Иҹтимаи шаһидлијин јени нөвү
1 Биринҹи әсрдәки мәсиһчиләр даһа чох евдән-евә тәблиғ едирдиләр. Онлар, һәмчинин иҹтимаи јерләрдә дә хош хәбәри чатдырырдылар (Һәв. иш. 20:20). Мәсәлән, онлар мәбәддә чохлу инсан тапа биләҹәкләрини билдикләри үчүн ора ҝедирдиләр (Һәв. иш. 5:42). Һәвари Павел Афинада оланда һәр ҝүн базар мејданында тәблиғ едирди (Һәв. иш. 17:17). Бу ҝүн дә евдән-евә тәблиғ хош хәбәри инсанлара чатдырмаг үчүн истифадә етдијимиз әсас үсул олараг галыр. Бунунла белә, биз инсанлары тапа биләҹәјимиз һәр јердә — машын дајанаҹагларында, ишҝүзар әразиләрдә, паркларда, әһалинин чох олдуғу күчәләрдә вә башга јерләрдә инсанлара тәблиғ едирик. Һәр бир тәблиғчи, мүмкүн олан иҹтимаи јерләрдә тәблиғ етмәјә тәшвиг едилсә дә, чохларынын иҹтимаи шаһидлијин ики јени мараглы нөвүндә иштирак етмәк имканы олаҹаг.
2 Ири шәһәрләрдә хүсуси иҹтимаи шаһидлик. 2013-ҹү илин «Иллик мәҹмуә»синин 16, 17-ҹи сәһифәләриндә (рус.) мәлумат верилдији кими, 2011-ҹи илин нојабрындан Нју–Јорк шәһәриндә иҹтимаи шаһидлијин јени нөвү сынагдан кечирилмәјә башлајыб. Үзәриндә бир нечә дилдә әдәбијјатларымыз нүмајиш етдирилән сәјјар масалар вә стендләр инсанларын чох олдуғу мүнасиб јерләрдә гојулур. Һәр ҝүн минләрлә инсан онун јанындан кечир, онларын арасында кодлу вә ја мүһафизә едилән биналарда јашајан, еләҹә дә бүтүн ҝүн евдә олмајанлар вар. Нәтиҹә һејрәтамиз олду. Елә өтән ајларын бириндә 3797 журнал вә 7986 китаб пајланды. Јолдан кечәнләрин әксәријјәти Мүгәддәс Китабы арашдырмаг истәдиләр. Әсас мәгсәд Мүгәддәс Китаб өјрәнмәси башламаг иди, марагланан кәсләр өз үнванларыны верән кими, үнван һәмин адамлара баш чәкилсин дејә мүнасиб јығынҹаға ҝөндәрилирди.
3 Бу үсул уғурлу алындығындан о, дүнјанын әһалиси чох олан башга ири шәһәрләри үчүн дә нәзәрдә тутулур. Јерли филиал һансы шәһәрләрин мүнасиб олдуғуну мүәјјәнләшдирәҹәк. Адәтән, бунлар ҝедиш-ҝәлишин сых олдуғу вағзаллары, ири офис вә јашајыш биналары олан шәһәрләрдир. Бундан әлавә, бу иш үчүн мүнасиб јығынҹаглары филиал өзү тәјин едәҹәк вә онлара әлавә тәлим верәҹәк. Бу иши, әсасән, даими вә хүсуси пионерләр иҹра едир, амма бәзи јерләрдә көмәкчи пионерләр дә иштирак едир.
4 Шаһидлик неҹә һәјата кечирилир? Тәблиғин бу хүсуси нөвүндә иштирак едәнләр, адәтән, киминсә масаја, јахуд стендә јахынлашмасыны ҝөзләјирләр. Јахынлашан адама она мараглы ҝәлән әдәбијјат ҝөтүрмәк тәклиф олунур. Пионерләр марагланан инсанын вердији истәнилән суала Мүгәддәс Јазылар әсасында мәмнунијјәтлә ҹаваб верирләр. Әҝәр һәмин адам әдәбијјат ҝөтүрүрсә, пионерләр көнүллү ианә һагда һеч бир шеј демирләр. Јох әҝәр һәмин адам бизим фәалијјәтимизин неҹә малијјәләшдији һагда сорушса, она әдәбијјатда ҝөстәрилән үнванлардан биринә көнүллү ианә ҝөндәрә биләҹәјини изаһ етмәк олар. Мүнасиб оланда пионерләр сорушур: «Истәјәрдиниз сизә евиниздә баш чәксинләр?», јахуд «Сиз билирсиниз, биз әдәбијјатларла јанашы, пулсуз олараг Мүгәддәс Китабы арашдырмағы да тәклиф едирик?»
