Австралијадан ҝәлән мәктуб

«Бу ахшам оҹағын гырағында отуруб буну охујаҹағам»

АВСТРАЛИЈАНЫН әһалиси аз олан јерләриндән сөз дүшәндә инсанын ағлына гызмар сәһралар, дөзүлмәз истиләр вә уҹсуз-буҹагсыз бош әразиләр ҝәлир. Бунунла белә, һәмин әразиләрдә тәхминән 180 000 адам јашајыр ки, бу да әһалинин тәхминән 1 фаизини тәшкил едир.

Јеһованын Шаһидләри олан валидејнләрим бу әразиләрә тәблиғ етмәјә ҝедәндә мәни дә өзләри илә апарырдылар. О јерләрин бөјүклүјү вә тәкраролунмаз ҝөзәллији мәни һејрәтләндирирди. Мән һәмчинин оранын дөзүмлү вә меһрибан сакинләрини севдим. Инди мәним өз аиләм вар. Мән истәдим ки, арвадымын вә 10, 12 јашларында олан ики ушағымын да ејни тәәссүраты олсун.

Сәјаһәтә һазырлыг

Биз илк нөвбәдә отуруб мәсрәфләри һесабладыг. Нә гәдәр узаг мәсафәјә ҝедә биләрик? Сәјаһәтимиз нечә ҝүн чәкәҹәк? Јығынҹағымыздан бир әр-арвад вә ики таммүддәтли хидмәтчи бизимлә ҝетмәк истәди. Биз илин ортасында — ушаглар тәтилә чыханда ҝетмәји гәрара алдыг. Сонра Јеһованын Шаһидләринин Австралијанын Сиднеј шәһәриндәки филиалына јаздыг ки, бизә тәблиғ үчүн әрази версинләр. Бизә Гундивиндинин јахынлығында, јашадығымыз Брисбендән 400 километр гәрбдә јерләшән кичик шәһәрдә тәблиғ етмәји тәклиф етдиләр.

Гундивиндидә Јеһованын Шаһидләринин кичик јығынҹағы олдуғуну биләндә чох севиндик. Мәсиһчи баҹы-гардашларымызла ҝөрүшү сәбирсизликлә ҝөзләјирдик. Һәмин јығынҹагла әлагә јарадыб ораја ҝәләҹәјимиз барәдә хәбәр вердик. Онлар бизи севинҹлә ҝөзләјәҹәкләрини билдирдиләр.

Јола дүшмәздән бир гәдәр әввәл, јығышыб Аллаһын Падшаһлығы һаггында хош хәбәри һәмин әразидә неҹә тәблиғ едәҹәјимизи мүзакирә етдик. Хүсусилә дә гаршымыза чыхаҹаг абориҝенләрин (јерли сакинләрин) мәдәнијјәт вә адәт-әнәнәләринә һөрмәтлә јанашмаг истәјирдик. Мәсәлән, бәзи тајфалар јашадыглары әразинин онлара мәхсус олдуғуну һесаб едирләр. Ораја дәвәтсиз ҝетмәк һөрмәтсизлик әламәти оларды.

Јола дүшүрүк

Нәһајәт, ҝөзләдијимиз ҝүн ҝәлди. Әрзагла јүкләнмиш ики машынла Гундивиндијә јола дүшдүк. Беҹәрилмиш тарлаларын ардынҹа ара-сыра евкалипт ағаҹлары битән чәмәнликләр ҝөрүнүрдү. Исти гыш ҝүнәши булудсуз сәмада парлајырды. Бир нечә саатдан сонра Гундивиндијә чатдыг вә пуллу трејлер дајанаҹағында ҝеҹәләдик.

Нөвбәти ҝүн, базар ҝүнү, һава ҝүнәшли вә тәравәтли иди — тәблиғ үчүн бундан јахшы ҝүн ола билмәзди. Јај мөвсүмүндә һаванын һәрарәти 40 дәрәҹәдән јухары олур. Илк дајанаҹағымыз 30 километр узаглыгда јерләшән бир абориҝен иҹмасы олду. Бизи иҹма башчысы Ҹенни адлы ағбирчәк гадынын јанына ҝөндәрдиләр. О бизә диггәтлә гулаг асды вә мәмнунијјәтлә «Бөјүк Мүәллимдән өјрән» (рус.) китабыны ҝөтүрдүa. Бу гадын бизи орада јашајан јерли сакинләрә тәблиғ етмәјә дәвәт етди.

