Хош хәбәри тәблиғ етмәјин үсуллары

ИСА хош хәбәри усанмадан тәблиғ едирди вә бунунла давамчыларына ҝөзәл нүмунә гојду. О, шәхсән инсанларын јанына ҝедир, иҹтимаи јерләрдә, евләрдә онларла сөһбәт едир вә өјрәдирди (Мәт. 9:35; 13:36; Лука 8:1). Иса инсанларла фәрди шәкилдә сөһбәт едир, шаҝирдләринә ајрылыгда тәлим верир, бәзән исә минләрлә инсанын гаршысында вәз едирди (Марк 4:10—13; 6:35—44; Јәһ. 3:2—21). О, һәр фүрсәтдән истифадә едәрәк инсанлара көнүлохшајан вә үмидвериҹи сөзләр чатдырырды (Лука 4:16—19). Һәтта јорғун оланда белә, шаһидлик етмәк имканыны әлдән вермирди (Марк 6:30—34; Јәһ. 4:4—34). Сөзсүз ки, Исанын хидмәти илә бағлы руһландырыҹы һадисәләри охујанда, һәвариләр кими, биздә дә ону тәглид етмәк истәји јараныр (Мәт. 4:19, 20; Лука 5:27, 28; Јәһ. 1:43—45).

² Ҝәлин ҝөрәк тәхминән 2000 ил әввәл Иса Мәсиһин тәмәлини гојдуғу бу ишә һансы төһфәни верә биләрик.

ЕВ-ЕВ ТӘБЛИҒ

³ Биз, Јеһованын Шаһидләри, Падшаһлыг һаггында хош хәбәри мүтәшәккил шәкилдә ев-ев тәблиғ етмәјин ваҹиб олдуғуну дәрк едирик. Һамы бизи ев-ев тәблиғ етмәјимизлә таныјыр, чүнки биз бу үсулдан ҝениш истифадә едирик. Әлдә олунан наилијјәтләр сүбут едир ки, гыса мүддәт әрзиндә милјонларла инсана хош хәбәри чатдырмағын ән ҝөзәл үсулу ев-ев тәблиғдир (Мәт. 11:19; 24:14). Биз ев-ев тәблиғ етмәклә Јеһованы вә инсанлары севдијимизи әмәлдә ҝөстәририк (Мәт. 22:34—40).

⁴ Ев-ев тәблиғи Јеһованын Шаһидләри иҹад етмәјиб. Һәвари Булус инсанлара евләрдә тәлим вердијини јазырды. О, Ефесдәки ағсаггаллара өз хидмәти барәдә демишди: «Асија әјаләтинә ајаг басдығым ҝүндән бәри... сизә хејир ҝәтирән шејләр һаггында данышмагдан,.. ев-ев өјрәтмәкдән ваз кечмәдим». Һәвари бу вә диҝәр үсулларла «һәм јәһудиләрә, һәм јунанлара төвбә едиб Аллаһа тәрәф дөнмәк вә Ағамыз Исаја иман етмәк һаггында әтрафлы шәһадәт» верирди (Һәв. 20:18, 20, 21). О дөврдә Рома императорлары инсанлара бүтпәрәстлији тәлгин едирдиләр, буна ҝәрә дә чохлары мүхтәлиф илаһлара ибадәт едирди. Бу инсанлар «дүнјаны вә онун ичиндәки һәр шеји јарадан» вә һарада јашамаларындан асылы олмајараг, инсанларын һамысына төвбә етмәји бујуран Аллаһы ахтармалы идиләр (Һәв. 17:22—31).

⁵ Бу ҝүн инсанлара хош хәбәри чатдырмаг әввәлкиндән даһа тәҹилидир. Бу шәр дүнјанын сону сүрәтлә јахынлашыр. Буна ҝөрә дә бүтүн ҝүҹүмүзү сәфәрбәр етмәлијик. Ев-ев тәблиғ һәгигәти ахтаран инсанлары тапмағын сынагдан чыхмыш үсулудур. Бу үсул Исанын вә һәвариләрин вахтында олдуғу кими, бу ҝүн дә еффективдир (Марк 13:10).

⁶ Сиз ев-ев тәблиғдә там шәкилдә иштирак едә билирсиниз? Әҝәр беләдирсә, әмин ола биләрсиниз ки, Јеһова Аллаһ сиздән разыдыр (Һизг. 9:11; Һәв. 20:35). Ола билсин, ев-ев тәблиғ етмәк сизә чәтиндир. Бәлкә, сәһһәтиниз буна јол вермир, јахуд тәблиғ етдијиниз әразидә инсанлар хош хәбәрә лагејд јанашыр, һәтта дөвләт тәрәфиндән мүәјјән манеәләр јарадылыр. Бәлкә дә, утанҹаг олдуғунуз үчүн танымадығыныз инсанларла сөһбәт етмәјә чәкинирсиниз. Бу сәбәбдән, һәр дәфә ев-ев тәблиғ едәндә нараһатчылыг кечирирсиниз. Руһдан дүшмәк лазым дејил (Чых. 4:10—12). Дүнјада бир чох баҹы-гардашларыныз да ејни шеји јашајыр.

