‘Агибәтинизи’ дүшүнүн

ҺӘЈАТ адлы сәјаһәтдә гаршымыза чохлу сечимләр чыхыр. Сөзсүз ки, јолу әлимизә алмаздан әввәл онун ахырыны фикирләшмәк мүдриклик оларды. Бәзиләри гәбул етдикләри гәрарлара ҝөрә сонрадан чох пешманчылыг чәкмишләр. Јәгин сән дә һачанса демисән: «Белә олаҹағыны әввәлҹәдән билсәјдим, һеч вахт бу аддымы атмаздым».

Тәҹрүбәли сәјаһәтчи һәр бир јолун һара апардығыны билмәк истәјир. О, хәритәјә бахыр, һәмин јерә јахшы бәләд олан адамлардан сорушур. О, мүтләг јол нишанларына да бахаҹаг. Бәс һәјат адлы сәјаһәтдә ән јахшы јолу неҹә тапмаг олар? Аллаһ бир дәфә гәдим Исраил халгы һаггында Муса васитәсилә демишди: «Каш ки мүдрик олуб буну дәрк едәјдиләр, агибәтләрини дүшүнәјдиләр» (Ганунун тәкрары 32:29).

Ән јахшы мәсләһәт

Һәјат сәјаһәтиндәки јолларын ‘агибәти’ илә бағлы тәлаш кечирмәјә еһтијаҹ јохдур. Һәјат јолунун јолчуларына ән јахшы јолу мәсләһәт ҝөрмәк үчүн Аллаһ ән әлверишли мөвгејә саһибдир. О, инсанларын ҝетдији бир чох јоллары вә онларын ахырыны ҝөрмүшдүр. Мүгәддәс Китабда дејилир: «Инсанларын јоллары Рәббин ҝөзү гаршысындадыр, онларын һәр аддымларыны јохлајыр» (Сүлејманын мәсәлләри 5:21).

Јеһова Ону севән инсанларын гајғысына галыр. Кәламы олан Мүгәддәс Китаб васитәсилә онлар үчүн ән јахшы јолу ҹызыр. Биз охујуруг: «Сәнә тәлим верәҹәјәм, ҝедәҹәјин јолу өјрәдәҹәјәм. Нәсиһәт верәҹәјәм, ҝөзүм сәнин үстүндә олаҹаг». Буна ҝөрә дә һәр һансы јола аддым атмамышдан әввәл: «Ҝедәҹәјим јолу мәнә өјрәт», — дејә дуа едән гәдим Исраилин падшаһы Давуд кими Јеһованын мәсләһәтини ахтармаг мүдриклик оларды (Мәзмур 32:8; 143:8).

Етибарлы, тәҹрүбәли сәјаһәтчинин ҝөстәрдији јолла ҝетмәк инсанда етимад доғурур вә архајынлыг јарадыр. Артыг јолун һара апардығына ҝөрә адам нараһат олмур. Давуд Јеһовадан рәһбәрлик вә ҝөстәриш истәјир вә она риајәт едирди. Нәтиҹәдә о, 23-ҹү мәзмурда ифадә олундуғу кими, гәлб раһатлығы тапды. Давуд јазырды: «Рәбб мәним чобанымдыр, мөһтаҹ олмарам. О мәни јашыл чәмәнләрдә динҹәлдир, сакит ахан сулар кәнарында ҝәздирир. Мәни јенә дә ҹанландырыр, исми шәрәфинә салеһлик јолу илә апарыр. Гаранлыг дәрәдә ҝәзсәм белә, шәрдән горхмарам» (Мәзмур 23:1-4).

Онларын агибәти неҹә олаҹаг?

Һәјат јолу илә сәјаһәт едән бир мәзмурчу, ја Асәф, ја да онун нәслиндән олан бир нәфәр етираф едирди ки, дүз јолдан «аз гала бүдрәмишди». Нәјә ҝөрә? О, виҹдансыз, зоракы адамлары ҝөрүб, ‘писләрин фираванлығына’ һәсәд апармышды. Онун фикринҹә, ‘пис адамлар даим архајын’ идиләр. Ән писи исә о иди ки, мәзмурчу сечдији салеһлик јолуну изләмәјин мүдрик олдуғуна шүбһә етмәјә башламышды (Мәзмур 73:2, 3, 6, 12, 13).

Сонра мәзмурчу Јеһованын мүгәддәс мәканына дахил олду, дуа едиб писләрин ахыры һагда фикирләшәндән сонра деди: «Онларын агибәтини дәрк етдим». О, һәсәд апардығы адамлары ҝәләҹәкдә нә ҝөзләдији барәдә дүшүндү. Баша дүшдү ки, белә адамлар ‘сүрүшкән јердәдирләр’ вә ‘бир анда дәһшәт ичиндә итиб-батаҹаглар’. Бәс мәзмурчунун тутдуғу јол һаггында нә демәк олар? О етираф едирди ки, Јеһова ону ‘сонра шәрәфә чатдыраҹаг’ (Мәзмур 73:17-19, 24).

