Ҝәләҹәји ким ҝөрә биләр?
«Аллаһ Мәнәм... Ахыры әввәлдән, баш вермәмиш һадисәләри әзәлдән билдирән... Мәнәм» (Јешаја 46:9, 10).
БУ ГЕЈРИ-САБИТ вахтда сијаси, игтисади вә сосиал аналитикләр ҝәләҹәкдә нә олаҹағыны демәк үчүн тарихи вә мүасир ҹәрәјанлары өјрәнирләр. Башгалары исә, шәхсән онлары нә ҝөзләдијиндән нараһат олараг астролоҝијаја вә спиритизмә үз тутурлар. Анҹаг алдыглары ҹаваб чох вахт бу инсанлары мәјус едир. Дүнјаны, аиләмизи вә шәхсән бизи нә ҝөзләдијини өјрәнмәк һеч ҹүр мүмкүн дејилми? Үмумијјәтлә, ҝәләҹәкдән ким исә хәбәр верә биләрми?
Күлли-Ихтијар Аллаһ Јеһова Јешаја пејғәмбәрә дедији, јухарыда ситат ҝәтирилән сөзләрдә Өзүнүн ҝәләҹәкдән хәбәр вермәк баҹарығындан данышыр. Јешаја васитәсилә Аллаһ габагҹадан демишди ки, гәдим исраиллиләр Бабил көләлијиндән азад едиләҹәк, Јерусәлими вә мәбәди бәрпа етмәк үчүн ҝери гајыдаҹаглар. Бу пејғәмбәрлик нә дәрәҹәдә мүфәссәл дејилмишди? Тәхминән 200 ил габагҹадан Јешаја Бабили фәтһ едәҹәк адамын адынын Кир олаҹағыны дәгигликлә демишди. Бундан әлавә, Јешаја Кирин стратеҝијасыны — шәһәрин мүһафизәси үчүн хүсуси әһәмијјәт кәсб едән Фәрат чајынын сәмтини дәјишдирәҹәјини дәгиг тәсвир етмишди. О, һәтта хәбәр вермишди ки, шәһәр диварларынын нәһәнҝ икитајлы дарвазасы еһтијатсызлыг уҹбатындан ачыг галдығындан Кир асанлыгла гәләбә газанаҹаг (Јешаја 44:24–45:7).
Аллаһдан фәргли олараг, инсан ҝәләҹәји ҝөрмәјә гадир дејил. Мүдрик падшаһ Сүлејман демишди: «Сабаһкы ҝүнүнлә өјүнмә, ҝүнүн нә доғаҹағыны билмәзсән» (Сүлејманын мәсәлләри 27:1). Онун мүшаһидәләри һәлә дә өзүнү доғрулдур. Һеч бир инсан һәтта өз ҝәләҹәјини дә габагҹадан дејә билмәз. Бәс нәјә ҝөрә буну Аллаһ һаггында демәк олмаз? О, јаратдығы һәр шеји, еләҹә дә инсан тәбиәтини вә мејлләрини там баша дүшүр. Аллаһ истәјәндә ајры-ајры адамларын вә бүтөв халгларын неҹә һәрәкәт едәҹәкләрини дәгигликлә ҝөрә билир. Бундан әлавә, Онун һадисәләрин нәтиҹәләрини истәдији сәмтә јөнәлтмәк баҹарығы гејри-мәһдуддур. О Өз пејғәмбәрләри васитәсилә нәјинсә баш верәҹәјини хәбәр верәндә «гулунун сөзләрини иҹра едән, елчиләринин сөзләрини ҝерчәк едән» Шәхс олур (Јешаја 44:26). Бу сөзләри өзү һагда јалныз Јеһова Аллаһ дејә биләр.
Јешаја Иса Мәсиһдән тәхминән 700 ил әввәл јашаса да, Мәсиһин ҝәлмәси һагда пејғәмбәрлик етмишдир. Лакин әсас етибарилә 18-ҹи әсрдән башлајараг Мүгәддәс Китаб тәнгидчиләри «Јешаја» китабынын доғрулуғуну шүбһә алтына алмышлар. Онлар иддиа едирләр ки, Јешајанын јаздыглары әслиндә пејғәмбәрлик дејил, онлар һадисәләр баш верәндән сонра јазылыб, сонралар јашајан бир нәфәр садәҹә оланлары гәләмә алыб. Бу доғрудурму? 1947-ҹи илдә Өлү дәниз јахынлығындакы мағарада башга гәдим тумарларла бирликдә «Јешаја» китабынын әлјазмасы да тапылмышдыр. Алимләр мүәјјән едибләр ки, бу нүсхә, һаггында пејғәмбәрлик едилмиш Мәсиһин доғулмасындан јүз илдән чох әввәл јазылмышдыр. Бәли, Мүгәддәс Китаб ҝәләҹәкдән хәбәр верир!
Јешаја вә Мүгәддәс Китабын башга јазычылары јалныз өз анлајышларына әсасланараг ҝәләҹәк һадисәләри сөјләјә билмәздиләр. Әксинә, онлар ‘Мүгәддәс Руһ тәрәфиндән һәрәкәтә ҝәтириләрәк, Аллаһдан ҝәлән шејләри сөјләјирдиләр’ (2 Петер 1:21, И–93). Нөвбәти мәгаләләрдә Исанын һәјаты һаггында Јешаја васитәсилә габагҹадан дејилмиш бәзи тәфсилатлар мүзакирә олунаҹаг. Сонра исә Иса Мәсиһин вә онун шаҝирдләринин бизим ҝүнләримиз вә ҝәләҹәк үчүн сөјләдији пејғәмбәрликләри нәзәрдән кечирәҹәјик.