Охуҹуларымыз сорушур...
Нә үчүн Аллаһ инсанлара әбәди һәјат вермәји вәд едир?
▪ Мүгәддәс Китабда дејилир ки, Аллаһ бизә ‘әбәди һәјат’ вәд едир (Јәһја 6:40). Бәс инсанлара бу ҹүр имканы вермәјә Ону нә тәшвиг едир? О, буну садәҹә әдаләт наминәми едир?
Әдаләт инсанларла дүзҝүн вә лајиг олдуглары тәрздә давранмағы тәләб едир. Бәс демәк олармы ки, биз әбәди һәјата лајигик? Хејр. Мүгәддәс Китаб дејир: «Јер үзүндә елә салеһ адам јохдур ки, јалныз јахшылыг едиб һеч бир ҝүнаһ етмәсин» (Ваиз 7:20). Ҝүнаһа ҝөрә ҹәза верилир. Аллаһ илк инсан Адәми хәбәрдар етмишди ки, о ҝүнаһ ишләтдији ҝүн мүтләг өләҹәк (Јарадылыш 2:17). Сонралар һәвари Павел Аллаһдан илһам алараг јазмышдыр: ‘Ҝүнаһын әвәзи өлүмдүр’ (Ромалылара 6:23). Буна ҝөрә дә әҝәр Адәмин бүтүн өвладлары һаглы олараг өлүмә лајигдирләрсә, бәс онда нә үчүн Аллаһ онлара әбәди јашамаг имканы верир?
Әбәди һәјат бизә «мүфтә» тәклиф олунур. Бу, Аллаһын мәһәббәтинин вә мәрһәмәтинин нә гәдәр бөјүк вә зәнҝин олдуғунун ҝөстәриҹисидир. Мүгәддәс Китабда дејилир: «Һамы ҝүнаһ ишләтмиш вә Аллаһын иззәтиндән мәһрум галмышдыр. Онлар Онун лүтфү илә, Иса Мәсиһин вердији ниҹатла бәраәти мүфтә алдылар» (Ромалылара 3:23, 24).
Бүтүн инсанларын өлүмә лајиг олмасына бахмајараг, Аллаһын фикри вар ки, Ону севәнләрә әбәди һәјат версин. Бәс буна әдаләтсизлик демәк олармы? Мүгәддәс Китабда дејилир: «Инди нә дејәк? Мәҝәр Аллаһын јанында һагсызлыгмы вар? Әсла! Чүнки О, Мусаја дејир: “Кимә мәрһәмәт едирәмсә, едәҹәјәм; кимә рәһм едирәмсә, едәҹәјәм”... Бәс сән, еј инсан, кимсән ки, Аллаһ илә мүбаһисәјә ҝириширсән?» (Ромалылара 9:14—20).
Дүнјанын бәзи јерләриндә дөвләтин сәлаһијјәтли мәмурунун вә ја һакимин ағыр ҹәзаја лајиг олан ҹинајәткары әфв етмәјә һүгугу чатыр. Әҝәр ҹинајәткар һакимин тәләбини ҹанла-башла јеринә јетирәрсә, һәрәкәт вә давранышы илә дәјишилдијини ҝөстәрәрсә, һаким јахуд президент онун ҹәза мүддәтини азалда ја да тамамилә әфв едә биләр. Бу һәрәкәт мәрһәмәтин тәзаһүрүдүр.
Ејнилә, Јеһова бүтүн ҝүнаһкарлары лајиг олдуглары һөкмлә ҹәзаландырмамаг гәрарына ҝәлә биләр. Бунун әвәзинә, мәһәббәтдән ирәли ҝәләрәк, Аллаһ Ону севәнләрә вә әмрләринә ујғун јашајанлара әбәди һәјаты бәхш едә биләр. Мүгәддәс Китабда дејилир: «Аллаһ инсанларын кимлијинә бахмаз. Амма һәр халгдан олуб, Ондан горхан вә һагг иш ҝөрән Она мәгбулдур» (Һәвариләрин ишләри 10:34, 35).
Јеһованын бизә мәһәббәтинин ән бөјүк тәзаһүрү Оғлуну бизим уғрумузда әзаб чәкәрәк өлмәјә ҝөндәрмәсидир. Иса Атасы һагда демишди: «Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун» (Јәһја 3:16).
Јеһованы севмәјә вә Онун ирадәсини јеринә јетирмәјә ҹан атанларын һамысы, кечмишдә ким олмаларындан асылы олмајараг, Аллаһ тәрәфиндән ејни дәрәҹәдә бәјәнилир. Беләликлә, әбәди һәјат үмиди илк нөвбәдә Аллаһын мәрһәмәтинин вә бөјүк мәһәббәтинин сүбутудур.
[15-ҹи сәһифәдәки шәкил]
Бу, илк нөвбәдә, Аллаһын мәрһәмәтинин вә бөјүк мәһәббәтинин сүбутудур