Һијлә вә јахуд шүбһәли ишләрлә фираванлыға чатанларын һәрәкәтләринин нәтиҹәси һаггында дүшүнәндә мәзмурчу дүз јолда олдуғуна әмин олду. О белә гәнаәтә ҝәлди: «Мәним үчүн Аллаһа јахынлашмаг јахшыдыр». Јеһова Аллаһла јахын мүнасибәтдә олмаг һәмишә әбәди фајдалар ҝәтирир (Мәзмур 73:28).

«Тутдуғун јолу бил»

Бизим гаршымыза да бәнзәр сечимләр чыха биләр. Ола билсин, сиз ширникдириҹи иш мүгавиләси бағламаг, ишдә ирәлиләјиш, јахуд јахшы газанҹы олан шәрикли иш тәклифи алмысыныз. Дүздүр, һәр јени ишин өз тәһлүкәси вар. Бунунла белә сечиминизин ‘агибәти’ барәдә әввәлҹә дүшүнмәјин ваҹиблијини анлајырсынызмы? Онун нәтиҹәләри неҹә ола биләр? Евдән узаг галмаг инсанын һәм өзү, һәм дә һәјат јолдашы үчүн ҝәрҝинлик јарада биләр. Бәс сиздән бу тәләб олунаҹагмы? Иш јолдашларынызын, јахуд һотелләрдә вә ја башга јерләрдәки адамларын пис тәсиринә мәруз галаҹагсынызмы? Гаршыныздакы јолу диггәтлә јохламагла мүдрик гәрар чыхара биләҹәксиниз. Сүлејманын мәсләһәтинә диггәт јетирин: «Тутдуғун јолу бил» (Сүлејманын мәсәлләри 4:26, «Contemporary English Version»).

Һәр биримизә, хүсусилә дә ҝәнҹләрә бу мәсләһәтин үзәриндә дүшүнмәк јахшы оларды. Бир ҝәнҹ оғлан еһтирас ојадан сәһнәләрлә долу бир филми кирајә ҝөтүрүб бахды. Филм онда елә еһтирас ојатды ки, јахынлыгда јашајан фаһишәнин јанына ҝетди. Ахырда она галан кәдәр, виҹдан әзабы вә хәстәлијә тутулмаг горхусу олду. Баш верән һадисә ејнилә Мүгәддәс Китабда тәсвир олунан һадисәјә бәнзәјир: «Кәсилмәјә апарылан бир өкүз кими... гадынын ардынҹа дүшдү». Каш ки о, ‘агибәтини’ дүшүнәјди! (Сүлејманын мәсәлләри 7:22, 23).

Јол нишанларына етибар един

Чохлары разылашаҹаг ки, јол нишанларына мәһәл гојмамаг ағылсызлыгдыр. Анҹаг тәәссүф ки, һәјат јолунда верилән ҝөстәришләр хошларына ҝәлмәјәндә бәзиләри мәһз белә давраныр. Јеремјанын ҝүнләриндәки бәзи исраиллиләрә нәзәр салаг. Халг ики јол арасында галмышды вә Јеһова Аллаһ онлара мәсләһәт верди: «Әзәлдән олан јоллары сорушун. Јахшы јолун һарада олдуғуну өјрәнин, о јолла ҝедин». Лакин халг инадкарлыгла ҹаваб вериб деди: «О јолла ҝетмәјәҹәјик» (Јеремја 6:16). Һәмин үсјанкарларын ‘агибәти’ неҹә олду? Ерамыздан әввәл 607-ҹи илдә бабиллиләр ҝәлиб Јерусәлими јерлә-јексан етдиләр вә сакинләрини Бабилә әсир апардылар.

Аллаһын вердији ҝөстәришләрә мәһәл гојмасаг һеч вахт хејир тапмајаҹағыг. Мүгәддәс Јазылар бизи сәсләјир: «Бүтүн гәлбинлә Рәббә ҝүвән, өз идракына етибар етмә. Бүтүн јолларында Ону таны, О сәнин јолларыны дүзәлдәр» (Сүлејманын мәсәлләри 3:5, 6).

Аллаһын бәзи хәбәрдарлыглары «Ҝириш гадағандыр» кими ишарәләрә бәнзәјир. Мәсәлән, Мүгәддәс Китабда дејилир: «Писләрин јолуна ајаг басма, шәр инсанын јоллары илә ҝетмә» (Сүлејманын мәсәлләри 4:14). Белә зәрәрли јоллардан бири Сүлејманын мәсәлләри 5:3, 4 ајәләриндә тәсвир олунуб: «Әхлагсыз гадынын додағындан санки бал ахыр, дили ширин, јағдан јумшагдыр. Амма агибәти јовшан кими аҹыдыр, икиағызлы гылынҹ кими кәскиндир». Кимәсә истәр фаһишә илә, истәрсә дә башга бири илә ҹинси әхлагсызлыг ҹәлбедиҹи ҝөрүнә биләр. Анҹаг әхлаги давранышы низама салан «Ҝириш гадағандыр» кими ишарәләрә мәһәл гојмамаг јалныз вә јалныз фәлакәтә сүрүкләјәҹәк.

