдафиә етди?
7 Бәс Јеһованын икинҹи — халгыны мүдафиә едәҹәји вә’ди һаггында нә демәк олар? Јеһова халгыны Мисирдән чыхарыб Вә’д едилмиш дијара ҝәтирәҹәјини дејәндә онлары мүдафиә едәҹәјини дә нәзәрдә тутмушду. Гәзәбләнмиш фир’онун јүзләрлә дөјүш арабасы илә тәҹһиз олунмуш гүдрәтли ордусуну ҝөтүрүб исраиллиләрин далынҹа дүшдүјүнү хатырла. Өзүндән чох разы олан бу тәкәббүрлү адам исраиллиләрин дағла дәниз арасында тәләјә дүшдүјүнү дүшүнәндә даһа да гүрурланды! Амма Аллаһ о андаҹа мүдахилә етди вә фир’онун ордусу илә исраиллиләрин дүшәрҝәси арасына булуд гојмагла халгыны мүдафиә етди. Мисирлиләрин тәрәфи гаранлыг, исраиллиләринки исә ишыглы иди. Булуд мисирлиләри о бири тәрәфә кечмәјә гојмурду. Бу заман Муса өз әсасыны галдырды вә Гырмызы дәнизин сулары араланды. Әмәлә ҝәлмиш јол исраиллиләр үчүн гуртулуш, мисирлиләр үчүн исә тәлә олду. Јеһова фир’онун ҝүҹлү ордусуну тамамилә мәһв етди вә халгынын мәғлуб олмасына јол вермәди (Чыхыш 14:19-28).
8. Јеһова исраиллиләри а) сәһрада, б) Вә’д едилмиш дијара дахил оланда неҹә мүдафиә етмишди?
8 Исраиллиләр Гырмызы дәнизи кечәндән сонра ‘бөјүк вә горхунҹ, зәһәрли илан вә әгрәбләрлә долу олан сусуз шоран торпаг’ кими тәсвир олунан сәһрада долашырдылар (Ганунун тәкрары 8:15). Јеһова бурада да халгыны мүдафиә едирди. Бәс онлар Вә’д едилмиш дијара дахил оланда неҹә? Ҝүҹлү Кән’ан ордулары онлара гаршы чыхды. Амма Јеһова Јешуаја деди: «Галх, сән вә бүтүн бу халг Иордан чајыны кечиб Исраил өвладларына верәҹәјим торпаға ҝедин... Бүтүн өмрүн боју һеч кәс сәнә гаршы чыха билмәјәҹәк. Муса илә олдуғум кими сәнинлә дә олаҹағам, сәни атмајаҹағам вә тәрк етмәјәҹәјәм» (Јешуа 1:2, 5). Јеһованын бу сөзләри боша чыхмады. Тәхминән алты ил әрзиндә Јешуа 31 падшаһы мәғлуб етди вә Вә’д едилмиш дијарын бөјүк һиссәсини истила етди (Јешуа 12:7-24). Јеһова онлары мүдафиә етмәсәјди, бу мүмкүн олмазды.
Јеһова халгынын гајғысына галыр
9, 10. Јеһова сәһрада халгынын гајғысына неҹә галырды?
9 Инди исә ҝәлин Јеһованын үчүнҹү вә’динә — халгынын гајғысына галаҹағы вә’динә бахаг. Мисирдән азад едилдикдән бир гәдәр сонра Аллаһ исраиллиләрә деди: «Будур, Мән сизин үчүн ҝөјдән чөрәк јағдыраҹағам. Гој халг һәр ҝүн чыхыб лазыми мигдарда о чөрәји јығсын». Аллаһ дедији кими дә етди: онлара «ҝөјдән чөрәк» јағдырды. «Исраиллиләр буну ҝөрдүкдә бир-биринә “Бу нәдир?” дедиләр». Бу, Јеһованын онлара вә’д етдији чөрәк — манна иди (Чыхыш 16:4, 13-15).