⁷ Иса шаҝирдләринә сөз вериб демишди: «Мән бу дөврүн јекунуна кими һәмишә сизинләјәм» (Мәт. 28:20). Бу сөзләр бизим шаҝирд һазырламаг гәтијјәтимизи ҝүҹләндирир. Биз һәвари Булусун нөвбәти сөзләринә шәрикик: «Мәнә гүввәт верәнин сајәсиндә һәр шејә ҝүҹүм чатыр» (Филип. 4:13). Јығынҹағынызын ев-ев тәблиғ үчүн тәшкил етдији тәдбирләрдә там шәкилдә иштирак един. Башгалары илә әмәкдашлыг етмәк сизә севинҹ ҝәтирәҹәк вә пүхтәләшмәјә көмәк едәҹәк. Үзләшдијиниз манеәләри ашмаг үчүн дуа един вә бир мүждәчи кими өзүнүзү бу ишә һәср един (1 Јәһ. 5:14).

⁸ Биз инсанлара хош хәбәри чатдырмагла онлара үмид бәхш едирик (1 Бут. 3:15). Ҝет-ҝедә сиз үмидини Падшаһлыға бағлајан инсанларла үмидсиз инсанлар арасындакы тәзады даһа ајдын ҝөрәҹәксиниз (Әшј. 65:13, 14). Сиз Иса Мәсиһин «гој сизин дә нурунуз инсанларын гаршысында парласын» әмринә әмәл етдијиниз үчүн мәмнунлуг дујаҹаг, инсанлара Јеһованы танытмағын вә әбәди һәјата апаран һәгигәти өјрәтмәјин севинҹини дадаҹагсыныз (Мәт. 5:16; Јәһ. 17:3; 1 Тим. 4:16).

⁹ Һәфтәсону, еләҹә дә һәфтәарасы ев-ев тәблиғ үчүн мүәјјән тәдбирләр ҝөрүлүр. Ҝүндүз вахты инсанлары евдә тапмағын мүшкүл олдуғу әразиләрдә бәзи јығынҹаглар ахшам шаһидлик етмәк үчүн мүәјјән тәдбирләр ҝөрүрләр. Инсанларын, ола билсин, сәһәр јох, ахшам саатларында вахты олур.

ЛАЈИГЛИ АДАМЛАРЫ АХТАРЫН

¹⁰ Иса шаҝирдләринә лајигли адамлары ахтармағы тапшырмышды (Мәт. 10:11). Исанын өзү сәмими инсанлары јалныз ев-ев тәблиғ етмәклә ахтармырды. О, һәр фүрсәтдән истифадә едиб инсанлара тәблиғ едирди (Лука 8:1; Јәһ. 4:7—15). Һәвариләр дә онун кими мүхтәлиф јерләрдә шаһидлик едирди (Һәв. 17:17; 28:16, 23, 30, 31).

¹¹ Бу ҝүн дә мәгсәдимиз әлимиздән ҝәләни едиб Падшаһлыг хәбәрини һамыја чатдырмагдыр. Биз шаҝирд һазырламаг ишиндә Иса Мәсиһдән вә онун һәвариләриндән нүмунә ҝөтүрмәли, һәмчинин зәманәнин дәјишкән вә инсанларын шәраитинин фәргли олдуғуну нәзәрә алмалыјыг (1 Кор. 7:31). Мәсәлән, тәблиғчиләр инсанларын иш јерләриндә онларла сәмәрәли сөһбәт едир. Бир чох өлкәләрдә күчәдә, паркларда, автомобил дајанҹагларында, бир сөзлә, инсанларын олдуғу һәр јердә тәблиғ етмәк ҝөзәл бәһрәләр ҝәтирир. Бәзи јығынҹаглар өз әразиләриндә маса вә стендләр гојуб тәблиғ едирләр. Һәмчинин филиал бир нечә јығынҹагдан олан тәблиғчиләрин көмәји илә бөјүк шәһәрләрдә ҝедиш-ҝәлишин сых олдуғу јерләрдә хүсуси иҹтимаи шаһидлик тәшкил едир. Бунун сајәсиндә хош хәбәр тәблиғчиләрин евдә тапа билмәдији инсанлара чатыр.

¹² Иҹтимаи јерләрдә Мүгәддәс Китабдакы мүждә илә марагланан инсанларла сөһбәт едәндә онлара мүнасиб нәшр тәклиф едә биләрик. Инсанын марағыны артырмаг үчүн она өз әлагә нөмрәнизи сахлаја вә нөвбәти дәфә нә вахт ҝәләҹәјинизи дејә биләрсиниз. Һәмчинин ону jw.org сајтына јөнләндирә, јахуд она ҝөрүшләрин кечирилдији ән јахын ибадәт евинин үнваныны верә биләрсиниз. Беләҹә, ҝөрәҹәксиниз ки, иҹтимаи јерләрдә шаһидлик хидмәти ҝенишләндирмәјин ән ҝөзәл јолларындан биридир.