5 Бу үсулла хидмәт етмәк олдугҹа хошдур. Бир әр-арвад јазмышды: «Масанын јанында дајаныб һәр ҝүн јолдан кечән минләрлә инсана баханда бүтүн дүнјада инсанлара хош хәбәри чатдырмаг үчүн ҝөрүлән ишин нә гәдәр бөјүк олдуғуну үрәјимизлә дәрк едирик. Бу гәдәр инсаны ҝөрмәк вә Јеһованын, һәгигәтән дә, һәр бир инсанын гајғысына неҹә галдығы үзәриндә дүшүнмәк тәблиғ ишини һәмишә һәјатымызында биринҹи јерә гојмаг гәтијјәтимизи мөһкәмләндирир. Биз елә тәсәввүр едирик ки, Јеһова лајиг оланлары ахтармаг үчүн масанын јанындан кечән һәр бир инсанын үрәјини јохлајыр. Биз бу ишдә бәзән мәләкләрин әлини дә һисс едирик».
6 Јерли әразидә тәшкил олунан иҹтимаи шаһидлик. Хүсуси иҹтимаи шаһидлик үсулундан әлавә, јерли әразидә олан бүтүн ағсаггаллар шурасы бирликдә әлавә олараг јени иҹтимаи шаһидлик тәшкил едә биләрләр. Бу үсулда тәблиғчиләр, өз јығынҹағынын әразиси дахилиндә олмаг шәртилә, ҝедиш-ҝәлишин чох олдуғу јердә сәјјар маса вә ја стенддән истифадә едә биләрләр. Бу иҹтимаи шаһидлик хүсуси шаһидликдән фәргләнир. Белә ки, шәһәрин ҝедиш-ҝәлиш чох олан ејни әразисиндә иҹтимаи шаһидлијин хүсуси нөвүндә иштирак едәҹәк јығынҹаглары филиал сечир («Јахшы әмәкдашлыг тәләб олунур» адлы чәрчивәјә бах).
7 Ағсаггаллар һансы јығынҹағын әразисиндә даһа чох ҝедиш-ҝәлишин олдуғунун үзәриндә дүшүнәҹәк вә иҹтимаи шаһидлик тәшкил етмәјин мүнасиб олуб-олмадығыны мүәјјәнләшдирәҹәк. Маса вә стенди, мәсәлән, вағзалларда, мејданларда, паркларда, әһалинин чох ҝедиб-ҝәлдији күчәләрдә, тиҹарәт мәркәзләриндә, университет әтрафы әразиләрдә, һава лиманларында, иллик тәдбирләрин кечирилдији јерләрдә јерләшдирмәк олар. Масаны ејни јердә, ејни ҝүнләрдә вә ејни вахтда гојмаг әлверишлидир. Һәмчинин мүшаһидә едилмишдир ки, масалары, инсанларын фикирләрини алаҹаглары шејә ҹәмләјәрәк ҝириб-чыхдыглары, бир бөјүк мағазанын чыхышында гојмагданса, тиҹарәт мәркәзләриндә гојмаг даһа әлверишлидир. Бәзи јерләрдә, мәсәлән, пијадаларын чох олдуғу күчәләрдә кичик өлчүлү әдәбијјат стенди гојмаг мүнасибдир. Ағсаггаллар веб-сајтымыздан «Ҝөзәтчи гүлләси» вә «Ојанын!» журналлары, һәмчинин «Мүгәддәс Китаб өјрәдир» китабынын стендинин гурашдырылмасы үчүн лазым олан хүсуси материаллары јүкләјә биләрләр. Бу материаллар иҹтимаи тәблиғин хүсуси олараг бу нөвүндә истифадә етмәк үчүн һазырланыб. Јерли әразидә тәшкил олунан иҹтимаи шаһидликдә иштирак едәнләр хүсуси иҹтимаи шаһидликдә иштирак едәнләрин етдији үсулла хидмәт едәҹәкләр вә онлар хидмәт нәзарәтчисинин ҝөстәришләринә там риајәт етмәлидирләр. Әҝәр мараглананын вердији үнван онларын әразиси дејилсә, тәблиғчиләр дәрһал «Зәһмәт олмаса, бу адама баш чәк» (С-43) бланкыны долдуруб јығынҹағын катибинә вермәлидирләр.
8 Өз хидмәтиндә иҹтимаи шаһидлик. Ола билсин, бәзи јығынҹагларын әразисиндә бу ҹүр масаларын вә стендләрин гојулмасыны тәләб едән пијадаларын кифајәт гәдәр чох олдуғу јер јохдур. Һәтта бу ҹүр јығынҹагларда да тәблиғчиләр өз хидмәтләринә иҹтимаи шаһидлији дахил етмәјә тәшвиг олунурлар. Әразиниздә базар, ҹәрҝә мағазалар, јахуд чохлу иш јерләри вар? Јахуд парк вә ја инсанларын топлашдығы јер неҹә? Бәс әразиниздә ҹамаатын вахташыры һансыса тәдбир үчүн топладығы јер вар? Әҝәр варса, сиз дә иҹтимаи шаһидликдә иштирак едә биләрсиниз.
