Биз горхмурдуг, чүнки Јеһова бизимлә иди

Нәгл етди Ејиптија Петриду

1972-ҹи илдә Кипр адасындакы Шаһидләр, узун мүддәт Јеһованын Шаһидләринин фәалијјәтинә рәһбәрлик едән Нејтан Норрун хүсуси мәрузәсини динләмәк үчүн, Никосијада топлашмышдылар. Өзүмү тәгдим етмәјә маҹал тапмамыш о мәни дәрһал таныды вә сорушду: «Мисирдә ишләр неҹә ҝедир?» Мән Норр гардашла 20 ил әввәл доғма шәһәрим Исҝәндәријјәдә (Мисир) таныш олмушдум.

МӘН 1914-ҹү ил јанварын 23-дә Исҝәндәријјәдә анадан олмушам. Аиләдә дөрд ушаг идик вә ән бөјүјү мән идим. Ушаглығымыз дәнизин кәнарында кечиб. О заман Исҝәндәријјә мемарлығы вә тарихи илә танынан ҝөзәл чохмилләтли шәһәр иди. Авропалылар вә әрәбләр јан-јана јашадыглары үчүн биз, ана дилимиз олан јунан дилиндән савајы, әрәб, инҝилис, франсыз вә италјан дилләриндә данышмағы өјрәндик.

Мәктәби битирдикдән сонра франсыз мода евиндә ишә дүзәлдим вә күбар ҹәмијјәтдән олан ханымлар үчүн ҝөзәл либаслар фикирләшиб тикдијимлә фәхр едирдим. Чох диндар идим. Мүгәддәс Китабы охумағы хошлајырдым, амма чох шеји баша дүшмүрдүм.

Һәмин әрәфәдә, 1930-ҹу илләрин орталарында, Кипр адасындан олан јахшы бир оғланла таныш олдум. Теодотос Петридес маһир ҝүләшчи иди, о һәмчинин ширнијјат мәмулатларынын биширилмәси сәнәтинә јијәләнмишди вә мәшһур ширнијјат дүканында ишләјирди. Теодотос, мәнә — бәстәбој, гарасачлы гыза ашиг олду. О, тез-тез пәнҹәрәмин алтында романтик јунан маһнылары охујурду. Биз 1940-ҹы илин ијун ајынын 30-да евләндик. Неҹә дә хошбәхт ҝүнләр иди! Биз анамдан бир мәртәбә ашағыда јашајырдыг. 1941-ҹи илдә илк өвладымыз Ҹон дүнјаја ҝәлди.

Мүгәддәс Китаб һәгигәтини өјрәнирик

Теодотос динимиздән наразы олдуғу үчүн Мүгәддәс Китаб һаггында суаллар ону дүшүндүрүрдү. О мәндән хәлвәтҹә Јеһованын Шаһидләри илә Мүгәддәс Китабы өјрәнмәјә башлады. Ҝүнләрин бир ҝүнү, көрпәмизлә евдә оларкән бир гадын гапымызы дөјдү вә мәнә үзәриндә Мүгәддәс Китаб хәбәри јазылмыш бир вәрәгә верди. Нәзакәт хатиринә ҝөтүрүб ону охудум. Сонра о мәнә Мүгәддәс Китаб әдәбијјатлары тәклиф етди. Бу ки Теодотосун евә ҝәтирдији китаблардыр!

«Бу китаблар мәндә вар», — дејә ҹаваб вердим, — «Бујурун, ичәри ҝирин». Бу Шаһидин ады Елени Николау иди. Елени отурмаға маҹал тапмамыш она суаллар јағдырмаға башладым. О, Мүгәддәс Китабдан истифадә едәрәк сәбрлә онлара ҹаваб верирди. Бу мәним хошума ҝәлди. Санки, ҝөзләрим ачылды вә мән Мүгәддәс Китабы баша дүшмәјә башладым. Сөһбәтимизә бир аз ара верәндә Елени әримин шәклини ҝөрүб уҹадан деди: «Мән ону таныјырам!» Теодотосун сирринин үстү ачылды. Сән демә, Теодотос мәнсиз, һәтта мәндән ҝизлиҹә Јеһованын Шаһидләринин ҝөрүшләринә ҝедирмиш! Һәмин ҝүн, Теодотос евә гајыданда, она дедим: «Кечән базар ҝетдијин јерә бу һәфтә мән дә сәнинлә ҝедәҹәјәм!»