¹³ Мәсиһиләрә јалныз хош хәбәри тәблиғ етмәк тапшырылмајыб. Әҝәр мараг ҝөстәрән инсанларын һәјата апаран һәгигәти гәбул етмәләрини истәјирсинизсә, онларын јанына тәкрар-тәкрар ҝетмәк лазымдыр. Бунун сајәсиндә онлар јеткин мәсиһи олаҹаглар.

ТӘКРАР СӨҺБӘТ

¹⁴ Иса давамчыларына демишди: «Јерин уҹгарларынадәк мәним шаһидим олаҹагсыныз» (Һәв. 1:8). Бундан әлавә, белә ҝөстәриш дә вермишди: «Ҝедин вә бүтүн халгларын ичиндә шаҝирд һазырлајын,.. сизә әмр етдијим һәр шејә риајәт етмәји онлара өјрәдин» (Мәт. 28:19, 20). Инсанларла тәкрар ҝөрүшүб сөһбәт етмәк Јеһоваја ибадәтдә дујдуғумуз севинҹи артырыр. Хош хәбәрә мараг ҝөстәрән инсанлар, бәлкә дә, сизинлә јенидән ҝөрүшмәјә шад олаҹаглар. Мүгәддәс Китаб һәгигәтләрини бөлүшмәк онларын Аллаһа олан иманыны мөһкәмләндирә вә руһани еһтијаҹларыны дәрк етмәјә көмәк едә биләр (Мәт. 5:3). Јахшы һазырлашмаг вә мүнасиб вахтда инсанын јанына тәкрар ҝетмәк, Мүгәддәс Китаб дәрси башламаға ҝөзәл зәмин јарадыр. Тәкрар ҝөрүшүб сөһбәт етмәкдә мәгсәдимиз мәһз будур. Биз јалныз һәгигәт тохумларыны әкмәмәлијик, һәмчинин әкдијимизи суламалыјыг (1 Кор. 3:6).

¹⁵ Бәзиләринә инсанларла тәкрар сөһбәт етмәк чәтин ҝәлир. Ола билсин, сиз мәһарәтлә гыса тәгдиматлар едирсиниз вә бунунла кифајәтләнирсиниз. Амма нөвбәти дәфә гајыдыб ев сакини илә сөһбәти давам етдирмәк сизә ашылмаз дағ кими ҝөрүнүр. Јахшы һазырлыг әминлијинизи артыраҹаг. Һәфтәарасы ҝөрүшдәки практики мәсләһәтләри тәтбиг един. Һәмчинин даһа тәҹрүбәли тәблиғчи илә әмәкдашлыг един.

МҮГӘДДӘС КИТАБ ДӘРСЛӘРИ

¹⁶ Мүждәчи Филип Аллаһын Кәламыны охујан јәһуди прозелити илә сөһбәт едәркән ондан сорушмушду: «Охудуғуну баша дүшүрсән?» О белә ҹаваб вермишди: «Изаһ едән олмаса, неҹә баша дүшә биләрәм?» «Һәвариләрин ишләри» китабынын 8-ҹи фәслиндә дејилир ки, Филип һәмин адамын Мүгәддәс Јазылардан охудуғу јердән башлајараг «Иса һаггындакы мүждәни она данышды» (Һәв. 8:26—36). Филипин прозелитлә нә гәдәр сөһбәт етдијини дәгиг билмирик, амма о, мүждәни елә изаһ етмишди ки, нәтиҹәдә, һәмин адам имана ҝәлиб вәфтиз олмаг истәди. О, Иса Мәсиһин шаҝирди олду.

¹⁷ Бу ҝүн чохлары Мүгәддәс Китабла таныш дејил. Буна ҝөрә дә инсана иман ашылајыб ону вәфтизә һазырламаг үчүн тәкрар-тәкрар онун јанына ҝәлиб һәфтәләрлә, ајларла, һәтта бир ил вә ја илләрлә Мүгәддәс Китабы арашдырмаг лазым ҝәлә биләр. Сәбир вә мәһәббәт ҝөстәрсәниз, сәмими инсанлара Мәсиһин шаҝирди олмаға көмәк етмәклә зәһмәтинизин бәһрәсини ҝөрәҹәксиниз. Иса демишкән: «Вермәк алмагдан даһа чох хошбәхтлик ҝәтирир» (Һәв. 20:35).

¹⁸ Дәрс кечәндә Мүгәддәс Китабын тәдриси үчүн нәзәрдә тутулмуш вәсаитләрдән истифадә един. Һәфтәарасы ҝөрүшдәки ҝөстәришләрә әмәл етдикҹә вә јығынҹағыныздакы тәҹрүбәли Мүгәддәс Китаб мүәллимләри илә әмәкдашлыг етдикҹә сәмәрәли дәрсләр кечирәҹәк вә инсанлара Иса Мәсиһин шаҝирди олмаға көмәк едәҹәксиниз.

