Ушагларынызы өјрәдин

Сам һәр ики дүнјанын пислијини ҝөрдү

НУҺУН оғлу Сам һәм әввәлки дүнјанын сонуну, һәм дә сонракы дүнјанын башланғыҹыны ҝөрдү. Сән билирсән, Самын јашадығы әввәлки дүнја нәјә ҝөрә мәһв едилди вә неҹә олду ки, о, бүтүн аиләси илә бирликдә сонракы дүнјаја сағ кечди? ~a Ҝәл бу һагда сәнә данышым.

Мүгәддәс Китабда дејилир ки, Сам ҹаван оланда «инсанларын шәр әмәлләри» чохалмышды. Онларын дүшүнҹәләри ‘һәр заман пислијә доғру иди’. Билирсән, Аллаһ буна ҝөрә нә етди? ~ О, һәмин пис дүнјаны мәһв етмәк үчүн дашгын ҝөндәрди. Һәвари Петер јазмышды: «О заманкы дүнја да һәмин суларла [дашгында] боғулуб мәһв олду» (Јарадылыш 6:5; 2 Петер 3:6).

Билдин, Аллаһ һәмин дүнјаны нәјә ҝөрә мәһв етди? ~ Инсанлар писләшмишдиләр вә ‘һәр заман пислик’ һаггында дүшүнүрдүләр. Иса да бу һагда сөз ачыб демишди ки, «туфандан әввәлки ҝүнләрдә» инсанлар вахтларыны јахшы кечирирдиләр, «јејиб, ичиб», «евләниб, әрә ҝедирдиләр». Иса һәм дә демишди ки, онлар ‘туфан ҝәлиб һамысыны апарынҹаја гәдәр бихәбәр идиләр [‘фикир вермирдиләр’, ЈД]’ (Матта 24:37—39).

Бәс бу инсанлар нәјә фикир вермирдиләр? ~ Самын атасы Нуһ «салеһлик тәблиғчиси» иди, амма инсанлар онун дедикләринә гулаг асмырдылар. Нуһ Аллаһа гулаг асараг, ону вә аиләсини Дашгындан сағ чыхараҹаг ҝәми тикди. Тәкҹә Нуһ, арвады, үч оғлу — Сам, Һам, Јафәс вә арвадлары Аллаһын онлардан нә тәләб етдијинә фикир вердиләр. Јалныз онлардан тәләб олунан шејләри етдикләри үчүн Дашгындан сағ чыхдылар (2 Петер 2:5; 1 Петер 3:20 ).

Дашгын башлајандан тәхминән бир ил сонра Сам вә аиләси ҝәмидән гуру торпаға чыха билдиләр. Бүтүн пис инсанлар мәһв олду, амма тезликлә јенә дә пислик баш галдырды. Самын гардашы оғлу Кәнан елә пис иш тутду ки, Нуһ дилә ҝәлиб деди: «Кәнана ләнәт олсун». Һамын нәвәси Нәмруд да пис адам иди. О, һәгиги Аллаһ Јеһованын сөзүндән чыхараг, өз адыны уҹалтмаг үчүн халга деди ки, Бабил адланан һүндүр бир гүллә тиксинләр. Сәнҹә, Сам вә онун атасы буна неҹә јанашдылар? ~ (Јарадылыш 9:25; 10:6—10; 11:4, 5).

Һәм онлар, һәм дә Јеһова буна ҝөрә кәдәрләнди. Һеч билирсән, Јеһова нә етди? ~ О, инсанларын дилини гарышдырды ки, онлар бир-бирини баша дүшә билмәсинләр. Сонра инсанлар тикинтини дајандырдылар вә һәрә онунла ејни дилдә данышанларла бирләшиб башга-башга јерләрә дағылдылар (Јарадылыш 11:6—9). Анҹаг Аллаһ Сам вә аиләсинин дилини дәјишмәди. Буна ҝөрә дә онлар бирликдә галыб, бир-биринә Јеһоваја ибадәт етмәјә көмәк етдиләр. Һеч билирсән, Сам нечә ил Јеһоваја ибадәт едиб? ~

Сам дүз 600 ил јашајыб. О, Дашгындан әввәл 98 ил, ондан сонра исә 502 ил јашајыб. Биз әмин ола биләрик ки, о, ҝәмини тикмәкдә вә Дашгынын олаҹағы һагда инсанлары хәбәрдар етмәкдә Нуһа көмәк едиб. Неҹә фикирләширсән, бәс Дашгындан сонра јашадығы 502 ил әрзиндә Сам нә ишлә мәшғул иди? ~ Нуһ Јеһованы «Самын Аллаһы» адландырмышды. Чох еһтимал ки, Сам Јеһоваја ибадәт етмәјә давам едир вә аиләсинә дә бу ишдә көмәк едирди. Сонралар Самын нәслиндән Ибраһим, Сара вә Исһаг кими инсанлар чыхды (Јарадылыш 9:26; 11:10—31; 21:1—3).

Самын ҝүнләриндән бәри дүнја даһа да писләшиб. Бәс бу дүнјанын ахыры неҹә олаҹаг? ~ Мүгәддәс Китабда дејилир ки, бу ‘дүнја кечиб ҝедәҹәк’. Амма белә бир вәд дә верилир: ‘Аллаһын ирадәсини јеринә јетирән әбәди јашајаҹаг’. Буна ҝөрә дә әҝәр биз Аллаһын ирадәсини јеринә јетирсәк, хилас оланларын арасында олуб, Аллаһын јени дүнјасына кечә биләҹәјик. Сонра Аллаһын көмәји илә јер үзүндә әбәди вә хошбәхт јашајаҹағыг (1 Јәһја 2:17; Мәзмур 37:29; Јешаја 65:17).

[Һашијә]

Суаллар:

○ Сам әввәл неҹә дүнјада јашајырды вә һансы ики сәбәбә ҝөрә Аллаһ о дүнјаны мәһв етди?

○ Сам нечә ил јашајыб вә неҹә инсан олуб?

○ Тезликлә бу дүнја илә нә баш верәҹәк?

○ Бу дүнјанын сонундан сағ чыхмаг үчүн биз нә етмәлијик?