10 Исраиллиләрин сәһрада долашдығы 40 ил әрзиндә Јеһова онлары су вә чөрәклә тә’мин етмәклә гајғыларына галырды. Јеһова һәм дә елә етди ки, бу илләр әрзиндә онларын палтарлары јыртылмады вә ајаглары шишмәди (Ганунун тәкрары 8:3, 4). Јешуа бүтүн бунларын ҹанлы шаһиди олмушду. Јеһова вә’д етдији кими, халгыны гуртарды, мүдафиә етди вә гајғысына галды.
Бизим ҝүнләрдә гуртулуш
11. Бруклиндәки Бет-Елдә 1914-ҹү илин октјабрында һансы е’лан сәсләнди вә бу нә демәк иди?
11 Бәс бизим ҝүнләр һаггында нә демәк олар? 1914-ҹү ил октјабрын 2-дә, ҹүмә ҝүнү, о вахтлар Мүгәддәс Китаб Тәдгигатчыларына рәһбәрлик едән Чарлз Тејз Рассел Бет-Елин (Бруклин, Нју–Јорк) јемәкханасына дахил олуб, һамыны севинҹлә саламлады вә јерини тутмаздан әввәл е’лан етди: «Диҝәр халгларын вахты тамам олду; онларын падшаһларынын вахтына аз галыб». Јенә дә Каинатын Һөкмдары Јеһованын Өз халгыны гуртармаг вахты ҝәлди. Вә О буну етди!
12. Јеһова 1919-ҹу илдә халгыны нәдән азад етди вә бунун нәтиҹәси нә олду?
12 Елә беш илдән сонра Јеһова халгыны ‘Бөјүк Бабилдән’, јалан динин гүдрәтли дүнја империјасындан азад етди (Вәһј 18:2). Арамызда һәјәҹан долу бу гуртулушу ҝөрәнләр чох аздыр. Лакин онун нәтиҹәләрини һамымыз ајдын ҝөрүрүк. Јеһова тәмиз ибадәти бәрпа етди вә Она ибадәт етмәк арзусунда оланлары бирләшдирди. Бу, Јешаја пејғәмбәр васитәсилә габагҹадан сөјләнилмишдир: «Сон ҝүнләрдә Рәббин еви олан дағ дағларын зирвәсиндә мөһкәм дураҹаг, тәпәләрдән јухары уҹалаҹаг. Бүтүн милләтләр она сары ҝәләҹәк» (Јешаја 2:2).
13. Сән Јеһованын халгы арасында һансы артымы мүшаһидә етмисән?
13 Јешајанын пејғәмбәрлији јеринә јетди. 1919-ҹу илдә мәсһ олунмуш галыг һәгиги Аллаһа ибадәти зирвәләрә галдыран үмумдүнја тәблиғ кампанијасына ҹәсарәтлә башлады. 1930-ҹу илләрдә ајдын олду ки, ‘башга гојунлар’ да һәгиги ибадәтә дә’вәт олунублар (Јәһја 10:16). Башланғыҹда минләрлә, сонра јүз минләрлә, инди исә милјонларла инсан һәгиги ибадәти дәстәкләјир! Һәвари Јәһјаја верилән вәһјдә онлар «һәр милләтдән, бүтүн гәбиләләрдән, халглардан вә дилләрдән олан, кимсәнин сајмаға гадир олмадығы бөјүк бир издиһам» кими тәсвир олунур (Вәһј 7:9). Бәс сән өзүн нәләрин шаһиди олмусан? Һәгигәтә ҝәләндә јер үзүндә нә гәдәр Јеһованын Шаһиди варды? Бу ҝүн Јеһоваја хидмәт едәнләрин сајы 6 700 000-и өтүб кечир. Халгыны Бөјүк Бабилдән гуртармагла Аллаһ һал-һазырда дүнја мигјасында севинҹлә мүшаһидә етдијимиз артыма јол ачды.
14. Бизи габагда һәлә һансы гуртулуш ҝөзләјир?