Белә јола гәдәм гојмаздан әввәл өзүнүздән сорушун: «Бу јол мәни һара апарыр?» Бир анлыг ајаг сахлајыб онун ‘агибәти’ үзәриндә дүшүнмәк инсаны учурума апаран јолдан сахламаг үчүн кифајәт едә биләр. ГИЧС вә ҹинси јолла өтүрүлән башга хәстәликләр, арзуолунмаз һамиләлик, аборт, корланан мүнасибәтләр, виҹдан әзабы белә хәбәрдарлыглара мәһәл гојмајанларын јолуну корлајыр. Һәвари Павел әхлагсызлыг едәнләрин јолунун сонуну ачыг-ајдын ҝөстәрмишдир: онлар «Аллаһын Сәлтәнәтини мирас алмајаҹаглар» (1 Коринфлиләрә 6:9, 10).

«Јол будур»

Һәрдән тутдуғумуз јолун бизи һара апардығыны ҝөрмәк чәтин олур. Буна ҝөрә дә мәһәббәтли гајғысына вә ајдын рәһбәрлијинә ҝөрә Аллаһа неҹә дә миннәтдарыг! Јеһова демишди: «Јол будур, ҝедин бу јола» (Јешаја 30:21). Јеһованын ҝөстәрдији јол бизи һара апарыб чыхараҹаг? Һәмин јол енсиз вә чәтин олса да, Иса деди ки, о, әбәди һәјата апарыр (Матта 7:14).

Ҝетдијиниз јолун үзәриндә бир анлыға дүшүнүн. Бу дүз јолдурму? О һара апарыр? Дуада Јеһовадан рәһбәрлик истәјин. «Јол хәритәси» олан Мүгәддәс Китабдан мәсләһәт алын. Һәтта, ола билсин, тәҹрүбәли сәјаһәтчидән, Аллаһын јолу илә јеријән бир нәфәрдән, мәсләһәт алмаға еһтијаҹ дујасыныз. Әҝәр истигамәти дәјишмәк лазым ҝәләрсә, буну дәрһал един.

Чох вахт сәјаһәтчи ону дүзҝүн јолда олдуғуна әмин едән јол нишаныны ҝөрәндә руһланыр. Әҝәр һәјат јолунузу јохлајанда салеһлик јолу илә ҝетдијиниз ашкар олурса, ҹәсарәтлә јолунуза давам един. Сәјаһәтин ән мүкафатландырыҹы һиссәси һәлә гаршыдадыр (2 Петер 3:13).

Һәр бир јол инсаны һараса апарыр. Тутдуғунуз јолун сонуна чатанда һарада олаҹагсыныз? Орада дуруб: «Каш ки башга јолу сечәјдим!» демәклә һеч нә әлдә едә билмәјәҹәксиниз. Беләликлә, һәјат јолунда нөвбәти аддымы атмаздан әввәл өзүнүздән сорушун: «Бу јолун ‘агибәти’ неҹә олаҹаг?»

[16-ҹы сәһифәдәки чәрчивә]

‘Агибәтиниз’ неҹә олаҹаг?

Ҝәнҹләри чох вахт ширникләндирир вә тәзјиг ҝөстәрирләр ки, дәбдә олан шејләри тәҹрүбәдән кечирсинләр. Ашағыда бәзи мүмкүн вәзијјәтләр садаланыр.

◼ Ким исә сизи сигарет чәкмәјә тәһрик едир.

◼ Јахшы нијјәтдән ирәли ҝәләрәк, мүәллим сизи университетдә али тәһсил алмаға тәшвиг едир.

◼ Спиртли ичкиләрин, бәлкә дә наркотик маддәләрин олаҹағы гонаглыға дәвәт едилирсиниз.

◼ «Нә үчүн Интернетә өз тәрҹүмеји-һалыны салмајасан?» — дејә кимсә тәклиф едир.

◼ Танышыныз сизи зоракы, јахуд әхлагсыз сәһнәләрин олдуғу филмә бахмаға дәвәт едир.

Белә вәзијјәтләрдән биринә дүшсәниз, нә едәҹәксиниз? Садәҹә тәслим олаҹагсыныз, јохса ‘агибәтинизи’ ҹидди дүшүнәҹәксиниз? Јахшы олар ки, өзүнүздән сорушасыныз: «Бир киши гојнуна од аланда әјин-башы јанмазмы? Көз үзәриндә ҝәзәнин ајаглары бишмәзми?» (Сүлејманын мәсәлләри 6:27, 28).