Исраиллиләрин сәһвләриндән ибрәт алаг
ИСРАИЛЛИЛӘР Вәд едилмиш дијара дахил оланда Јеһованын онлардан нә ҝөзләдијини билирдиләр. Аллаһ Муса васитәсилә әмр етмишди: «Өлкәдә јашајан бүтүн әһалини говун. Ојма дашларынын, төкмә бүтләринин һамысыны јох един. Онларын сәҹдәҝаһларынын јерләринин һамысыны дағыдын» (Сај. 33:52).
Исраил халгы һәмин дијарын сакинләри илә нә әһд бағламалы, нә дә онларла аилә гурмалы иди (Ганун. т. 7:2, 3). Аллаһын сечилмиш халгына һәтта хәбәрдарлыг едилмишди: «Өзүнүзү ҝирдијиниз торпағын сакинләри илә әһд кәсмәкдән ҝөзләјин ки, о сизә бир тәлә олмасын» (Чых. 34:12). Буна бахмајараг, исраиллиләр Аллаһа гулаг асмадылар вә тәләјә дүшдүләр. Онларын фәлакәтинә нә сәбәб олду вә бундан өзүмүзә һансы ваҹиб дәрси ҝөтүрә биләрик? (1 Кор. 10:11).
Јахын үнсијјәтдән бүтпәрәстлијә
Исраиллиләрин Вәд едилмиш дијары әлә кечирмәләри оранын сакинләри үзәриндә илк гәләбә иди. Амма Исраил оғуллары Аллаһын әмрләринә там әмәл етмәдиләр. Онлар дүшмәнләри говмадылар (Һак. 1:1–2:10). Әксинә, бу дијардакы ‘једди милләтин’ арасында јашајан исраиллиләрин онларла мүнтәзәм үнсијјәтдә олмалары һәмин милләтләрлә достлуг мүнасибәтинин јаранмасына сәбәб олду (Ганун. т. 7:1). Бу, исраиллиләрә неҹә тәсир етди? Мүгәддәс Китабда дејилир: «Исраил өвладлары онларын гызларындан өзләринә арвад алды, өз гызларыны да онларын оғулларына верди вә онларын аллаһларына ситајиш етди. Беләликлә, Исраил өвладлары Рәббин ҝөзүндә пис олан ишләр ҝөрдүләр. Онлар өз Аллаһы Рәбби унудараг Баал вә Ашера бүтләринә ситајиш етдиләр» (Һак. 3:5-7). Бир гәдәр вахтдан сонра исраиллиләр бу дијарын сакинләри илә аилә гурмаға вә бүтләринә ситајиш етмәјә башладылар. Гарышыг никаһларын сајынын артмасы бүтпәрәст халгларын бу дијардан говулмаг еһтималыны азалдырды. Һәгиги ибадәт мурдарланмышды вә исраиллиләрин өзләри јаланчы аллаһлара ибадәт етмәјә башладылар.
Вәд едилмиш дијарын сакинләринин Исраил халгына дост олмалары дүшмән олдуглары вахтдан даһа чох тәһлүкәли иди, чүнки белә достлуг исраиллиләрин Јеһова илә мүнасибәтләринә вә дүшүнҹә тәрзинә пис тәсир едирди. Ҝәлин ҝөрәк һәгиги ибадәтин мурдарланмасына даһа нә сәбәб ола биләрди?
Әкинчиликдән Баала ибадәтә доғру
Исраил оғуллары Вәд едилмиш дијара дахил оландан сонра көчәри һәјат тәрзинә сон гојдулар вә чохлары әкинчиликлә мәшғул олмаға башлады. Еһтимал ки, онларын истифадә етдији әкинчилик үсуллары кәнанлыларын әкинчилик үсуллары илә ејни иди. Ҝөрүнүр, исраиллиләр кәнанлыларын садәҹә әкинчилик үсулларыны мәнимсәмәклә кифајәтләнмәдиләр. Исраиллиләрин јерли сакинләрлә јахын үнсијјәти онларын әкинчиликлә бағлы дини етигадларынын мәнимсәмәләринә ҝәтириб чыхарды.