Ушаглар габағымызда гачараг ҝәлишимиз барәдә ҹар чәкирдиләр. Ҝәтирдијимиз хәбәрә һәр евдә һөрмәтлә гулаг асыр вә Мүгәддәс Китаб әдәбијјатыны ҝөтүрүрдүләр. Тезликлә әдәбијјатымыз гуртарды вә артыг јығынҹаг ҝөрүшү үчүн шәһәрә гајытмағын вахты чатмышды. Биз сөз вердик ки, даныша билмәдијимиз инсанлара баш чәкмәк үчүн гајыдаҹағыг.

Падшаһлыг Залында јерли баҹы-гардашларла таныш олдуг вә тезликлә достлашдыг. Бу јығынҹагда 25 тәблиғчи вар вә онлар Падшаһлыг һаггында хош хәбәри 30 000 квадрат километр әразидә јашајан 11 000 инсана тәблиғ едирләр. Бир Шаһид миннәтдарлығыны билдирәрәк деди: «Бура ҝәлиб бизә көмәк етдијиниз үчүн чох сағ олун». Руһландырыҹы ҝөрүшдән сонра һамымыз бир аз јемәк јемәјә ҝетдик. Јатмаға ҝетмәздән өнҹә, трејлер дајанаҹағында ҝәзиб-долашан опоссумлара јемәк вердик.

«Бу ахшам оҹағын гырағында»

Нөвбәти ики ҝүн әрзиндә машынла ҝедиб, Квинсленд илә Јени Ҹәнуби Уелс арасындакы сәрһәд бојунҹа тәблиғ едирдик. Кәнд јерләринин бөјүк һиссәсини өртән гуру евкалипт коллуглары илә гојун-гузу вә мал-гара отлајан чәмәнликләр бир-бирини әвәз едирди. Јолда бир нечә кенгуру ҝөрдүк вә онлар бизи ҝөрдүкләрини билдирмәк үчүн гулагларыны тәрпәдирдиләр. Узагдан чәпәрләнмиш тозлу саһәдә мәғрур-мәғрур ҝәзишән ему дәвәгушларыны сејр етдик.

Чәршәнбә ахшамы ҝүнортадан сонра јол илә јаваш-јаваш ҝедән инәкләрә раст ҝәлдик. Нахырчылар хүсусилә дә гураглыг оланда һејванлары башга отлаглара апарырлар. Тезликлә бир атлыја чатдыг. Машыны јолун кәнарында сахладым вә дүшүб она салам вердим. Ҹавабында о мәнә: «Салам, дост», — деди. Јанында ити олан һәмин јашлы киши, сөһбәт етмәк үчүн атыны сахлады.

Бир-ики кәлмә гураглыг барәдә сөһбәт етдикдән сонра она хош хәбәрдән данышдым. Киши нида етди: «Ушаглыгдан бәри Мүгәддәс Китаб һаггында бир шеј ешитмәмишәм!» О, дүнјада мәнәви позғунлуғун баш алыб ҝетмәсиндә дин рәһбәрләринин мәсулијјәт дашыдығыны сөјләди. Бунунла белә, Мүгәддәс Китаба дәрин һөрмәт бәсләјирди. Мүгәддәс Китаб әсасында етдијимиз мараглы сөһбәтимизин сонунда мән она «Мүгәддәс Китаб әслиндә нә өјрәдир?» китабыны тәклиф етдимb. Китабы алыб көјнәјинин ҹибинә гојдугдан сонра деди: «Әҝәр бу китаб һәгигәтән дә Мүгәддәс Китабын өјрәтдикләри һаггындадырса, ону бу ахшам оҹағын гырағында отуруб охујаҹағам».

Евә гајыдырыг

Баш верәнләри һәмин ахшам Падшаһлыг Залында баҹы-гардашларла бөлүшдүк. Онлар сөз вердиләр ки, бизим тәблиғ етдијимиз инсанлара тәкрар баш чәкәҹәкләр. Ҝөрүш сона чатдыгда видалашмаг чәтин иди. Биз достлашдыг вә руһландырыҹы үнсијјәт сајәсиндә иманымыз даһа да мөһкәмләнди (Ромалылара 1:12).

Ертәси ҝүн евимизә јола дүшдүк. Сәјаһәтимиз барәдә дүшүнәркән Јеһованын сәјләримизә бол хејир-дуалар вердијини ҝөрдүк. Биз Јеһоваја даһа да јахын олдуг. Евә гајытдыгдан сонра ушагларымдан сорушдум: «Ҝәлән дәфә тәтилинизи һарада кечирмәк истәјирсиниз? Сизи дағлара апарыммы?» Ҹавабында онлар дедиләр: «Јох, атаҹан, ҝәл јенә дә һәмин јерә тәблиғ етмәјә ҝедәк». Һәјат јолдашым да онлара гошулуб деди: «Һә, ҝәлин ҝедәк. Бу бизим ән јахшы тәтилимиз олду!»

[Һашијәләр]