¹⁹ Сизә Мүгәддәс Китаб дәрсләрини башламаг вә кечирмәк чәтиндирсә, нәзарәтчиләрин бириндән вә ја бу саһәдә тәҹрүбәси олан тәблиғчидән көмәк истәјин. «Мәсиһи һәјаты вә ибадәти. Иш дәфтәри»ндәки тәклифләрдән вә ибадәт ҝөрүшләриндәки сәһнәҹикләрдән јарарланын. Јеһоваја ҝүвәнин, бу барәдә Она дуа един (1 Јәһ. 3:22). Ола билсин, сиз артыг аиләниздән кимәсә дәрс кечирсиниз. Анҹаг јахшы оларды ки, башгалары илә дә Мүгәддәс Китаб дәрси кечмәји гаршыныза мәгсәд гојасыныз. Нәтиҹәдә, севинҹиниз бирә-беш артаҹаг.

ИНСАНЛАРЫ ЈЕҺОВАНЫН ТӘШКИЛАТЫНА ЈӨНӘЛДИН

²⁰ Инсанлара Јеһованы танымаға вә Исанын давамчысы олмаға көмәк едәндә онлар јығынҹағын бир парчасы олурлар. Шаҝирдләр бу тәшкилатын Аллаһын тәшкилаты олдуғуну гәбул едиб онунла әмәкдашлыг етсәләр, руһән инкишаф едиб јеткин мәсиһи олаҹаглар. Буну шаҝирдә өјрәтмәк чох ваҹибдир. Мәһз бу мәгсәдлә мүхтәлиф видеоматериаллар вә «Јеһова Аллаһын мүасир халгы» брошүрү һазырланыб. Һәмчинин бу нәшрин 4-ҹү фәслиндәки бәзи мәлуматлар да фајдалы ола биләр.

²¹ Мүгәддәс Китаб дәрсләрини кечдијиниз илк ҝүндән шаҝирдә Јеһованын тәблиғ ишини Өз тәшкилаты васитәсилә јеринә јетирдијини баша салын. Мүгәддәс Китаб дәрсләри үчүн нәзәрдә тутулмуш вәсаитләрин дәјәрини вурғулајын вә бу нәшрләрин өзүнү Аллаһа һәср етмиш көнүллүләр тәрәфиндән неҹә һазырланыб бүтүн дүнјаја јајылдығыны изаһ един. Шаҝирди ибадәт евиндә кечирилән ҝөрүшләрә дәвәт един. Ҝөрүшләрин неҹә кечирилдијини данышын. Ону достларынызла, һәмчинин бөјүк топлантыларда диҝәр баҹы-гардашларла да таныш един. Бу минвалла онлар Јеһованын халгы арасында әсл мәсиһиләрә хас хүсусијјәтин — мәһәббәтин олдуғуну ајдын ҝөрәҹәкләр (Јәһ. 13:35). Онлар тәшкилаты гијмәтләндирдикҹә Јеһоваја даһа јахын олаҹаглар.

НӘШРЛӘРИМИЗДӘН ИСТИФАДӘ ЕДИН

²² Илк мәсиһиләр Аллаһын Сөзүнү һәвәслә јајырдылар. Онлар Мүгәддәс Јазыларын сурәтини көчүрүб шәхсән охујур вә јығынҹагда арашдырырдылар, һәмчинин башгаларына да Аллаһын һәгигәт кәламыны охумағы төвсијә едирдиләр. Әл илә көчүрүлмүш бу нүсхәләр аз олдуғу үчүн чох гијмәтли идиләр (Кол. 4:16; 2 Тим. 2:15; 3:14—17; 4:13; 1 Бут. 1:1). Бу ҝүн Јеһованын Шаһидләри мүасир чап үсулларындан истифадә едәрәк јүз милјонларла Мүгәддәс Китаб вә она әсасланан дәрс вәсаитләри дәрҹ едирләр. Бу нәшрләрә јүзләрлә дилдә буклетләр, брошүрләр, китаблар вә журналлар дахилдир.

²³ Хош хәбәри тәблиғ едәндә Јеһованын тәшкилатынын тәгдим етдији Мүгәддәс Китаба әсасланмыш дәрс вәсаитләриндән истифадә един. Јеһованын Шаһидләринин әдәбијјатларыны шәхсән охујуб-арашдырмағын сизә һансы фајданы ҝәтирдијини ҝөрәндә онлары башгаларына да тәклиф етмәк истәјәҹәксиниз (Ибр. 13:15, 16).

²⁴ Бу ҝүн ҝет-ҝедә даһа чох инсан мәлуматы интернет васитәсилә алмаға үстүнлүк верир. Бу сәбәбдән, хош хәбәри јајмаг үчүн биз јалныз Мүгәддәс Китаба әсасланан әдәбијјатлардан јох, һәмчинин рәсми jw.org сајтымыздан истифадә едирик. Бүтүн дүнјада јашајан инсанлар Мүгәддәс Китабы вә она әсасланан әдәбијјатлары компүтер васитәсилә охуја вә ја динләјә биләрләр. Бизимлә сөһбәт етмәкдән чәкинән вә ја Јеһованын Шаһидләринин аз олдуғу әразиләрдә јашајан инсанлар инанҹларымыз барәдә евдә отуруб сајтымыздан өзләри мәлумат ала биләрләр.