Кәнанлылар торпағы мәһсулдар едән мүхтәлиф Баалларын олдуғуна инанараг онлара ибадәт едирдиләр. Әкин-бичинлә мәшғул олан исраиллиләр дә бир мүддәтдән сонра буна инаныб, Кәнан аллаһларына ибадәт етмәјә башладылар. Бир чох исраиллиләр өзләрини Јеһованын хидмәтчиләри кими гәләмә версәләр дә, әслиндә тамамилә дөнүклүјә гәрг олунмушдулар.
Бизим үчүн чәкиндириҹи нүмунә
Исраиллиләр Вәд едилмиш дијарын сакинләри илә үнсијјәт етмәјә башлајанда, чәтин ки, онларын нијјәти Баала ибадәт етмәк вә ијрәнҹ дини ајинләрә гошулмаг иди. Амма онларла үнсијјәт мәһз бунлара сәбәб олду. Бәс бизә достҹасына јанашан, лакин иманымыза, мәнәви дәјәрләримизә вә принсипләримизә шәрик олмајан инсанларла јахын үнсијјәт етдикдә бу кими позуҹу тәсирә мәруз галаҹағымызы ҝөзләмәли дејиликми? Сөзсүз, бәзән иш јериндә, мәктәбдә вә ола билсин, һәтта евдә иманымыза шәрик олмајан адамларла тәмасда олмаг лазым ҝәлир. Анҹаг исраиллиләрин нүмунәси бизи хәбәрдар едир ки, белә инсанларла үнсијјәт ахтармаг, өз башымызы бәлаја салмаг кимидир. Аллаһын Кәламында белә бир дәјишмәз һәгигәт јазылыб: «Пис достлуг јахшы әхлагы позар» (1 Кор. 15:33).
Бу ҝүн бизим гаршылашдығымыз бир чох чәтинликләр исраиллиләринкинә охшајыр. Мүасир ҹәмијјәтдә бир чох «бүтләр» вар. Мәсәлән, пул, шоу-бизнес вә идман улдузлары, сијаси системләр, бәзи дини рәһбәрләр вә һәтта аилә үзвләри. Бунлардан һансынынса һәјатымызда ваҹиб јер тута билмәси еһтималы вар. Јеһованы севмәјән инсанларла достлуг етсәк, нәтиҹәдә руһани тәнәззүлә уғраја биләрик.
Баала ибадәтин ајрылмаз һиссәси олан әхлагсызлыг бир чох исраиллиләри өзүнә ҹәлб едиб тәләјә салмышды. Бизим ҝүнләрдә дә Аллаһын бәзи хидмәтчиләри белә тәләләрә дүшмүшләр. Мәсәлән, тәкликдә оланда компүтерин сичанынын дүјмәсинә бир дәфә басмаг кифајәтдир ки, һәр шеји билмәк истәјән вә ја еһтијатсыз инсанын тәмиз виҹданы ләкәләнсин. Мәсиһчинин Интернетдә порнографијаја алудә олмасы неҹә дә кәдәрли оларды!
«Нә бәхтијардыр Онун өјүдләринә әмәл едәнләр»
Дост сечмәк мәсәләсиндә Јеһоваја итаәт едиб-етмәмәјә өзүмүз гәрар веририк (Ганун. т. 30:19, 20). Буна ҝөрә дә өзүмүздән сорушмалыјыг: «Асудә вахтымы кимләрлә кечирирәм? Онлар Аллаһын ганунларына вә әхлаг нормаларына неҹә јанашырлар? Бу инсанлар Јеһоваја ибадәт едирләрми? Онларла үнсијјәтдә олмаг мәни мәсиһчи кими пүхтәләшмәјә тәшвиг едирми?»
Мәзмурчу охујурду: «Нә бәхтијардыр өз јолунда камил оланлар, Рәббин ганунуна ҝөрә јашајанлар. Нә бәхтијардыр Онун өјүдләринә әмәл едәнләр, бүтүн гәлби илә Ону ахтаранлар» (Мәз. 119:1, 2). Бәли, Јеһовадан «горхан, Онун јоллары илә ҝедән инсан» һәгигәтән дә бәхтијардыр (Мәз. 128:1). Кимләрлә үнсијјәт етдијимизи сечәндә, ҝәлин исраиллиләрин чәкиндириҹи нүмунәсиндән ибрәт алаг вә Јеһоваја там итаәт едәк (Сүл. мәс. 13:20).
[26-ҹы сәһифәдәки шәкил]
Јеһованы севмәјән инсанларла јахын үнсијјәт бизи бүтпәрәстлијә чәкә биләр