Тиҹарәт јерләриндә тәблиғ
ҺӘВАРИ Павел Афина шәһәриндә оланда һәр ҝүн базар мејданына ҝедиб Иса һаггында хош хәбәри тәблиғ едирди (Һәв. иш. 17:17). Павел бураны Афина сакинләринин даһа чох вахт кечирдикләри јер олдуғу үчүн сечмишди.
Тәхминән 2 000 ил кечсә дә, Јеһованын халгы Онун Падшаһлығы һагда хош хәбәри јајмаг үчүн тиҹарәт јерләриндә тәблиғ едир. Нәјә ҝөрә? Чүнки чох инсанлары белә јерләрдә тапмаг олур. Бу ҝүн базар мејданы тиҹарәт мәркәзләри ола биләр. Белә јерләрин мүдириндән, јахуд саһибиндән иҹазә алдыгдан сонра бәзи Шаһидләр Мүгәддәс Китаба әсасланан нәшрләри нүмајиш етдирмәк үчүн орада маса гојурлар.
Мисал үчүн, АБШ-ын Нју–Ҹерси штатындакы тиҹарәт мәркәзләриндән бириндә «Аилә дәјәрләрини неҹә горујуб сахламаг олар?» мөвзусу илә бағлы ҹәлбедиҹи нәшрләр нүмајиш етдирилмишди. Бунун нәтиҹәси нә олмушду? Бир ҝүндә 6 дилдә 153 китаб пајланмышды.
Әдәбијјат масасына јахынлашан бир гадын баҹымызын вердији изаһа диггәтлә гулаг асырды. Гадын разылашды ки, һәјатымызда вә аиләмиздә Аллаһын ирадәсини нәзәрә алмаг ваҹибдир. О, «Бөјүк Мүәллимдән өјрән» (рус.), «Аилә хошбәхтлијинин сирри», «Ҝәнҹләрин суаллары. Практики мәсләһәтләр» (рус.) китабларыны алды.
Ҝүнортадан сонра әдәбијјат масасынын јанындан кечиб нөвбәти мағазаја ҝедән бир кишинин диггәтини «Ҝәнҹләрин суаллары» китабы ҹәлб етди. Масанын архасында дуран баҹы һәмин кишинин бу китабла марагландығына фикир вериб сорушду: «Сизи һансы китаб марагландырыр?» О, башы илә «Ҝәнҹләрин суаллары» китабына ишарә етди. Баҹы бу китабы она верди. Киши үч оғлу олдуғуну деди. О, сөһбәт әснасында билдирди ки, һәфтәдә бир дәфә ушагларыны башына јығыб сөһбәт едир. Онун ики бөјүк оғлу јенијетмәдир. Киши китабы вәрәгләјәркән ону аилә мүзакирәләриндә истифадә едә биләҹәјини сөјләди. Тәблиғчи онун диггәтини «Аилә хошбәхтлијинин сирри» китабына јөнәлдиб ону әмин етди ки, арвады илә бирҝә аилә һәјатлары үчүн фајдалы мәсләһәтләр тапаҹаглар. Киши тәклиф үчүн өз тәшәккүрүнү билдирди, ианә етди вә һансыса бир Шаһидин онлара баш чәкмәсинә разылыг верди.
Тиҹарәт мәркәзиндә тәблиғ едән Шаһидләр ҝүнүн сонунда өзләрини неҹә һисс едирдиләр? Бир баҹы дејир: «Бу тәблиғ үсулу шәхсән мәним чох хошума ҝәлди. Һәр шеј чох ҝөзәл кечди!» Башга баҹы бөлүшүр: «Јеһова демишди ки, хош хәбәр дүнјанын ән уҹгар јерләринә гәдәр тәблиғ олунаҹаг. Бу ҝүн Нју–Ҹерсинин Парамус шәһәриндә хош хәбәр мүхтәлиф дилләрдә данышан инсанларын үрәјинә јол тапыб. Тиҹарәт мәркәзиндә шаһидлик етмәк мәнә чох хош иди. Онда иштирак едәнләрин һамысы севинҹ дујду. Ҝүнүн сонунда һеч биримиз дағылышмаг истәмирдик».
Хош хәбәри тәблиғ едәркән мүхтәлиф үсуллардан истифадә едә биләрсәнми? Бизим ән башлыҹа тәблиғ үсулумуз евдән-евә тәблиғдир (Һәв. иш. 20:20). Бунунла белә, тиҹарәт мәркәзләриндә шаһидлик етмәк барәдә дүшүнә биләрдинми?