²⁵ Буна ҝөрә дә биз һәр фүрсәтдән истифадә едиб инсанлары рәсми сајтымызла таныш едирик. Ев сакини етигадларымыз һагда суал верәндә елә орадаҹа мобил ҹиһаздан вә ја компүтердән истифадә едәрәк ҹавабы сајтдан ҝөстәрә биләрик. Башга дилдә, һәмчинин жест дилиндә данышан инсанла растлашанда онун диггәтини сајтымыза јөнәлтмәлијик ки, өз дилиндә Мүгәддәс Китабы вә она әсасланан әдәбијјатлары тапа билсин. Бир чох тәблиғчиләр сајтдакы видеолардан истифадә едәрәк инсанларла Мүгәддәс Китаб әсасында сөһбәтә башлајырлар.

ГЕЈРИ-ФОРМАЛ ШАҺИДЛИК

²⁶ Иса ону динләјән шаҝирдләрә демишди: «Сиз дүнјанын нурусунуз... Гој сизин дә нурунуз инсанларын гаршысында парласын ки, онлар јахшы ишләринизи ҝөрүб ҝөјдәки Атанызы мәдһ етсинләр» (Мәт. 5:14—16). Иса өзү һаггында демишди ки, «мән дүнјанын нурујам». Шаҝирдләр ондан нүмунә ҝөтүрмәклә Јеһованын гануну илә јашадыгларыны ҝөстәрирдиләр. Иса ону динләјән инсанлар үчүн һәјат нуру сачырды вә бунунла о, мәсиһиләрә ҝөзәл өрнәк гојуб (Јәһ. 8:12).

²⁷ Һәвари Булус да бизим үчүн нүмунәдир (1 Кор. 4:16; 11:1). Афинада оланда о, һәр ҝүн базар мејданында гаршысына чыхан инсанлара тәблиғ едирди (Һәв. 17:17). Филиппидәки мәсиһиләр ондан нүмунә ҝөтүрүрдүләр. Бу сәбәбдән һәвари Булус бу мәсиһиләр һаггында јазырды ки, онлар «позғун вә әхлагсыз нәслин ичиндә» јашајыр вә онларын арасында «нур кими» парлајырлар (Филип. 2:15). Бу ҝүн дә биз тәблиғ етдијимиз һәр јердә сөзләримизлә вә һәрәкәтләримизлә Падшаһлыг һаггында һәгигәт нурунун парламасына имкан јарада биләрик. Дүздүр, дүрүст вә салеһ олмағымыз өзү-өзлүјүндә башгаларынын диггәтини чәкир вә онлара бу дүнјадакы инсанлардан фәргли олдуғумузу ҝөстәрир. Амма хош хәбәри тәблиғ едәндә онлар бизим нәјә ҝөрә фәргли олдуғумузу баша дүшүрләр.

²⁸ Јеһованын Шаһидләринин әксәријјәти ишдә, мәктәбдә, иҹтимаи нәглијјатда, јахуд ҝүндәлик ишләри илә мәшғул олдуглары һәр јердә гаршыларына чыхан инсанлара хош хәбәри тәблиғ едирләр. Биз һараса јол ҝедәндә јол јолдашларымыза тәблиғ едә биләрик вә ади сөһбәт вахты шаһидлик етмәјә һазыр олмалыјыг. Ҝәлин һәр фүрсәтдән истифадә едиб һәр кәсә шаһидлик верәк.

²⁹ Тәблиғимизлә Јараданымыза шәрәф ҝәтирдијимизи вә Онун адыны уҹалтдығымызы јадда сахласаг, фүрсәти әлдән вермәјиб шаһидлик едәҹәјик. Бундан әлавә, сәмими инсанлара Јеһованы танымаға көмәк едә биләрик. Бунун сајәсиндә онлар Јеһоваја ибадәт едәҹәк вә Иса Мәсиһә имандан доған әбәди јашамаг үмидинә саһиб олаҹаглар. Јеһова чәкдијимиз зәһмәтә јүксәк дәјәр верир вә буна мүгәддәс хидмәт кими бахыр (Ибр. 12:28; Вәһј 7:9, 10).

ТӘБЛИҒ ӘРАЗИСИ

³⁰ Јеһованын ирадәси бундан ибарәтдир ки, хош хәбәр бүтүн дүнјада, һәм шәһәрләрдә, һәм дә уҹгар әразиләрдә тәблиғ олунсун. Бу мәгсәдә чатмаг үчүн филиал јығынҹаглара, һәмчинин уҹгар әразиләрдә хидмәт едән тәблиғчиләрә тәблиғ әразиси тәјин едир (1 Кор. 14:40). Бу, биринҹи әсрдә Аллаһ тәрәфиндән верилән ҝөстәришләрә ујғун олараг едилир (2 Кор. 10:13; Гал. 2:9). Јашадығымыз бу ахырзаманда Падшаһлығын иши даһа ҝениш вүсәт алыб. Әҝәр јығынҹағын әразисиндә тәблиғ фәалијјәти јахшы тәшкил едиләрсә, бу ишдә чох шејә наил олмаг олар.