Илк дәфә ҝетдијим ҝөрүшдә он нәфәр иштирак едирди. Онлар Мүгәддәс Јазыларын «Микеја» китабыны мүзакирә едирдиләр. Мән бөјүк марагла динләјиб ешитдикләрими гәбул едирдим. О ҝүндән Ҹорҹ вә Катерини Петраки һәр ҹүмә бизимлә евимиздә Мүгәддәс Китаб өјрәнмәси кечирирдиләр. Атам вә аиләмизин башга үзвләри Јеһованын Шаһидләри илә Мүгәддәс Китабы өјрәнмәјимизә гаршы чыхырдылар, лакин кичик баҹым һеч вахт Шаһид олмаса да, етигадыма һөрмәтлә јанашырды. Анам исә һәгигәти гәбул етди. 1942-ҹи илдә анам, Теодотос вә мән Јеһоваја һәср олунмағымыза әламәт олараг Исҝәндәријјәдә, дәниздә вәфтиз олдуг.

Һәјат чәтинләшир

1939-ҹу илдә башлајан Икинҹи Дүнја мүһарибәси ҝүнү-ҝүндән шиддәтләнирди. 1940-ҹы илләрин әввәлләриндә алман ҝенералы Ервин Роммелин команданлыг етдији танк гошуну Әл-Әламејнә јахынлашды, Исҝәндәријјә Британија әсҝәрләри илә долду. Биз гуру әрзаг мәһсуллары еһтијаты ҝөрмәјә башладыг. Сонра Теодотосун мүдири ондан Сүвејшин јахынлығындакы Порт-Тауфигдә јерләшән тәзә ширнијјат дүканынын гејдинә галмағы хаһиш етди, буна ҝөрә дә биз ора көчдүк. Ики јунандилли Шаһид бизи ахтармаға башлады. Онлар үнванымызы билмирдиләр, лакин евдән-евә тәблиғ заманы бизи тапдылар.

Порт-Тауфикдә Ставрос вә Јула Кипраосла вә онларын ушаглары Тотос вә Јеориа илә Мүгәддәс Китабы өјрәнирдик. Онлар бизим јахын достларымыз олду. Ставрос Мүгәддәс Китабы өјрәнмәји о гәдәр хошлајырды ки, биз ахырынҹы гатара ҝеҹикәк вә онларла даһа чох галаг дејә, евдәки бүтүн саатлары бир саат ҝеријә чәкирди. Мүзакирәләримиз ҝеҹәјарыјадәк давам едирди.

18 ајдан сонра, анам хәстәләнәндә, Исҝәндәријјәјә дөндүк. 1947-ҹи илдә о өлдү, амма өмрүнүн сонунадәк Јеһоваја садиг галды. Биз бир даһа Јеһованын јеткин мәсиһчиләрлә руһландырыҹы үнсијјәт васитәсилә бизә неҹә үрәк-дирәк вердијини һисс етдик. Башга өлкәләрә тәјинат алан миссионерләрин ҝәмиләри јолүстү Исҝәндәријјәдә дајананда онлары гонаг алмаг имканымыз олурду.

Севинҹли вә кәдәрли анлар

1952-ҹи илдә икинҹи оғлумуз Ҹејмс дүнјаја ҝәлди. Биз, бир валидејн кими, ушаглары сағлам руһани аб-һавада бөјүтмәјин ваҹиблијини дәрк едирдик, буна ҝөрә дә евимизи јығынҹаг ҝөрүшләринин кечирилмәси үчүн тәгдим етдик вә тез-тез таммүддәтли хидмәтчиләри гонаг чағырырдыг. Бунун сајәсиндә бөјүк оғлумуз Ҹон Мүгәддәс Китаб һәгигәтини севди вә һәлә јенијетмә икән пионер хидмәтинә башлады. Ејни заманда, орта тәһсилини битирмәк үчүн ҝеҹә мәктәбиндә охујурду.

Бир гәдәр сонра Теодотосда ҹидди үрәк хәстәлији ашкар олунду вә һәким она ишини дәјишмәји мәсләһәт ҝөрдү. О вахт оғлумуз Ҹејмс дөрд јашында иди. Чарәмиз нә иди? Мәҝәр Јеһова вәд етмәмишдими: «Горхма, чүнки Мән сәнинләјәм»?! (Јешаја 41:10). 1956-ҹы илдә Сүвејш каналынын јахынлығындакы Исмаилијјә шәһәриндә пионер кими хидмәт етмәјә дәвәт аланда тәәҹҹүбләндик вә севинҹимиз јерә-ҝөјә сығмырды! Нөвбәти илләрдә Мисирдә вәзијјәт гејри-сабит иди вә мәсиһчи гардашларымызын үрәк-дирәјә еһтијаҹлары варды.

1960-ҹы илдә һәрәмиз әлиндә бир чамаданла Мисири тәрк етмәли олдуг. Биз әримин вәтәни олан Кипрә көчдүк. Артыг Теодотосун сәһһәти писләшмишди вә о ишләјә билмирди. Амма бир хејирхаһ мәсиһчи гардашымыз вә онун арвады бизә евләриндә јашамағы тәклиф етдиләр. Әфсуслар олсун ки, ики илдән сонра әрим өлдү вә мән балаҹа Ҹејмслә тәк галдым. Бизимлә бирҝә Кипрә ҝәлән Ҹон евли иди вә өз аиләсинин гајғысыны чәкмәли иди.