9 Јеһова истәјир ки, «һәр ҹүр инсан хилас олуб һәгигәт барәсиндә дәгиг билијә јијәләнсин» (1 Тим. 2:4). Буна ҝөрә дә биз сон ҝәлмәздән өнҹә, мүмкүн гәдәр даһа чох инсана Падшаһлыг һаггында хош хәбәри чатдырмаға чалышырыг (Мат. 24:14). Бир чох әразиләрдә инсанлары евләриндә тапмаг мүшкүл мәсәләдир. Анҹаг биз бу инсанларла иҹтимаи јерләрдә сөһбәт едә биләрик. Иҹтимаи тәблиғ бәзиләринин хош хәбәри ешидә биләҹәји јеҝанә тәблиғ үсулу ола биләр. Буна ҝөрә дә ҝәлин инсанлара һәр јердә тәблиғ етмәклә өз хидмәтимизи там јеринә јетирәк (2 Тим. 4:5).
[Ојрәнилмә үчүн олан суаллар]
1. Еркән мәсиһчиләр нәдә нүмунә гојублар?
2. 2011-ҹи илин нојабрындан етибарән хидмәтин һансы нөвү сынагдан кечирилмәјә башлады?
3. Јени үсул башга јерләрдә неҹә тәтбиг едиләҹәк?
4. Иҹтимаи тәблиғин хүсуси нөвүндә шаһидлик неҹә һәјата кечирилир?
5. Хидмәтин бу јени нөвүндә иштирак етмәк бир әр-арвадда һансы һиссләр јарадыр?
6. а) Бир чох јығынҹагларда иҹтимаи шаһидлик үчүн һансы әлавә тәдбирләр тәшкил едилир вә бу, хүсуси иҹтимаи шаһидлик үсулундан нә илә фәргләнир? б) Иҹтимаи тәблиғдә иштирак едәркән јығынҹаглар неҹә әмәкдашлыг едир?
7. Мүнасиб әразиләрдә ағсаггаллар иҹтимаи шаһидлији неҹә тәшкил едә биләрләр?
8. Јығынҹагда иҹтимаи шаһидлик тәшкил едилмәсә дә, иҹтимаи тәблиғ үчүн һансы имканлар әлчатандыр?
9. Нәјә ҝөрә биз чалышмалыјыг ки, инсанлара һәр јердә тәблиғ едәк?
[5-ҹи сәһифәдәки чәрчивә]
Јахшы әмәкдашлыг тәләб олунур
Мәлумат верилиб ки, гоншу јығынҹагларын тәблиғчиләри иҹтимаи јерләрдә шаһидлик едәркән бәзән ејни күчәдә, ејни паркда, ејни тиҹарәт мәркәзләриндә вә ја вағзалларда тәблиғ едирләр. Мүхтәлиф јығынҹаглардан олан тәблиғчиләр ејни дәһлиздә, ҝөзләмә залында, ҹамашырханада әдәбијјат сахлајыр, ејни ишчиләрә тәблиғ едирләр. Һәтта тәблиғчиләр мүхтәлиф вахтда ҝәлсәләр дә, бу, ишчиләрин вә јахынлыгдакы инсанларын етиразына сәбәб олуб. Буна ҝөрә дә, адәтән, јахшы оларды ки, иҹтимаи шаһидлик едәркән јығынҹағын тәјин олунмуш әразисиндән кәнара чыхмајаг.
Әҝәр тәблиғчиләр гоншу јығынҹағын әразисиндә иҹтимаи шаһидлик етмәк истәјирләрсә, бу һагда хидмәт нәзарәтчиси илә сөһбәт етмәлидирләр. Белә едилсә, о, әввәлҹәдән иҹазә алмаг үчүн диҝәр јығынҹағын хидмәт нәзарәтчиси илә әлагә сахлаја биләр. Әразиси ејни олан мүхтәлифдилли јығынҹагларын хидмәт нәзарәтчиләри әмәкдашлыг етмәлидирләр ки, әразидә јашајан ҹамаатын јерсиз наразылығына сәбәб олмасын. Јахшы әмәкдашлыг сајәсиндә һәр шеј «әдәб-әрканла вә низамла» едилә биләр (1 Кор. 14:40).
[6-ҹы сәһифәдәки шәкил]
[6-ҹы сәһифәдәки шәкил]