³¹ Бу иш хидмәт нәзарәтчисинин нәзарәти алтында һәјата кечирилир. Тәблиғчиләрә тәблиғ саһәләрини вермәји јығынҹаг хидмәтчисинә тапшырмаг олар. Ики нөв тәблиғ саһәси вар: груп саһәси вә фәрди саһә. Саһәләри мәһдуд сајда олан јығынҹагларда груп шәклиндә тәблиғ етмәк үчүн груп нәзарәтчиләриндә саһәләр олур. Саһәләрин чох олдуғу јығынҹагларда исә һәр тәблиғчи ајрыҹа саһә ҝөтүрә биләр.

³² Ајрыҹа саһәси олан тәблиғчи тәблиғ ҝөрүшүнүн кечирилмәдији вахтларда вә ҝөрүшүн вахты она әл вермәјәндә истәдији вахт саһәјә ҝедә биләр. Бәзи тәблиғчиләр иш јерләринин јахынлығында саһә ҝөтүрүб наһар фасиләсиндә вә ја ишдән сонра орада тәблиғ едирләр. Аиләләр исә јашадыглары әразидә саһә ҝөтүрүр вә ахшамлар тәблиғ едирләр. Мүнасиб әразидә саһә ҝөтүрмәк тәблиғчијә саһә хидмәтинә даһа чох вахт сәрф етмәјә имкан верир. Тәбии ки, фәрди саһәләри групла хидмәт едәндә дә ишләмәк олар. Фәрди саһәләри саһәләрә ҹавабдеһ гардашдан ҝөтүрә биләрсиниз.

³³ Һәм груп нәзарәтчиси, һәм дә тәблиғчи ҝөтүрдүјү саһәләрдәки бүтүн сакинләрә тәблиғ етмәк үчүн әлиндән ҝәләни етмәлидир. Тәблиғ саһәләринин ишләнмә гајдасы өлкәдәки фәрди мәлуматларын горунма ганунуна мүвафиг олмалыдыр. Саһә ҝөтүрән груп нәзарәтчиси вә тәблиғчи саһәни дөрд ај әрзиндә ишләмәлидир. Саһәни ишләјиб гуртарандан сонра саһәләрә ҹавабдеһ гардаша мәлумат вермәк лазымдыр. Шәраитдән асылы олараг, груп нәзарәтчиси, јахуд тәблиғчи ја саһәни өзүндә сахлајыб јенидән ишләјә, ја да саһәләрә ҹавабдеһ гардаша гајтара биләр.

³⁴ Бүтүн јығынҹаг ҝөстәришә ујғун давранса, саһәни там шәкилдә ишләмәк олар. Ев сакинләрини нараһат етмәмәк үчүн еһтијатлы олмалыјыг ки, бир саһәни ејни вахтда бир нечә тәблиғчи ишләмәсин. Бунунла биз һәм баҹы-гардашларымызы, һәм дә саһәмиздәки инсанлары нәзәрә алдығымызы ҝөстәрмиш оларыг.

ҺӘР ХАЛГА ТӘБЛИҒ

³⁵ Һәр кәс Јеһова Аллаһ, Онун Оғлу вә Падшаһлыг барәдә ешитмәлидир (Вәһј 14:6, 7). Биз һәр дилдә данышан инсана Јеһованын адыны чағырыб хилас олмаға вә мәсиһи хүсусијјәтләринә јијәләнмәјә көмәк етмәк истәјирик (Ром. 10:12, 13; Кол. 3:10, 11). Чохдилли әразиләрдә хош хәбәри тәблиғ едәндә һансы чәтинликләр јарана биләр? Бу чәтинликләрин өһдәсиндән неҹә ҝәлмәк олар? Неҹә етмәк олар ки, мүмкүн гәдәр чох инсан Падшаһлыг хәбәрини даһа јахшы баша дүшдүјү дилдә ешитсин? (Ром. 10:14).

³⁶ Јығынҹағын тәблиғ әразиси јығынҹағын дилинә ујғун олараг тәјин олунур. Буна ҝөрә дә чохдилли әразиләрдә мүхтәлиф јығынҹагларын тәблиғчиләри ејни әразидә хидмәт едирләр. Мүәјјән һалларда јахшы оларды ки, һәр јығынҹағын тәблиғчиләри онларын дилиндә данышан инсанлара тәблиғ етсинләр. Бу гајдаја һәр ил кечирилән хүсуси кампанијалар вахты да әмәл етмәк лазымдыр. Амма иҹтимаи јерләрдә тәблиғ едәндә вә гејри-формал шаһидлик едәндә тәблиғчиләр һәр кәслә даныша вә истәдикләри дилдә әдәбијјат пајлаја биләрләр.

³⁷ Бәзән башга дилдә данышан јығынҹаглар узаг әразиләри мүнтәзәм ишләјә билмирләр. Бу һалда јығынҹагларын хидмәт нәзарәтчиләри бир араја ҝәлиб саһәни ишләмәк үчүн план тәртиб етмәлидирләр. Бунун сајәсиндә һәр кәс Падшаһлыг хәбәрини ешидәҹәк вә тәблиғчиләр әбәс јерә икигат әмәк сәрф етмәјәҹәкләр (Мәс. 15:22).