Чәтин анларда гајғы

Сонра Ставрос вә Дора Каирис бизә өз евләриндә јашамағы тәклиф етдиләр. Мән диз чөкүб, Јеһоваја јенә дә гајғымыза галдығына ҝөрә миннәтдарлыг етдим (Мәз. 145:16). Ставрос вә Дора евләрини сатыб, биринҹи мәртәбәсиндә Падшаһлыг Залы олаҹаг башга бир ев тикмәји гәрара аланда хејирхаһлыг ҝөстәриб мәнимлә Ҹејмс үчүн јанында әлавә ики балаҹа отаг да тикдиләр.

Ҹејмс дә бөјүјүб аилә гурду вә илк өвлады дүнјаја ҝәләнә гәдәр һәјат јолдашы илә пионер кими хидмәт едирди. Сонра онларын даһа үч өвлады олду. 1974-ҹү илдә, Нејтан Норрун јаддагалан ҝәлишиндән ики ил сонра, Кипрдә сијаси чеврилиш баш вердиa. Јеһованын Шаһидләри дә дахил олмагла, бир чох инсанлар евләриндән гачмалы вә һәр шеји јенидән башламалы олдулар. Оғлум Ҹон онлардан бири иди. О, јолдашы вә үч ушағы илә Канадаја көчдү. Чохлары Кипри тәрк етсә дә, тәблиғчиләрин сајы артмагда давам едирди.

Тәгаүдә чыханда хидмәтдә даһа чох иштирак едә билирдим. Лакин бир нечә ил бундан әввәл микроинсулт кечирдим вә оғлум Ҹејмсҝилә көчмәли олдум. Бир гәдәр сонра, сәһһәтим даһа да писләшәндә, бир нечә һәфтә хәстәханада јатдым, сонра гоҹалар евинә көчдүм. Һәмишә ағрымағыма бахмајараг, ишчиләрә, пасиентләрә вә бурада оланлара баш чәкмәјә ҝәлән инсанлара шәһадәтлик едирәм. Мән чох охујуб-арашдырырам вә руһани гардашларымын көмәји илә јахынлыгда кечән китабөјрәнмәјә ҝедә билирәм.

Аһыл јашларымда тәсәлли

Теодотосла көмәк етдијимиз инсанлардан хәбәр аланда үрәјим севинир. Онларын ушагларынын әксәријјәти вә нәвәләри таммүддәтли хидмәтдәдирләр: бәзиләри Австралијада, Канадада, Инҝилтәрәдә, Јунаныстанда вә Исвечрәдә хидмәт едирләр. Оғлум Ҹон арвады вә оғлу илә Канадада јашајыр. Онларын бөјүк гызы әри илә бирҝә пионер кими хидмәт едирләр. Онларын кичик гызы Линда әри Ҹошуа Снеплә бирҝә Ҝилеад Мәктәбинин 124-ҹү синфинә дәвәт алыблар.

Оғлум Ҹејмс арвады илә бирҝә һал-һазырда Алманијада јашајыр. Онларын ики оғлу Бет-Елдә — бири Афинада (Јунаныстан), о бириси исә Зелтерсдә (Алманија) хидмәт едир. Онларын кичик оғлу, гызы вә онун јолдашы Алманијада пионер кими хидмәт едирләр.

Анам вә әзиз Теодотосум дириләндә онлара данышасы чох шејимиз олаҹаг. Онлар аиләләринә нә гәдәр гијмәтли мирас гојдугларыны ҝөрәндә чох шад олаҹагларb.

[Һашијәләр]

[24-ҹү сәһифәдәки чәрчивә]

Биз бир даһа Јеһованын јеткин мәсиһчи достларымызла руһландырыҹы үнсијјәт васитәсилә бизә неҹә үрәк-дирәк вердијини һисс етдик

[24-ҹү сәһифәдәки хәритә]

(Хәритәјә нәшрин өзүндә бахын)

КИПР

НИКОСИЈА

АРАЛЫГ ДӘНИЗИ

МИСИР

ГАҺИРӘ

Исҝәндәријјә

Әл-Әламејн

Исмаилијјә

Сүвејш

Порт-Тауфиг

Сүвејш каналы

[Иҹазә илә]

Based on NASA/Visible Earth imagery

[23-ҹү сәһифәдәки шәкил]

Теодотосла, 1938-ҹи ил

[25-ҹи сәһифәдәки шәкил]

Ҹон вә һәјат јолдашы

[25-ҹи сәһифәдәки шәкил]

Ҹејмс вә һәјат јолдашы