14 Лакин гаршыда бизи башга бир гуртулуш ҝөзләјир вә онун јер үзүндә јашајан һәр бир инсана аидијјәти олаҹаг. Јеһова мөһтәшәм гүввәсини нүмајиш етдирәрәк Она гаршы чыханларын һамысыны јер үзүндән јох едәҹәк вә хидмәтчиләрини азад едиб онлары салеһлијин һөкм сүрәҹәји јени дүнјаја ҝәтирәҹәк. Пислијин сонуну вә бүтүн бәшәр тарихинин ән парлаг дөврүнүн башланғыҹыны ҝөрмәк неҹә дә севиндириҹи олаҹаг! (Вәһј 21:1-4).
Јеһова инди дә халгыны мүдафиә едир
15. Нәјә ҝөрә инди дә Јеһованын мүдафиәсинә еһтијаҹымыз вар?
15 Ҝөрдүјүмүз кими, Јешуанын дөврүндә јашамыш исраиллиләрин Јеһованын мүдафиәсинә еһтијаҹлары варды. Бәс Јеһованын мүасир халгынын Онун мүдафиәсинә еһтијаҹы вармы? Сөзсүз ки! Иса давамчыларына хәбәрдарлыг етмишди: «О заман сизә әзијјәт вериб өлдүрәҹәкләр; вә Мәним адыма ҝөрә бүтүн халглар сизә нифрәт едәҹәкләр» (Матта 24:9). Бир сыра өлкәләрдә Јеһованын Шаһидләри илләр бојунҹа шиддәтли мүгавимәтләрә вә тә’гибләрә мә’руз галмышлар. Амма Јеһованын Өз халгына дајаг олдуғу ҝөз габағындадыр (Ромалылара 8:31). Јеһова Кәламы васитәсилә әмин едир ки, бизә «гаршы ишләнән һеч бир силаһ» тәблиғ вә шаҝирдләр һазырламаг ишимизи дајандыра билмәјәҹәк (Јешаја 54:17).
16. Јеһованын халгыны мүдафиә етдијинә нәјин әсасында әмин олмусан?
16 Дүнјанын нифрәтинә бахмајараг, Јеһованын хидмәтчиләринин сајы ҝүндән-ҝүнә артыр. Јеһованын Шаһидләри 236 өлкә вә әразидә фәалијјәт ҝөстәрирләр. Бу, һәгигәтән ҝөстәрир ки, бизи мәһв етмәк, јахуд сусдурмаг истәјәнләрдән мүдафиә етмәк үчүн Јеһова бизимләдир. Вахтилә Аллаһын халгыны шиддәтлә тә’гиб едән гүдрәтли сијасәтчиләрин вә ја дин хадимләринин адларыны јада сала биләрсәнми? Онларла нә баш вериб? Инди һарададырлар? Мусанын вә Јешуанын ҝүнләриндәки фир’он кими, бу адамларын чоху артыг јохдур. Бәс өләнәдәк садиг галан Аллаһын мүасир хидмәтчиләри һагда нә демәк олар? Онлар Јеһованын јаддашындадырлар. Бундан тәһлүкәсиз јер исә ола билмәз. Бәли, Јеһованын Өз халгыны мүдафиә едәҹәји барәдә вә’ди боша чыхмады.
Јеһова бу ҝүн дә халгынын гајғысына галыр
17. Јеһова руһани гидаја даир бизә нә вә’д едиб?
17 Јеһова сәһрада халгынын гајғысына галырды, елә бу ҝүн дә О буну едир. «Садиг вә ағыллы гул» бизи руһани гида илә тә’мин едир (Матта 24:45). Биз әсирләр әрзиндә ҝизли галан руһани һәгигәтләр һаггында билик алырыг. Мәләк Даниел пејғәмбәрә демишди: «Ахыр замана гәдәр бу сөзләри сирр сахла вә бу китабы мөһүрлә. Чох адам өзүнү ора-бура вураҹаг вә билик артаҹаг» (Даниел 12:4).
18. Нәјә ҝөрә дејә биләрик ки, һәгиги билик бизим ҝүнләрдә артыб?