³⁸ Әҝәр тәблиғ едән заман гапыны башга дилдә данышан инсан ачарса, нә етмәлијик? Архајын олмаг лазым дејил ки, онун дилиндә данышан тәблиғчи она баш чәкәҹәк. Бәзи тәблиғчиләр онларын әразиләриндә ән чох данышылан әҹнәби дилдә садә тәгдимат өјрәнирләр. Биз башга дилдә данышан инсанлара сајтымыздан өз ана дилиндә әдәбијјатларымызы неҹә охумағы вә јүкләмәји ҝөстәрә, јахуд һәмин дилдә әдәбијјат ҝәтирмәји тәклиф едә биләрик.

³⁹ Кимсә сәмими мараг ҝөстәрәрсә, биз онун баша дүшдүјү дилдә даныша билән тәблиғчи тапмалыјыг. Һәмчинин һәмин инсана јахынлыгда онун ана дилиндә кечирилән јығынҹағын јерини демәк лазымдыр. Әҝәр о, онун дилиндә данышан тәблиғчи илә әлагә јаратмаг истәјирсә, сајтымыз васитәсилә әлагә мәлуматларыны неҹә ҝөндәрмәји ҝөстәрә биләрик. Филиал исә, өз нөвбәсиндә, она јахын әразидәки тәблиғчијә, група вә ја јығынҹаға она көмәк етмәји тапшыраҹаг.

⁴⁰ Инсан өз дилиндә данышан тәблиғчи илә әлагә сахлајана кими онун јанына ҝетмәк лазымдыр. Бәзән филиал ағсаггаллара мәлумат верә биләр ки, о әразидә һәмин инсанын дилиндә данышан тәблиғчи јашамыр. Белә олан һалда, ев сакининин марағыны артырмаг үчүн әлимиздән ҝәләни етмәлијик. Мүмкүндүрсә, онун дилиндә олан әдәбијјатын көмәји илә Мүгәддәс Китаб дәрси кечин. Әҝәр шәкилләрдән мәһарәтлә истифадә етсәниз вә ситат ҝәтирилән ајәләри она охутсаныз, о, Мүгәддәс Китабын бәзи әсас тәлимләрини мәнимсәјәҹәк. Онун аилә үзвләриндән бири һәм өз дилини, һәм јерли дили кифајәт гәдәр билирсә, тәрҹүмәчи кими сизә көмәк едә биләр.

⁴¹ Мараг ҝөстәрән инсаны Јеһованын тәшкилатына јөнәлтмәк үчүн, һәтта програмы там баша дүшмәсә дә, ону ибадәт ҝөрүшүнә дәвәт етмәк лазымдыр. Ајәләр охунанда, варыдырса, она өз дилиндәки Мүгәддәс Китабдан һәмин ајәни тапмаға көмәк един. Јығынҹагдакыларла үнсијјәт өзү-өзлүјүндә она мүсбәт тәсир едәҹәк вә руһани инкишафына көмәк едәҹәк.

⁴² Натамам груплар. Натамам груп дедикдә јығынҹағын дилиндән фәргли дилдә тәблиғ едән бир нечә тәблиғчинин олдуғу груп нәзәрдә тутулур. Бу групда һәмин дилдә һәфтәлик ҝөрүшләри апармаг үчүн јарарлы ағсаггал вә ја јығынҹаг хидмәтчиси олмаја да биләр. Әҝәр ашағыдакы тәләбләрә ҹаваб верилирсә, филиал бир јығынҹағы натамам група мәсул сечә биләр:

1. 1) Һәмин әразидә јығынҹағын данышдығы дилдән фәргли дилдә данышан кифајәт гәдәр әһали јашајыр.

2. 2) Һәмин дилдә данышан вә ја бу дили өјрәнмәк истәјән ән азы бир нечә тәблиғчи вар.

3. 3) Ағсаггаллар шурасы һәмин дилдә тәблиғ ишини тәшкил етмәјә һазырдыр.

Әҝәр ағсаггаллар шурасы натамам група мәсул олмаг истәјирсә, рајон нәзарәтчиси илә мәсләһәтләшмәлидир. Ола билсин, рајон нәзарәтчиси бу дилдә данышан инсанлара башга јығынҹагларын тәблиғ етдијини билир вә һансы јығынҹағын натамам група мәсул олмасынын даһа мүнасиб олдуғуну мүәјјән етмәк үчүн дәјәрли мәлумат верә биләр. Мәсул јығынҹаг мүәјјән олунандан сонра һәмин јығынҹағын ағсаггаллары натамам група мәсул јығынҹаг кими рәсми тәсдиг олунмаг үчүн филиала мәктубла мүраҹиәт едә биләр.

⁴³ Груплар. Әҝәр ашағыдакы тәләбләрә ҹаваб верилирсә, филиал бир јығынҹағы група мәсул сечә биләр:

1. 1) Һәгигәтә кифајәт гәдәр мараг ҝөстәрилир вә бу саһәнин потенсиал инкишафы вар.

2. 2) Һәмин дилдә данышан вә ја бу дили өјрәнмәк истәјән ән азы бир груп тәблиғчи вар.

3. 3) Һәмин дилдә ән азы һәфтәнин бир ҝөрүшүнү, јахуд ҝөрүшүн мүәјјән һиссәсини, мәсәлән, ачыг мәрузә вә ја «Ҝөзәтчи гүлләси» мүзакирәсини кечирә билән мүнасиб ағсаггал вә ја јығынҹаг хидмәтчиси вар.

Әҝәр бу тәләбләрә гәнаәтбәхш ҹаваб верилирсә, ағсаггаллар шурасы јығынҹағын нәздиндә групун јарадылмасынын рәсми тәсдиг олунмасы үчүн филиал тәфәррүатлы мәктубла мүраҹиәт етмәлидир. Бу група мәсул олан ағсаггал вә ја јығынҹаг хидмәтчиси һәмин групун мүвафиг олараг, груп нәзарәтчиси, јахуд груп хидмәтчиси һесаб едиләҹәк.

⁴⁴ Груп јарадыланда мәсул јығынҹағын ағсаггаллар шурасы ибадәт ҝөрүшләринин диҝәр һиссәләринин кечирилмәсинә еһтијаҹ олуб-олмадығына вә бунун ај әрзиндә нечә дәфә олаҹағына гәрар верә биләр. Груп үчүн тәблиғ ҝөрүшләри дә тәшкил етмәк олар. Групдакылар аид олдуглары јығынҹағын ағсаггаллар шурасынын нәзарәти алтында фәалијјәт ҝөстәрмәлидирләр. Ағсаггаллар таразлы ҝөстәришләр вермәли вә групун гејдинә галмалыдырлар. Рајон нәзарәтчиси групун аид олдуғу јығынҹағы зијарәт етдији һәфтә групла әмәкдашлыг едиб онун наилијјәтләри вә хүсуси еһтијаҹлары барәдә филиала гыса һесабат ҝөндәрәҹәк. Мүәјјән мүддәтдән сонра груп јығынҹаг кими фәалијјәт ҝөстәрә биләр. Әҝәр групда олан һәр кәс теократик ҝөстәришә әмәл етсә, Јеһова бу иши аванд едәҹәк (1 Кор. 1:10; 3:5, 6).

ГРУПЛА ТӘБЛИҒ

⁴⁵ Өзүнү Аллаһа һәср етмиш мәсиһиләр инсанларла хош хәбәри бөлүшмәк мәсулијјәти дашыјырлар. Буну етмәјин мүхтәлиф јоллары олса да, әксәр мәсиһиләр бир-бириләри илә әмәкдашлыг едәрәк ев-ев тәблиғ етмәји даһа чох хошлајырлар (Лука 10:1). Буна ҝөрә дә, јығынҹаглар һәм һәфтәсону, һәм дә һәфтәичи тәблиғ ҝөрүшләри кечирирләр. Бајрам ҝүнләри групла тәблиғ етмәк үчүн әлверишлидир, чүнки баҹы-гардашлар һәмин ҝүнләр ишләмирләр. Јығынҹағын хидмәт комитәси мүнасиб вахтда вә јердә, ҝүнорта вә ахшам саатларында тәблиғ ҝөрүшләри тәшкил едир.

⁴⁶ Групла тәблиғ тәблиғчиләрә әмәкдашлыг етмәк вә бир-бириләрини руһландырмаг имканы верир (Ром. 1:12). Јени тәблиғчиләр баҹарыглы вә тәҹрүбәли баҹы-гардашларла әмәкдашлыг едиб тәҹрүбә топлаја биләрләр. Бәзи әразиләрдә тәһлүкәсизлик мәгсәдилә ики вә даһа чох тәблиғчинин бирликдә тәблиғ етмәси мәсләһәтдир. Саһәни тәкбашына ишләмәји планлашдырсаныз да, групла ҝөрүшдә иштирак етмәк јахшы оларды, чүнки бу ҝөрүш һамыны руһландырмаг үчүн нәзәрдә тутулуб. Биләндә ки, ејни әразидә сизинлә бәрабәр башгалары да тәблиғ едир, даһа ҹәсарәтли олаҹагсыныз. Өнҹүлләр вә диҝәр тәблиғчиләр јығынҹағын бүтүн тәблиғ ҝөрүшләриндә (хүсусилә дә һәр ҝүн кечирилирсә) иштирак етмәјә мәҹбур дејилләр. Лакин һәфтәлик тәблиғ ҝөрүшләринин бир нечәсиндә иштирак етмәк јахшы оларды.

⁴⁷ Ҝәлин һамымыз Исанын вә һәвариләрин гојдуғу нүмунәни изләјәк! Бу ваҹиб ишдә, Падшаһлыг һаггында хош хәбәрин тәблиғиндә бүтүн ҝүҹүмүзү сәфәрбәр етсәк, әмин ола биләрик ки, Јеһова бизә мүкафат верәҹәк (Лука 9:57—62).