18 Биз һал-һазырда ахыр ҝүнләрдә јашајырыг вә һәгиги билик һәгигәтән дә артыб. Бүтүн дүнјада мүгәддәс руһ һәгигәти севән инсанлары һәгиги Аллаһ вә Онун нијјәтләри һаггында дәгиг билијә јөнәлдиб. Мүгәддәс Китаб вә онун гијмәтли һәгигәтләрини баша дүшмәкдә көмәк едән әдәбијјатлар бүтүн дүнјада ҝениш јајылыб. Мүгәддәс Китаб өјрәнмәләри апармаг үчүн нәзәрдә тутулан «Мүгәддәс Китаб әслиндә нә өјрәдир?»a нәшринин мүндәриҹатына бир нәзәр јетирин. Орада «Аллаһ һаггында һәгигәт», «Өләнләр һарададырлар?», «Аллаһын Падшаһлығы нәдир?» вә «Аллаһ әзаблара нә үчүн јол верир?» кими фәсилләр вар. Инсанлар мин илләрдир ки, бу кими суаллара ҹаваб ахтарырлар. Амма онлара ҹаваб тапмаг елә дә чәтин дејил. Мүгәддәс Китаб һәгигәтләри әсрләр әрзиндә инсанлардан ҝизли сахланылырды вә дөнүк Христиан дүнјасы онлара јаланы өјрәдирди. Лакин Аллаһын Кәламы Јеһоваја хидмәт етмәк истәјәнләри мөһкәмләндирәрәк зәфәр чалды.
19. Сән Аллаһын һансы вә’дләринин јеринә јетмәсини ҝөрмүсән вә бундан һансы нәтиҹәјә ҝәлмисән?
19 Бәли, өз ҝөзләримизлә ҝөрдүјүмүз һадисәләри нәзәрә алараг биз дејә биләрик: «Аллаһыныз Рәббин һаггынызда дедији бүтүн јахшы шејләрдән һеч бири боша чыхмады. Һамысы сизин үчүн јеринә јетди. Онун сөзләриндән һеч бири боша чыхмады» (Јешуа 23:14). Јеһова хидмәтчиләрини гуртарыр, мүдафиә едир вә онларын гајғысына галыр. Сән Аллаһын елә бир вә’дини дејә биләрсәнми ки, о өз вахтында јеринә јетмәсин? Бу мүмкүн дејил. Биз Аллаһын Кәламынын доғрулуғуна шүбһә етмирик.
20. Биз нәјә ҝөрә ҝәләҹәјә инамла баха биләрик?
20 Бәс ҝәләҹәк һаггында нә демәк олар? Јеһова бизә дејиб ки, әксәријјәтимиз ҝөзәл Ҹәннәтә чеврилмиш јер үзүндә јашамаға үмид едә биләрик. Бизләрдән чох аз адам Мәсиһлә ҝөјләрдә падшаһлыг етмәк үмидинә маликдир. Үмидимиз нә олурса-олсун, бизим дә Јешуа кими садиг галмаға тутарлы сәбәбләримиз вардыр. Ҝүн ҝәләҹәк ки, үмидләримиз ҝерчәкләшәҹәк. Онда биз ҝеријә бојланыб Јеһованын бүтүн вә’дләринә нәзәр салараг дејәҹәјик: «Һамысы... јеринә јетди».
[Һашијә]
a Јеһованын Шаһидләри тәрәфиндән дәрҹ олунуб.
Изаһ едә биләрсинизми?
• Јешуа Јеһованын һансы вә’дләринин јеринә јетдијини ҝөрдү?
• Сән Аллаһын һансы вә’дләринин јеринә јетдијини ҝөрмүсән?
• Аллаһын сөзүнә даир һамымыз нәјә әмин ола биләрик?
[25-ҹи сәһифәдәки шәкил]
Јеһова халгыны гуртармаг үчүн мүдахилә етди.
[25-ҹи сәһифәдәки шәкил]
Јеһова халгыны Гырмызы дәниздә неҹә мүдафиә етди?
[26-ҹы сәһифәдәки шәкил]
Јеһова инди дә халгынын гајғысына галыр.